1. Taunimanima momo ese ḡaukara be ede e laloa tomamu?

O NOHOMU gabunai taunimanima ese ḡaukara be ede e laloa tomamu? Tano momo ai, taunimanima momo edia ḡaukara na momo herea dainai, edia ḡaukara horadia na e habadamu, dia guna bamona. Una dainai asi edia nega edia bese bae bamodia, bae laḡa-ani bona Dirava bae dibaia. (Koh. 2:23) A haida be asie uramu bae ḡaukara bona hahekora herevadia e gwauraimu.​—Her. 26:13, 14.

2-3. Ḡaukara baita herevalaiamu neganai, Iehova bona Iesu edia haheitalai be dahaka?

² Tanobada taudia momo na e ḡaukara hanaimu eiava edia ḡaukara na asie haḡuḡurumu. To Iehova bona Iesu ese ḡaukara e laloamu dalana mani aita laloa. Ta dibamu Iehova na ḡaukara tauna, Iesu ese una na e gwauraia eto: “Tamagu na e ḡaukaramu ema bona hari, lau danu na ḡaukaramu.” (Ioa. 5:17) Mani Dirava ese e kara ḡaudia, heḡereḡere aneru bona iunives a lalodia. Danu Ia ese ḡau mai hairaidia momo tanobadai e kara. Una dainai Salamo e torea tauna na e gwa: “Iehova e, o kara ḡaudia dahaka ini heḡiḡi-boudia; iboudiai na mai aonegamu ida vada o kara, o kara ḡaudia ese tanobada e hahonuamu.”​—Sal. 104:24.

³ Iesu ese Tamana e tohotohoa. Bona Tamana ese “guba e karaia negana ai” ia na Tamana e durua. Ia na Iehova ida e nohova, “ḡaukara idibaka tauna na heto.” (Her. 8:27-31) Gabeai Iesu na tanobada ai e nohova neganai, ḡaukara hereana ta e karaia. Una ḡaukara na aniani ida e haheḡereḡerea bona e hahedinaraia ia na Dirava ese e siaia.​—⁠Ioa. 4:34; 5:36; 14:10.

4. Laḡa-ani karanai, Iehova bona Iesu edia haheitalai amo dahaka ta dibamu?

⁴ Iehova bona Iesu edia ḡaukara goadagoada karana ese e hahedinaraiamu ita baita laḡa-ani be asi anina, a? Lasi. Iehova  na basine hesiku diba dainai ḡau ta e karaiamu murinai baine laḡa-ani na asi anina. To, Baibul na e gwaumu Iehova ese guba bona tanobada e karadia murinai ia na “e laḡa ani, bona e kara ḡaudia e moalelai.” (Eso. 31:17) Oibe, Iehova na e laḡa-ani bona e kara ḡaudia e haero neganai e moale. Ena be Iesu tanobada ai e nohova neganai e ḡaukara goadagoada, to nega danu e ato turana ida e laḡa-ani bona e aniani.​—Mat. 14:13; Luka 7:34.

5. Nega haida Dirava ena taunimanima ediai e aukamu ḡauna be dahaka?

⁵ Baibul ese Dirava ena taunimanima na e hagoadadiamu e karamu ḡaukaradia na bae moalelai. Idia na bae ḡaukara goadagoada to basie lahedo. (Her. 15:19) Reana oi na emu ruma bese inarina totona moni ḡaukarana ta o karaiamu. Bona Keriso ena hahediba taudia iboudiai edia maduna na sivarai namona iharorolaina ḡaukarana bae karaia. To bae laḡa-ani namonamo danu na mai anina bada. Nega haida oiemu ai e aukamu nega bavato moni ḡaukarana ba karaia, ba haroro bona ba laḡa-ani totona, a? Eda ḡaukara bona laḡa-ani negadia be ede baita dibadia toma?

