1, 2. (a) Edena dalai lalokau bona abidadama na e ḡaukara heboumu? (b) Ededia henanadai baita herevalaimu?

 IEHOVA ta lalokau heniamu badina “ia ese e lalokau henida guna.” (1 Ioa. 4:19) Iehova ese ena lalokau e hahedinaraia dalana ta na, ia e badinaiamu taudia e hanamodiamu. Eda Dirava baita lalokau henia badamu neganai, eda abidadama na be goadamu, bona baita abia daemu ia na e nohomu bona Ia e lalokau henidiamu taudia na davadia namodia baine henidia.​—Heberu 11:6 ba duahia.

² Taunimanima davadia namodia ihenina karana na Iehova ena kara badana ta. Dirava na basita abia dae momokanimu bema ita na basita abia daemu ia ese e tahuamu taudia na davadia namodia e henidiamu, badina “abidadama na ta laromu ḡaudia ihamomokanidia.” (Heb. 11:1) Oibe, abidadama anina na, ta diba momokanimu Dirava ese e gwauhamatalai hahenamodia na be varamu. To, edena dalai dava namona baita laroa karana ese baine duruda? Edena dalai Iehova ese ena hesiai taudia, idaunegai bona hari ina negai, na davadia namodia e henidia? Mani aita itaia.

3. Malaki 3:10 ai dahaka gwauhamata e herevalaia?

³ Iehova Dirava na e gwauhamata ena hesiai taudia davadia namodia baine henidia, una dainai e noidamu baita ḡaukara goada iena hahenamo baita abi totona. Baibul na e  gwaumu: “Iehova Sabaota na e tomu, . . . ba tohogu, guba gaba-maurudia baina kehodia emui, bona hahenamo na latamui ai baina seia dobi ela bona baine hepurai dobi.” (Mal. 3:10) Iehova ena hariharibada karana ta abia daemu neganai, eda tenkiu karana ta hahedinaraiamu.

4. Dahaka dainai Iesu ena hereva, Mataio 6:33 ai baita abia dae diba?

⁴ Iesu na ena hahediba e hadibadia bema Basileia bae atoa guna, Dirava ese baine durudia. (Mataio 6:33 ba duahia.) Iesu ese una na e abia dae momokani badina ia na mai dibana Iehova ena gwauhamata iboudiai na e ḡuḡurumu. (Isa. 55:11) Ita danu bema mai kudouda ibounai ida Iehova baita abidadama heniamu, iena gwauhamata na be haḡuḡuruamu, badina ia na eto: “Lau na basina negemu bona basina rakatanimu, lasi ona lasi vaitani.” (Heb. 13:5) Una hereva bona Iesu ese e gwauraia herevana, Dirava ena Basileia bona kara maoromaoro baita tahua guna, na heḡereḡere.

5. Dahaka dainai Iesu ese Petro e haere henia karana ese eda abidadama e hagoadaiamu?

⁵ Nega ta aposetolo Petro na Iesu e nanadaia: “Ai na ḡau iboudiai vada a rakatani, oi vada a ḡavamu; ai na dahaka baia abi?” (Mat. 19:27) Una henanadai dainai Iesu ese Petro na se gwau henia, to Iesu ese ena hahediba na e hamaorodia edia ura e dadarai dainai davadia namodia bae abi.  Abidadama aposetolo taudia bona ma haida na Iesu ida gubai bae lohia. To, hari danu davada namodia baita abi diba. Iesu na eto; “Ruma, eiava tadikakana, eiava taihuna, eiava tamana, eiava sinana, eiava adavana, eiava natuna, eiava tano, lau daigu ai vada e rakatanidia tauna ese sinahu sinahu be abimu, bona mauri hanaihanai danu do baine abia.” (Mat. 19:29) Iesu ena hahediba bae abi hahenamodia ese edia hekwarahi na baine hereaia. Eda abidadama tamona taudia, heḡereḡere tama, sina, tadikaka, taihu, bona natu ese Basileia dainai ta dadarai ḡaudia na e hereadiamu, ani?

