1-2. Dahaka dainai Iesu lalona na e hekwarahi bada herea?

TANOBADAI Iesu na ena mauri gabedia lalodiai e lalohekwarahi bada herea. Ia na kara dika taudia ese do bae hahisia bona bae hamasea. To dia una mo e lalohekwarahilaiava. Ia na Tamana e lalokau henia badava bona e urava baine hamoalea. Una dainai, dibana bema be haheaukamu ela bona dokona, ia ese Iehova ladana be abia isimu. Danu, ia na taunimanima e lalokau henidiava, bona e diba bema ia ese Iehova be badinaiamu, dala na be hekehomu ita ese mauri hanaihanai baita abia totona.

² Ena be Iesu na e lalohekwarahi to lalomaino e abia. Ena aposetolo taudia e hamaorodia, eto: “Egu maino name henimui.” (Ioa. 14:27) Ia na “Dirava ena maino” e abia, una na Iehova e hetura heniamu tauna ese e mamiamu mainona. Una maino dainai Iesu lalona na se hekwarahi.​—Filp. 4:6, 7.

3. Ina atikol ai dahaka baita herevalaimu?

³ Iesu enai e vara hisihisidia na ita edai basie varamu, to Iesu murinai e rakamu taudia iboudiai ese hahetoho na be davarimu. (Mat. 16:24, 25; Ioa. 15:20) Danu, Iesu heḡereḡerena, nega haida baita lalohekwarahimu. Dahaka baita kara unu amo basita lalohekwarahi bona lalomaino baita abia? Tanobada ai Iesu ena hesiai ḡaukara lalonai e durua ḡaudia toi mani aita herevalai, bena hahetoho ta davarimu negadiai ia baita tohotohoa daladia baita dibamu.

4. 1 Tesalonika 5:17 ena hereva heḡereḡerena, ede ta diba tomamu Iesu do se hamasea hanuaboina ai ia na e ḡuriḡuri loulouva?

⁴ 1 Tesalonika 5:17 ba duahia. Iesu na tanobada ai ena dina ginigabenai e ḡuriḡuri loulou. Iena hahediba ida ena  mase bae laloatao hebouna e hamatamaia neganai, ia na parao bona wain ḡuriḡurina e karaia. (1 Ko. 11:23-25) Pasova e karaia gabuna do se rakatania neganai, ia na ena hahediba ida e ḡuriḡuri. (Ioa. 17:1-26) Una hanuaboi ai, ena hahediba ida Olive Ororona ai e kau neganai ia na e ḡuriḡuri loulouva. (Mat. 26:36-39, 42, 44) Bona Iesu baine mase horanai ena hereva oredia na ḡuriḡuri ai e gwaurai. (Luk. 23:46) Una dina ai e vara ḡaudia iboudiai na Iesu ese Iehova enai e ḡuriḡurilai.

5. Dahaka dainai aposetolo taudia e gari?

⁵ Iesu ese hahetoho e haheaukalai badina ta na, ia na ḡuriḡuri amo Tamana enai e tabekau. To, bae dabaia tao hanuaboina ai aposetolo taudia na asie ḡuriḡuri. Una dainai, Iesu idabai-taona taudia ela neganai idia na e gari. (Mat. 26:40, 41, 43, 45, 56) Hahetoho ta davarimu neganai, Dirava baita badinaia dibamu bema Iesu heḡereḡerena baita ḡuriḡuri loulou. Dahaka baita ḡuriḡurilai diba?

6. Edena dala ai abidadama ese baine duruda lalomaino baita abia?

⁶ Iehova baita noia diba eda ‘abidadama baine habadaia.’ (Luk. 17:5; Ioa. 14:1) Eda abidadama baine goada na namo, badina Satana na Iesu murinai e rakamu taudia iboudiai be tohodiamu. (Luk. 22:31) Edena dala ai hekwakwanai ta davari louloumu negadiai, abidadama ese baine duruda lalomaino baita abia? Hahetoho ta ihanaina totona ḡau iboudiai ta karamu neganai, Iehova imanai baita rakatania, badina ta abia dae momokanimu ia ese nega korikori ai baine duruda. Danu, ta dibamu, ia sibona  mo mai dibana ita be ede baine duruda toma.​—1 Pe. 5:6, 7.

7. Robert ena hereva amo dahaka ome diba?

⁷ Ḡuriḡuri karana ese baine duruda lalomaino baita abia, herevana ita edai dahaka hekwakwanai bae vara. Robert ena sivarai mani aita laloa, ia na elda goadana ta bona laḡanina na 80 heḡereḡerena. Ia na eto: “Filipi 4:6, 7 ena hereva ese e durugu egu ai e varava hekwakwanaidia baina haheaukalai. Nega haida egu moni na dia heḡereḡere. Bona egu elda madunana amo e kokigu.” Dahaka ese Robert e durua lalomaino baine abia? Ia na e gwaumu: “Lalogu e hekwarahimu negadiai haraḡa herea na ḡuriḡurimu. Na abia dae momokanimu ḡuriḡuri loulou karana ese e durugumu lalomaino baina abia.”

