1-2. (a) Satana be ededia dala ai taunimanima e koidiamu? (b) Ina atikol ai dahaka baita herevalaimu?

SATANA, “koikoi idoidiai tamadia,” na Adam bona Heva edia nega amo ema bona hari taunimanima e koidiamu. (Ioa. 8:44) Ena hahediba koikoi herevadia lalodiai, ia na etomu mase taudia na doini mamauri eiava gabu ta ai e maurimu. Unu hahediba koikoidia daidiai kastom karadia bona lalohadaidia momo ese e hahedinaraimu taunimanima na mase taudia laumadia garidia e garimu. Una dainai, eda tadikaka bona taihu haida na edia ruma bese eiava hanua lalonai ta e masemu neganai, e hekwarahimu edia “abidadama” bae dogoatao.​—Iud. 3, NW.

² Bema bae dorimu una kastom karana ta ba karaia, dahaka ese baine durumu diba Baibul ese mase e herevalaia dalana ba gwauraia hedinarai? (Efe. 6:11) Bema Kristen tauna ta na ena bese ese e doriamu Dirava ese e inai henimu kastom karadia ai baine vareai, ede ba hagoadaia toma? Ina atikol ai Iehova ese e durudamu dalana baita herevalaiamu. To mani Baibul ese mase e herevalaia dalana aita laloa guna.

3. Koikoi herevana ginigunana dainai dahaka e vara?

³ Dirava na se uramu taunimanima bae mase. Adam bona Heva na bae mauri hanaihanai totona, Iehova bae badinaia na namo; Ia ese e henidia haheḡanina na dia auka, eto: “A namo bona dika idibalaidia auna huahuana una mo basio ania; badina be ia bavania dinana ai oi na ba mase vaitani.” (Gen. 2:16, 17) Bena Satana ese hekwakwanai e havaraia. Ia ese gaigai ta amo Heva e hereva henia, eto: “Momokani, umui na basio mase.” Heva ese una koikoi herevana e abia dae bona au huahua e ania. Gabeai, adavana e henia bona ia danu una au huahua e ania. (Gen. 3:4, 6) Una dainai, kara dika bona mase na taunimanima iboudiai e henidia hanai.​—Rom. 5:12.

4-5. Satana be edena dalai taunimanima doini e koidiamu?

 ⁴ Adam bona Heva na e mase, Dirava ena hereva heḡereḡerena. To Satana na dounu mase dainai koikoi herevadia e gwauraimu. Gabeai, ia ese koikoi herevadia ma haida e halasi. Momo ese e hahedibalaiamu koikoi herevana ta na, ta e masemu neganai laumana na e maurimu, reana lauma edia gabu e laomu. Una nega amo ema bona hari, momo ese una koikoi herevana na e abia daemu.​—1 Ti. 4:1.

⁵ Dahaka dainai taunimanima momo ese Satana ena koikoi herevana e abia daemu? Satana na mai dibana taunimanima na mase garina e garimu, una dainai e koidiamu. Bona Dirava ese ita e karada na baita mauri hanaihanai, una dainai asita uramu baita mase. (Koh. 3:11) Mase na ita inaida.​—1 Ko. 15:26.

6-7. (a) Satana ese mase anina korikori be ede e hunia tomamu? Ba herevalaia. (b) Edena dalai Baibul ena hereva ese e durudamu mase taudia garidia basita gari?

⁶ Ena be Satana na unu e kara tomamu, to Baibul ese mase anina na e hahedinaraia ḡoevaḡoeva. Una dainai, hari, momo na Baibul ena hereva momokani mai dibadia bona e harorolaiamu herevana na, mase taudia na ḡau ta asi dibadia bona idia na do bae toreisi lou. (Koh. 9:5, 10; Apos. 24:15) Una ese tauhalo e henidamu dainai taunimanima e masemu neganai asita garimu bona asita daradaramu. Heḡereḡere, ita, Iehova ena hesiai tauda, na mase taudia asita gari henidiamu eiava eda lalokau tauna ta e masemu neganai, ta dibamu ia enai ḡau dikana ta basine varamu. Idia na gabu idauna ta ai asie maurimu bona ta basie hahisia diba. Idia na vaitani mamahuta mamase. (Ioa. 11:11-14) Bona mai dibada, mase taudia na hora eiava laḡani hida vada e hanai na asi dibadia. Una dainai, guna e mase taudia be toreisi loumu neganai be hoamu, idia na vaitani varanivarani mo matadia e hakapu bena ma e keho na heto.

