MASE NEGADIAI TAUNIMANIMA NA E DARADOKOMU, BONA HARI MOMO NA UNA TOPIK AI HETAHU E KARAMU. Ina magasin ai tame herevalai atikol ese eme hahedinaraia, heduru maorona na Baibul ai baita davariamu. Baibul ena hereva ese idaunegai e nohova taudia e durudia heḡereḡerena hari ita danu be durudamu. Baibul ai taunimanima ihakaudia sisibadia bona tauhalo herevadia na mimia. Gabu ma ta ai hereva unu bamodia na basita davarimu dibamu.

• Baibul e gwaumu, e mase lalokau taudia na hisihisi ta se mamiamu

  Baibul ai Kohelete 9:5 na e gwaumu: “Mase taudia na ḡau ta asi dibadia.” Bona edia “lalo-hadai e oremu.” (Salamo 146:4) Danu, Baibul ese mase na mahuta ida e haheḡereḡerea.​—Ioane 11:11.

• Lalokau Diravana iabidadama henina karana ese tauhalo be henidamu

  Baibul ai Salamo 34:15 na e gwaumu: “Iehova a ese kara maoromaoro taudia e haḡerediamu; edia taitai ia ese e hakala henidiamu.” Dirava enai eda hemami baita herevalaiamu neganai eda hemami na be namomu, bona una ese ta ihereva henina karana na e hereaia. Oibe, ḡuriḡuri karana ese be durudamu Ihavarada Tauna turana ai baita laomu, bona ena siahu amo ita na baine hagoadada diba.

• Vaira nega namona baita laloa

  Mani a laloa, mase taudia iboudiai na tanobada ai be mauri loumu. Baibul ese una na e herevalaia momo. Tanobada ai bae vara ḡaudia haida na ini, Dirava ese ‘iruru-matada iboudiai matada amo baine dahu oho. Mase bona dara-doko bona taitai bona hisihisi bae ore.’​—Apokalupo 21:3, 4.

Iehova, Baibul ihavarana Dirava, e abidadama heniamu taudia momo na e haheaukamu badina e abia dae vaitanimu e mase lalokau taudia na be itadia loumu. Heḡereḡere, Ann na e headava bena laḡani 65 muridiai adavana e mase. Ia na e gwaumu: “Baibul amo na dibaia ḡauna na ina: Vada e mase lalokau taudia na hisihisi ta se mamiamu, bona Dirava ese e lalodia taomu taudia na be hatoredia isi loumu. Adavagu na laloamu negadiai unu hereva ese e lau na e hagoadagumu dainai, egu metau na baina haheaukalaia diba!”

Ina magasina ai matamanai ta herevalaia hahinena Tiina, na e gwa: “Timo e mase dinana amo Dirava ena heduru na na mamia. Egu taitai negadiai Iehova ese lau e durugumu daladia na na itamu. Danu, Baibul ese e gwauhamatalaia toreisi lou herevana na na abia daemu. Una ese lau na e hagoadagumu baina haheauka ela bona dina ta Timo ma baina itaia lou.”

Taunimanima milion momo ese danu una na e abia daemu badina dibadia Baibul ena hereva na be ḡuḡurumu. Bema oi ese Baibul ena hereva bavabia dae na auka, namona na ba hetahu bena oi sibomu ese ba hamomokania Baibul ena sisiba bona gwauhamata herevadia be momokani eiava. Reana sibomu ese bo hamomokaniamu, Baibul na daradoko taudia idurudia bukana hereadaena.

Emai websait jw.org ai vidio haida ba ita

 TA E MASEMU NEGANAI DAHAKA E VARAMU?

O URAMU SIVARAI NAMODIA BA DIBA?