6. Dahaka dainai Iehova ese ia e toma henia dihomu taudia e gwauhamata henidia davadia baine henidia?

⁶ Iehova na e gwauhamata ia e toma henia dihomu taudia na davadia namodia baine henidia, una ese idia na e durudiamu hahetoho negadiai kara maoromaoro bae badinaia totona. Iehova Dirava ena hesiai taudia na hari ina negai hahenamo momo e abimu, bona vaira negana ai danu hahenamo momo herea bae abi diba. (1 Tim. 4:8) Oibe, ta diba momokanimu Iehova ese ‘ia e tahuamu taudia davadia namodia baine henidia’ dainai, una ese e durudamu eda abidadama baita hagoadaia.​—Heb. 11:6.

7. Edena dalai helaro na dogo na heto?

⁷ Iesu na Ororo Harorona ai, eto: “Ba moale, ba moale hisi dae, badina be guba ai davamui baine bada; badina be e gunalaimui taudia, peroveta taudia, na unu e daḡedaḡe henidia tomava.” (Mat. 5:12) Haida na guba ai davadia bae abi, to ma haida na tanobada paradaisona ai mauri hanaihanai bae abia dainai ‘bae moale, bae moale hisi dae.’ (Sal. 37:11; Luka 18:30) Ena be eda helaro na guba ai eiava tanobada ai, to una helaro na “laumada [“iseda mauri,” Nega Matamata Baibel] dogona na heto, se idaumu bona se mareremu.” (Heb. 6:17-20) Dikadika lalodiai dogo ese kada e hadaia taomu heḡereḡerena, eda helaro ese baine duruda diba hanaihanai eda hemami, lalohadai, bona lauma dalana ai baita goada totona. Una ese baine duruda diba metau idauidau baita haheaukalaidia.

8. Edena dalai eda helaro ese baine duruda basita lalohekwarahi momo?

⁸ Eda helaro ese baine duruda diba basita lalohekwarahi momo. Dehoro namona ese tauanida e hanamoamu heḡereḡerena, Dirava ena gwauhamata ese laloda baine hagoadaia diba. Ta moalemu badina ta dibamu ‘eda maduna na Iehova enai baita taho kau’ neganai, ‘ia ese baine abida isi.’ (Sal. 55:22) WTa abia dae momokanimu Dirava ese “eda noinoi bona eda lalo-hadai idoidiai baine hereadia” ḡaudia na baine heni diba. (Efe. 3:20) Mani a laloa, eda noinoi bona eda lalo-hadai ḡaudia mo basine henidamu, to unu ḡau e hereadia ḡaudia danu be henimu!

9. Ede ta diba tomamu Iehova ena hahenamo na baita abi diba?

⁹ Ita ese davada namona baita abia totona, namona na Iehova baita abidadama henia bona ena hahekau daladia baita badina. Mose ese Israel besena e hamaorodia: “Iehova, emui Dirava, vada e henimui emui tano ai ba halaoa tanona ai Iehova ese baine hanamomui. Ḡau tamona, Iehova, emui Dirava, erena ba kamonai, bona hari dina ai na henimuimu haheḡanidia ba badinadia. Badina be Iehova, emui Dirava, ese baine hanamomui, ena gwauhamata heḡereḡerena.” (Deu. 15:4-6) Oi o abia daemu Iehova ese oi na be hanamomumu bema mai emu abidadama ida ia bo hesiai henia hanaihanaimu, a? Badi namona ta dainai oi na unu bo kara tomamu.

10, 11. Edena dalai Iehova ese Iosef na davana namona e henia?

¹⁰ Baibul na ita iduruda totona e torea. Ia  lalonai Dirava ese ia e abidadama henia taudia davadia namodia e heni daladia e herevalai. (Roma 15:4) Iosef na haheitalai namona. Ia kakana ese e kara henia dalana bona gabeai biaguna adavana ena koikoi herevana dainai, ia na Aigupto dibura rumana ai e noho. Ia be ena Dirava ena amo e daudau, eiava? Lasi! “Iehova ese Iosef e haḡerea, e bogaia hisi . . . bona ena ḡaukara iboudiai anidia e havara.” (Gen. 39:21-23) Unu hahetoho lalodiai, Iosef na mai haheaukana ida ena Dirava e naria.

