1, 2. Dahaka dainai horoa Kristen taudia ediai Roma karoa 8 na mai anina bada?

 IESU ena mase ihelalolaina negana ai, Roma 8:15-17 be o duahia, a? Reana o duahia. Unu siri ese e hahedinaraiamu Kristen taudia be ede e diba tomamu idia na e horodia​—lauma helaḡa na idia laumadia ida e gwau bou. Bona siri6 ese idia na e gwauraidiamu “Keriso Iesu e badinaiamu taudia.” To Roma karoa 8 be horoa taudia mo e herevalaidia, a? Eiava tanobada helarona bae abia Kristen taudia danu e herevalaidia?

² Una karoa ese horoa Kristen taudia mo e herevalaidia. Idia na “lauma” vada e abia bona Dirava ese ‘baine abidia dae bona tau-anidia baine hamauridia negana e nariamu.’ (Roma 8:23) Oibe, vaira negana ai idia na guba ai Dirava natuna ai baela. Una na momokani, badina idia na bapatiso Kristen taudia ai ela, bona Dirava ese mauri davana amo edia dika e gwautao, bona maorodia e gwaurai, unu amo idia na Ia natuna ai ela.​—Roma 3:23-26; 4:25; 8:30.

3. Dahaka dainai baita gwau diba tanobada helarona bae abia taudia ediai Roma karoa 8 na mai anina bada?

³ To, tanobada helarona bae abia taudia ediai danu Roma karoa 8 na mai anina bada, badina Dirava ese idia na maorodia e  gwaurai. Paulo ese ena revareva ai e torea matama herevana amo una ta dibamu. karoa 4 ai, ia ese Abraham e herevalaia. Iehova ese Taravatu na Israel taudia do se henidia bona Iesu na eda dika dainai do se mase neganai, una abidadama tauna na vada e noho. To, Iehova ese Abraham ena abidadama karana na dounu e laloatao bona maorona e gwaurai. (Roma 4:20-22 ba duahi.) Una heḡereḡerena, hari ina negai Iehova ese tanobada ai bae mauri hanaihanai abidadama Kristen taudia na maorodia e gwauraimu. Una dainai, idia na Roma karoa 8 ai kara maoromaoro taudia e henidia sisibana amo namo bae abia diba.

4. Roma 8:21 baita duahia neganai edena henanadai baita laloa?

⁴ Roma 8:21 ese e hahedinaraiamu, tanobada matamatana na baine vara momokani. Una siri na e gwaumu, Dirava ese “e kara ḡaudia na mase ena iḡui amo bae heruha nege, bona Dirava natuna edia ura-kwalimu herea-daena bae abia.” To henanadai na, ita be unuseni ai baita nohomu bona una hahenamo baita abiamu, eiava? Oi o dibamu una hahenamo bo abiamu, a? Roma karoa 8 ena sisiba ese oi be durumumu una bavabia totona.

5. Roma 8:4-13 ai Paulo ese dahaka mai anina bada ḡauna e herevalaia?

⁵ Roma 8:4-13 ba duahi. Roma karoa 8 ese “tau-anina ena kara e karamu taudia” bona “lauma ena kara e karamu taudia” edia idau e herevalai. Reana haida na be lalomu una na hereva momokani ai asie nohomu bona hereva momokani ai e nohomu taudia, o Kristen taudia bona dia Kristen taudia e herevalaidiamu. To, Paulo na ‘Dirava ese e ura henidiava taudia Roma ai e nohova, helaḡa taudia’ e tore henidia. (Roma 1:7) Una dainai, Paulo ese tau-anina ena kara e karamu Kristen taudia bona lauma ena kara e karamu Kristen taudia edia idau e herevalaia. Edia idau be dahaka?

6, 7. (a) Baibul ai ina hereva “tau-anina” anina be dahaka? (b) Roma 8:4-13 ai, Paulo ese “tau-anina” anina be ede e herevalaia toma?

