1-2. (a) Iubile anina be dahaka? (Maua ladana “ Iubile Anina be Dahaka?” ba itaia.) (b) Luka 4:16-18 ai, Iesu be dahaka e herevalaia?

TANO haida ai laḡani 50 e abiamu neganai, taunimanima na moale karadia badadia e karamu una laḡani ihelalolaina. To una laḡani iha-imahuina o 50 na e gwauraiamu Iubile. Una laḡani ariana na dina ta, wiki ta eiava wiki haida lalodiai e moalelaiamu, to e oremu murinai taunimanima ese ma e laloboio haraḡamu.

² Ita ese iubile namona ta baita herevalaiamu, una ese Israel ai laḡani 50 iboudiai lalodiai e moalelaiava ariana na e hereaia. Idaunegai Israel taudia ese e badinaiava Iubile ese idia na e ruhadia. Dahaka dainai, ita edai una na mai anina bada? Badina Iehova ese ita iruhada dalana hereadaena ta e heḡaeḡaelaia, bona una na Iesu ese e gwauraia.​—Luka 4:16-18 ba duahi.

3. Levitiko 25:8-12 ena hereva heḡereḡerena, Israel taudia ediai Iubile ena namo be dahaka?

³ Israel edia negai Dirava ese Iubile e heḡaeḡaelaia dalana baita herevalaiamu neganai, Iesu ese ita iruhada nege herevana e herevalaia karana baita lalopararalaiamu. Iehova ese Israel taudia na e hamaorodia eto: “Laḡani iha-imahuina ba hahelaḡaia, baine helaḡa herea. Una laḡani lalonai iḡui taudia iboudiai bae ruhadia nege. Ia ladana be Iubile: ia lalonai taunimanima iboudiai edia tano korikori bona edia iduhu korikori bae lou henidia.” (Levitiko 25:8-12 ba duahi.) Atikol 49 ai, Israel taudia ese Sabati taravatuna e badinaia amo namo e abi dalana e herevalaia. To, idia ediai Iubile dinana ena namo be dahaka? Bema Israel tauna ta ena abitorehai na bada bona ihalouna na auka, ia ese ena tano baine hoihoilaia unu amo ena abitorehai davana baine karaia. Una Iubile laḡanina lalonai ia ese ena tano ma baine abia lou. Anina na ena “tano korikori” baine lou henia, bona ia  baine mase neganai ia natuna ese una tano bae noholaia. Eiava bema tau ta ena abitorehai na bada herea, ia na natuna ta baine hoihoilaia o sibona baine hehoihoilai bena hesiai tauna ai bainela ena abitorehai ihalouna. Iubile laḡanina lalonai, hesiai tauna na “iduhu korikori baine lou henia.” Una dainai ta na hesiai tauna ena ḡaukara basine karaia hanaihanai. Una dala amo Iehova ese e hahedinaraia ena taunimanima na e lalodia bada.

4-5. Dahaka dainai Israel taudia edia Iubile baita stadilaia na mai anina bada?

⁴ Iubile ena namo ma ta be dahaka? Iehova na e gwa: “Tau ta basine ogoḡami umui bogaraḡimui ai; badina be Iehova, emui Dirava, vada e henimui emui tano ai ba halaoa tanona ai Iehova ese baine hanamomui.” (Deu. 15:4) Una na hari ina negai ta itaiamu maurina amo na idau badina taḡa taudia ese edia taḡa e habadamu bona ogoḡami taudia edia ogoḡami danu e badamu.

⁵ Ita na Kristen tauda dainai, ita na dia Mose ena Taravatu henunai ta nohomu. Anina na ita ese Iubile taravatuna henunai e varava ḡaudia, heḡereḡere hesiai taudia iruhadia, abitorehai igwautaodia bona bese edia tano iheni louna karadia na asita karamu. (Roma 7:4; 10:4; Efe. 2:15) To Iubile baita stadilaia na mai anina bada. Dahaka dainai? Badina unu amo Iehova ese ita na kara dika amo e ruhada dalana be hadibadamu.

6. Taunimanima be dahaka amo bae heruha nege na namo?

⁶ Ita iboudai na ḡau dikana ta ena iḡui amo bae ruhada nege na namo​—una na kara dika. Ita na kara dika tauda dainai, ta burukamu, ta goreremu bona ta masemu. Taunimanima momo na sibodia hevarivari ai e heitamu eiava gorere dainai dokta e itadiamu neganai una na e lalopararalaiamu. Bona kara dikadia ta karamu neganai ta lalomanokamu. Aposetolo Paulo na e gwa “e ḡuigumu, kara dika taravatuna ena, tau-anigu ai e nohomu ḡauna bunai.” Bona ma e gwa: “Lau madi, ihabaigu! Daika ese ina tau-anigu masena amo baine hamaurigu?”​—Roma 7:23, 24.