6. Edena dalai Mareko 6:30-34 ese e hahedinaraiamu Iesu ese ḡaukara bona laḡa-ani na e lalodia maoromaoro?

⁶ Ḡaukara baita laloa maoromaoro na ḡau badana. King Solomon na Iehova ena lauma helaḡa ena heduru amo ini e gwau toma: “Ḡau iboudiai na mai edia nega korikori.” Ia ese hadohado, ruma hagini, taitai, kiri, mavaru bona ḡaukara ma haida e herevalai. (Koh. 3:1-8) Mauri lalonai mai anina bada ḡaudia rua na, ḡaukara bona laḡa-ani. Iesu ese ḡaukara bona laḡa-ani na e lalodia maoromaoro. Nega ta, aposetolo taudia na haroro ḡaukara ai e bisi bada herea dainai “asi edia nega bae aniani.” Iesu ese e hamaorodia eto: “Gabu ḡaḡaena ta aitala, laḡada baita ani.” (Mareko 6:30-34 ba duahi.) Iesu na mai dibana ia bona ena hahediba taudia bae laḡa-ani na namo, to nega haida una na se varava.

7. Sabati taravatuna amo baita dibamu ḡaudia ese ede be duruda tomamu?

⁷ Nega haida ita iboudai ese dina ta ta ai ta karamu ḡaudia baita haidau eiava baita laḡa-ani na namo. Una ta dibaiamu dalana na Dirava ese ena taunimanima idaunegai e nohova na Sabati taravatuna e henidia, wiki iboudiai dina ta na bae hahelaḡaia. Ena be ita na dia Mose ena Taravatu henunai, to Sabati e herevalaia dalana amo namo baita davari diba. Baita dibamu ḡaudia ese be durudamu ḡaukara bona laḡa-ani baita lalodia maoromaoro.

8. Esodo 31:12-15 ena hereva heḡereḡerena, Sabati dinanai be dahaka e karava?

⁸ Baibul amo ta dibamu, “dina” tauratoi lalodiai Dirava na tanobada ai ḡau idauidau e havaradia murinai e laḡa-ani. (Gen. 2:2) To Iehova na e uramu baine ḡaukara bona dala idauidau ai ia na doini “e ḡaukaramu.” (Ioa. 5:17) Iehova na dina tauratoi e ḡaukara bona dina ihahituna ai e laḡa-ani bona Israel taudia e hamaorodia unu bae kara toma. Dirava na e gwa Sabati na toa ta, ia bona Israel taudia padadiai. Una “na laḡa-ani dinana; vada e helaḡa vaitani, Iehova ena.” (Esodo 31:12-15 ba duahi.) Anina na taunimanima iboudiai na edia ḡaukara amo bae laḡa-ani, natu, hesiai  taudia bona animal danu. (Eso. 20:10) Unu amo idia na lauma ḡaudia bae lalohadailai namonamo.

9. Iesu ena negai haida ese Sabati be ede e laloa tomava?

⁹ Sabati dinana ese Dirava ena taunimanima na e durudia, to Iesu ena negai e nohova tomdiho igunalaina taudia momo ese taravatu aukadia e atova. Idia na e gwauva Sabati ai uit ikokina eiava gorere tauna ta ihanamona na taravatu. (Mar. 2:23-27; 3:2-5) To Dirava ena lalohadai na dia unu heto, bona Iena lalohadai na Iesu ese ia e kamonai heniava taudia e hadibalaidia.