¹¹ Laḡani haida muridiai, Farao ese Iosef na dibura rumana amo e ruhaia bona Aigupto ai lohia tauna iharuana ai e halaoa. (Gen. 41:1, 37-43) Iosef adavana ese memero rarua e havaradia neganai, “roboana na Iosef ese ladana e hatoa Manase; eto, Dirava ese egu hekwarahi bona tamagu ena ruma ilalolaidia na egu amo vada e abi oho. A tau muritai ladana e hatoa Efraim; eto, Hisi na ani tanona ai Dirava ese besegu vada e henigu.” (Gen. 41:51, 52) Iosef na Dirava e badinaia dainai, Dirava ese e hanamoa bona unu amo doe negana ai ia ese Israel bona Aigupto taudia e hamauridia. Mai anina bada ḡauna na ina, Iosef na e diba Iehova ese davana namona e henia bona e hanamoa.​—Gen. 45:5-9.

12. Iesu na hahetoho e davari neganai, edena dalai Dirava e badinaia hanaihanai?

¹² Iesu Keriso danu, hahetoho idauidau lalodiai Dirava e badinaia hanaihanai, bona Dirava ese davana namona e henia. Dahaka ese e durua dainai e haheauka? Baibul na e gwaumu: “Vairanai e hure moalena dainai satauro e haheaukalaia, hemaraina se laloa.” (Heb. 12:2) Iesu na Dirava ladana e hahelaḡaia dainai e moale. Danu, Tamana ese ia na e lalonamo henia bona hahenamo momo e abi. Baibul ese e hahedinaraiamu ia na “Dirava ena terono idibana kahana ai vada e helaimu.” Bona Baibul na e gwaumu: “Dirava ese e imodaia, lada ta e henia, lada iboudiai e hereadia ladana.”​—Fili. 2:9.

13, 14. Iehova ese ia dainai ta karamu ḡaudia be ede e lalodia tomamu?

¹³ Ita na ta dibamu Iehova ese ia baita hesiai henia totona ta karamu ḡaukaradia na e lalodia badamu. Eda lalohekwarahi o daradara ḡaudia na e lalopararalaimu. Ia ese ita na e bogada hisimu bema moni ena hekwakwanai dainai ta lalometaumu, eiava eda gorere o hemami dainai ta laloamu ita na dia heḡereḡere hesiai ḡaukara helaḡana baita karaia. Bona namona na baita diba Iehova ena hesiai taudia ese Ia ibadinana totona e karamu ḡaudia na Ia ese e lalodia badamu.​—Heberu 6:10, 11 ba duahi.

¹⁴ Bona baita helalotao, “ḡuriḡuri ikamonaina Diravana” baita ḡuriḡuri henia diba, badina ta dibamu eda lalohekwarahi ḡaudia baita herevalaimu neganai be kamonaimu. (Sal. 65:2) “Tama hebogahisina, tauhalo Diravana” ese tauani bona lauma dalanai be durudamu, reana eda tadikaka bona taihu edia amo unu be kara tomamu. (2 Kor. 1:3) Ma haida ta bogadia hisimu neganai, Iehova na e moalemu. “Ogoḡami taudia e bogadia hisimu tauna ese Iehova enai e henitorehaimu; Iehova ese ena kara davana do baine henia.” (Her. 19:17; Mat. 6:3, 4) Una dainai, mai eda ura ida metau e davarimu taudia baita durudiamu neganai, una vaitani Iehova enai ta henitorehaimu. Bona ia na e gwauhamata davada namona do baine henida.

15. O uramu vaira negana ai dahaka hahenamo bavabi? (Rau 24 ai laulau ba itaia.)

¹⁵ Dirava ese lauma helaḡa amo e horodia Kristen taudia ese “kara maoromaoro ena kwara-havava ḡauna” bae abia, ‘una dina ai Lohiabada ese baine henidia; badina be ia na Hahemaoro Tauna, mai ena kara maoromaoro.’ (2 Tim. 4:7, 8) To, bema emu helaro na tanobada ai, Dirava ese oi danu be  hanamomumu. Iesu ena “mamoe idaudia” milioni momo na e ura dikadikamu vaira negana ai tanobada paradaisona lalonai bae mauri hanaihanai. Unuseni ai “maino ena harihari-bada idia ese bae moalelaia.”​—Ioa. 10:16; Sal. 37:11.

16. 1 Ioane 3:19, 20 ena hahegoada herevana be dahaka?