⁶ Ina hereva “tau-anina,” anina aita laloa guna. Paulo ena hereva anina be dahaka? Baibul ese ina hereva “tau-anina” na dala idauidau ai e ḡaukaralaia. Nega haida, ia anina na ita tauanida korikori eiava hidioda  e herevalaiamu. (Roma 2:28; 1 Kor. 15:39, 50) Ia anina ma ta na bese e herevalaia. Heḡereḡere, Iesu na “tau-anina ai David garana amo e vara,” bona Paulo ese Iuda taudia na e gwauraidia, “tadikakagu bona egu bese taudia.”​—Roma 1:3; 9:3.

⁷ To, Paulo ese Roma karoa 7 ai e gwauraia herevana amo Roma 8:4-13 ai e herevalaia “tau-anina” anina baita dibaiamu. Ia ese “tau-anina” ibadinana karana na “kara dika ena laloani” ida e herevalaia, una na idia “[taudia] regedia lalodiai e vareaiva.” (Roma 7:5) Unu amo ta lalopararamu Paulo na “tau-anina ena kara e karamu taudia” e herevalaidia, idia na “tau-anina ena ḡau mo e lalomu.” Paulo ese sibodia edia ura e lalo badamu eiava edia ura ese e biagudiamu taudia e herevalaidia. Idia ese edia ura dikadia idauidau bona matabodaḡa karadia e badinamu.

8. Dahaka dainai Paulo ese horoa Kristen taudia ediai “tau-anina ena kara” ibadinana ena dika e herevalaia?

⁸ To, reana bo laloamu dahaka dainai Paulo ese horoa taudia ediai, “tau-anina ena kara” ibadinana ena dika e herevalaia. Bona hari ina negai Dirava ese turana ai e halaodiamu bona maorodia e gwauraimu Kristen taudia ediai una dika baine vara diba, a? Momokani, Kristen tauna ese tauanina ena ura dikadia na baine lalo matama diba. Heḡereḡere, Paulo na e gwa Roma ai tadikaka haida na “bogadia [o edia ura] mo” e lalova, unu na mahuta hebou karadia, aniani, eiava moale karadia ma haida. Idia haida ese ‘asi dibadia taudia e koidiava.’ (Roma 16:17, 18; Fili. 3:18, 19; Iuda 4, 8, 12) Bona ina a laloa, Korinto ai tadikaka ta na “tamana adavana ida e heuda hanai.” (1 Kor. 5:1) Unu amo ta dibamu, dahaka dainai Dirava ese Paulo e ḡaukaralaia Kristen taudia ediai “tau-anina ilalona” ena dika e herevalaia.​—Roma 8:5, 6.

9. Roma 8:6 ai Paulo be dahaka se herevalaia?

⁹ Hari ina negai danu una sisiba na mai anina bada. Laḡani momo Dirava e hesiai henia Kristen tauna ese tauanina ḡaudia na baine lalodia matama diba. Paulo na se gwa, Kristen tauna ese aniani, moni ḡaukara, moale karadia eiava headava taudia bae helalokau heheni karana na basine lalo. Lasi. Unu na vaevae eda mauri ai ta lalomu ḡaudia. Iesu ese aniani na e moalelaia, bona ia ese ma haida e ubudia. Ia ese moale karadia na e karava. Bona Paulo ese headava taudia bae helalokau heheni karana na e herevalaia.

10. Roma 8:5, 6 ai ina hereva “tau-anina ilalona” anina be dahaka?

¹⁰ Paulo ena hereva “tau-anina ilalona” anina be dahaka? Paulo ese e ḡaukaralaia Grik herevana anina na, “ta na darana eiava kudouna ai ḡau tamona mo e laloamu, bona una baine karaia dalana e l[aloa hatamu.” Tauanina ena kara e badinamu taudia edia mauri dalana na edia ura ese e biaguamu. Diba bada tauna ta ese Roma 8:5 na ini e herevalaia toma: “Idia na tau-anina ena ura e lalo badamu, e herevalaidia louloumu, karadia e karamu bona e moalelaimu.”