7. Isaia be dahaka e perovetalai?

 ⁷ Ta moalemu badina Iehova ese kara dika amo ihamaurida o iruhada dalana e heḡaeḡaelaia. Iesu ena amo una dala e karaia. Laḡani 700 mai kahana gunanai Iesu do sema neganai, peroveta tauna Isaia na vaira negai taunimanima bae ruhadia nege dalana badana e perovetalaia. Una ese Israel taudia edia Iubile laḡanina ai e karava karadia na e hereadia. Ia na e gwa: “Ḡaubada Iehova ena Lauma ese e rohegumu, badina be Iehova ese vada e horogu, hisi e animu taudia dekediai hari namodia baina mailai totona. Ia ese vada e siaigu, dara-doko taudia taudia ihalodia bona iḡui taudia iruha-negedia.” (Isa. 61:1) Una peroveta herevana be daidia e herevalaidiamu?

8. Isaia ena peroveta herevana be daika e herevalaiamu?

⁸ Una peroveta herevana na Iesu ena hesiai ḡaukara tanobada ai e hamatamaia murinai e ḡuḡuru matama. Ia na ena hanua Nasaret ai sinagoga ela neganai, Isaia ena peroveta herevana na Iuda taudia vairadiai e duahia. Iesu na e gwa: “Lohiabada ena Lauma ese eme rohegu, Badina be vada e hahelaḡagu, sivarai namo ogoḡami taudia baina harorolai henidia; Bona vada e siaigu, e ḡuidia taudia iruhadia Bona mata-kepulu taudia matadia ihapapadia baina gwaurai; Bona e haberodia taudia baina hamauridia; Bona Lohiabada ena lalo-namo laḡanina baina harorolaia.” (Luka 4:16-19) Iesu ese una peroveta herevana be ede e haḡuḡurua toma?

9. Iesu ena negai e nohova taudia momo be e urava dahaka amo bae ruhadia?

⁹ Isaia ese e perovetalaia bona Iesu ese e duahia heruha nege herevana ena namo na Iesu ena nega taudia ese e abia matama. Una na ta hamomokaniamu badina Iesu na e gwa: “Ina vada o kamonai herevana na hari ina dina ai vada eme momokani.” (Luka 4:21) Iesu ena hereva e kamonaia taudia momo na reana e laloava idia na Roma gavamani ena lohia siahuna amo bae ruhadia. Reana idia edia lalohadai na tatau rarua edia lalohadai heḡereḡerena, idia na e gwa: “Ai banava ato ia na Israel edia hahemauri tauna.” (Luka 24:13, 21) To ita na mai dibada Iesu ese ia murinai e rakava taudia na se hamaorodia Roma ena gavamani bae gwau-edeede henia ena be una gavamani na mai daḡedaḡena ida e lohiava. To e haḡanidia: “Kaisara ena, Kaisara ba henia.” (Mat. 22:21) Una nega lalonai Iesu ese taunimanima be ede e ruhadia toma?

10. Iesu ese taunimanima be dahaka amo e ruhadia?

¹⁰ Dirava Natuna ema na dala rua ai taunimanima  baine ruhadia helaoreana. Dala ginigunana na, tomadiho e gunalaimu taudia edia hahediba hereva koikoidia amo taunimanima e ruhadia. Una negai e nohova Iuda taudia momo na idia ese e doridiava kastom karadia eiava hahediba hereva koikoidia bae badina. (Mat. 5:31-37; 15:1-11) To idia ese Dirava na asie badinaia namonamova, una dainai idia na vaitani matadia na kekepulu. Idia ese Mesia bona ia ese e hahedibalaiva hereva momokani na asie abi daeva dainai idia na Dirava asie dibaia bona edia kara dika na asie gwautao. (Ioa. 9:1, 14-16, 35-41) Iesu na hereva momokani e hahedibalaia bona haheitalai namona e hahedinaraia dainai manau taudia e hadibadia hahediba koikoi amo bae heruha diba.​—Mar. 1:22; 2:23–3:5.

11. Iesu ese taunimanima e ruhadia dalana iharuana be dahaka?

¹¹ Dala iharuana na, Iesu ese taunimanima na kara dika iḡuina amo e ruhadia. Iesu na ena mauri e bouboulaia amo dala e kehoa bae abidadama henia bona edia kara amo una abidadama bae hahedinaraia taudia edia dika na Dirava ese baine gwautao. (Heb. 10:12-18) Iesu na e gwa: “Natuna ese baine ruhamui nege, umui na ba heruha nege momokani.” (Ioa. 8:36) Una kara ese Israel ena Iubile laḡanina lalonai e karava karadia na e hereadia. Heḡereḡere, Iubile laḡanina ai iḡui amo e ruhaia hesiai tauna na gabeai hesiai tauna ai ma e lao louva, to gabeai ia na e mase.

