Dirava Ladana be Daika?
Bema oi na o uramu ta ba dibaia, ḡau ginigunana na bo nanadaiamu, “Oi ladamu be daika?” Bema una henanadai na Dirava bo heniamu, ia be dahaka be gwaumu?
“Lau na Iehova, ladagu bunai.”—Isaia 42:8.
Una lada matamata oiemu ai? Reana bo gwaumu oibe. Baibul e hahanaia taudia momo ese Dirava ladana na asie ḡaukaralaia momomu. Idia ese Dirava ladana e kokiamu bena gabunai dagi ladana “LOHIABADA” e atoamu. To, Baibul e torea revareva ginigunadia lalodiai, Dirava ladana na nega 7,000 mai kahana e hedinarai. Dirava ladana na Heberu revarevadia foa YHWH eiava JHVH ai e hedinarai, bona idaunega amo ema bona hari, nao gado ai e gwaumu “Jehovah.”
Dead Sea Psalms Scroll First century C.E., HEBREW
Tyndale’s translation 1530, ENGLISH
Reina-Valera version 1602, SPANISH
Union Version 1919, CHINESE
Heberu toretorediai bona Baibul momo lalodiai Dirava ladana na hedinarai
DAHAKA DAINAI DIRAVA LADANA NA MAI ANINA BADA?
Dirava enai ia sibona ladana na mai anina bada. Dirava ladana na ta ena amo se abia, ia sibona ese una lada e abia hidi. Iehova na e gwa: “Lau ladagu binai ela hanaihanai; uru iboudiai lalodiai ini ba lalogu toma.” (Esodo 3:15) Baibul ai, Dirava ena dagi ladadia heḡereḡere Siahu Idoinai, Tamada, Lohiabada, eiava taunimanima ladadia heḡereḡere Abraham, Mose, David, bona Iesu na se hedinarai momo, to Dirava ladana hari gabu momo ai e hedinarai. Hereadaena be, Iehova na e uramu ia ladana na baita dibaia. Baibul na e gwaumu: “Ba hadibadia, bena bae diba, oi ladamu na Iehova; oi mo sibomu Herea Mikamika, tanobada idoinai daenai.”—Salamo 83:18.
Iesu enai Dirava ladana na mai anina bada. Momo ese e gwauraiamu Lohiabada Ena Ḡuriḡuri ai, Iesu na ia murinai e rakamu taudia e hamaorodia ini bae ḡuriḡuri toma: “Oi ladamu baia hahelaḡaia.” (Mataio 6:9) Iesu ese Dirava e ḡuriḡuri henia neganai eto: “Tamagu e, ladamu a heatolaia.” (Ioane 12:28) Iesu enai Dirava ladana baine heatolaia eiava baine hanamoa na ḡau badana. Una dainai ia na ena ḡuriḡuri ai ini e gwau toma: “Oi ladamu danu vada na hadibalaidia, bona ma baina hadibalaidia.”—Ioane 17:26.
Dirava mai dibadia taudia ediai Dirava ladana na mai anina bada. Idaunegai Dirava ena taunimanima na e laloparara, Dirava na ladana dainai ena taunimanima baine gimadia bona baine hamauridia diba. “Iehova ladana na kohoro aukana; kara maoromaoro tauna na ia lalonai e heau vareaimu bena e maurimu.” (Hereva Lada-isidia 18:10) “Iehova ladana bae hahanea taudia iboudiai na bae mauri.” (Ioel 2:32) Baibul na e gwa, Dirava ladana ese baine hahedinaraia ia e hesiai heniamu taudia be daidia. “Badina be bese iboudiai na e rakamu, ta ta ena dirava ena dirava ladana ai; a ita ese Iehova, eda Dirava, ladana ai baita raka, ela bona hanaihanai.”—Mika 4:5; Aposetolo Edia Kara 15:14.
DIRAVA LADANA AMO TA DIBAMU ḠAUDIA
Dirava ladana ese e hahedinaraiamu Dirava korikorina be daika. Diba bada taudia momo na e gwaumu, ina lada Iehova anina na “Ia Na E Hahelaomu.” Iehova Dirava ese ia sibona ladana anina baine hahedinaraia namonamo totona, Mose enai ini hereva e gwaurai: “Dahaka ai na uramu baina hahelao, na vada baina hahelao.” (Esodo 3:14, NWT) Dirava ladana ese e hahedinaraia ḡoevaḡoevamu, ia na ḡau iboudiai Ihavaradia Tauna. Danu, ia ladana anina ese e hahedinaraiamu, ia na baine ura ḡauna ai sibona baine hahelao diba, bona ia ese e havara ḡaudia na ena ura heḡereḡerena ai baine ḡaukaralaidia iena ura baine haḡuḡurua totona. Oibe, dagi ladadia be Dirava ena siahu e herevalaiamu, to ia ladana Iehova ese e hahedinaraiamu ia be daika bona dahaka ai e uramu baine hahelao na baine hahelao diba.
Dirava ladana ese e hahedinaraiamu, ita na e lalokau henidamu. Dirava ladana anina ese e hahedinaraiamu, iena lalokau e havara ḡaudia iboudiai, ita edai danu, na dounu e hesiriumu. Heḡereḡere, Dirava ese ladana e hadibadamu, una anina na e uramu ia baita dibaia. Dibana ita na baita uramu ia ladana baita diba dainai, ia ese na de hadibada guna. Unu amo ta dibamu, Dirava na e uramu ia na taunimanima korikorina ta bamona baita laloa bona ia dekena baitala diba, dia kaivakuku ta eiava idau dirava ta na heto baita laloa.—Salamo 73:28.
Dirava ladana baita ḡaukaralaia, unu amo ta hahedinaraiamu ta uramu ia na turada ai bainela. Haheitalai ta, oi na o uramu turamu ai bainela tauna ese ladamu korikorina na baine ḡaukaralaia, ani? To, ede bo hemami tomamu bema ia na se uramu oi ladamu baine ḡaukaralaia? Reana bo laloamu, ia na se uramu oi turamu ai bainela. Dirava danu unu be hemami tomamu. Iehova ese ia ladana na taunimanima ediai e hahedinaraia, bona e uramu una lada na baita ḡaukaralaia. Bema unu baita kara tomamu, Iehova enai ta hahedinaraiamu ita na ta uramu ia baita hakahikahia. Oibe, Iehova na mai dibana “ia ladana e laloa badamu taudia” be daidia.—Malaki 3:16, NWT.
Dirava baita dibaia totona ḡau ginigunana na, ia ladana baita dibaia. To dia una mo, namona na una lada e abia Tauna bona ena kara danu baita dibadia.
DIRAVA LADANA BE DAIKA? Dirava ladana na Iehova. Una lada ese e hahedinaraiamu Dirava korikorina be daika bona ena ura na baine haḡuḡuru diba
