Dahaka Dainai Taunimanima Na Asie Hematauraimu?
DAHAKA DAINAI HEMATAURAI KARANA NA MAI ANINA BADA?
Hemataurai karana ese hekwakwanai momo e laodia ahumu.
-
Baibul na e gwa: “Haere manauna ese badu e laoa ahumu, a gwau turiariki ese badu e havaraiamu.” (Hereva Lada-isidia 15:1) Bema ta gwauraimu herevadia bona ta karamu karadia na dia hemataurai dalanai, hepapahuahu na be varamu.
-
Iesu na e gwa: “Lalona e honu honu daemu ḡaudia amo uduna e herevamu.” (Mataio 12:34) Bema eda hereva na dia hemataurai dalanai ta gwauraimu, una ese kopi, iduhu, tano, bona noho daladia idauidau taudia ta lalodiamu dalana be hahedinaraiamu.
Vanegai hetahu ḡaukarana ta amo tano 28 ai, taunimanima 32,000 mai kahana amo 65 percent na e gwa, guna taunimanima ese hemataurai karana e hahedinaraiava, to hari una kara na se hahedinaraiamu.
BA KARA DIBA ḠAUDIA
Sikuli o ḡaukara gabunai taunimanima iboudiai na baita matauraidia, herevana edia lalohadai na i’idau. O abi daemu ḡaudia na ba gwaurai hedinarai. Una ese be durumumu haida basio lalodia kereremu, bona basio hahemaoro henidiamu.
O uramu bae kara henimui heḡereḡerena ai haida ba kara henidia. Bema bo manaumu bona haida ihereadia lalohadaina basio abiamu, idia ese danu unu be kara henimu tomamu.
Dika ba gwautao. Basio laloa haida na mai edia ura ida oi e hahisimumu.
IEHOVA ENA WITNES TAUDIA ESE HEMATAURAI BE EDE E HAHEDINARAIA TOMAMU?
Iehova ena Witnes taudia na edia noho bona ḡaukara gabudiai ma haida na e matauraidiamu.
Ai ese Baibul ena hahediba herevadia na taunimanima iboudiai ediai a herevalaiamu asi davana, to asia doridiamu ai ese a abi daemu ḡaudia bae badina. Danu, ai na Baibul ena sisiba a badinaiamu bona “mai manau bona mai hematauraimai ida” taunimanima a haroro henidiamu.—1 Petro 3:15; 2 Timoteo 2:24.
Heinai-heheni karadia a dadaraimu, noho daladia idauidau bona e uramu Baibul ena hereva bae abia dae taudia na emai kongrigeisin heboudia ai a abidia daemu. Ena be edia kara na ede bamona to ‘taunimanima iboudiai a matauraidiamu.’—1 Petro 2:17.
Emai noho gabudia ai gavamani ena taravatu na a matauraiamu. (Roma 13:1) Taravatu heḡereḡerena ai tax monidia a henimu. Ena be politikol karadia ai asia vareaimu, to haida edia maoro bona edia abi hidi politikol karadia ai na a matauraimu.
