1. Efeso 6:10-13 ena hereva heḡereḡerena, Iehova ese ita e lalodamu dalana namo hereana ta be dahaka? Ba herevalaia.

IEHOVA ese ita e lalodamu dalana namo hereana ta na, e durudamu inaida baita dadaraidia. Ita e inai henidamu taudia na Satana bona demoni. Idia ese basie hadarereda totona Iehova ese ita iduruda ḡaudia na e henidamu. (Efeso 6:10-13 ba duahi.) Bema Iehova ena heduru baita abia daemu bona enai baita tabekau momokanimu, Diabolo ituari henina ai baita kwalimumu. Bona aposetolo Paulo heḡereḡerena, baita gwau dibamu: “Bema Dirava na iseda kahai, daika ese ita baine tuari henida?”​—Rom. 8:31, Nega Matamata Baibel.

2. Ina atikol ai dahaka baita herevalaimu?

² Ita na Kristen taudia momokanidia dainai, Satana bona demoni edia kara na asita herevalaimu eiava asita lalodia badamu. To ita ese baita laloa bada ḡauna na, dounu Iehova baita dibaia bona baita hesiai henia. (Sal. 25:5) To, Satana ese e ḡaukaralaimu daladia baita diba na namo. Dahaka dainai? Unu amo ia ese basine hadarereda. (2 Ko. 2:11) Ina atikol ai, Satana bona demoni ese taunimanima e koidiamu dalana ta baita herevalaiamu. Danu, edia koikoi karadia baita dadarai daladia baita herevalaimu.

3-4. (a) Babalau karadia be dahaka? (b) Edena dala ai babalau karadia na e bada e laomu?

³ Satana bona demoni ese taunimanima e hakaudia kereremu dalana ta na, babalau karadia amo. Babalau karadia e karamu taudia na e tomamu idia na taunimanima asi dibadia ḡaudia na mai dibadia o bae biagudia diba. Heḡereḡere, haida na e gwaumu mari karadia eiava toa idauidau anidia  itahudia karana amo vaira negana ai bae vara ḡaudia e dibamu. Ma haida be e gwaumu idia na mase taudia ida e herevaherevamu. Haida be meamea karadia e karamu bona unu meamea karadia amo e uramu haida bae vadaridia o bae hadikadia. *

⁴ Edena dala ai babalau karadia na e bada e laomu? Latin America bona Caribbean ai, tano 18 lalodiai hetahu ḡaukarana e karaia neganai, e davaria taunimanima toi amo tamona na mea, babalau, eiava vada karadia e abi daemu, bona momo na e gwaumu idia na lauma taudia ida e herevaherevamu. Africa ai, tano 18 lalodiai danu hetahu ḡaukarana e karaia. Unuseniai, taunimanima rua rua amo ta na e gwaumu ia ese mea karadia na e abi daemu. Momokani, herevana edeseniai ta nohomu, to namona na babalau karadia daidiai baita henahua toho. Badina Satana na “tanobada idoinai” e koiamu.​—Apok. 12:9.

5. Iehova ese babalau karadia be ede e lalodia tomamu?

⁵ Iehova na “kara momokani Diravana.” (Sal. 31:5, NW) Ia ese babalau karana be ede e laloa tomamu? Una kara na e inai heniamu! Iehova ese Israel taudia e hamaorodia, eto: “Ta ese natuna maruanena eiava natuna hahinena na lahi ai basine haḡolea oho. Ta ese babalau eiava mari eiava rohe karadia basine kara, eiava mea ḡaudia basine abi, eiava basine vada, eiava lauma basine nanadaidia, eiava kara hehunidia basine kara, eiava mase taudia basine hahanedia. Badina be unu kara bodaḡadia e karamu taudia na Iehova ese e dadaraidiamu.” (Deu. 18:10-12) Kristen taudia na Iehova ese Israel taudia e henidia Taravatuna henunai asie nohomu. To, ta dibamu Iehova ena lalohadai na se idau; ia ese babalau karadia na e inai henidiamu.​—Mal. 3:6.

6. (a) Satana be edena dalai babalau karadia amo taunimanima e hahisidiamu? (b) Kohelete 9:5 ena hereva heḡereḡerena, mase taudia ediai be dahaka e varamu?

⁶ Iehova ese e hadibadamu babalau karadia daidiai baita henahua toho badina ia na mai dibana Satana na unu kara amo taunimanima e hahisidiamu. Satana na babalau karadia amo ena koikoi herevadia e halasimu​—ena koikoi herevana ta na, mase taudia na gabu ma ta ai e maurimu. (Kohelete 9:5 ba duahia.) Danu, Satana ese babalau karadia amo taunimanima e hagaridiamu, unu amo Iehova ena amo baine hakaudia siri. Iena ura na babalau karadia e karamu taudia ese lauma dikadia bae abidadama henidia, dia Iehova.

7. Iehova ese ita be dahaka e hadibadamu?

⁷ Matamanai tame herevalaia heḡereḡerena, Iehova ese ita na e hadibadamu dahaka baita kara, unu amo Satana bona demoni ese basie koida. Satana bona demoni baita tuari henidia daladia haida mani aita herevalai.

