1. Iehova ese tama sina e henidia maduna na be dahaka?

IEHOVA ese tau bona hahine ginigunadia e karadia neganai e hamaorodia natudia bae havara. Baibul na e gwaumu: Natu na “Iehova ena herahia.” (Sal. 127:3) Una hereva anina be dahaka? Mani a laloa, oi na turamu namona ta ese e noimu iena moni badana ba balaiaheni. Oi be ede bo hemami tomamu? Oi na bo moalemu badina ia na e diba momokanimu oi ese iena moni na bo balaiaheni namonamomu. To reana oi na una moni badana ibalahenina bo lalohekwarahilaiamu. Iehova, ita Turada namo hereana, ese moni e hereaia ḡauna namona ta na tama sina e henidia bae naria. Ia ese maduna e henidia unu amo natudia bae naridia namonamo bona edia mauri ai bae moale.

2. Ededia henanadai baita herevalaimu?

² Natu bae havara bona edena negai bae havara abi hidina be daika ese baine karaia? Bona tama sina be dahaka bae kara unu amo natudia bae durudia edia mauri bae moalelaia? Baibul ena hahekau herevadia haida mani aita lalodia, unu ese Kristen headava taudia be durudiamu abi hidi maorodia bae kara.

3. (a) Natu ba havara eiava lasi abi hidina be daika ese baine karaia? (b) Edena hahekau herevana Baibul ai na headava taudia edia bese bona bamodia ese bae laloa na namo?

³ Tano haida edia kastom ai, headava matamata taudia na bae headava murinai maoromaoro natudia bae havara. Nega haida edia bese eiava ma haida ese be doridiamu una kastom bae badinaia. Jethro, Asia ai e nohomu tadikakana ta, na ini e gwau toma: “Kongrigeisin ai tama sina haida ese natudia do asie havara headava taudia na e doridiamu natudia bae havara.” Jeffrey, Asia ai e nohomu tadikakana ma ta, na e  gwa: “Natudia do asie havara headava taudia na haida ese e hamaorodiamu idia be burukamu neganai, idia na asi inaridia.” To, natu bae havara eiava lasi abi hidina na headava taudia sibodia ese bae karaia. Una na idia edia maduna. (Gal. 6:5) Vaia, headava matamata taudia edia bese bona bamodia na e uramu idia na bae moale. To namona na iboudiai bae helalotao una abi hidi na headava taudia sibodia ese bae karaia ḡauna.​—1 Tes. 4:11.

4-5. Headava taudia ese ededia henanadai rua bae herevalai, bona edena nega be nega maorona unu bae herevalai? Ba herevalaia.

⁴ Bema headava taudia na e uramu natudia bae havara, namona na ini henanadai badadia rua bae herevalaidia: Ginigunana na, idia be edena negai natu bae havara? Iharuana na, natu hida bae havara? Edena nega be nega maorona unu bae herevalai? Bona dahaka dainai unu henanadai ruaosi na mai anidia bada?

⁵ Nega momo mero bona kekeni na do asie headava neganai, natu ihavara karana na e herevaherevalaia gunamu. Dahaka dainai? Badina ta na, unu amo idia raruosi edia lalohadai na baine tamona. Bona namona na bae laloa bema idia na heḡaeḡae una maduna bae huaia eiava lasi. Headava taudia haida na lalodia e hadaimu e headavamu negana amo laḡani ta eiava rua muridiai natudia e havaramu, badina natudia be havaramu neganai edia nega bona goada na be ḡaukaralaiamu idia bae naridia totona. Unu amo bae hemanada namonamo bona edia headava maurina na bae moalelaia.​—Efe. 5:33.

6. Ita na nega dikana ai ta nohomu dainai, headava taudia haida be dahaka e uramu bae kara?

⁶ Kristen taudia haida na e uramu Noa natuna memerodia tatoiosi bona adavadia edia haheitalai bae tohotoho. Idia ese natudia na asie havara haraḡa. (Gen. 6:18; 9:18, 19; 10:1; 2 Pet. 2:5) Iesu ese iseda nega na Noa ena nega ida e haheḡereḡerea bona asita daradaramu ita na “dina gabedia ai” ta nohomu. (Mat. 24:37; 2 Tim. 3:1) Una dainai headava taudia haida na lalodia e hadaimu natu na do basie havara, unu amo edia nega na bada Iehova bae hesiai henia.

