Dirava be daika? Una henanadai haerena na ina magasin ena atikol ta ta ai tame dibaia. Matamanai tame diba ḡauna na, Baibul na e gwaumu Dirava ladana na Iehova bona iena kara badana na lalokau. Bona taunimanima edia namo daidiai vada e kara ḡaudia bona be karamu ḡaudia tame diba. To, ita na dounu baita hekwarahi Dirava baita dibaia namonamo totona. Reana bo laloamu unu baina kara toma ena namo be dahaka?

Iehova na e gwauhamatamu, bema ia bo ‘tahuamu,’ ia na bo ‘davariamu.’ (1 Sisiga 28:9) Mani a laloa, bema oi na Dirava bo tahuamu bona bo dibaia namonamomu, ena namo oiemu ai be dahaka? “Iehova ena hetura” namona bo moalelaiamu! (Salamo 25:14) Una hetura karana amo be varamu hahenamodia be dahaka?

Moale korikorina. Baibul ese Iehova na e gwauraiamu “moale Diravana.” (1 Timoteo 1:11) Ia turana ai bo laomu bona iena kara bo tohotohodiamu neganai, moale korikorina bo davariamu. Una ese emu hemami, lalohadai bona mauri na be hanamoamu. (Salamo 33:12) Hari emu mauri ba moalelaia totona, namona na mauri daladia dikadia ba dadarai, kara namodia ba goadalai, bona ma haida ida emu hetura karana namona ba hagoadaia. Bena Salamo e torea tauna ena hereva na bo abia daemu, ia na e gwa: “Dirava badibadinai na nohomu be namo.”​—Salamo 73:28.

Oi na be narimumu. Iehova ese ena hesiai taudia na ini e gwauhamata henidia toma: “Emu raka dalana baina hadibalaimu; lau matagu ese baine itamu tao.” (Salamo 32:8) Una anina na, Iehova ese ena hesiai taudia ta ta na e lalodia badamu bona edia dabu heḡereḡerena ai e durudiamu. (Salamo 139:1, 2) Emu hetura karana Iehova ida be goadamu neganai, bo lalopararamu ia na hanaihanai noho heḡaeḡae oi baine durumu.

Vaira nega namona. Iehova Dirava ese e durumumu hari emu mauri ba moalelaia, to danu dala na e kehoa vaira nega ai mauri namona bavabia. (Isaia 48:17, 18) Baibul na e gwaumu: “Mauri hanaihanai binai: idia ese oi Dirava Korikori tamona bae dibamu, bona Iesu Keriso danu, oi ese o siaia tauna.” (Ioane 17:3) Ini nega aukadiai, Dirava ese e henida helarona na dogo na heto, bona una helaro na “se idaumu bona se mareremu.”​—Heberu 6:19.

Dirava baita dibaia namonamo bona ia turana ai baitala badidia na momo to haida mo tame herevalai. Iehova ena Witnes tauna ta ba hereva henia eiava emai websait jw.org baola heduru bavabi totona.