1, 2. (a) Dahaka dainai basita hoa, bema nega haida ta lalohekwarahimu? (Rau 19 ai laulau ba itaia.) (b) Ina stadi ai dahaka baita herevalaiamu?

 ITA na lalohekwarahi momo negana lalonai ta nohomu. Satana Diabolo na e badu dikadikamu bona “e loamu mai ḡouna ida, leona na heto, baine anidia ore taudia na e tahudiamu.” (1 Pet. 5:8; Apok. 12:17) Una dainai basita hoa, nega haida ita, Dirava ta hesiai heniamu tauda, danu baita lalohekwarahimu. Guna Iehova ena hesiai taudia, heḡereḡere King David, na nega haida e ‘dara’ dokova. (Sal. 13:2) Danu, aposetolo Paulo na kongrigeisen daidiai lalona e ‘hekwarahiva.’ (2 Kor. 11:28) To, ta lalohekwarahi badamu negadiai dahaka baita kara diba?

² Tamada gubai e nohomu ese guna ena hesiai taudia e durudia heḡereḡerena, hari ina negai Ia ese baine duruda diba basita lalohekwarahi momo. Baibul na e gwaumu: “Emui lalo-haguhi na ia enai ba tahoa kau, badina be ia ese e lalomuimu.” (1 Pet. 5:7) Edena dalai unu baita kara toma diba? Mani una sisiba baita badinaia diba daladia hani aita lalodia: (1) mai kudouda ibounai ida baita ḡuriḡuri, (2) Dirava ena Hereva baita duahia bona baita  laloa dobu, (3) Iehova ena lauma helaḡa ena heduru baita noia, bona (4) eda hemami na bamoda namona ta vairanai baita gwaurai. Unu dala hani ta herevalaidiamu neganai, ba badinaia diba daladia ba lalodia.

3. Edena dalai ḡuriḡuri amo “emu maduna na Iehova enai ba tahoa kau”?

³ Dala ginigunana na, mai kudouda ibounai ida Iehova baita ḡuriḡuri henia. Bema oi na so moalemu, o lalohekwarahimu, eiava o garimu, namona na Tamada lalokauna ba hamaorolaia. Salamo itorena tauna David ese Iehova e noia, eto: “Dirava e, egu ḡuriḡuri a kamonai.” Bona ma eto: “Emu maduna na Iehova enai ba tahoa kau, ia ese baine abimu isi.” (Sal. 55:1, 22) Emu hekwakwanai ihamaoromaorona daladia iboudiai ba kara murinai, mai kudoumu ibounai ida bo ḡuriḡurimu dainai basio lalohekwarahi momomu. To, edena dalai ḡuriḡuri karana ese baine durumu diba basio lalohekwarahi?​—Sal. 94:18, 19.

4. Ta lalohekwarahimu neganai, dahaka dainai ḡuriḡuri na mai anina bada?

⁴ Filipi 4:6, 7 ba duahi. Mai kudouda ibounai ida Iehova baita noia loulou neganai, baine duruda diba. Edena dalai? Ia ese lalomaino baine henida unu amo laloda e hadikamu bona kudouda e hahisimu ḡaudia baita dadaraidia. Momo ediai una na e vara. Ena be idia na e lalometau to Dirava ena heduru dainai idia ese lalomaino, taunimanima ese basie havaraia diba ḡauna, e davaria. Oiemu ai danu una na baine vara diba. Una dainai “Dirava ena maino” ese baine durumu diba emu hekwakwanai ba hahanaidia totona. Iehova ena gwauhamata na bavabidadama henia diba, e gwa: “Kudoumu basine hetaha, badina be lau na oiemu Dirava; baina hagoadamu, baina durumu.”​—Isa. 41:10.

5. Edena dalai Dirava ena Hereva ese lalomaino baine henida diba?

⁵ Dala iharuana na, Baibul baita duahia bona baita laloa dobu amo lalomaino baita abia. Dahaka dainai una na mai anina bada? Baibul ena hahekau herevadia ese bae durumu diba basio lalohekwarahi, o emu lalohekwarahi ba hamaraḡia, eiava ba haheaukalaia. Baibul ena heduru na basita laloa maraḡi badina Baibul lalonai Dirava ena aonega herevadia na mimia. Hanaihanai Dirava ena hereva bo haeromu bona ibadinana daladia bo lalodiamu neganai, oi na be hagoadamumu. Iehova ese e hadibadamu, Baibul iduahina karana ese baine duruda diba ‘baita goada bona baita haheauka,’ to ‘basita gari.’​—Ios. 1:7-9.

