Dahaka Dainai Taunimanima Na Mauri Asie Matauraiamu?

PLAY

DAHAKA DAINAI MAURI IMATAURAINA NA MAI ANINA BADA?

Bema bo karamu ḡaudia ese emu mauri bona haida edia mauri na be hadikaiamu, una ese be hahedinaraiamu oi ese mauri na so laloa badamu.

Siga ani karana ese cancer gorerena be havaraiamu bona tauani danu be hamanokaiamu. Lung-cancer gorerena amo e mase taudia momo na siga e animu taudia, bona siga se animu to ma ta ena siga kwalahuna e hahodiamu taudia danu.
Laḡani ta ta ai momo e hamasedia kavamu karana ese lalohisihisi bada herea e havaraiamu. Stanford University edia ripot ta ai e gwa: “Hetahu amo e davaria, taunimanima e hamasedia kavamu karana amo e heau maurimu taudia momo na asi berodia to e vara ḡauna dainai laḡani momo lalodiai e lalohisihisimu.”
Motuka e heaumu lalonai e inuinumu o drug e animu karana ese ma haida baine hahekwakwanaidia diba. Bema taunimanima ese edia kara amo e hahedinaraiamu mauri na asie laloa badamu, una ese asi edia kerere taudia danu e hahisidiamu.

BA KARA DIBA ḠAUDIA

Emu helt ba naria. Tauanimu e hadikaiamu ḡaudia heḡereḡere, siga ani karana, kekero, eiava drag ani karana ba hadokoa. Kara unu bamodia ese emu mauri be hadikaiamu bona be hahedinaraiamu ma haida edia mauri bona emu ruma bese edia danu so matauraidiamu.

‘Tau-anina . . . ihadikana karadia iboudiai baita huri oho.’—2 Korinto 7:1.

Seifti ba laloa bada. Emu ruma na ba karaia namonamo, unu amo hekwakwanai na basie vara. Ba taritari namonamo bona emu motuka ḡaudia ba hanamo. Dia namo haida ese bae dorimu bena hekwakwanai eiava mase bae havara diba karadia ai ba vareai.

“Ruma matamatana ba haginia negana ai, guhi isena ai helaoahu ḡauna ba karaia, emu ruma guhina amo tau ta baine moru dobi bena rarana na emu ruma latanai baine mia na garina.”—Deuteronomi 22:8. a

Haida ba kara namo henidia. Mauri ta matauraiamu anina na taunimanima iboudiai baita kara namo henidia, herevana edia bese, tano, bona noho daladia na i’idau. Heiriheiri bona heinai heheni dainai, daḡedaḡe bona tuari e varamu.

“Heiri-heiri, daḡedaḡe, badu, heloḡo-heloḡo, hereva mirodia, hahebade, iboudiai ba nege daure. Ba hekaha heheni; ba hebogahisi heheni.” —Efeso 4:31, 32.

IEHOVA ENA WITNES TAUDIA ESE MAURI IMATAURAINA KARANA BE EDE E HAHEDINARAIA TOMAMU?

Iehova ena Witnes na ma haida e hamaorodiamu mauri dala namona bae badinaia. Emai Baibul stadi program ese taunimanima be durudiamu tauanina ihadikana ḡaudia imanadalaidia karana bae dadaraia totona.

Emai konstraksen projekdia ai seifti taravatudia na a badinamu. Emai hebou gabudia bona baia ḡaukaralai bildin ma haida ihaginidia ai e hedurumu taudia na treinin e abi unu amo bero basie davari. Emai bildin na e sekedia louloumu unu amo una gabu ena seifti taravatudia na e badinamu.

Disasta e davarimu taudia a durudiamu. Laḡani 2022 ai, tanobada heḡeḡemadai ai disasta 200 bamona e vara, bona ai ese kahirakahira moni 12 milion dollars na unu disasta e davari taudia idurudia totona a heni.

Ebola gorerena na West Africa (2014) bona Democratic Republic of Congo (2018) ai e kau neganai, ai ese una gorere basie abia bona ma haida basie henidia hanai daladia na taunimanima a hadibalaidia. Danu, taunimanima haida a siaidia grup ta ta ai ina topik “Obedience Saves Lives” bae herevalaia. Emai hebou gabudia raka vareaidia ai ima huri ḡaudia a ato, taunimanima a hamaorodiava imadia bae huri bona una gorere basie abia totona hahekau herevadia bae badina.

Sierra Leone ai, radio announcement ta ai Iehova ena Witnes taudia e hanamodia badina idia ese edia hanua lalonai Witnes taudia bona dia Witnes taudia e durudiava Ebola gorerena basie abia totona.

Laḡani 2014 lalonai Liberia ai Ebola gorerena e kau neganai una na Kingdom Hall ai idia imadia e huriva gabuna.

a Idaunegai Middle East ai, una haheḡani e badinaiava taudia ese edia famili bona ma haida edia seifti na e lalo badava.

BA NOGA!