8. (a) Lauma dikadia ese basie koida totona ḡau badana be dahaka baita kara? (b) Salamo 146:4 ese Satana ena hereva be ede e hakoikoia tomamu?

⁸ Dirava ena Hereva baita duahia bona baita laloa dobu. Unu amo lauma dikadia  edia koikoi karadia ese basie koida. Dirava ena Hereva na dare o kaia mai matana na heto, Satana ena koikoi karadia e utu ohomu eiava e hahedinaraidiamu. (Efe. 6:17) Heḡereḡere, Dirava ena Hereva amo ta dibamu, mase taudia ese mauri taudia na basie hereva henidia diba. (Salamo 146:4 ba duahia.) Danu Baibul ese e hadibadamu Iehova sibona ese vaira negai bae vara ḡaudia baine gwaurai diba. (Isa. 45:21; 46:10) Bema hanaihanai Dirava ena Hereva baita duahia bona baita laloa dobu, be durudamu lauma dikadia edia koikoi herevadia basita abi dae bona baita inai henidia.

9. Ededia babalau karadia baita dadarai?

⁹ Babalau karadia iboudiai ba dadarai. Ita na Kristen momokanidia dainai, babalau karadia idauidau na asita karamu. Heḡereḡere, babalau taudia na asita vadivadidiamu eiava dala ma haida ai mase taudia asita hereva henidiamu. Atikol 16 ai ta herevalaia heḡereḡerena, fineral negadiai e karamu kastom karadiai na asita vareaimu, badina unu kastom daidiai taunimanima na e tomamu mase taudia na gabu ta ai e maurimu. Danu mari karana eiava vaira negai bae vara ḡaudia e gwauraimu taudia dekedia na asita laomu vairai bae vara ḡaudia baita diba totona. (Isa. 8:19, NW) Mai dibada kara unu bamodia iboudiai na mai edia dika, bona bema unu kara lalodiai baita vareaimu, ita na Satana bona demoni edia dala vada ta kehomu.

10-11. (a) Aposetolo edia negai haida na hereva momokani e diba neganai dahaka e kara? (b) 1 Korinto 10:21 ena hereva heḡereḡerena, dahaka dainai Kristen ginigunadia baita tohotohodia, bona edena dalai unu baita kara toma?

¹⁰ Mea ḡaudia iboudiai ba nege. Aposetolo edia negai, Efeso ai e nohova taudia haida na babalau karadia e karava. Hereva momokani e diba neganai, kara badana ta e karaia. “Babalau taudia dia gagadoi edia buka e habou, taunimanima iboudiai vairadiai e gabu.” (Apos. 19:19) Idia ta ta na lalodia e hadai lauma dikadia bae dadaraidia.  Ena be edia babalau bukadia davadia na babada, to se hoihoilai eiava haida se henidia. Idia ese e laloa badava ḡauna na Iehova bae hamoalea, edia buka davadia edia bada na se lalo.

¹¹ Unu Kristen taudia ginigunadia edia haheitalai be ede baita tohotohoa toma? Aonega karana na dekedai henari kohudia iboudiai baita nege. Unu kohu haida na, taunimanima ese lauma dikadia amo bae hegima totona e balahenimu henari ḡaudia, heḡereḡere toni o ḡau unu bamodia ma haida.​—1 Korinto 10:21 ba duahia.

12. Moale karadia ta abi hidimu neganai ededia henanadai baita lalo?

¹² Emu moale karadia ba haero namonamo. Sibomu ba henanadai: ‘Lau be mea karadia e herevalaimu bukadia, magasin, eiava Intanet ai e atomu atikol na duahimu, a? Na kamonaimu miusikidia, muvi bona TV program ai na itamu laulaudia, eiava vidio game be ede bamona? Unu ḡau ese babalau karadia e hahedinaraimu, eiava? Unu ese vampire, zombie, eiava ḡau unu bamodia e hahedinaraimu, a? Unu ḡau ese e hahedinaraimu meamea karadia idauidau be dia didika, a?’ Ta ena lalohadai eiava gori amo e halasimu sivaraidia haida na dia babalau o meamea karadia e hahedinaraimu. Ḡau badana na, emu moale karadia o abi hidimu neganai, Iehova ese e inai henimu ḡaudia ba dadarai. Ita na ta uramu baita hekwarahi Dirava vairanai ‘laloda’ baine ḡoeva.​—Apos. 24:16. *

13. Dahaka basita kara na namo?

¹³ Demoni sivaraidia na basio herevalai. Ita na ta uramu Iesu ena haheitalai baita  tohotohoa. (1 Pe. 2:21) Iesu tanobada do sema neganai, ia na guba ai e nohova, bona Satana bona demoni edia kara iboudiai na mai dibana namonamo. To, ia na taunimanima ediai lauma dikadia sivaraidia na se herevalaiva. Iesu na taunimanima ediai Iehova sivaraina mo e herevalaiava, dia Satana. Iesu baita tohotohoa bona taunimanima ediai demoni e karamu karadia na basita herevalai. Namona na eda hereva amo baita hahedinaraia ‘laloda na ḡau namona’ o hereva momokani amo e honu.​—Sal. 45:1.