11. Eda mauri lalonai dahaka be mai anina bada ḡaudia ai baita halaodia dibamu?

¹¹ Roma ai Kristen taudia ese bae haeroa edia mauri lalonai idia be dahaka e lalo badava. Idia be edia mauri lalonai “tau-anina ena” ura ḡaudia e lalodia bada, eiava? Ita danu eda mauri lalonai una baita haeroa na namo. Ita be dahaka ta lalo badamu, bona ta herevalaimu ḡaudia ese dahaka e hahedinaraimu? Dina ta ta ai dahaka ta uramu baita kara? Haida na e uramu wain idauidau bae tohodia, edia ruma e hahairaidiamu, dabua matamatadia e tahumu, edia moni e habadamu, holidei e palanilaimu bona ḡau ma haida e karamu. Unu e kara tomamu na asi ena kerere; unu na vaevae eda mauri ai ta karamu ḡaudia. Heḡereḡere, nega ta Iesu na vine ranuna e karaia, bona Paulo na Timoteo e hamaoroa “vine ranuna kuri ta ta” baine inu. (1 Tim. 5:23; Ioa. 2:3-11) To, Iesu bona Paulo ese vine ranuna ‘e herevalaia loulou bona e imodaia,’ eiava? Idia be e urava una mo bae herevalaia, a? Lasi. To, ita be ede bamoda? Eda mauri lalonai dahaka be mai anina bada ḡauna?

12, 13. Dahaka dainai ta lalomu ḡaudia baita haerodia na mai anina bada?

¹² Ta lalo badamu ḡaudia baita haerodia namonamo na mai anina bada. Dahaka dainai? Paulo na eto: “Tau-anina ilalona be mase.” (Roma 8:6) Una na mai anina bada; bema tauanina ena ura baita badinaiamu, hari ina negai eda hetura karana Dirava ida be dikamu bona vaira negai eda mauri baita haboioa dibamu. To, Paulo ena hereva anina na dia ta ese tauanina ena ura baine laloa matama neganai, ia ahuna na mase. Ena kara na baine haidaua diba. Korinto ai matabodaḡa tauna aita laloa, ia na “tau-anina” ena ura e badinaiava dainai kongrigeisen amo e atoa lasi. To, ena kara na e haidaua. Ia ese tauanina ena ura e dadaraia bona dala maorona e badinaia lou.​—2 Kor. 2:6-8.

¹³ Bema una Korinto tauna na ena kara e haidaua, hari ina negai tauanina ena ura e badinaiamu Kristen tauna ese ena kara danu baine haidaua diba. Momokani, Paulo ese tauanina ena ura e laloamu tauna enai baine vara ḡauna e sisibalaia amo Kristen taudia e hagoadadia, edia kara bae haidau na namo.

14, 15. (a) Paulo ese “tauanina ilalona” karana e herevalaia murinai, dahaka danu ma e herevalaia? (b) “Lauma ilalona” anina be dahaka se herevalaia?

¹⁴ Aposetolo Paulo ese “tau-anina ilalona” karana e herevalaia murinai, ina hereva namona ma e gwauraia: “Lauma ilalona be mauri bona maino.” Una na hahenamo namona! Edena dalai una hahenamo baita abia diba?

¹⁵ “Lauma ilalona” anina na dia ta na mauri ai e varamu ḡaudia basine lalodia. Eiava anina na dia ia ese dina ta ta maurina basine laloa to Baibul eiava ena lalokau Dirava enai, bona ena vaira nega helarona mo baine lalodia o baine herevalai. Lasi! Kristen  ginigunadia edia negai Paulo bona ma haida aita lalodia, idia ese aniani, inuinu, bona dina ta ta ai e karava ḡaukaradia na e moalelaiva. Momo na e headavava bona ruma bese maurina e moalelaiava, bona e ḡaukarava sibodia bae henari helaoreana.​—Mar. 6:3; 1 Tes. 2:9.