7. Edena dalai Luka 14:28, 29 bona Hereva Lada-isidia 21:5 edia hahekau herevadia ese headava taudia be durudiamu?

⁷ Bema headava taudia na e uramu natu bae havara bona hida bae havara, namona na idia ese ḡau iboudiai bae ‘haero’ namonamo guna. (Luka 14:28, 29 ba duahi.) Tama sina momo na e gwaumu, natu inarina karanai dia moni bada mo bo negemu to nega bona goada danu bo ḡaukaralaimu.  Una dainai, headava taudia ese ini henanadai bae lalo na ḡau badana: ‘Eda ruma bese taudia edia ura ḡaudia ihoidia totona raruosi moni ḡaukara baita kara, eiava? Eda ruma bese ediai mai anidia bada ḡaudia da ta lalotamonalai, eiava? Bema raruosi baita ḡaukaramu, natuda be daika ese be naridiamu? Ita natuda be nariamu tauna ese ia be hadibaia namonamomu, eiava? Headava taudia ese unu henandai e herevalaimu neganai, idia na Hereva Lada-isidia 21:5 ena hereva e badinaiamu.​—Ba duahia.

8. Headava taudia ese be davarimu hekwakwanaidia haida be dahaka, bona lalokau e hahedinaraiamu headava tauna be dahaka baine kara?

⁸ Natu inarina karanai tama o sina ese nega bona goada bada baine heni na mai anina bada. Unai dainai, bema headava taudia na natudia do se bada namonamomu bena ma haida e havaradiamu, idia na be hekwarahi badamu natu ta ta bae naridia namonamo totona. Idia haida na e gwa nega haida idia na asi dibadia dahaka bae gwaurai eiava dahaka bae kara. Sina ta na be hemamimu ena goada na dia heḡereḡere bona be hesikumu. O laloamu una ese iena stadi, ḡuriḡuri, bona haroro hanaihanai karana baine hadikaia diba, eiava? Hekwakwanai ma ta na, Kristen heboudia ai sina ena hakala karana bona hebou amo namo baine abi dalana be hadikaiamu. To, adavana e lalokau heniamu tauna ese hahine baine durua, hebou ai bona ruma ai natuna baine naridia. Heḡereḡere, ruma ḡaukaradia danu baine kara. Namona na baine ḡaukara goada Ruma Bese Tomadiho na baine karaia hanaihanai, unu amo ena ruma bese taudia iboudiai baine durudia. Bona Kristen tama na hanaihanai ruma bese ida bae haroro hebou.

9-10. Tama bona sina ese natudia bae durudia totona, mai anina bada ḡauna be dahaka?

⁹ Tama sina be dahaka bae kara, unu amo natudia bae durudia Iehova bae lalokau henia? Edena dalai natu na ina tanobada dikana ese e havaramu dika idauidau amo bae gimadia? Tama sina ese bae kara ḡaudia haida mani aita herevalai.

¹⁰ Ḡuriḡuri amo Iehova ena heduru ba noia. Manoa bona adavana edia haheitalai mani aita laloa, idia na Samson tamana bona sinana. Manoa na e diba natudia ta be varamu dainai, Iehova e noia inarina dalana baine hadibadia.

11. Tama sina ese Hahemaoro Taudia 13:8 ai Manoa ena haheitalai be ede bae tohotohoa toma?

¹¹ Nihad bona Alma na Bosnia bona Herzegovina amo, idia na Manoa ena haheitalai amo ḡau ta e dibaia. Idia na e gwa: “Manoa e kara heḡereḡerena, ai na Iehova a noia tama sina namodiai baiala daladia  baine hadibamai. Bona Iehova ese emai ḡuriḡuri na dala idauidau ai​—Baibul, Baibul pablikeisin, kongrigeisin heboudia bona hebouhebou badadia amo e haerelai.”​—Hahemaoro Taudia 13:8 ba duahia.