8. Ioane 8:29 ena hereva heḡereḡerena, Iesu lalomaino e abia badina ma ta be dahaka?

⁸ Ioane 8:29 ba duahia. Iesu na daḡedaḡe e davariva negadiai danu lalomaino e abia, badina dibana ia na Tamana e hamoaleava. Ia na Dirava e badinaia hanaihanaiva, ena be nega haida una na mai hekwarahina. Tamana e lalokau heniava dainai ena mauri lalonai Iehova ena hesiai ḡaukara e laloa badava. Tanobada do sema neganai, ia na Dirava ena “ḡaukara idibaka tauna.” (Her. 8:30) Bona tanobada ema neganai, mai ena ura ida haida ediai Tamana e herevalaia. (Mat. 6:9; Ioa. 5:17) Iesu ese una ḡaukara na e moalelaia.​—Ioa. 4:34-36.

9. Dahaka dainai haroro goadagoada karana ese lalomaino baine henida diba?

⁹ Iehova baita badinaia bona hanaihanai  ‘ena ḡaukara lalonai baita goada balaheni’ neganai, ita na Iesu ta tohotohoamu. (1 Ko. 15:58) Baita ‘haroro goadagoadamu’ neganai eda hekwakwanai na basita lalodia momomu. (Apos. 18:5) Heḡereḡere, haroro ḡaukara ai ta davaridiamu taudia edia hekwakwanai na ita eda e hanaia. To, Iehova ilalokau henina karana e dibaiamu bona iena sisiba e badinaiamu neganai, edia mauri e haidaumu bona e moalemu. Una ta itaiamu neganai, ta diba momokanimu Iehova ese na ita be naridamu. Bona una ese lalomaino e henidamu. Taihu ta enai una na e vara; ia na e lalometauva bona e hemamiva ena mauri na asi anina. Ini e gwau toma: “Haroro ḡaukara ai na bisimu neganai, egu hemami na namo bona na moalemu. Na laloamu na haroro momomu dainai, Iehova na lau dekedekeguai.”

10. Brenda ena hereva amo dahaka ome diba?

¹⁰ Taihu ta ladana Brenda enai e vara ḡauna mani aita laloa. Ia bona natuna kekenina na gorere badana ta (multiple sclerosise) e davaria. Brenda na se rakamu dainai wilsea ai helaimu bona tauanina na asi goadana. Ia na nega haida ruma ta ruma ta ai e haroromu, to nega momo na revareva e toremu. Ia na ini e gwau toma: “Na laloparara bona na abia dae egu gorere na asi ihanamona dalana ta, una dainai lalogu na hadaia haroro ḡaukara baina laloa bada. Na haroromu neganai, asina lalohekwarahimu. To, ruma ta ta ai eiava revareva amo na hereva henidiamu taudia baina durudia daladia hari na lalomu. Una ese e durugumu nega vaira helarona baina laloa.”

11-13. (a) Aposetolo taudia bona ma haida be edena dalai e hahedinaraia idia na Iesu turana korikoridia? (b) Iesu na turana ese e durua dainai, iena hemami be ede bamona?

¹¹ Iesu e harorova negadiai, ena aposetolo taudia na ia turana namodia. Idia na Baibul ese e gwauraiamu tura korikoridia na heto. Baibul na e gwaumu: “Hetura korikori tauna ena hedaro-boubou ese tadikaka ena hedaro-boubou e hereaiamu.” (Her. 18:24) Iesu ese tura unu bamodia na e lalokau henidiava. Iena hesiai ḡaukara lalonai, ia tadikakana korikoridia ese ia na asie abidadama henia. (Ioa. 7:3-5) Nega ta varavarana na e tomava ia na e kavaia. (Mar. 3:21) To aposetolo taudia be Iesu turana korikoridia dainai, ia do se mase hanuaboinai, e hamaorodia, eto: “Umui be e dibaḡaniguva negadia ai dekegu ai o noho tarika-tarikava taumui.”​—Luk. 22:28.

¹² Ena be nega momo aposetolo taudia na Iesu lalona e hahisiava, to edia kerere na se lalo badina e diba idia na ia e abidadama heniava. (Mat. 26:40; Mar. 10:13, 14; Ioa. 6:66-69) Iesu ese ena hanuaboi ginigabena ai, unu abidadama tataudia e hamaorodia, eto: “Turagu baina gwauraimui; badina be Tamagu ena amo na kamonai herevadia iboudiai vada na hamaorolaimui.” (Ioa. 15:15) Momokani, Iesu na turana veridia ese e hagoadaia. Ena hesiai ḡaukara lalonai e duruava dainai, una ese Iesu kudouna na e hamoalea.​—Luk. 10:17, 21.

