Daradoko ihaheaukalaina sisibadia na momo, haida be mai edia heduru haida be lasi. Matamanai tame herevalaia heḡereḡerena, ta e lalohisihisimu dalana na idau ta ena amo. Badina heduru herevadia ta enai be namo, to ma ta enai be lasi.

To, sisiba haida be taunimanima momo e durudiamu. Diba bada taudia ese nega momo e ḡaukaralaimu daradoko taudia bae durudia. Bona unu na aonega buka gunana ta Baibul amo e abimu herevadia.

• Haida na e gwaumu, emu daradoko lalonai femli eiava bamo edia heduru bavabi dae na mai anina bada. To, nega momo oi na bo uramu sibomu ba noho. Idurumu taudia danu reana bo badu henidiamu. Una na vaevae bo abiamu hemamina.

• Sibomu o nohomu na asi ena kerere to namona na ma haida danu ba bamodia. Badina nega vairai bamomu edia amo heduru bo tahumu. Emu hemami na ba herevalai hedinarai namonamo unu amo idurumu taudia ese oi na bae durumu diba.

• Emu hemami heḡereḡerena ai, sibomu ese bavabia hidi edena nega be sibomu ba noho, bona edena nega be haida ba bamodia.

HAHEKAU HEREVANA: “Rarua ese tamona e hereaiamu. . . . Badina be ta bema keto, bamona ese bema abia isi.”​—Kohelete 4:9, 10.

• Aniani maorodia ese oi na be durumumu emu daradoko ba haheaukalaia totona. Heḡereḡere frut idauidau, uma anianidia, bona vamu asi diḡaradia bavani.

• Ranu bona tauani iduruna ranudia haida danu ba inu momo.

• Bema lalomu na hekou, aniani na taidia taidia bavani. Namona na emu dokta ba nanadaia, ededia muramura eiava vitamin be oi tauanimu baine durua diba. a

• Ba raka eiava eksasais ma haida ba kara. Unu ese oi na be durumumu bona emu hemami be hanamoamu.

HAHEKAU HEREVANA: “Badina be tau ta ese sibona tau-anina se inai heniamu, to e ubuamu bona e dosiamu.”​—Efeso 5:29.

• E daradokomu tauna baine mahuta namonamo na mai anina bada badina nega unu bamodiai tauani na e metaumu.

• Caffeine bona alkahol o inumu neganai ba haeroa namonamo, badina emu mahuta be hadikaia dibamu.

HAHEKAU HEREVANA: “Ima tamona na laḡa-ani amo baine honu be namo; ima ruaosi na hekwarahi bona lai ianina amo bae honu na dika.”​—Kohelete 4:6.

• Ba helalotao, ta e lalohisihisimu dalana na idau ta ena amo. Una dainai, oi baine durumu dalana na sibomu ese bavabia hidi.

• Momo e durudiamu ḡauna na haida ediai, edia lalohisihisi e herevalaimu to haida be lasi. Taunimanima edia hemami e stadilai namonamomu taudia edia heduru herevadia na idauidau. Bema oi na o uramu ta ba hereva henia to emu ai na auka, turamu namona ta enai emu hemami ba gwauraia hedinarai.

• Haida na e taimu neganai edia hemami e namomu, to haida be e haheaukamu ena be asie tai momomu.

HAHEKAU HEREVANA: “Lalo sibona ese ena idita mamina e dibaiamu.”​—Hereva Lada-Isidia 14:10.

• E daradokomu taudia haida na alkahol eiava drag amo edia hisihisi e uramu bae laloa boio. Kara unu bamodia ese ta tauanina baine hadikaia diba. Alkahol eiava drag ese ta ena hemami na nega sisina lalonai mo e hanamoamu, to gabeai na hekwakwanai badadia e davarimu. Ba hekwarahi ḡau namodia ba kara unu amo lalomu baine moale.

HAHEKAU HEREVANA: “Tau-anina bona lauma ihadikadia karadia iboudiai baita huri oho.”​—2 Korinto 7:1.

• Momo na e lalohisihisimu negadiai, idia na ḡau idaudia haida e karamu, unu amo e mamiamu hisihisina na bae laloa boio.