16. Paulo ena mauri lalonai ia be dahaka e lalo badava?

¹⁶ To, Dirava ena hesiai taudia na edia mauri lalonai vaevae e karava ḡaudia na asie lalodia badava. Heḡereḡere, ena be Paulo na dabua rumadia e turiva tauna, to Baibul ese e hahedinaraiamu ena mauri lalonai ia na hanaihanai haroro bona hahediba ḡaukarana e karaiava. (Kara 18:2-4; 20:20, 21, 34, 35 ba duahi.) Bona Roma ai ena tadikaka bona taihu na e hagoadadiava una ḡaukara bae karaia. Oibe, Paulo na ena mauri lalonai Dirava ena hereva bona hesiai ḡaukara na e lalodia badava. Roma ai tadikaka taihu ese Paulo bae tohotohoa na namo, bona ita danu unu baita kara toma.​—Roma 15:15, 16.

17. Bema ita na “lauma” ḡaudia baita lalo badamu, dahaka hahenamo baita abimu?

¹⁷ Dahaka namo baita davarimu bema lauma ḡaudia baita lalo badamu? Roma 8:6 ese una e hahedinaraiamu, e gwaumu: “Lauma ilalona be mauri bona maino.” Anina na Dirava ena lauma helaḡa ese darada baine hadibaia bona Dirava ena lalohadai baita badinadia. Ta abia daemu eda mauri ai “lauma” ḡaudia baita lalo badamu neganai, ita ese hari ina negai mauri namona baita moalelaiamu. Bona ita ese tanobada ai eiava guba ai mauri hanaihanai baita abiamu.

18. Edena dala ai “lauma ilalona” karana amo maino baita davaria dibamu?

¹⁸ Ina hereva “lauma ilalona be . . . maino,” anina mani aita laloa. Taunimanima momo na e hekwarahimu lalomaino bae abia totona. Ena be idia na unu e kara tomamu, to ita ese una lalomaino na vada ta moalelaiamu. Unu bamona mainona ta hahedinaraiamu dalana ta na, ta ḡaukara goadamu eda ruma bese bona kongrigeisen taudia ida baita maino totona. Ta lalopararamu ita bona eda tadikaka taihu na dia ḡoḡoevadae. Una dainai, hekwakwanai na be varamu bona unu bae vara neganai, ita ese Iesu ena sisiba baita badinaia, eto: “Tadikakamu ida ba herohemaino.” (Mat. 5:24) Unu baita kara tomamu na dia auka, bema baita helalotaomu ita tadikakada o taihuda danu “Maino Diravana” e hesiai heniamu.​—Roma 15:33; 16:20.

19. Edena maino hereadaena baita moalelaia dibamu?

¹⁹ Maino hereadaena bina, “lauma” ḡaudia baita lalodia badamu neganai, ita e karada Diravana ida maino ai baita nohomu. Isaia ese e torea herevana na ena negai e ḡuḡuru, to hari ina negai danu una na e ḡuḡurumu, eto: “Oi [Iehova] e badinamumu tauna na oi ese maino ḡoeva-daena ai o hanohoamu, badina be ia ese oi e abidadama henimumu.”​—Isa. 26:3; Roma 5:1 ba duahia.

20. Dahaka dainai Roma karoa 8 ena sisiba na o moalelaiamu?

²⁰ Una dainai, ena be ita na horoa tauda eiava tanobada paradaisona ai mauri hanaihanai baita abia, to ta moalemu badina Roma karoa 8 ena hereva ese ita na e durudamu. Ta moalemu badina Baibul ese e hagoadadamu eda mauri lalonai “tau-anina” ena ura na basita lalodia momo! To, aonega karana na ina sisiba baita badinaia: “Lauma ilalona be mauri bona maino.” Unu baita kara tomamu na mai ena hahenamo, badina Paulo na eto: “Kara dika davana be mase; a Dirava ena harihari ḡauna na mauri hanaihanai, Keriso Iesu iseda Lohiabada bagunai.”​—Roma 6:23.