6. Edena dalai Iesu ena hereva ese baine durumu diba?

⁶ Iesu ena heduru herevadia na Baibul ai baita davarimu. Iena hereva e hakala heniva taudia na lalogoada e abiva. Hutuma na ia dekena e laova badina ia ese lalohisihisi taudia, manoka taudia bona lalometau taudia e hagoadadiava. (Mataio 11:28-30 ba duahi.) Ia ese ma haida edia lauma dalana, edia hemami bona edia dabu tauani dalanai na e lalo bada. (Mar. 6:30-32) Iesu ese ita danu baine duruda diba. Ia ese aposetolo taudia e durudia heḡereḡerena, oi danu baine durumu diba. Ena be tauanina dalanai Iesu na dia oi ida noho, to iena heduru na bavabia diba. Hari ia na guba ai e Lohiamu, to ena hebogahisi na doini e hahedinaraiamu. Una dainai, o lalohekwarahimu negadiai, ia ese baine ‘durumu’ bona baine ‘kahamu’ diba. Oibe, Iesu ese baine durumu diba, lalometau ba haheaukalaia, helaro  bona goada danu baine henimu.​—Heb. 2:17, 18; 4:16.

7. Dirava ena lauma helaḡa bo noiamu neganai, dahaka namo bo davarimu?

⁷ Iesu na e gwauhamata Tamada guba ai ese lauma helaḡa e noiamu taudia na baine henidia. (Luka 11:10-13) Una ese lalohekwarahi ba haheaukalaia dalana ihatoina e hahedinaraiamu, una na lauma huahuadia. Idia na siahu idoinai Diravana ena ḡaukara siahuna amo e varamu kara namodia, bona iena kara e hahedinaraiamu. (Galatia 5:22, 23 ba duahi; Kol. 3:10) Unu lauma huahuadia bo hahedinaraimu neganai, emu hetura karana ma haida ida na be namomu. Una dainai, lalohekwarahi bae havara hekwakwanaidia na basie varamu. Mani lauma huahuadia ese bae durumu daladia aita herevalai.

8-12. Edena dalai lauma huahuadia ese bae durumu diba, lalohekwarahi bae havara ḡaudia ba haheaukalai eiava ba lao ahu?

⁸ “Lalokau, moale, maino.” Bema taunimanima bo matauraidiamu, emu hemami bae hadikaia diba karadia na bo haheaukalaimu. Ede baine vara toma? Bema ba helalokau heheni, bona ba hemataurai heheni, lalohekwarahi bae havara ḡaudia na bo laodia ahumu.​—Roma 12:10.

⁹ “Haheauka, hebogahisi, kara maoromaoro.” Maino ai ba noho diba bema ina sisiba ba badinaia: “Ba hekaha heheni; ba hebogahisi heheni; emui dika ba hegwau tao heheni.” (Efe. 4:32) Unu bo kara tomamu neganai, lalohekwarahi bae havara ḡaudia na bo laodia ahumu. Bona kara dika dainai bae vara hekwakwanaidia baita hamaoromaorodia diba.

¹⁰ “Hereva ibadinana” o abidadama. Nega momo ta lalohekwarahilai badamu ḡaudia na moni bona kohu. (Her. 18:11) To Iehova ena henari karana baita abidadama heniamu neganai, unu na baita haheaukalaimu eiava basita lalohekwarahilaimu. Edena dalai? Aposetolo Paulo ena sisiba baita badinaiamu neganai basita lalohekwarahimu, eto: “Dekemui ai mimia ḡaudia na bavabi, asi karikarimui; badina be Dirava eto, Lau na basina negemu bona basina rakatanimu, lasi ona lasi vaitani. Taunabunai, mai goadada ida baitato, Lohiabada be egu hekaha, Lau na basina gari; Taunimanima ese ede bae hadikagu toma?”​—Heb. 13:5, 6.

