To e hahedinaraiamu ḡauna badana na, una hane-ulato na asi ena kerere. Mani Deuteronomi 22:25-27 daena siridia ba duahi.

Siri 23 bona 24 ese e hahedinaraiamu tau ta ese hane-ulato ta “hanua lalonai” bema davaria bona bema eno henia (sex). Unu e kara toma dainai ia na be gwauraiamu heudahanai tauna, badina taunimanima vairadiai mai maohenina hane-ulatona na headava hahinena. Una hane-ulato be ede bamona? “Ena be hanua lalonai, to ia na se lolo.” Ia bema lolo neganai, haida na bema kamonai bona bema durua. To ia na se lolo. Una dainai ia danu heudahanai karana e karaia bona idia raruosi na e gwauraidia, idia na e kerere.​—⁠Deu. 22:23, 24.

Siri 25 ela 27 ese ma ḡau idauna ta e herevalaia, e gwaumu: “A tau ta ese hane-ulato mai maohenina na tano paka ai bema davaria, bena bema rosia bona bema eno henia, una tau mo sibona baine mase; a hane-ulato enai kara ta basio karaia, badina be ia na se kerere, taunabunai asi badina ia baine mase. Una na tau ta baine tore isi, dekena tauna baine aIaia mase, na heto. Badina be tano paka ai e davaria, bena hane-ulato na e lolo, a asi iduruna tauna ta unuseni ai.”​—Deu. 22:25-27.

Una e vara neganai, hahemaoro taudia ese hane-ulato ena hereva e abia dae. Dahaka dainai? Idia na e laloa hane-ulato na “e lolo, a asi iduruna tauna ta unuseni ai.” Una dainai ia na se heudahanai. To una tau na reipi bona heudahanai dainai e kerere, badina ia ese una hane-ulato mai maohenina na ‘e rosia bona e eno henia.’

Unu daidiai, tame herevalai siridia ese e hahedinaraimu una hane-ulato na asi ena kerere, to una tau na reipi bona heudahanai karadia e kara dainai ia na kerere. Ita na ta diba momokanimu, hahemaoro taudia ese ḡau iboudiai e hetahulai namonamo bona Dirava ese e gwauraia loulou taravatuna heḡereḡerena abi hidi e kara.​—Deu. 13:14; 17:4; Eso. 20:14.