12. Edena dalai Iosepa bona Maria na natudia ediai haheitalai namodia e hahedinarai?

¹² Emui haheitalai amo natumui ba hadibadia. Emu hereva na mai anina, to emu kara ese natumu na be durua namonamomu. Ta dibamu Iosepa bona Maria ese edia haheitalai namona na natudia ediai bona Iesu enai danu e hahedinaraia. Iosepa na e ḡaukara goada ena ruma bese baine durua. Bona natuna na e hadibadia Iehova itoma heni dihona karana bae laloa bada. (Deu. 4:9, 10) Ena be taravatu ese na se hahedinaraia Iosepa na “laḡani iboudiai” ena ruma bese baine laohaidia Ierusalem Pasova bae moalelaia, to ia na unu e kara tomava. (Luka 2:41, 42) Ia ena negai, tama haida na e laloava una laolao na auka, nega bada be abiamu, bona moni bada be ḡaukaralaimu. To Iosepa ese lauma ḡaudia na e lalo badava bona natuna na e hadibadia idia danu unu bae kara toma. Danu, Maria ese Baibul na e dibaia namonamo. Asita daradaramu, ia na ena hereva bona kara amo natuna e hadibadia Dirava ena Hereva bae laloa bada.

13. Headava tauna ta bona adavana be edena dalai Iosepa bona Maria edia haheitalai e tohotohoa?

¹³ Nihad bona Alma, paragraf 11 ai tame herevalaidia taudia, na Maria bona Iosepa edia haheitalai e tohotohoa. Una ese ede e durudia toma unu amo natudia merona e hadibaia Dirava baine lalokau henia bona baine hesiai henia? Idia na e gwa: “Ai na a urava natumai merona enai baia hahedinaraia Iehova ena hahekau herevadia na eda mauri lalonai baita badinamu neganai, namo baita davarimu.” Nihad na e gwa: “Bema o uramu natumu na taunimanima namona ai bainela, oi danu emu kara amo haheitalai namona ba hahedinaraia.”

14. Dahaka dainai tama sina ese natudia e bamodiamu taudia bae dibadia na namo?

¹⁴ Natumui ba durudia tura namodia bae abi hidi. Tama bona sina na natudia ese e bamodiamu taudia bona e karamu ḡaudia bae diba na namo. Anina na bae diba natudia be daidia ida e herevaherevamu social media ai bona mobael foun ai. Badina unu ḡau ese natu edia lalohadai bona kara bae hadika diba.​—1 Kor. 15:33.

15. Jessie ena haheitalai amo tama sina be dahaka e hadibadiamu?

¹⁵ Bema tama sina na kompiuta eiava mobael foun iḡaukaralaidia na asi dibadia, dahaka bae kara diba? Jessie, Philippines ai e nohomu tama ta, na ini e gwau toma: “Ai na kompiuta eiava mobael foun iḡaukaralaidia na asi dibamai namonamo. To unu ese na se koumai edia dika na natumai ediai baia herevalai.” Ena be Jessie na unu ḡau iḡaukaralaidia na asi dibana namonamo, to ia ese natuna na se taravatudia unu ḡau bae ḡaukaralai. Ia na e gwa: “Natugu na na hagoadadiamu unu ḡau na bae ḡaukaralai gado matamatana bae dibaia, hebou ḡaudia bae heḡaeḡaelai, bona dina iboudiai Baibul bae duahia.” Bema umui na tama bona sina, foun amo teks meseij isiaina karana eiava social media ai photo bae post karana be natumui ida jw.org^® Teenagers kahanai, do duahi bona do herevalai, a? Natumui ida ini vidio, Daika ese E Biagumumu​—Oi  Eiava Emu Mobael Fon? bona Intanet Ba Ḡaukaralaia Namonamo do herevalai hebou, a? * Natumui o hadibadiamu kompiuta eiava foun bae ḡaukaralai namonamo neganai, unu vidio ba ḡaukaralai na mai anina bada.​—Her. 13:20.