¹¹ “Manau, boga-auka.” Unu kara ba hahedinarai edia namo ba lalo. Unu amo lalomu baine hahekwarahia diba karadia bona “heiri-heiri, daḡedaḡe, badu, heloḡo-heloḡo, hereva mirodia” ba dadarai diba.​—Efe. 4:31.

¹² “Dirava imana siahuna henunai” ba noho bona ‘emu lalo-haguhi na ia enai ba taho kau’ totona, namona na ba manau. (1 Pet. 5:6, 7) Manau karana bo hahedinaraiamu neganai, Dirava ena lalonamo bona heduru bo abimu. (Mika 6:8) Bema hanaihanai emu goada, lalohadai bona hemami hetoadia bo dibamu, oi na basio lalo hekwarahimu badina Dirava enai bo tabekaumu.

13. Iesu ena hereva, “lalomui basie hekwarahi” anina be dahaka?

¹³ Mataio 6:34 ai (ba duahia), Iesu ese mai anina bada sisibana ta e gwauraia: “Lalomui basie hekwarahi.” To reana una sisiba baita badinaia na auka. Ina hereva, “lalomui basie hekwarahi” anina be dahaka? Iena hereva anina na dia Dirava ena hesiai taudia na edia mauri lalonai basie lalohekwarahi; matamanai tame herevalaia bamona David bona Paulo na edia hereva amo una na e hahedinaraia. To Iesu ese una hereva amo ena hahediba taudia e hadibadia lalohekwarahi momo ese hekwakwanai na  basie hamaoromaorodia diba. Dina ta ta na mai edia lalohekwarahi ḡaudia, una dainai dia namo Kristen taudia ese guna e vara ḡaudia o vairai bae vara ḡaudia bae lalohekwarahilai. Lalometau negadia ai, edena dalai Iesu ena sisiba ibadinana karana amo lalomaino bavabia?

14. Edena dalai emu kerere gunadia ilalohekwarahilaidia karana ba haheaukalaia diba?

¹⁴ Lalohekwarahi haida na kara o kerere gunadia ilalodia karana amo bae vara diba. Reana ta na laḡani momo gunadia ai e karaia kererena ta dainai be lalohisihisimu. Nega haida, King David na e mamiava ena ‘kara havara na kwarana ai vada e kau.’ Ia na eto: “Na ḡanaḡanamu, daragu e dokomu dainai.” (Sal. 38:3, 4, 8, 18) Una negai David be dahaka e kara? Ia ese Iehova ena hebogahisi bona dika igwautaona karana na e abi dae. Una dainai ia na ini e gwa toma: “Ena kara dika eme hegwau tao tauna be namo.”​—Salamo 32:1-3, 5 ba duahi.

15. (a) Dahaka ba kara na namo hari e varamu ḡaudia basio lalohekwarahilai? (b) Ededia dala haida ba badina diba lalohekwarahi ba hamaraḡia totona? (Maua ladana “ Lalohekwarahi Ba Hamaraḡia Daladia Haida” ba itaia.)

¹⁵ Nega haida, reana hari e varamu ḡaudia bo lalohekwarahilaimu. Heḡereḡere, David ese Salamo 55 e torea neganai, ia na bae hamasea garina e gari. (Sal. 55:2-5) To, lalohekwarahi karana ese iena abidadama Iehova enai na se hadikaia. David ese ena hekwakwanai na e ḡuriḡurilaidia, to danu e laloparara kara haida baine kara na namo lalohekwarahi e havaramu ḡaudia baine hamaoromaorodia. (2 Sam. 15:30-34) David ena amo tame dibaia ḡauna na ina: Namona na basio lalohekwarahi momo, to emu lalohekwarahi ba hamaraḡia daladia ba tahu, bona Iehova imana ai ba rakatania.

