Ede ta diba tomamu “Dirava ena [Gavamani] vada eme kahira-kahira”? (Luka 21:31) Iesu na e peroveta, tuari, tano laga, doe bona dai-hanai goreredia bae vara. Unu hekwakwanai na hari iseda nega ai e varamu.​—Luka 21:10-17.

Danu Baibul ese e hahedinaraiamu, “dina gabedia ai” be varamu ḡauna ta na tanobada gavamanidia edia lohia henunai, taunimanima edia gwau-edeede karadia na be bada hereamu. Una na 2 Timoteo 3:1-5 ai bo duahiamu. Unu kara na hari iseda nega ai ta itamu, bona e hamomokaniamu Baibul ena peroveta herevana na e ḡuḡurumu.

Una anina na Dirava ena Gavamani ese tanobada ai iseda mauri be hanamoamu negana na vada eme kahirakahira. (Luka 21:36) Baibul ai Dirava na e gwauhamata, tanobada bona taunimanima totodia ḡau namodia baine kara. Haida bini.

“Bena lohia siahuna [na Iesu] e henia, bona hairai bona basileia danu, bese idau-idau bona basileia idau-idau bona gado idau-idau iboudiai ese ia isiaina bae lao heni helaoreana; iena lohia siahuna na mia-hanaihanai siahuna, basine puki oho ḡauna, bona ena basileia danu ta ese basine habuaia tari.”​—DANIEL 7:14.

Siri anina: Dirava ese gavamani ta e haginia tanobada ibounai baine lohiaia, bona ia ese Natuna Iesu na una gavamani ena King ai e halaoa.

“Hanua tauna ta basineto ‛E goreregumu.’” ​—ISAIA 33:24.

Siri anina: Ta na basine gorereamu eiava basine disable; bona ita na basita mase to baita mauri hanaihanaimu.

“Tuari ia ese e hadokodiamu ela bona tanobada dokona.”​—SALAMO 46:9.

Siri anina: Tuari bona tuari dainai e varamu hisihisidia iboudiai be oremu.

“Kara dika tauna baine puki, . . . A manau taudia ese tano bae abia.”​—SALAMO 37:10, 11.

Siri anina: Kara dika tauna ta na basio davariamu, to mai kudoudia ibounai ida Dirava e badinaiamu taudia mo bo davaridiamu.

“Ruma bae haginidia bena bae noholai; vine imeadia bae hado, bena anidia bae ani.”​—ISAIA 65:21, 22.

Siri anina: Tanobada na gabu mai hairaina ai be laomu. Eda ḡuriḡuri ai ta noimu ḡaudia na Dirava ese be haḡuḡurumu, una na “tanobada ai” ena ura baine karaia.​—Mataio 6:10.