PAULO ena negai taunimanima bae gui kadadia na lasi. Laolao taudia haida na kada ai bae gui totona, haida e nanadaidiava bema mai dibadia kago iudadia kadana ta na idia be laomu gabuna be laomu bona taunimanima bae gui diba. (Apos. 21:2, 3) Bema kada na laolao tauna e uramu bainela gabuna se laova, to wofu ma ta ai e stopuva neganai, laolao tauna na kada ma ta e tahuava unu amo baine gui hanai bena e uramu gabuna bainela.​—Apos. 27:1-6.

Kada na mai edia heau negadia, to sediual korikorina ta se badinaiava. Bema nega na dika, se heauva, to dia una mo, kada e tariva taudia na badi haida daidiai asie urava bae heau, heḡereḡere bema galo ta na kada varona ai e helaiva bona e taiva, eiava kone ai bouti dikana ta e itaiava neganai, e laloava ḡau dikana ta na ediai be varamu. Kada e tariva taudia na lai ena toa e itaiava namo neganai wofu e rakataniava. Laolao tauna na baine gui kadana ta e davariava neganai, ena kohu e abiva bona kada abi gabunai kada ena heau negana e nariava.

Histori e stadilaimu tauna ta, Lionel Casson, na eto: “Rome ai taunimanima ese bae gui kadadia bae davaridia na haraḡa. Badina kada abi gabuna na Tiber River ai. Ostia taonina badinai kada e naridiamu ofesidia na momo. Unu ofesi momo na Narbonne [hari France] bona Carthage [hari Tunisia] edia ofesi, . . . bona kampani ma haida danu. Ta na baine laolao kadana ta e urava baine sekea neganai unu ofesi ta e laova.”

Kada ese laolao taudia e durudiava, to ma mai ena hekwakwanai danu. Nega haida, Paulo na ena misinari laolao ai e gui kadadia haida na e dika.​—2 Ko. 11:25.