1. Dirava ena hesiai taudia iboudiai be e uramu edena ḡaukara bae karaia, bona dahaka dainai? (Rau 1 laulauna ba itaia.)

KERISO IESU ese murinai e raka taudia e haḡanidia, eto: “Baola, bese iboudiai hahediba ai ba halaodia.” (Mat. 28:19) Dirava ena hesiai taudia iboudiai na e uramu una hesiai ḡaukara bae “haḡuḡurua” daladia bae diba. (2 Ti. 4:5) Ina ḡaukara na mai anina bada, dia ḡaukara haida heḡereḡeredia. To, nega haida eda hesiai ḡaukara baita karaia namonamo na mai hekwarahina.

2. Eda hesiai ḡaukara ta karaiamu lalonai, ta davarimu hekwakwanaidia haida be dahaka?

² Ḡaukara haida na mai anidia bada bona unu ese eda nega bona goada e haoremu. Heḡereḡere eda moni ḡaukara ai hora momo ta ḡaukaramu, badina ta uramu siboda bona eda ruma bese baita naridia. Eiava ruma bese madunadia ma haida, o gorere, lalometau, eiava buruka ena hisihisi idauidau daidiai ta hekwarahimu. Unu hekwakwanai idauidau lalodiai, eda hesiai ḡaukara be ede baita haḡuḡurua toma?

3. Mataio 13:23 ai Iesu ena hereva amo dahaka ta dibamu?

³ Namona na basita lalomanoka bema eda noho daladia daidiai Iehova ihesiai henina ḡaukaradia asita habadamu. Iesu na mai dibana ita ta ta eda goada na idauidau. (Mataio 13:23 ba duahia.) Iehova ese ia dainai ta karamu ḡaudia iboudiai na e lalodia badamu, bema unu na mai laloda idoinai ida ta karamu. (Heb. 6:10-12) To, reana baita laloamu eda noho daladia na heḡereḡere eda hesiai ḡaukara baita habadaia. Ina atikol ai, baita itaiamu edena dala ai eda hesiai ḡaukara baita atoa guna, ḡau  haida baita haidau, bona eda haroro bona hahediba daladia baita hanamo. To, eda hesiai ḡaukara baita haḡuḡurua anina be dahaka?

4. Eda hesiai ḡaukara baita karaia namonamo totona dahaka baita kara?

⁴ Eda hesiai ḡaukara baita karaia namonamo totona, namona na baita haroro bona taunimanima na hahediba ai baita halaodia. To, eda nega baita ḡaukaralaia mo na dia heḡereḡere. Iehova enai, ita ta haroromu badina na mai anina bada. Ita na Iehova bona dekeda taudia ta lalokau henidiamu dainai, eda Kristen hesiai ḡaukara * na mai laloda idoinai ida ta karaiamu. (Mar. 12:30, 31; Kol. 3:23) Mai laloda idoinai ida Dirava baita hesiai henia anina na eda nega bona goada baita heni. Bema baita lalopararamu haroro ḡaukara na hahenamo ta, baita hekwarahimu sivarai namona na taunimanima iboudiai ediai baita herevalaiamu.

5-6. Edena dala ai ta na hesiai ḡaukara baine atoa guna ena be ena nega na dia bada? Haheitalai ta ba herevalaia.

⁵ Mani gita gadaralai e moalelaiamu merona ta aita laloa. Ia na nega idauidau ai ena gita e gadaralaiamu. To, tauani iduruna ḡaudia iabidia totona, ia na stoa ta ai fultaim moni ḡaukarana e karaiamu. Ena be ena ḡaukara gabunai hora momo e ḡaukaramu, to ia ese miusik na e ura henia dikadikamu. Bona e hekwarahimu gita ḡadaralai dalana baine hanamoa, unu amo ena diba baine habadaia. Una dainai, dala e hekehomu negadiai ena gita e gadaralaiamu.

⁶ Una heḡereḡerena, reana emu nega na dia bada ba haroro. To, una ḡaukara na o ura henia dikadikamu. Una dainai o hekwarahimu emu haroro daladia ba hanamo, unu amo sivarai namona amo taunimanima kudoudia ba hamarere. Emu maduna na momo dainai, reana bo laloamu ‘Egu mauri lalonai haroro ḡaukara be ede baina atoa guna toma?’

7-8. Haroro ḡaukara ai Iesu ena haheitalai be ede baita tohotohoa toma?

⁷ Iesu na haroro ḡaukara ai haheitalai hereadaena e hahedinaraia. Iena mauri lalonai Dirava ena Basileia iharorolaina ḡaukarana na e laloa bada. (Ioa. 4:34, 35) Ia na kilomita momo e rakava taunimanima momo baine haroro henidia totona. Dala idauidau e tahuva taunimanima na edia ruma ai eiava gabu idauidau ai baine hereva henidia. Iesu ena mauri lalonai haroro ḡaukara na e atoa gunava.