14-15. (a) Dahaka dainai lauma dikadia garidia na basita gari? (b) Dahaka ese e hamomokaniamu Iehova ese ena taunimanima na e gimadiamu?

¹⁴ Lauma dikadia garidia na basio gari. Ina tanobada ai, ḡau dikadia haida na vaia ita edai be varamu. Heḡereḡere, aksiden, gorere, bona mase na e vara kavamu. To baita gwaumu asita itadiamu laumadia ese unu e havaramu, a? Baibul na e gwaumu: “Nega bona kara na e vara kavamu mo, iboudiai ediai.” (Koh. 9:11) Iehova ena siahu ese demoni edia siahu e hereaia. Heḡereḡere, Dirava ese Satana na e hamaoroa Iobu na basine hamasea. (Iob. 2:6) Mose ena negai, Iehova ese e hahedinaraia iena siahu na Aigupto ena mea karadia e karava pris taudia edia siahu e hereaia. (Eso. 8:18; 9:11) Guba ai, Iehova ese Iesu siahu e henia dainai, Satana bona demoni na guba amo e tahodia dobi tanobada ai. Una ese e hamomokaniamu, Iesu ena siahu na Satana bona demoni edia siahu e hereaia. Bona nega vairai, guri dobu masemasena lalonai be tahodia dobimu, unu amo taunimanima basie hahisidia.​—Apok. 12:9; 20:2, 3.

¹⁵ Hari ḡau momo ese e hamomokaniamu, Iehova na ena taunimanima e gimadiamu. Mani a laloa: Ita ese hereva momokani na tanobada heḡeḡemadai ta harorolaiamu bona haida ta hadibalaidiamu. (Mat. 28:19, 20) Unu amo taunimanima na e dibamu Diabolo ena kara na didika rohoroho. Momokani, bema Satana ena siahu na bada, eda ḡaukara iboudiai baine koudia diba, to ia na dia heḡereḡere unu baine kara toma. Una dainai lauma dikadia garidia na basita gari. Ta dibamu “Iehova matana ese tanobada idoinai e neneamu, ena siahu na ienai asie kereremu taudia idurulaidia ai baine hedinarai totona.”  (2 Si. 16:9) Bema Iehova baita badinaiamu, demoni na asi siahudia ita bae hadikada.

16-17. Lauma dikadia baita dadaraidia totona basita gari ekspiriens na ta mani a herevalaia.

¹⁶ Namona na basita gari lauma dikadia baita dadaraidia, ena be bamoda eiava varavarada ese bae inai henida. Asie garimu taudia na Iehova ese e hanamodiamu. Ghana ai e nohomu taihuna ta ladana, Erica, enai e vara ḡauna mani aita laloa. Erica na laḡanina 21 ai, Baibul e stadilaia. Ia tamana na pris bona babalau tauna, una dainai Erica e hamaoroa edia kastom karana ta baine badinaia; senedia laumadia ediai e bouboulaia vamuna na baine ania. Erica ese una kara e dadaraia neganai, ena ruma bese taudia na e laloava ia ese senedia na se matauraidiamu. Bona e laloava senedia ese be hadikadiamu o be hagorerediamu.

¹⁷ Erica na ena ruma bese ese e doriava una kastom karana baine badinaia, to ia ese una na se abia dae, una dainai ruma amo e lulua. To Witnes taudia haida ese edia ruma ai e abia dae. Iehova ese Erica e hanamoa dalana na, famili haida ese e naria​—idia na Witnes taudia bona ia tadikakana bona taihuna ai ela. (Mar. 10:29, 30) Ena be Erica na varavarana ese e dadaraia bona ena kohu danu e gabu, to ia ese Iehova e badinaia, e bapatiso, bona hari ia na regula painia ta. Ia na demoni garidia na se garimu. Bona ena ruma bese e lalodiamu neganai, ini e gwau tomamu: “Hanaihanai na ḡuriḡurimu egu ruma bese danu Iehova bae dibaia bona bae hesiai henia karana amo moale bae davaria.”

18. Iehova baita abidadama heniamu neganai dahaka hahenamo baita abimu?

¹⁸ Ita iboudai edai hahetoho unu bamodia na asie varamu. To, namona na lauma dikadia baita dadaraidia bona Iehova baita abidadama henia. Bema unu baita kara tomamu, hahenamo momo baita abimu bona Satana ese basine koidamu. Danu, demoni na basita gari henidia, badina idia na dia heḡereḡere eda hesiai ḡaukara Iehova enai bae koua. Ḡau badana na, Iehova ihetura henina karana baita hagoadaia. Hahediba tauna Iakobo na eto: “Dirava isiaina ba lao heni. Diabolo ba ginia ahu, bena ia ese baine heautanimui. Dirava ba raka henia kahi, bena ia ese danu baine raka henimui kahi.”​—Iak. 4:7, 8.