OI ESE tenkiu karana o hahedinaraiamu, a? Una henanadai na ita ta ta ese baita laloa. Baibul ese e hahedinaraiamu iseda negai taunimanima momo na ‘asie hahenamomu.’ (2 Tim. 3:2) Reana oi mai dibamu taudia haida na e laloamu idia ediai miadia ḡaudia iboudiai na sibodia edia goada amo e davari. Bona e laloamu ta ese e henidiamu ḡaudia daidiai bae tenkiu na asi anina. Taunimanima unu bamodia ida noho hemamina na dia namo, ani?

To Iehova ena hesiai taudia na idau. Idia na e hagoadadiamu: ‘Dirava bae hanamoa’ o bae tenkiu henia. Ita na ‘ḡau iboudiai daidiai Dirava baita hanamoa.’ (Kol. 3:15; 1 Tes. 5:18) Momokani, tenkiu karana baita hahedinaraia na mai ena namo. Badi momo daidiai unu baita kara toma.

Hanaihanai tenkiu karana baita hahedinaraia badina badana ta na, eda hemami be hanamoamu. Ḡau ta e abia dainai tenkiu herevana e gwauraiamu tauna ena hemami na be namomu, bona tenkiu o hahenamo herevana e abiamu tauna ena hemami danu be namomu. Dahaka dainai tenkiu karana ese ita bona ma haida be hamoaledamu? Mani a laloa: Bema ta na oi daimuai ḡau ta e karaiamu, anina na ia ese oi na e lalomu badamu. Una bo lalopararalaiamu neganai, emu hemami na be namomu. Ruta ena haheitalai amo una na ta dibamu. Boa ese Ruta na e kara namo henia. Una dainai, Ruta na e diba ta ese ia na e laloa bada.​—Ruta 2:10-13.

Dirava baita tenkiu henia na maoro. Momokani nega haida ita na Ia ese lauma bona tauani dalanai e heni bona doini e henidamu harihari ḡaudia ta lalodiamu. (Deu. 8:17, 18; Apos. 14:17) To namona na nega bada baita ato Dirava ena kara namodia ita edai bona eda lalokau taudia ediai na baita haerodia. Ita e Havarada Tauna ena hariharibada karana baita laloa dobumu neganai, be durudamu Ia baita laloa badamu bona baita mamiamu ia ese ita na e lalokau henidamu.​—1 Ioa. 4:9.

Namona na Iehova ena kara namo dainai baita tenkiu henia. (Sal. 100:4, 5) Momo na e gwaumu “tenkiu karana ese taunimanima na e hamoalediamu.”

Badi ma ta na, tenkiu karadia ese hetura karadia e hagoadamu. Ita iboudai na ta uramu taunimanima ese bae laloda bada. Bema oi na mai momokanimu ida ta bo kara namo heniamu bona bo tenkiu heniamu, umui raruosi na tura namodia ai bo laomu. (Roma 16:3, 4) Tenkiu karana e hahedinaraiamu taudia ese ma haida na e durudiamu. Haida edia kara namodia idia ediai na e lalomu dainai idia danu unu e kara tomamu. Momokani ma haida baita durudiamu neganai baita moalemu. Una na Iesu ena hereva heḡereḡerena, ia na e gwa: “Ḡau ihenina be namo bada, ḡau iabina be namo maraḡi.”​—Apos. 20:35.

California ena iunivesiti ta ai tenkiu karana e hetahulaia tauna ta, Robert Emmons na e gwa: “Tenkiu karana baita hahedinaraia totona, namona na baita laloparara tenkiu karana na dia taunimanima tamona ese baine karaia karana. Nega haida ita ese una kara baita hahedinaraia, a nega haida una kara na ma haida ese bae hahedinaraia.”  Oibe, baita mauri bona eda mauri baita moalelaia totona, dala idauidau ai haida edia heduru baita abia na namo. Heḡereḡere, haida ese aniani be henidamu eiava baita goreremu neganai medikol dalanai be durudamu. (1 Kor. 12:21) Tenkiu e hahedinaraiamu tauna ese ma haida edia kara namo ia enai na e laloa badamu. Oi e kara namo henimumu taudia o tenkiu henidiamu, a?

Tenkiu karana ba hahedinaraia badina ma ta na, be durumumu ḡau namodia mo bo lalomu. Una kara bo habadaiamu neganai ḡau namodia momo bo lalodiamu. Bema emu mauri ai o moalelaimu ḡaudia bo lalo badamu una ese oi na be durumumu Paulo e gwauraia herevana bo badinaiamu, ia na e gwa: “Nega idoidiai Lohiabada lalonai ba moale.”​—Flp. 4:4.

Tenkiu karana ese oi na be durumumu lalohadai kereredia bo dadaraimu. Heḡereḡere, mama, lalohisihisi o badu lalohadaidia na basio o abimu. Bona tenkiu karana e hahedinaraiamu taudia na moni eiava kohu na se lalo badamu. To dekediai miadia mo e moalelaimu dainai nega bada asie haoremu ḡau momo bae abi totona.​—Flp. 4:12.

Oi na Kristen tauna ta dainai, Satana na e uramu ina dina gabediai o abimu hekwakwanadia daidiai ba lalohisihisi bona ba lalomanoka. Ia na be moalemu, bema oi na unu bo kara tomamu bona ḡau iboudiai daidiai bo maumaumu. Bema oi na taunimanima unu bamona, sivarai namona bo harorolaiamu neganai, taunimanima ediai na be aukamu bae kamonai totona. Tenkiu karana ese be durumumu Dirava ena lauma huahuadia ma haida ba hahedinarai heḡereḡere, o moalemu Dirava ese e henimu ḡaudia daidiai bona iena gwauhamata iboudiai na o abidadama henimu.​—Gal. 5:22, 23.

Oi na Iehova ena taunimanima ta dainai, ina atikol ai tame herevalai ḡaudia na reana o abi daemu. To nega haida be aukamu tenkiu karana ba hahedinaraia bona mauri ai e varamu ḡau namodia ba lalodia. Una ese basine hamanokamu na namo. Tenkiu bona ḡau namodia ilalodia karana na ba hahedinaraia diba. Edena dalai? Dina ta ta ai nega bavato, emu mauri ai ḡau namodia ba lalo bona unu daidiai ba tenkiu. Unu bo kara tomamu neganai, tenkiu karana ihahedinaraina na be haraḡamu. Unu amo bo moalemu, bena mauri ai hekwakwanai e lalo momomu taudia heḡereḡeredia basio laomu. Dirava bona ma haida ese ihamoalemu totona e kara ḡau namodia ba lalo. Unu na ba toredia diba, heḡereḡere dina ta ta ai e hamoalemumu ḡaudia rua o toi ba toredia.

Tenkiu karana e hetahulaia taudia haida na e gwaumu, “ma haida baita tenkiu henidia louloumu karana ese harada ena ḡaukara dalana na be haidauamu, unu amo ḡau namodia mo baita lalomu.” Tenkiu karana e hahedinaraiamu tauna na moale tauna. Una dainai, emu mauri lalonai ḡau namodia mo ba lalo bona hanaihanai tenkiu karana ba hahedinaraia. Oibe, ḡau namodia na basita abi kava, to ‘Iehova baita hanamoa, badina be ia na namo.’ Momokani, ‘ḡau iboudiai daidiai Dirava baita hanamoa.’​—1 Sis. 16:34; 1 Tes. 5:18.