16. Edena dalai Dirava ladana anina ese emu abidadama baine hagoadaia diba?

¹⁶ Lalohekwarahi asi anidia na bae vara diba bema Kristen tauna na vairai bae vara hekwakwanaidia baine lalodia momo. To, do asie vara ḡaudia daidiai ba lalohekwarahi na asi anina. Dahaka dainai? Badina be nega momo, e varamu ḡaudia na dia ita ese ta lalohekwarahilai heḡereḡeredia e varamu. Danu, Dirava sibona na heḡereḡere ḡau iboudiai baine hamaoromaorodia, ia enai eda lalohekwarahi iboudiai baita taho kau diba. Ia ladana anina na “Dahaka ai na uramu baina hahelao na vada baina hahelao.” (Eso. 3:14, NWT) Dirava ladana anina ese e hadibadamu, ia na heḡereḡere vaitani iena hesiai taudia daidiai baine kara ḡaudia iboudiai baine haḡuḡurudia. Namona na ba diba Dirava ese abidadama taudia na be hanamodiamu bona be durudiamu, guna, hari bona vairai bae vara ḡaudia basie lalohekwarahilai momo.

17, 18. Edena dalai ma ta enai emu hemami ba gwaurai hedinarai karana ese baine durumu?

¹⁷ Lalohekwarahi ba haheaukalaia dalana ihahanina na herevahereva namonamo karana, anina na bamomu namona ta vairanai emu hemami ba gwaurai hedinarai. Adavamu, o turamu namona ta, eiava kongrigeisen elda ta ese baine durumu diba, emu lalohekwarahi ḡauna ba haeroa. “Lalo-hekwarahi ese tau ta e hametauamu, a hereva namona ese e hamoaleamu.” (Her. 12:25) Bamomu namona ta enai mai momokanimu ida emu hemami ba gwaurai hedinarai karana ese baine durumu, emu lalohekwarahi ba lalopararalaia bona ba haheaukalaia diba. Baibul na e gwaumu: “Ta se hahealomu negana ai, taunimanima edia lalo-hata ḡaudia asie tubu namonamomu; a hahealo taudia na hoho negana ai na e tubu ḡoevaḡoevamu.”​—Her. 15:22.

¹⁸ Danu, Iehova na kongrigeisen heboudia amo Kristen taudia e durudiamu edia lalohekwarahi bae haheaukalaidia totona. Hebou gabudia ai tadikaka taihu ba bamodia diba, idia ese oi na e lalomu badamu bona e uramu bae hagoadamu. (Heb. 10:24, 25) Una “hahealo heheni” karana ese baine durumu lauma dalanai ba goada bona emu lalohekwarahi ba haheaukalaidia diba.​—Roma 1:12.

19. Dahaka dainai o diba momokanimu emu hetura karana Dirava ida ese baine hagoadamu?

¹⁹ Canada ai, kongrigeisen elda ta ese Iehova enai ena lalohekwarahi baine tahoa kau ena namo na e dibaia. Iena ḡaukara na bada, ia na tisa bona sikuli edia sisiba heni tauna, danu ia na mai ena lalometau gorerena. Unu be ede e haheaukalai toma? Ia na e gwa: “Egu lalometau ai e durugu bada ḡauna na, egu hetura karana Iehova ida na hagoadaia. Lalometau negadiai tura namodia bona tadikaka taihu edia heduru na mai anina bada. Adavagu vairanai mai momokanigu ida egu hemami na gwaurai hedinaraimu. Elda bamogu bona emai seket tauna ese e durugu mai anina bada ḡaudia baina atodia guna. Danu, dokta edia heduru na tahu, ḡau haida na haidau egu nega baina ḡaukaralaia namonamo totona, bona nega na ato baina laḡa-ani bona baina eksasais. Bena taina ruana egu hemami na biagua. Egu ai ḡau haida ibiagudia e aukava neganai, Iehova imana ai na rakatanidia.”

20. (a) Edena dalai eda lalohekwarahi na Dirava enai baita taho kau? (b) Stadi gabena ai dahaka baita herevalaiamu?

²⁰ Ina stadi ai tame diba, eda lalohekwarahi Dirava enai baita taho kau dalana na, mai kudouda idoinai ida baita ḡuriḡuri bona Baibul baita duahia bona baita laloa dobu. Danu, ita ese lauma huahuadia baita hahedinarai ena namo, bamoda namona ta enai eda hemami baita gwaurai ena namo, bona Kristen hebamo karana ena namo tame herevalai. Stadi gabena ai, Iehova ese vaira negana ai davada namona baine heni karana amo be durudamu dalana baita herevalaiamu.​—Heb. 11:6.