1. Headava

Headava lalonai moale ihavaradia ḡaudia ai taunimanima edia lalohadai na idauidau.

ANINA: Headava na Dirava ese e hamatamaia dainai, headava tau bona hahine ese edia headava maurina bae moalelaia daladia na ia mo sibona dibana. (Mareko 10:​6-9) Headava lalonai, bema tau bona hahine na sibodia edia namo basie lalo badamu to be helalokau hehenimu, idia na be moalemu. Tau ese adavana e kara namo heniamu bona e nariamu dalana amo e hahedinaraiamu ia na e lalokau heniamu. Hahine ese danu ena hereva bona kara amo baine hahedinaraia, ia ese adavana na e matauraiamu.

BAIBUL ENA HAHEKAU HEREVADIA ESE E DURUDIA: Vietnam ai, Quang bona Thi, na edia headava maurina ai asie moaleva. Quang na kara auka tauna. Ia na e gwa: “Lau na Thi ena hemami na asina laloava bona nega momo na hahemaraiava. Una dainai Thi na e urava baia divos.” Thi e gwa: “Quang ena kara dainai, asina trastiava bona asina matauraiava.”

Gabeai, Quang bona Thi na Baibul ena hereva Efeso 5:33 ai e dibaia, bona edia headava maurina ai bae badinaia dalana e laloparalaia. Quang e gwa: “Ina siri ese e durugu bona na laloparara adavagu baina kara namo henia na mai anina bada. Dia una mo, namona na Thi baine diba lau na ia na lalokau heniamu, ena hemami na laloa badamu bona tauanina dalanai baina naria. Lau ese una sisiba na badinaiamu neganai, Thi ese lau na e lalokau henigumu bona e matauraigumu.” Bona Thi na e gwa, “Lau ese Efeso 5:33 na badinaiamu bona adavagu na matauraiamu neganai, ia ese danu lau na e lalokau henigumu, e gimagumu, bona maino ai a nohomu.”

 2. Haida Ikara Henidia Dalana

Nega momo taunimanima ese haida na edia bese, edia hanua, toadia, eiava edia tomadiho dainai asie matauraidiamu.

ANINA: Baibul na se gwaumu, bese eiava gado idaudia eiava geligeli taudia baita inai henidia. To, e hagoadadamu taunimanima iboudiai baita matauraidia, herevana ena noho dalana be ede bamona. (Aposetolo Edia Kara 10:34) Ena be haida ese e abi daemu ḡaudia na asita lalotamonalaimu eiava e karamu karadia na asita moalelaimu, to namona na baita kara namo henidia bona baita matauraidia.—Mataio 7:12.

BAIBUL ENA HAHEKAU HEREVADIA ESE E DURUDIA: Daniel e badava neganai e hadibaia Asia taudia na dia taunimanima namodia. Una dainai ia ese Asia taudia na e inai henidiava bona nega momo pablik gabudiai e itadiava neganai e hahemaraidiava. Daniel na e gwa: “Na lalo egu kara amo lau ese egu country na sapotiava. Bona natomava egu lalohadai eiava kara na mamaoro.”

Gabeai, Daniel na Baibul ena hahediba herevadia e diba. Ia na e gwa: “Na laloparara egu lalohadai baina haidaua na namo. Bona Dirava ese taunimanima e itadiamu dalana baina tohotohoa—herevana edena tano tauda, ita iboudai na heheḡereḡere.” Hari, Daniel na taunimanima e hedavari henidiamu neganai, ini e gwau tomamu: “Idia edena tano amo na dia ḡau badana. Lau ese taunimanima iboudiai na lalokau henidiamu, bona tanobada heḡeḡemadai ai lau turagu namodia na momo.”

 3. Moni

Taunimanima momo na e laloamu bema be taḡamu be moalemu bona vaira neganai edia noho na be namomu.

ANINA: Moni na mai ena heduru, to una ese basine hamoaledamu bona vaira nega namona basine havaraiamu. (Hereva Lada-isidia 18:11; 23:​4, 5) To, Baibul ai Dirava ena aonega herevadia baita badinamu neganai moale korikorina baita mamiamu bona vaira nega ai mauri namona baita moalelaiamu.—1 Timoteo 6:​17-19.

BAIBUL ENA HAHEKAU HEREVADIA ESE E DURUDIA: Indonesia ai, tau ta ladana Cardo, na e urava kohu momo tauna ai bainela. Ia na e gwa: “Lau na momo ese e ura heniva ḡaudia na moalelaiva. Na travel momova, dava bada kohudia, motuka momo, bona ruma na hoiva.” To iena moni na se mia daudau. Ia na e gwa: “Lau na ta ese e koigu bena egu moni ibounai e henaoa, laḡani momo na habou monidia na haraḡa herea e ore. Egu mauri ai lau na na hekwarahi taḡa tauna ai bainala, to dokonai, egu kohu iboudiai na haboio dainai na lalohisihisi bada herea bona na hemami lau na asi anigu.”

Gabeai, Cardo na Baibul ese moni iḡaukaralaina e herevalaia dalana e dibaia. Hari, ia na dia taḡa maurina e tahuamu, to lalona e hadaia simple maurina ai baine noho. Ia na e gwa: “Hari lau na lauma dalanai name taḡa, badina egu hetura karana Iehova ida na namo herea. Lau na vada na mahuta namonamomu bona na moalemu.”

 4. Mahuta Hebou Karana

Mahuta hebou karana ai taunimanima edia lalohadai na idauidau.

ANINA: Baibul na mahuta hebou urana ai eda hetoa na e atoa. Ina hereva “matabodaḡa karadia” na kara ini bamodia e gwauraimu: heudahanai, prostitution, do asie headava taudia e mahuta heboumu, hahine ma hahine ta ida e mahuta heboumu bona tau ma tau ta ida e mahuta heboumu, bona animal ida e mahuta heboumu karana. (1 Korinto 6:​9, 10) Mahuta hebou karana na harihari ḡauna ta Dirava amo, bona ia na e gwa headava tau bona hahine sibodia mo bae mahuta hebou na maoro.—Hereva Lada-isidia 5:​18, 19.

BAIBUL ENA HAHEKAU HEREVADIA ESE E DURUDIA: Australia ai hahine ta ladana Kylie na e gwa: “Lau do asina headava neganai, na lalova bema ta ida ba mahuta heboumu, lau na be lalokau henigumu bona be narigumu. To unu na se vara toma. Lau na na lalohekwarahi momova bona na lalometauva.”

Gabeai, Kylie na Baibul amo Dirava ena lalohadai mahuta hebou karana ai e dibaia bona ena mauri lalonai e badinaia. Ia na e gwa: “Na lalopararamu Dirava ena taravatu na hisihisi bona metau amo e gimadamu. Hari, egu hemami na namo bona na moalemu badina Iehova ese e ura heniamu mauri dalana na badinaiamu. Baibul ena hahekau herevadia na badinamu dainai asina lalohisihisimu!”