¹³ Dia aposetolo taudia mo, to Iesu turana ma haida​—tatau bona hahine​—ese danu haroro ai bona dala idauidau ai e durua. Idia haida na edia ruma ai Iesu e  abia daeva bona e aniani hebouva. (Luk. 10:38-42; Ioa. 12:1, 2) Haida be ia e bamoava bona edia kohu e ḡaukaralaiva ia iduruna. (Luk. 8:3) Iesu turana namodia ese ia na e duruava badina mai dibadia ia ese danu be durudiamu. E durudiava neganai, ia ese iena kara namodia bae halou lalohadaina na se abia. Ena be turana na dia ḡoevadae to Iesu ese edia heduru na e abi dae. Ta dibamu idia ese danu Iesu e durua dainai lalomaino e abia.

14-15. Edena dalai tura namodia baita davaridia, bona idia ese ede be duruda tomamu?

¹⁴ Tura namodia ese be durudamu Iehova baita badinaiamu. Bema o uramu tura namona ta ba davaria, namona na oi danu tura namona ta ai baola. (Mat. 7:12) Heḡereḡere, Baibul ese e hagoadadamu eda nega bona goada baita ḡaukaralai, “e dabumu” taudia baita durudia. (Efe. 4:28) Emu kongrigeisin ai ba durua diba tauna ta o laloamu, a? Bema pablisa ta na buruka eiava gorere dainai rumai mo e nohomu, stoa ai iena ura ḡaudia ba hoi diba, a? Bema ruma bese ta edia moni na dia heḡereḡere, idia daidiai aniani ba heḡaeḡaelai diba, a? Bema jw.org^® websait bona JW Library^® app iḡaukaralaidia daladia na mai dibamu, emu kongrigeisin ai haida ba durudia unu app bae ḡaukaralai totona, a? Haida baita durudiamu neganai baita moalemu.​—Apos. 20:35.

¹⁵ Eda hekwakwanai negadiai turada ese be durudamu bona lalomaino baita abiamu. Iobu ese ena hekwakwanai e herevalaiva neganai, Elihu na e hakalava,  una heḡereḡerena eda hemami ta herevalaimu neganai, turada na be hakalamu. (Iob. 32:4) Idia ese basie hamaorodamu ita be dahaka baita kara, to Baibul amo heduru herevadia e henidamu neganai, namona na baita kamonai. (Her. 15:22) King David ese turana edia heduru na mai manauna ida e abi dae heḡereḡerena, ita danu turada edia heduru na mai manauda ida baita abi dae. (2 Sa. 17:27-29) Momokani, tura namodia na Iehova ena harihari ḡaudia.​—Iak. 1:17.

16. Filipi 4:6, 7 ena hereva heḡereḡerena, lalomaino baita abia diba dalana tamona be dahaka? Ba herevalaia.

¹⁶ Filipi 4:6, 7 ba duahi. Dahaka dainai Iehova na e gwaumu, ia ese e henimu mainona na baita abia diba “Keriso Iesu lalonai”? Iehova ena ura ihaḡuḡuruna ai Iesu ena ḡaukara baita lalopararalaiamu bona baita abidadama heniamu neganai, baine mia hanaihanai mainona baita abia dibamu. Heḡereḡere, Iesu ese mauri davana e heni dainai, Dirava ese eda dika na baine gwautao diba. (1 Ioa. 2:12) Una dainai ta moalemu, ani? Iesu na Dirava ena Basileia Pavapavana dainai, Satana bona ena orea ese e havaramu hisihisidia iboudiai baine haoredia. (Isa. 65:17; 1 Ioa. 3:8; Apok. 21:3, 4) Una na helaro namona, ani? Danu, ena be Iesu ese e henida ḡaukarana na ḡaukara badana, to ina nega dokonai ia na ita ida bona e durudamu una ḡaukara baita haḡuḡurua. (Mat. 28:19, 20) Una ese e lalogoada e henidamu, ani? Lalomaino baita abia totona moale, helaro bona lalogoada na mai anidia bada.

17. (a) Edena dala ai Kristen tauna ta ese ena lalomaino na dounu baine dogoatao? (b) Ioane 16:33 ai Iesu ena gwauhamata heḡereḡerena, dahaka baita kara diba?

¹⁷ Hahetoho badadia daidiai o lalometaumu neganai, edena dala ai emu lalomaino na dounu ba dogoatao? Iesu ba tohotohoa. Ginigunana na, ba ḡuriḡuri bona ḡuriḡuri karana na basio hadokoa. Iharuana be, Iehova ba badinaia bona ba haroro goadagoada, ena be nega haida una na mai hekwarahina. Bona ihatoina be, hahetoho lalodiai turamu ediai heduru ba tahu. Bena Dirava ena maino ese lalomu bona daramu baine gimadia. Iesu heḡereḡerena, o davarimu hahetohodia na bo hadarerediamu.​—Ioane 16:33 ba duahia.