⁸ Iesu baita tohotohoa bona dala baita tahu sivarai namona na nega bona gabu idauidau ai baita harorolaia. Ita na ta uramu siboda eda ura ḡaudia haida baita dadarai haroro ḡaukara baita karaia totona. (Mar. 6:31-34; 1 Pe. 2:21) Kongrigeisin lalonai haida na spesol, regula, o heduru painia ḡaukara e karaiamu. Ma haida na gado idauna ta e dibaiamu eiava pablisa dia momo gabudia e laomu. Ena be pablisa haida na unu fultaim hesiai ḡaukaradia asie karamu to e haroro hanaihanaimu. Herevana fultaim hesiai ḡaukara ta karaiamu eiava lasi, Iehova na ita se doridamu basita kara diba ḡaudia baita kara. Ia na e uramu iboudai ese ‘sivarai namona’ iharorolaina ḡaukarana baita moalelaia.​—1 Ti. 1:11; Deu. 30:11.

9. (a) Edena dala ai Paulo na haroro ḡaukara e atoa guna ena be nega haida palai e turiva? (b) Aposetolo Edia Kara 28:16, 30, 31 ai, Paulo ena haroro ḡaukara be ede e herevalaia toma?

⁹ Aposetolo Paulo na ena mauri lalonai haroro ḡaukara e atoa gunava. Iena misinari laolao iharuanai, Korinto ai e nohova neganai, iena moni na dia heḡereḡere dainai nega haida palai e turiva. To, palai turi na dia iena ḡaukara badana. Una ḡaukara e karaiava badina na sibona baine henari, unu amo sivarai namona baine harorolaia neganai, Korinto taudia na basie hekwarahi ia dainai moni bae nege. (2 Ko. 11:7) Ena be Paulo na palai turi ḡaukarana e karaiava, to haroro ḡaukara na e atoa gunava, bona Sabati negadia ta ta ai e harorova. Ena noho dalana e heḡereḡere neganai, ia ese ena haroro ḡaukara na e habadaia. “Una negana ai Paulo e haroro goadagoadava, Iuda taudia e hadibadia ḡoevaḡoeva, Iesu na Keriso.” (Apos. 18:3-5; 2 Ko. 11:9) Gabeai, Roma ai laḡani rua dibura rumana ai e noho neganai, ia e vadivadia taudia e haroro henidia bona revareva e tore. (Aposetolo Edia Kara 28:16, 30, 31 ba duahi.) Paulo na lalona e hadaia ḡau ta ese ena haroro ḡaukara basine koua. Eto: “Ina hesiai ḡaukarana vada a abia; taunabunai ai na asia hesikumu.” (2 Ko. 4:1) Paulo heḡereḡerena, ena be moni ḡaukara ta karamu, to eda mauri ai Basileia ḡaukarana na dounu baita atoa guna.

10-11. Bema gorere dainai eda goada na dia heḡereḡere, edena dala ai eda hesiai ḡaukara baita haḡuḡurua diba?

¹⁰ Bema buruka eiava gorere dainai ruma-ta-ruma-ta ai baita haroro na auka, dala ma haida ai baita haroro diba. Kristen taudia ginigunadia na taunimanima e davaridiava gabudia ai e harorova. Idia na dala idauidau​—ruma ta ruma ta, pablik gabudiai, nega bona gabu idauidau​—ai taunimanima e ‘davaridiava’ neganai hereva momokani e herevalaiava. (Apos. 17:17; 20:20) Bema gabu daudaudia baita raka na dia heḡereḡere, taunimanima momo e lao maimu gabuna ta ai baita helai bona raka hanai taudia baita haroro henidia. Eiava nega bona gabu idauidau  ai baita haroro, leta baita tore, o telefon amo baita haroro diba. Pablisa momo na dala unu bamodia amo edia haroro ḡaukara e moalelaiamu, ena be mai edia gorere eiava hekwakwanai ma haida.

¹¹ Ena be emu gorere dainai emu goada na dia heḡereḡere, to emu hesiai ḡaukara ba haḡuḡurua diba. Aposetolo Paulo ena haheitalai ma aita laloa lou. Ia na eto: “Goada e henigumu Diravana dainai lau na ḡau iboudiai ikaradia ai na goadamu.” (Filp. 4:13) Paulo na ena misinari laolaona ta ai e gorerea neganai, una heduru e abia. Galatia taudia ediai e herevalaia, eto: “Lau na nega gunana ai gorere dainai sivarai namo na harorolai henimui.” (Gal. 4:13) Una heḡereḡerena, emu gorere ese dala baine kehoa diba dokta, nesi, bona e narimumu taudia ediai sivarai namona ba harorolaia. Idia momo na e ḡaukaramu dainai pablisa ese edia ruma ai na asie davaridiamu.