• Lalomu ihagoadana ḡaudia haida ba kara, heḡereḡere bamomu ida ḡau haida ba kara hebou, ḡaukara matamatana ta ba dibaia, eiava oi e hamoalemumu ḡauna ta ba karaia.

• Nega e laomu lalonai, bo itaiamu, emu lalohisihisi na taina ruana be ore be laomu, emu goada be loumu, bona bo moalemu.

HAHEKAU HEREVANA: “Ḡau iboudiai na mai edia nega korikori, . . . taitai mai negana, kiri mai negana; lalo-hisihisi mai negana, mavaru mai negana.”​—Kohelete 3:1, 4.

• Dina ta ta ai, vaevae o karamu ḡaudia na ba karadia.

• Bema mahuta, ḡaukara bona ḡau ma haida na edia nega korikori ai bo karamu, guna o karava ḡaudia na bo karadia lou dibamu.

• Ḡaukara namodia idauidau bo karamu neganai, emu hisihisi na bo laloa boiomu.

HAHEKAU HEREVANA: “Idia ese edia mauri dinadia basie lalodia bada; badina be Dirava ese e hamoalediamu, bona una mo bae laloa bada.”​—Kohelete 5:20.

• Momo na edia lalokau taudia e masemu muridiai abi hidi badadia na maoromaoro e karamu, bena gabe amo e lalohisihisimu.

• Bema mai dalana, abi hidi haida heḡereḡere gabu ta ai ba ha noho, emu moni ḡaukara ba haidaua, eiava mase tauna ena kohu ba negedia abi hididia na basio kara haraḡa.

HAHEKAU HEREVANA: “Ḡaukara malaka-malaka tauna ena lalo-hadai ese anidia e havara badamu, a lalo-haraḡa taudia iboudiai na bae dabu.”​—Hereva Lada-Isidia 21:5.

• E daradokomu taudia momo na e mase tauna ilalotaona ḡaudia e karamu neganai e moalemu.

• Baine hamoalemu ḡauna ta na, laulau ba habou eiava o laloataomu sivaraina na noutbuk ta ai ba torea.

• Emui memori namodia na ba reḡudia namonamo, bena lalomu e goadamu neganai unu na gabeai ba itadia lou diba.

HAHEKAU HEREVANA: “Nega gunadia ba lalodia.”​—Deuteronomi 32:7.

• Gabu ta ai ba holidei diba.

• Bema o laloamu gabu ta ai ba holidei na auka, reana dina tamona eiava rua lalonai ḡau haida ba kara heḡereḡere park boala, kone ai ba raka loa, eiava motuka amo ba loaloa.

• Ḡau idauna ta ikarana ese oi na be durumumu emu lalohisihisi ba haheaukalaia.

HAHEKAU HEREVANA: “Gabu ḡaḡaena ta aitala, laḡada baita ani.”​—Mareko 6:31.

• Ba helalotao, haida idurudia karana ese oi danu be hagoadamumu.

• Turamu eiava varavaramu ba durudia, badina idia danu e mase lalokau tauna dainai e lalohisihisimu.

• Haida idurudia bona ihagoadadia karana ese oi na be hamoalemumu bona bo mamiamu emu mauri na mai anina.

HAHEKAU HEREVANA: “Ḡau ihenina be namo bada, ḡau iabina be namo maraḡi.”​—Aposetolo Edia Kara 20:35.

• Emu lalohisihisi negana ai, bo dibamu emu ai dahaka be mai anina bada.

• Ina na nega namona emu noho dalana ba haeroa, emu mauri ai oi be dahaka o ato gunamu.

• Bema o dibamu ḡau haida na ba haidau, namona na mai anidia bada ḡaudia ba karadia guna.

HAHEKAU HEREVANA: “Taitai rumana ilao-henina be namo, aria rumana ilao-henina na dika; badina be taunimanima iboudiai ini e doko tomamu, bona mauri taudia ese bae helalolaia.”​—Kohelete 7:2.

 Momokani, oi ese o mamiamu hisihisina na ḡau ta ese basine kokia vaitanimu. To, e darakomu taudia momo na e gwaumu, sisiba maorodia, heḡereḡere ina atikol ai e tore ḡaudia e badina neganai, lalodia na e goada. Ena be ina atikol ese ta baine durua daladia iboudiai na se herevalai, to bema ini dala haida bo badinamu, oi danu be hagoadamumu.