Dirava Ladana be Daika? Dirava sibona ese ladana na e gwauraia, eto: “Lau na Iehova. Ladagu bunai.” (Isaia 42:8) Baibul ai, Dirava ladana na nega 7,000 mai kahana e hedinarai. To, haida ese Baibul e trensleitia neganai, ia ladana gabudiai dagi ladadia e ato, heḡereḡere, “Lohiabada.” Dirava na e uramu ia turana ai baola dainai, e hagoadamumu ia ladana ba “hahanea.”​—Salamo 105:1.

Iehova Ena Dagi Ladadia. Baibul ese Iehova ena dagi ladadia na ini e gwauraidia toma: “Dirava,” “Siahu Idoinai Diravana,” “Ḡau Iboudiai Ihavaradia Diravana,” “Tama,” “Lohiabada,” bona “Ḡaubada.” Baibul ai e tore ḡuriḡuridia momo lalodiai, Iehova ena dagi bona ladana e ḡaukaralaidia.​—Daniel 9:4.

 Dirava Toana. Dirava na lauma. (Ioane 4:24) Baibul ese e hamomokaniamu “tau ta ese Dirava se itaia.” (Ioane 1:18) Baibul ese e hahedinaraiamu ia na mai ena hemami. Una dainai taunimanima ese ia lalona bae hahisia diba eiava bae ‘hamoalea’ diba.​—Hereva Lada-isidia 11:20; Salamo 78:40, 41.

Dirava Ena Kara. Dirava ese taunimanima oromadia na se lalomu. (Aposetolo Edia Kara 10:34, 35) Danu, ia na ‘hebogahisi Diravana, se badu haraḡamu, ena lalokau na be bada herea bona nega iboudiai hereva momokani e gwauraimu.’ (Esodo 34:6, 7, NWT.) To, iena kara badadia na foa.

Siahu. Ia na “Siahu Idoinai Diravana,” ena siahu na asi hetoana, una dainai ena gwauhamata iboudiai e haḡuḡurudiamu.​—Genese 17:1, NWT.

Aonega. Dirava ena aonega na bada herea bona ta ese basine hereaia dibamu. Baibul ese e gwauraiamu ia na “Aonega Diravana tamona.”​—Roma 16:27.

Hahemaoro-maoromaoro. Dirava na nega iboudiai e kara maoromaoromu. Iena kara na “ḡoevadae,” bona “asi ena kara dika.”​—Deuteronomi 32:4.

Lalokau. Baibul na e gwaumu “Dirava na lalokau.” (1 Ioane 4:8) Dirava ese lalokau e hahedinaraiamu bona ia na lalokau ai e honuhonudae. Ia na mai lalokauna ida ḡau iboudiai e karamu, una dainai ita na namo ta davarimu.

Dirava Ena Hetura Karana Taunimanima Ida. Dirava na ita Tamada lalokauna, bona ia na guba ai e nohomu. (Mataio 6:9) Ia baita abidadama heniamu neganai, ia turana ai baita lao dibamu. (Salamo 25:14) Dirava na e uramu ḡuriḡuri amo ia ba raka henia kahi. Bona ‘emu lalo-haguhi na ia enai ba tahoa kau badina ia ese e lalomumu.’​—1 Petro 5:7; Iamesi 4:8.

Iesu Na Dia Dirava. Dirava ese e kara ḡaudia iboudiai lalodiai, Iesu be idau. Badina ia na Dirava sibona ese e karaia. Una dainai Baibul ese e gwauraiamu Dirava Natuna vara-edeana. (Ioane 1:14) Dirava ese Iesu e karaia murinai, “ḡaukara idibaka tauna” ai e halaoa bona idia raruosi ese ḡau iboudiai e kara.​—Hereva Lada-isidia 8:30, 31; Kolose 1:15, 16.

 Iesu Keriso na se gwa ia na Dirava. To, ia na e gwa: “Lau be dibagu ia, badina be iena amo nama, bona ia ese e siaigu.” (Ioane 7:29) Iesu ese ena hahediba ta e hereva henia neganai, Iehova na ini e gwauraia toma: “Tamagu bona Tamamui, egu Dirava bona emui Dirava.” (Ioane 20:17) Iesu e mase murinai Iehova ese e hatorea-isi bena e dae guba, bona unuseniai Dirava idibana kahana ai e helai bona dagi badana ta e henia.​—Mataio 28:18; Aposetolo Edia Kara 2:32, 33.

Iesu Keriso ese Baine Durumu Diba Dirava Turana Ai Baola

Iesu ema tanobada Tamana ena kara e hahedibalaia. Iehova ese Iesu na ini e herevalaia toma, eto: “Ina na Natugu, egu lalokau, ia erena ba kamonai.” (Mareko 9:7) Iesu na Dirava ena kara na mai dibana namonamo, ma ta na dia unu bamona. Ia na e gwa: “Tau ta Tamana asi dibana, Natuna mo sibona, bona Natuna e uramu baine hahedinarai henia tauna.”​—Luka 10:22.

Iesu ese Dirava ena kara na e hahedinarai namonamo. Iesu ese Tamana ena kara na e tohotoho ḡoevaḡoevava dainai, ia na e gwa: “Vada eme itagu tauna ese Tamagu danu vada eme itaia.” (Ioane 14:9) Iesu na ena hereva bona kara amo Tamana ena lalokau e hahedinaraiava dainai taunimanima na Dirava turana ai e laova. Ia na e gwa: “Dala na lau, hereva momokani na lau, mauri danu lau. Tamada dekena baela taudia iboudiai edia dala na lau.” (Ioane 14:6) Danu ma e gwa: “Toma-diho taudia korikori ese Tamada bae toma henia diho lauma ai bona momokani ai, badina be Tamada ese unu bae toma henia diho toma taudia na e tahudiamu.” (Ioane 4:23) Mani a laloa! Iehova ese e tahudiamu taudia na oi heḡereḡeremu taudia, idia na e uramu iena kara bae diba namonamo.