12. Ina hereva “matamu baine namo” anina be dahaka?

¹² Iesu na eto: “Tau-anina ena lamepa na mata. Taunabenai, matamu baine namo, taumu anina idoinai baine diari.” (Mat. 6:22) Iena hereva anina be dahaka? Anina na, eda mauri lalonai ḡau haida baita haidau, eiava ḡau tamona mo baita laloa bada, bona ḡau ma haida ese una na basine koua eiava basine hadikaia. Iesu na haheitalai namona, badina ena mauri lalonai ena hesiai ḡaukarana e laloa badava, bona ena hahediba e hadibadia Iehova bae hesiai henia noho bona Iena Basileia bae laloa bada. Iesu baita tohotohoa,  eda mauri lalonai haroro ḡaukarana baita atoa guna, unu amo ita ese Dirava ena “basileia bona ena kara maoromaoro” ta tahua gunamu.​—Mat. 6:33.

13. Dahaka baita kara unu amo eda hesiai ḡaukara baita laloa bada?

¹³ Eda hesiai ḡaukara baita laloa bada dalana ta na, eda mauri lalonai ḡau haida baita haidau, unu amo nega bada baita ḡaukaralaia, haida baita durudia Iehova bae dibaia bona bae lalokau henia. * Heḡereḡere, eda moni ḡaukara horadia baita haidau, unu amo wiki lalonai baita haroro diba. Eiava nega bada e haoremu moale karadia haida baita dadarai.

14. Tadikaka ta adavana ida be dahaka e kara edia hesiai ḡaukara bae habadaia totona?

¹⁴ Elda tauna ta ladana Elias na adavana ida unu e kara toma. Elias na eto: “Ai na dia maoromaoro painia ḡaukara a karaia, to ḡau haida a kara guna. Ai ese ḡau maraḡidia haida a kara emai haroro ḡaukara baia habadaia totona. Heḡereḡere, emai moni na a ḡaukaralai namonamo, nega bada e haoreamu moale karadia a dadarai, bona emai bosi a noidia emai ḡaukara sediual bae haidau. Una dainai, adorahi ai baia haroro diba, Baibul stadi momo baia kara diba, bona hua ta ta wiki harorona na nega rua baia karaia diba. Una na a moalelaia!”

15-16. 1 Timoteo 4:13, 15 ai, eda haroro ḡaukara be ede baita hanamoa toma? (Maua ladana “ Egu Hesiai Ḡaukara Baina Haḡuḡurua Totona Baina Kara Ḡaudia” ba itaia.)

¹⁵ Eda hesiai ḡaukara baita haḡuḡurua dalana ma ta na, eda haroro ḡaukara ikarana  dalana baita hanamoa. Ḡaukara taudia na hanaihanai treinin e abimu, edia diba bona aonega bae habadaia totona. Basileia e harorolaiamu taudia danu unu e kara tomamu. Namona na hanaihanai eda hesiai ḡaukara baita karaia namonamo daladia baita diba.​—Her. 1:5; 1 Timoteo 4:13, 15 ba duahi.

¹⁶ To, edena dala ai eda hesiai ḡaukara baita karaia namonamo diba? Wiki ta ta ai Mauri Bona Hesiai Ḡaukara Hebouna ai ta abimu hahediba herevadia baita hakala namonamo. Ina hebou ai e hadibadamu ḡaudia ese e durudamu eda haroro ḡaukara ikarana dalana baita hanamoa. Heḡereḡere, seamani ese stiuden edia asainmen kahanai sisiba e henimu neganai, ena heduru herevadia amo eda haroro ḡaukara baita hanamo daladia baita dibamu. Gabeai ta enai sivarai namona baita harorolaia neganai unu heduru herevadia baita ḡaukaralai diba. Eda haroro e nariamu tadikakana amo heduru baita tahu eiava ia ida baita haroro hebou, o haroro e manada pablisa ta, o painia ta eiava seket tauna ida baita ḡaukara hebou. Hahediba Toolbox ai tulu idauidau iḡaukaralaidia daladia baita manadalaimu neganai, eda haroro bona hahediba ḡaukaradia baita moalelaimu.

17. Emu hesiai ḡaukara bo haḡuḡuruamu neganai, emu hemami be ede bamona?

¹⁷ Iehova ida ta “ḡaukara heboumu” na hahenamo badana ta! (1 Ko. 3:9) “Ḡau namodia toadia” bo dibamu bona Kristen hesiai ḡaukarana bo laloa badamu neganai, ‘Iehova isiaina bo lao henimu mai moalemu ida.’ (Filp. 1:10; Sal. 100:2) Oi na Dirava ena hesiai tauna ta dainai, bavabia dae momokani, ia ese goada baine henimu emu hesiai ḡaukara ba haḡuḡurua, herevana emu goada na mai hetoana eiava hekwakwanai idauidau bo davarimu. (2 Ko. 4:1, 7; 6:4) Reana emu noho dalana na heḡereḡere hora momo lalodiai ba haroro, eiava oi na dia heḡereḡere unu ba kara toma, to mai lalomu idoinai ida emu hesiai ḡaukara bo karaiamu neganai bo moalemu. (Gal. 6:4) Emu hesiai ḡaukara bo haḡuḡuruamu neganai, o hahedinaraiamu oi na Iehova bona dekemu taudia o lalokau henidiamu. “Unu ba kara toma, bena sibomu ba hahemauri, bona bae kamonai henimu taudia danu ba hamauridia.”​—1 Ti. 4:16.