¹⁶ Nega haida, ita na reana ta lalomu eda hesiai ḡaukara ai ḡau momo asita karamu, eiava ta laloamu Iehova be eda ḡaukara e moalelaiamu eiava lasi. Reana baita laloamu ita na dia heḡereḡere hahenamo idauidau baita abi. To, namona na baita helalotao “Dirava ese ita laloda e hereadiamu, bona ia na ḡau iboudiai dibana.” (1 Ioane 3:19, 20 ba duahi.) Eda abidadama bona lalokau dainai hesiai ḡaukara helaḡana ta karaiamu neganai, Dirava ese davada namona be henidamu, herevana ta karaiamu ḡaukarana na bada eiava maraḡi.​—Mar. 12:41-44.

17. Hari ina negai dahaka hahenamo haida ta moalelaimu?

¹⁷ Satana ena nega oromana dikana lalonai, Iehova ese ena taunimanima na dounu e hanamodiamu. Ia na e uramu ia e toma henia dihomu taudia momokanidia na lauma dalanai bae noho namonamo mai moaledia ida, una dainai idurudia ḡaudia momo e henidiamu. (Isa. 54:13) Iesu ese e gwauhamatalaia heḡereḡerena, hari Iehova ese ita e hanamodamu dalana na, tanobada heḡeḡemadai ita na tadikaka taihu padadiai ta nohomu, ruma bese ta na heto. (Mar. 10:29, 30) Bona Dirava e tahuamu taudia na lalomaino e abimu, asie lalohekwarahimu, bona e moalemu.​—Fili. 4:4-7.

18, 19. Iehova ena hesiai taudia ese e abimu hahenamodia be ede e lalodia tomamu?

¹⁸ Tanobada heḡeḡemadai Iehova ena hesiai taudia na Ia amo hahenamo namodia momo e abimu. Heḡereḡere, Germany ai, Bianca na e gwaumu: “Iehova na tenkiu henia badamu, badina egu lalohekwarahi negadia ai e durugumu bona dina ta ta ai e hagoadagumu. Tanobada na hekwakwanai bona daḡedaḡe karadia amo e honu. To Iehova badibadinai na ḡaukaramu neganai, na mamimu Ia ese lau na e gimagumu. Ia dainai sibogu egu ura ḡaudia haida na dadaraimu negadiai, ia ese hahenamo momo e henigumu.”

¹⁹ Eiava Canada ai, laḡanina 70 hahinena Paula aita laloa, ia na turia gorerena (spina bifida) e abia. Ia na ini e gwau toma: “Ena be egu gorere dainai ḡau momo basina kara diba, to una ese egu hesiai ḡaukarana na se koua. Telefon bona nega bona gabu idauidau ai na haroromu. E hagoadagumu ḡauna ta na, egu noutbuk ai Baibul siridia bona eda pablikeisen edia point haida na toredia dihomu, nega ta ta ai baina ḡaukaralaidia diba. Una noutbuk na na gwauraiamu ‘Egu Roho Mauri Bukana.’ Eda lalomanoka na basine mia hanaihanaimu bema Iehova ena gwauhamata baita lalodia badamu. Iehova na nega iboudiai ita be durudamu, herevana eda noho daladia na ede bamodia.” Reana emu hekwakwanai na Bianca eiava Paula edia amo na taina idau. To, Iehova ese oi bona ma haida e hanamomuimu daladia ba lalodia diba. Hari Iehova ese oi e hanamomu bona vaira negai baine hanamomu daladia bo lalomu na mai moalena, ani?

20. Bema mai kudouda idoinai Iehova baita hesiai heniamu, dahaka hahenamo baita moalelaimu?

²⁰ Namona na basio helaloboio, mai kudoumu idoinai ida Dirava enai o gwauraimu ḡuriḡuridia ‘davadia na bada.’ Namona na ba diba, “Dirava ena ura ba karaia ḡuḡuru, bena gwauhamata anina do bavabia.” (Heb. 10:35, 36) Una dainai, namona na hanaihanai eda abidadama baita hagoadaia bona mai kudouda idoinai ida Iehova baita hesiai henia. Unu ta kara tomamu, badina ta dibamu Iehova ese davada namona be henidamu.​—Kolose 3:23, 24 ba duahi.