12. Iesu ese e gwauraia herevana amo namo e abi taudia ginigunadia be daidia?

¹² Pentekos 33 C.E. dinana ai, Iehova na ena lauma helaḡa amo aposetolo taudia bona abidadama tatau bona hahine haida e horodia. Ia ese idia na ia natuna ai e halaodia bona vaira negai idia na bae toreisi lou bena Iesu ida gubai bae lohia hebou. (Roma 8:2, 15-17) Idia na Iesu ese Nasaret ena tomadiho gabuna ai e gwauraia herevana amo namo e abi taudia ginigunadia. Bona idia na Iuda tomadiho e gunalaiava taudia edia hahediba hereva koikoidia bona Dirava ena hereva e utumu kastom karadia ese asie ḡuidia. Dirava matanai idia na kara dika amo e heruha.  Laulau dalanai Iubile laḡanina na laḡani 33 C.E. ai Keriso murinai e raka taudia e horodia negana ai e matama, bona Iesu Ena Laḡani 1,000 Lohia Negana dokonai baine ore. Hari amo ela bona una Lohia Laḡanina 1,000 dokonai, be varamu ḡau namodia haida be dahaka?

13-14. Iesu ese e gwauraia herevana amo namo e abi taudia na dia horoa Kristen taudia mo to daidia danu?

¹³ Hari ina negai bese iboudiai amo kudou maoro taudia milioni momo na “mamoe idaudia” taudia. (Ioa. 10:16) Idia na Dirava ese se e abidia hidi Iesu ida gubai bae lohia. To Baibul ese e hahedinaraiamu idia na tanobada ai bae mauri hanaihanai. Oiemu helaro be una, a?

¹⁴ Hari danu oi na Dirava ena guba Basileiana ai bae noho taudia ese e moalelaimu hahenamodia o moalelaimu. Iesu ena boubou ḡauna o abidadama heniamu dainai, Iehova ba noia diba emu kara dika baine gwautao. Unu amo oi na Dirava ena lalonamo bavabia bona una ese oi na lalo maino baine henimu. (Efe. 1:7; Apok. 7:14, 15) Nega daudau lalonai e ḡuimu hahediba hereva koikoidia amo e ruhamu dainai o moalelaimu hahenamodia mani a lalodia. Iesu na e gwa: “Hereva momokani danu ba diba; bona hereva momokani ese baine ruhamui nege.” (Ioa. 8:32) Una hahenamo dainai ita na ta moalemu!

15. Vaira negai ededia hahenamo baita moalelaimu?

¹⁵ Ḡau iboudiai amo baine ruhamu negana namo hereana na vada kahirakahira. Una nega ai, Iesu ese tomadiho koikoi bona gavamani dikadia na be haorediamu. Dirava ese ia e hesiai heniamu “hutuma bada-herea” na be gimadiamu bona idia na tanobada paradaisona ai hahenamo idauidau  be moalelaimu. (Apok. 7:9, 14) Taunimanima hutuma na be toreisi loumu bona Adam amo e abia hanai kara dika siahuna ese e havaramu dika amo be ruhadiamu.​—⁠Apos. 24:15.

16. Vaira negai taunimanima ese be abimu hahenamodia haida be dahaka?

¹⁶ Laḡani 1,000 Lohia Negana lalonai, Iesu bona ia ida be lohiamu taudia ese taunimanima be durudiamu tauani bona lauma dalanai be ḡoevadaemu. Israel taudia na Iubile laḡanina ai e ruhadia heḡereḡerena, Keriso Ena Laḡani 1,000 Lohia Negana ai taunimanima na dala badana ai be ruhadiamu. Una anina na Iehova e hesiai heniamu abidadama taudia na be ḡoevadaemu bona kara dika ese ma basie ḡuidia loumu.

17. Isaia 65:21-23 ese Dirava ena taunimanima ediai baine vara ḡauna be ede e perovetalaia toma? (Rau 1 laulauna ba itaia.)

¹⁷ Tanobada maurina e perovetalaia herevana ta na Isaia 65:21-23 (ba duahi) ai baita itaiamu. Una negai taunimanima na basie noho kavamu. To, Baibul ese e hahedinaraiamu Dirava ena taunimanima na ḡaukara namodia be karamu bona be moalelaimu. Laḡani 1,000 Lohia Negana be oremu neganai, ta diba momokanimu “e kara ḡaudia na mase ena iḡui amo bae heruha nege, bona Dirava natuna edia ura-kwalimu herea-daena bae abia.”​—Roma 8:21.

18. Dahaka dainai baita abia dae momokani vaira negai eda mauri na baita moalelaiamu?

¹⁸ Iehova ese Israel taudia e durudia ḡaukara bona laḡa-ani bae lalodia maoromaoro heḡereḡerena, Keriso Ena Laḡani 1,000 Lohia Negana ai danu, iena taunimanima daidiai unu baine kara toma. Idia na mai edia nega Dirava bae toma henia diho. Hari bona nega matamata ai, una na moale korikori idavarina dalana. Una negai, Dirava ta badinaiamu tauda na baita moalemu badina iboudai ese eda ḡaukara na baita moalelaimu bona Dirava na baita hesiai henia heboumu.