⁷ Baibul ese mase taudia ediai e varamu ḡauna e herevalaia dalana na dia auka bona baita lalopararalaia diba, ani? Una na idau Satana ena hahediba koikoidia amo! Satana na dia taunimanima mo e koidiamu, to Ihavarada Diravana ladana e hadikaiamu danu. Satana ese e havaraia dika baita lalopararalaia namonamo totona, ini henanadai baita lalodia: Satana ena koikoi herevadia be edena dalai Iehova ladana e hadikaiamu? Unu koikoi herevadia daidiai taunimanima e laloamu Keriso ena mauri davana bae abidadama henia na asi anina, a? Unu koikoi herevadia ese taunimanima be ede e hahisidia tomamu?

8. Ieremia 19:5 ena hereva heḡereḡerena, Satana ena koikoi herevadia ese Iehova ladana be ede e hadikaia tomamu?

⁸ Satana ena koikoi herevadia ese Iehova ladana e hadikaiamu. Iena hahediba koikoi herevana ta na, mase taudia na lahi lalonai e hisihisimu. Hereva unu bamodia ese Dirava ladana na e hadikaiamu. Edena dala ai? Taunimanima na e laloamu lalokau Diravana ena kara na Diabolo ena kara heḡereḡerena. (1 Ioa. 4:8) Una hereva dainai emu hemami be ede bamona? Unu koikoi herevadia daidiai Iehova ena hemami be ede bamona? Iehova na taunimanima ihahisidia karadia iboudiai e inai henimu.​—Ieremia 19:5 ba duahia.

9. Satana ena koikoi herevadia daidiai taunimanima ese Keriso ena mauri davana, Ioane 3:16 bona 15:13 ese e herevalaia ḡauna, be ede e laloa tomamu?

⁹ Satana ena koikoi herevadia daidiai taunimanima na e laloamu Keriso ena mauri davana bae abidadama henia na asi anina. (Mat. 20:28) Satana ena koikoi herevana ma ta na, taunimanima e masemu neganai laumadia na e maurimu. Bema una na momokani, taunimanima na bema mauri hanaihanai. Bona mauri hanaihanai baita abia totona Keriso ese ena mauri ita daidai bema heni na asi anina. To baita helalotao Keriso ena boubou ḡauna ese ena lalokau hereadaena taunimanima ediai e hahedinaraia. (Ioane 3:16; 15:13 ba duahi.) Hahediba koikoidia ese una harihari ḡauna hereadaena na ḡau asi anina ai e halaoamu neganai, Iehova bona Iesu edia hemami mani a laloa!

10. Satana ena koikoi herevadia ese taunimanima be ede e hahisidia tomamu?

¹⁰ Satana ena koikoi herevadia ese taunimanima e hahisidiamu. Tama sina haida na natudia e masemu neganai, haida ese e hamaorodiamu e gwaumu, natudia na Dirava ese e boiria guba ai aneru ta ai baine halaoa. O laloamu una koikoi herevana ese edia hisihisi be e hamaraḡiamu eiava e habadaiamu? Hel lahina ena hahediba koikoina dainai, guna haida na e laloava idia na mai edia maoro dubu ena hahediba herevadia e dadarai taudia bae panisidia, heḡereḡere e taudia daeva bena lahi ai e gabudiava. Buka ta ese Spanish Inquisition o kota e herevalaia eto, unu e kara toma taudia na e laloava, taunimanima na una dala amo hel lahina ena hisihisi bae mamia, unu amo do se mase ai bae helalo-kerehai, bena bae mase neganai idia na hel basiela. Tano haida ai, taunimanima na e uramu edia sene taudia ese bae hanamodia dainai, e tomadiho henidiamu bona e matauraidiamu. Haida be e uramu edia sene taudia bae hamoaledia unu amo basie hahisidia. Unu koikoi herevadia ese taunimanima na tauhalo se henidiamu, to ediai lalohekwarahi bona gari e havaraiamu.

11. Edena dala ai varavarada eiava turada ese be doridamu Dirava ena Hereva basita badinaia?

¹¹ Dirava bona iena Hereva iura henidia karana ese be hagoadadamu Iehova baita badinaiamu, ena be varavarada eiava turada ese bae dorida, mase negadiai Baibul ese e taravatumu karadia baita kara. Reana be hahemaraidamu be gwaumu, ita na mase tauna asita lalokau heniamu bona asita matauraiamu. Eiava reana be gwaumu eda kara dainai mase tauna na dala haida ai mauri taudia be hahisidiamu. Baibul ena hereva momokani be ede baita badinaia toma? Mani Baibul ena hahekau herevadia baita badinadia daladia aita herevalai.