10. Mataio 12:9-12 ai Iesu ese Sabati e laloa dalana amo dahaka ta dibamu?

¹⁰ Iesu bona ia e badinaiava Iuda taudia na Mose ena Taravatu henunai e nohova dainai, Sabati na e hahelaḡaiava. * To, Iesu na ena hereva bona kara amo e hahedinaraia, Sabati dinana ai ma haida ba durudia eiava ba kara namo henidia na dia kerere. Ia na e gwa: “Dina Helaḡa ai kara namona ikarana be maoro.” (Mataio 12:9-12 ba duahi.) Oibe, ia na se laloa una na kerere. To ena kara amo e hahedinaraia ia na e laloparara dahaka dainai Dirava ese ena taunimanima e hamaorodia Sabati dinana ai bae laḡa-ani. Dirava ena taunimanima na dina ta ta ai e karava ḡaudia amo e laḡa-aniva dainai idia na mai edia nega lauma ḡaudia bae lalo namonamo. Iesu e bada ruma besena lalonai idia ese Sabati dinana na e ḡaukaralaia Dirava bae toma henia  diho totona. Ia Nasaret ai e nohova sivaraina amo una ta dibaiamu: “Vaia ena kara Dina Helaḡa ai ia na dubu ai e raka vareai. Bena buka iduahina totona e tore isi.”​—Luka 4:15-19.

11. Iesu be daika ena haheitalai ese e durua baine ḡaukara goadagoada totona?

¹¹ Iosef ese Iesu na kapenta tauna ai bainela dalana bona Dirava ese ḡaukara e laloamu dalana e hadibaia. (Mat. 13:55, 56) Bona reana Iesu ese Iosef na e itaia dina iboudiai e ḡaukara goadagoadava ena bese badana inarina totona. Gabeai, Iesu ese ena hahediba e hamaorodia, eto: “Ḡaukara tauna na mai heinaruna” o mai davana. (Luka 10:7) Oibe, Iesu na mai dibana ede baine ḡaukara goadagoada toma.

12. Ededia Baibul siridia ese e hahedinaraiamu Paulo na e ḡaukara goadagoada?

¹² Aposetolo Paulo danu una na mai dibana. Iena ḡaukara badana na Iesu ladana bona Iesu ese e hahedibalai ḡaudia na taunimanima e hadibalaidiava. Dia una mo to ena mauri iduruna totona ia na moni ḡaukarana danu e karaiava. Tesalonika taudia na mai dibadia ia na ‘dina hanuaboi e ḡaukarava bona e hekwarahiva, idia baine hametaudia garina.’ (2 Tes. 3:8; Apos. 20:34, 35) Paulo ese ena ḡaukara e herevalaia neganai, ia na reana dabua rumadia e turiva ḡaukarana e gwauraia. Bona Korinto ela neganai, Akula bona Priskila ida e nohova badina “edia ḡaukara na dabua rumadia ituridia” ḡaukarana. Paulo na e gwa ia na “dina hanuaboi” e ḡaukarava neganai, anina na ia na dia e ḡaukara hanaiva. To ia na e laḡa-aniva danu, heḡereḡere Sabati dinana ai, ia na se ḡaukarava. Una dina ai ia na Iuda taudia e haroro henidiava, idia danu Sabati dinana ai na asie ḡaukarava.​—⁠Apos. 13:14-16, 42-44; 16:13; 18:1-4.

13. Paulo ena haheitalai amo dahaka ta dibamu?

¹³ Aposetolo Paulo na haheitalai namona e hahedinaraia. Ena be ia na moni ḡaukarana e karaiava, to dala e tahuva ‘Dirava ena sivarai namona baine harorolaia.’ (Roma 15:16; 2 Kor. 11:23) Ia ese ma haida danu e hagoadadia unu bae kara toma. Akula bona Priskila na ‘Keriso Iesu bagunai ia ida e ḡaukara hebouva.’ (Roma 12:11; 16:3) Paulo ese Korinto taudia na e hagoadadia ‘Lohiabada ena ḡaukara lalonai bae goada balaheni.’ (1 Kor. 15:58; 2 Kor. 9:8) Iehova ese Paulo na lauma helaḡa amo e hasiahua dainai ina hereva e torea: “Ta basine ḡaukara, ia na basine aniani.”​—⁠2 Tes. 3:10.

