Dahaka Dainai Taunimanima Na Sibodia Se Hematauraimu?
DAHAKA DAINAI SIBOMU EMU AI HEMATAURAI KARANA BA HAHEDINARAIA NA MAI ANINA BADA?
Sibodia ediai hemataurai karana e hahedinaraiamu taudia ese mauri ai e varamu ḡaudia na mai lalogoadadia ida e hahanaidiamu. Idia na se hesiku haraḡamu.
-
Hetahu ḡaukarana ta amo e davaria, sibodia ediai hemataurai karana asie hahedinaraiamu taudia na e lalohekwarahimu, e lalohisihisimu, bona se aniani namonamomu. Bona idia na e inuinu momomu bona drag e ḡaukaralai kereremu.
-
Sibodia ediai hemataurai karana e hahedinaraiamu taudia na haida ida asie haheḡereḡeremu, una dainai ma haida ida e hebamo namonamomu. To sibodia se hematauraimu taudia ese haida na se lalodia badamu, una dainai ma haida ida edia hetura karana na se goadamu.
-
Ena be hekwakwanai e davarimu, to sibodia ediai hemataurai karana e hahedinaraiamu taudia na e ginigoadamu bona e ḡaukara goadamu e uramu bae kara ḡaudia e haḡuḡurudiamu. Sibodia se hematauraimu taudia ese hekwakwanai maraḡidia na ḡau badadia ai be halaomu. Una dainai nega momo be hesikumu.
BA KARA DIBA ḠAUDIA
Bae hagoadamu tura namodia bavabi hidi. E hematauraimu taudia, emu namo e lalo badamu taudia, bona oi bae durumu diba taudia ba bamodia.
Ma haida ba durudia. Bema oi na ma haida bo kara namo henidiamu—emu kara asie laloa badamu taudia ediai danu—hariharibada karana amo e varamu moalena bo mamiamu. Bona bo moalemu ena be haida ese emu kara namodia na se itamu.
Natumu ba durudia sibodia bae hemataurai. Una ba karaia dalana ta na, natumui ba durudia sibodia edia goada heḡereḡerena ai edia hekwakwanai bae hamaoromaorodia. Una ese natumui be durudiamu sibodia ese hekwakwanai ihahanaidia daladia be dibamu. Unu be kara tomamu neganai, hari bona be badamu neganai danu sibodia be hematauraimu.
A KARAMU ḠAUDIA
Iehova ena Witnes taudia edia hebou bona Baibul stadi program ese taunimanima e durudiamu edia mauri bae hanamoa bona sibodia bae hemataurai.
EMAI WIKI TA TA HEBOUDIA
Emai wiki ta ta heboudia ai, ai ese Baibul ena hereva badadia a herevalaimu bona sibomu ba hemataurai daladia danu. Emai hebou na asi davana bona taunimanima iboudiai baema diba. Heḡereḡere, emai hebou ai bo dibamu . . .
-
dahaka dainai Dirava ese oi na e lalomu badamu
-
mauri korikorina be ede ba davaria toma
-
edena dala ai ma haida ida emu hetura karana ba hagoadaia
Danu, e “heduru hehenimu” tura korikoridia bo davarimu.—1 Korinto 12:25, 26.
Emai hebou ai diba ma haida bavabi totona, jw.org ai ina vidio kwadoḡina ba itaia Kingdom Hall ai be Dahaka E Karamu?
EMAI BAIBUL STADI PROGRAM
Ai ese Mauri Moalelaia Hanaihanai! bukana a ḡaukaralaiamu taunimanima ida asi davana Baibul stadi a karamu. Una stadi bukana ai na siri badadia, hereva anidia e hahedinarai namonamo, henanadai namodia, vidio namodia, bona laulau mai hairaidia. Baibul stadi ese taunimanima e durudiamu sibodia bae hemataurai bona edia mauri bae hanamoa.
Iehova ena Witnes taudia ida Baibul ba stadilaia ena namo ba dibaia totona, jw.org ai ina vidio kwadoḡina ba itaia Dahaka Dainai Baibul Ba Stadilaia?
You May Also Like
ABOUT US
Ta Ba Noia Oi Bae Vadivadimu
Baibul ese e haerelaimu henanadaina ta ba herevalaia, eiava Iehova ena Witnes ediai diba ma haida bavabi.
ABOUT US
Iehova Ena Witnes Edia Kongrigeisin Heboudia
Emai hebou gabuna bona emai tomadiho dalana ba tahua.