12. Mase negadiai ededia kastom karadia eiava lalohadai na dia Baibul ena hereva heḡereḡerena?

¹² Lalomu ba hadaia Baibul ena taravatu e utumu kastom karadia o lalohadaidia “amo  ba raka oho, dauhai ba noho.” (2 Ko. 6:17) Caribbean tanona ta ai, momo na e abia daemu, ta e masemu neganai laumana na e loaloamu bona ia do maurinai se kara namo heniava taudia e hahisidiamu. Buka ta na e gwaumu, mase tauna “laumana” ese hanua taudia edia noho baine hadikaia diba. Africa taudia edia kastom ta na, mase tauna ena rumai hevarivari na e koumu bona mase tauna laulauna na haba kahana e giroa laomu. Badina be dahaka? Haida na e gwaumu unu amo mase taudia na sibodia basie heita! Ita na Iehova ena hesiai tauda dainai, Satana ena koikoi herevadia eiava koikoi karadia na basita abi dae.​—1 Ko. 10:21, 22.

13. Iakobo 1:5 ena hereva heḡereḡerena, bema kastom karana ta so lalopararalaiamu, namona be dahaka ba kara?

¹³ Bema kastom karana ta na so lalopararalaia namonamomu, ḡuriḡuri amo Iehova ba noia aonega baine henimu. (Iakobo 1:5 ba duahia.) Bena eda pablikeisin ai heduru herevadia ba tahu. Bema heḡereḡere, emu kongrigeisin elda taudia amo heduru ba tahu. Idia ese oi na basie hamaoromumu dahaka ba kara, to Baibul ena hahekau herevadia, heḡereḡere ina atikol ese e herevalai ḡaudia be herevalaimu. Unu dala bo badinamu neganai, ‘lalomu’ o daramu na bo hadibaiamu, bena be durumumu “namo bona dika toadia” bo dibamu.​—Heb. 5:14.

14. Ededia dala ai haida basita hahekwakwanaidia?

¹⁴ “Ḡau iboudiai ba kara Dirava iheatolaina ai” bona haida basio hahekwakwanaidia. (1 Ko. 10:31, 32) Bema ta uramu kastom o sene karana ta ai baita vareai, namona na baita lalo, eda abi hidi ese tadikakada lalodia be hahekwakwanaimu eiava lasi. Vaia, ita na asita uramu ta baita hahekwakwanaia. (Mar. 9:42) Danu, asita uramu dia Witnes taudia baita habadudia. Lalokau dainai mai hematauraida ida baita hereva henidia, unu amo Iehova baita heatolaia. Taunimanima ida basita heai eiava edia sene karadia na basita maumaurai. Ba helalotao, lalokau na mai siahuna! Mai lalokauda ida haida edia namo baita lalomu bona baita matauraidiamu neganai, basie badu henidamu.

15-16. (a) Dahaka dainai o abi daemu ḡaudia ba gwaurai hedinarai na aonega karana? Ekspiriens ta ba herevalaia. (b) Paulo ena hereva Roma 1:16 ai be ede baita badinaia toma?

¹⁵ Emu hanua lalonai ba hahedinaraia oi na Iehova ena Witnes tauna ta. (Isa. 43:10) Vaia emu bese lalonai ta e masemu bona kastom karana ta ai basio vareaimu neganai, varavaramu bona dekemu taudia ese na be  badu henimumu. To namona na nega badanai o abi daemu herevadia na idia ediai ba herevalai, unu amo hekwakwanai bae vara neganai ihamaoromaorodia na be haraḡamu. Mozambique ai e nohomu tauna ta, Francisco, na eto: “Lau bona adavagu, Carolina, na hereva momokani a diba neganai, emai bese a hadibadia ai ese mase taudia na basia tomadiho henidiamu. Carolina kakana hahinena e mase neganai, emai abi hidi na e tohoa. Hanua ena kastom na, tomadiho ariana ta ai mase tauna bae hadigua. Bena varavarana korikorina na dina toi lalodiai una mase tauanina e hurilaia ranuna e bubua gabunai baine hekure. Unu kastom karadia amo e mase tauna laumana na basie habadua. Carolina ena bese na e urava ia na una ranu e bubua gabunai baine hekure.”