14. Ioane 14:12 ai Iesu ena hereva anina be dahaka?

¹⁴ Hari ita ese baita kara ḡaukara badadia na haroro bona hahediba ḡaukaradia. Momokani, Iesu na e peroveta iena hahediba taudia ese bae kara ḡaukaradia ese iena ḡaukara na bae hereadia. (Ioane 14:12 ba duahia.) Iena hereva anina na, dia ia heḡereḡerena hoa karadia baita kara. To anina na, laḡani momo bona gabu momo lalodiai ia murinai bae raka taudia na taunimanima momo herea bae haroro henidia bona bae hadibadia.

15. Siboda ese ededia henanadai baita lalo, bona dahaka dainai?

¹⁵ Bema oi na moni ḡaukarana ta o karaiamu, sibomu ba henanadai: Ḡaukara taudia be e laloamu lau be ḡaukara goadagoada tauna ta, eiava? Egu ḡaukara be nega korikori ai na haḡuḡurumu bona na karadia namonamomu, eiava? Bema bo gwaumu oibe, anina na biagumu ese emu ḡaukara na be moalelaiamu. Bona  o ḡaukara heboumu taudia na be uramu Basileia sivaraina bae kamonaia. Emu haroro bona hahediba ḡaukaradia ai sibomu ba henanadai: ‘Ma haida ese lau e itagumu neganai, lau be haroro ḡaukara na goadalaiamu, eiava? Haroro ginigunana herevadia na heḡaeḡaelaimu, eiava? Kamonai taudia na lou henidia haraḡamu, eiava? Bona haroro daladia idauidau na tohodiamu, eiava?’ Bema bo gwaumu oibe, emu hesiai ḡaukara na bo moalelaiamu.

16. Edena dalai Iesu bona ena aposetolo taudia ese laḡa-ani karana e laloa dalana na idau hari ina nega taudia edia lalohadai amo?

¹⁶ Iesu na mai dibana nega haida ia bona ena aposetolo taudia bae laḡa-ani na namo. To, Iesu ena negai bona hari ina negai danu, taunimanima momo na iena haheitalai ai e herevalaia taḡa tauna heḡereḡerena. Una tau na e gwa: “Ba laḡa-ani, bavaniani, ba inuinu, ba moale.” (Luka 12:19; 2 Tim. 3:4) Ia na e laloa mauri ai ḡau badadia na laḡa-ani bona moale karadia. To Iesu bona ena aposetolo taudia edia mauri lalonai unu na dia ḡau badadia.

17. Moni ḡaukara amo ta laḡa-animu negadiai, eda nega be ede ta ḡaukaralai tomamu?

¹⁷ Hari, ita na ta uramu Iesu baita tohotohoa, una dainai ḡaukara amo ta laḡa-animu neganai haroro ḡaukarana ta karaiamu bona Kristen heboudia ta laomu. Oibe, ita edai hahediba ḡaukara bona hebou ilao henina karana na mai anidia bada dainai, ta hekwarahimu unu hesiai ḡaukara helaḡadia baita kara loulou. (Heb. 10:24, 25) Ena be gabu ta ai ta laolaomu, to unuseniai ta heboumu bona dala ta tahumu ta davaridiamu taudia ida Baibul baita herevalaia.​—2 Tim. 4:2.

18. Eda King Keriso Iesu be e uramu dahaka baita kara?

¹⁸ Ta moalemu badina eda King, Keriso Iesu, ese ita na e laloda badamu bona e durudamu ḡaukara bona laḡa-ani karadia baita lalodia maoromaoro. (Heb. 4:15) Ia na e uramu nega haida baita laḡa-ani na namo. Bona e uramu baita ḡaukara goadagoada danu, unu amo eda dabu ḡaudia baita abi, hahediba ḡaukarana lalonai baita vareai bona baita moalelaia. Stadi atikol 50 ai, Iesu ese ita na iḡui amo e ruhada dalana baita herevalaiamu.