Gima Kohorona 2019 amo e abi henanadaidia bo haerelai dibamu, a?

Dirava ena gwauhamata: “Tuari ḡauna ta oi ihadikamu totona e karaiamu na ena ḡaukara anina basine vara,” anina be dahaka? (Isa. 54:17)

Ita ese Iehova na ta abidadama heniamu badina Ia na “asi edia hebogahisi taudia edia badu” amo be gimadamu. (Isa. 25:4, 5) Ita na inaida ese be hahisidamu to idia na basie kwalimu dibamu.—w19.01, rau 6-7.

Dirava ese Kanana taudia bona Israel taudia e kara henidia dalana amo iena hahemaoro maoromaoro karana be ede e hahedinaraia tomamu?

Hahine bona natu asie kara namo henidiava taudia na Dirava ese e hahemaoro henidia. To, ia e badinaiava bona kara namodia e hahedinaraiva taudia na Ia ese e hanamodiava.—w19.02, pp. 22-23.

Bema dia Witnes tauna ta na e ḡuriḡurimu, ita be dahaka baita kara?

Namona na eda hemataurai karana baita hahedinaraia, to “amen” hari basita gwauraia eiava una ḡuriḡuri lalonai haida ida ima na basita dogotao. To, lalodai siboda eda ḡuriḡuri baita gwaurai diba.​—w19.03, rau 31.

Edena dalai child abuse na kara dika rohorohona?

E hadikadia taudia, kongrigeisin, gavamani, bona Dirava vairanai child abuse karana na kara dikana. Bema gavamani ena taravatu na e gwaumu child abuse keis na pulis ediai baita ripotia na maoro, elda taudia ese una taravatu bae badinaia na namo.—w19.05, rau 9-10.

Edena dalai eda kara bona lalohadai baita haidau eiava baita hanamo diba?

Dala badadia na ini: Iehova ba ḡuriḡuri henia. Lalo dobu karana amo sibomu ba henanadai. Turamu na bavabidia hidi namonamo.—w19.06, rau 11.

Hari ita be dahaka baita kara unu amo daḡedaḡe dainai ita na ta heḡaeḡae?

Namona na eda hetura karana Iehova ida na baita hagoadaia. Baita abia dae momokani ia ese ita na e lalokau henidamu bona ita na basine rakatanida. Dina iboudiai Baibul ba duahia, bona hanaihanai ba ḡuriḡuri. Bavabia dae vaitani Dirava ena Basileia ena hahenamo na be vara momokanimu. Oiemu feiva siridia ba memorais bona Basileia anedia ba lalodiatao.​—w19.07, rau 2-4.

Ita be dahaka baita kara, unu amo varavarada baita durudia mauri bae abia helaoreana?

Ma haida edia hemami baita lalo na ḡau badana, eda kara namodia baita hahedinarai, bona baita haheauka bona aonega dalanai baita haroro.​—w19.08, rau 15-17.

Edena dalai goada baita abi, Iesu ena gwauhamata Mataio 11:28 ai heḡereḡerena?

Hegunalai taudia namodia ese e naridamu, turada na tura namodia, bona ta karaiamu ḡaukarana na namo herea.—w19.09, rau 23.

Edena dalai Dirava ese iena ura ikarana urana baine henida bona baine hagoadada? (Flp. 2:13)

Dirava ena Hereva baita duahiamu bona baita laloa dobumu neganai, Dirava ese iena ura ikarana urana bona goada be henidamu. Iena lauma helaḡa ena heduru amo ita baine ḡaukaralaida diba.—w19.10, rau 21.

Abi hidi badana ta do asita karaia neganai, ededia dala baita badina na namo?

Dala faiv na: Ba hetahu namonamo. Iehova ba ḡuriḡuri henia aonega baine henimu. Emu abi hidi badidia na ba haero namonamo. Ḡau maorodia bavabi hidi. Ba kara diba ḡaudia bavabi hidi.—w19.11, rau 27-29.

Ina lalohadai, mase taudia na mai laumadia be Satana ese Heva e hamaoroa herevana amo e matama, a?

Lasi. Diabolo ese Heva na se hamaoroa bema Dirava ese e taravatua au huahuana baine ania, ia na baine mase. Tomadiho koikoi edia hahediba herevadia iboudiai na Abata badana ai e ore. Reana Babel kohorona e haginiava taudia edia gado na Dirava ese do se haidau bona do se “hakarohodia rohoroho” neganai, basine mase diba laumana hahediba herevana e matama.​—w19.12, rau 15.