¹⁶ Francisco bona adavana be dahaka e kara? Francisco eto: “Iehova a lalokau heniamu bona a uramu ia baia hamoalea dainai, una kastom karana na a dadaraia. Carolina ena bese na e badu dikadika. E gwauva ai na mase tauna asia matauraiamu bona e hamaoromai basie vadivadimaimu bona basie durumaimu. Emai abidadama na matamanai idia ediai vada a herevalaia dainai, idia e badu neganai unu ḡau na ma asia herevalai. To varavaramai haida be ai daimai ai e hereva eto, ai ese unu kara basia karamu badidia na matamanai vada a hadibadia. Gabeai, Carolina varavarana lalodia e namo bena a maino. Haida na emai ruma e maimu Baibul e herevalaiamu bukadia bae abi.” Basita hemarai eda abidadama iherevalaina ai, badina mai dibada mase taudia ediai e varamu hereva momokanina na Baibul ese e herevalaia.​—Roma 1:16 ba duahia.

17. Tadikaka eiava taihu ta na ena lalokau tauna ta e masemu neganai, ede baita hahedinaraia toma ita na tura korikoridia?

¹⁷ Bema eda tadikaka eiava taihu ta na ena lalokau tauna ta e mase dainai e lalohisihisimu, namona na baita hekwarahi ina sisiba baita badinaia: “Tau ta turana ese nega iboudiai e lalokau heniamu; bona tadikakana ena lalokau na dika negana ai e hedinaraimu.” (Her. 17:17) Bema ia na haida ese e doriamu Baibul ena taravatu e utuamu kastom karana ta baine karaia, ede baita hahedinaraia toma ita na ia “turana”? Baibul ena hahekau herevadia rua aita herevalai, unu  ese be durudamu e lalohisihisimu tadikakana eiava taihuna baita hagoadaia.

18. Dahaka dainai Iesu e tai, bona ena haheitalai amo dahaka ta dibamu?

¹⁸ “E taitaimu taudia ida ba tai.” (Rom. 12:15) Nega haida e taimu tauna enai asi dibada dahaka baita gwaurai. To bema be itadamu ta taimu, be dibamu idia na ta lalodia badamu. Iesu turana Lasaro e mase neganai, Maria, Mareta, bona ma haida na tadikakadia bona turadia lalokauna dainai e taiva. Dina hani muridiai Iesu e kau neganai, ia danu “e tai,” ena be mai dibana Lasaro na do baine hatorea isi lou. (Ioa. 11:17, 33-35) Iesu e tai karana amo e hahedinaraia Lasaro e mase neganai Iehova danu e hebogahisi. Danu e hahedinaraia, Iesu ese Lasaro ena ruma bese na e lalokau henidiava, una ese Maria bona Mareta na e hagoadadia. Una heḡereḡerena, tadikakada na be mamiamu ta lalokau henidiamu bona ta lalodia badamu neganai, be dibamu idia na dia sibodia to idia turadia na momo.

19. E lalohisihisimu Kristen tauna ta baita hagoadaia neganai, edena dala ai Kohelete 3:7 ena sisiba baita badinaia?

¹⁹ “Asi reḡereḡeda baita noho na mai negana, baita herevahereva na mai negana.” (Koh. 3:7) E lalohisihisimu Kristen tauna baita hagoadaia dalana ma ta na, baita hakala namonamo. Nega ba heni tadikakamu ena hemami baine herevalaia bona hereva kavakavadia o badu herevadia basio gwaurai. (Iob. 6:2, 3) Reana ena lalohisihisi na bada herea badina dia Witnes varavaradia ese metau e heniamu. Namona na ia dainai ba ḡuriḡuri. “Ḡuriḡuri ikamonaina Diravana” ba noia goada bona lalohadai maorona baine henia. (Sal. 65:2) Bema heḡereḡere, ia ida Baibul ba duahia hebou. Eiava eda pablikeisin amo atikol maorona ta, heḡereḡere mauri sivaraina e herevalaiamu ḡauna, ba duahia.

20. Atikol gabena ai dahaka baita herevalaiamu?

²⁰ Ta moalemu badina mase anina korikorina bona gara ai e nohomu taudia edia helaro namona na mai dibada. (Ioa. 5:28, 29) Una dainai, eda hereva bona kara amo baita hahedinaraia Baibul ena hereva momokani na ta laloa badamu bona dala e hekehomu negadiai haida ediai baita herevalaia. Atikol gabena ai, Satana ese babalau karadia amo taunimanima e koidiamu dalana baita herevalaiamu. Bona baita itaiamu dahaka dainai moale karadia bona kara ma haida ai demoni ese e atomu tarapudia baita dadarai na namo.