16. Tama sina momo be dahaka e kara, bona dahaka e vara?

¹⁶ Tama sina momo na dala e karamu natudia na Dirava ihesiai henina karanai haheitalai namona e hahedinaraiamu taudia bae bamodia. Heḡereḡere, tadikaka N’Déni bona adavana Bomine, idia na Côte d’Ivoire amo, na nega momo sekit tauna e boiriava edia rumai baine noho. N’Déni na e gwa: “Una ese natumai roboana na e durua bada. Ia na painia ḡaukara e karaia bona hari ia na nega ta ta sekit tauna ena ḡaukara e karaiamu.” Oi ese idia edia haheitalai ba tohotohoa diba, a?

17-18. Edena negai tama sina ese natudia bae hadibadia?

¹⁷ Natu na maraḡidiai ba hadibadia. Tama sina na unu be kara tomamu neganai, natudia edia mauri na be namomu. (Her. 22:6) Timoteo mani aita laloa, ia e bada neganai, aposetolo Paulo ida misinari ḡaukarana e karaia. Ia do maraḡinai, sinana Eunike bona tubuna hahinena Loi ese e hadibaia.​—2 Tim. 1:5; 3:15.

¹⁸ Côte d’Ivoire ai e nohomu headava tauna ta bona adavana, Jean-Claude bona Peace ese natudia siks e hadibadia Iehova bae lalokau henia bona bae hesiai henia. Dahaka ese e durudia? Idia ese Eunike bona Loi edia haheitalai e tohotohoa. Idia na e gwa: “Natumai na do mamaraḡi neganai, ai ese Dirava ena Hereva a hadibalaidia.”​—Deu. 6:6, 7.

19. Dirava ena Hereva na natumui ba “hadibalaidia” anina be dahaka?

¹⁹ Iehova ena Hereva na natumui ba “hadibalaidia” anina be dahaka? Anina na ba hadibadia bona ba hahelalodia tao loulou. Unu bae kara toma totona, tama sina na nega bae ato natudia bae bamodia. Nega haida tama sina na be lalohisihisimu badina ḡau tamona na natudia be hadibalaidia louloumu. To tama sina na bae diba, una dala amo idia ese natudia na be durudiamu Dirava ena Hereva bae lalopararalaia bona bae badinaia.

20. Edena dalai Salamo 127:4 ese natu na diba ida e haheḡereḡeredia?

²⁰ Natumui na ba dibadia namonamo. Salamo 127 ese natu na diba ida e haheḡereḡeredia. (Salamo 127:4 ba duahia.)  Diba na ḡau idauidau amo e kara bona edia bada na idauidau, una heḡereḡerena natu rarua na dia heḡereḡere. Una dainai tama bona sina ese natudia ta ta bae hadibadia daladia na bae lalodia namonamo. Hari ina negai, Israel ai e nohomu headava taudia na natudia ese Iehova bae hesiai henia totona e durudia dalana e herevalaia neganai, ini e gwa toma: “Natumai raruosi na dia nega tamona a stadi henidiava.” Ruma bese lalonai tama ta ta na abi hidi bae kara una dala bae badinaia eiava lasi.

21. Iehova be edena dalai tama sina baine durudia diba?

²¹ Tama sina na nega haida be hemamimu natu inaridia madunana na auka, to idia na Iehova ena harihari ḡaudia. Nega iboudiai ia na noho heḡaeḡae tama sina baine durudia. Ia na mai ena ura ida tama sina edia ḡuriḡuri e kamonaimu. Bona unu ḡuriḡuri e haerelaimu daladia na Baibul, eda pablikeisin, bona kongrigeisin lalonai haheitalai namodia bona heduru herevadia e henimu tama sina e ḡaukaralaidiamu.

22. Tama sina ese natudia bae henidia ḡau namodia be dahaka?

²² Taunimanima haida na e gwaumu, natu inaridia karana na vaitani laḡani 20 lalonai e karaiamu ḡaukarana ta, to tama sina ese una maduna ihuana karana na basie hadokoamu. Natudia bae henidia harihari ḡaudia namo hereadia na lalokau, nega, bona Baibul ena hahekau herevadia heḡereḡerediai natudia e hadibadiamu karana. Natu ta ta edia laloparara unu hahediba daladia ai na idauidau. To natu momo na Iehova e lalokau heniamu tama sina ese e hadibadia, edia hemami na Asia ai e nohomu taihuna, Joanna Mae, ena heḡereḡerena, ia na e gwa: “Tamagu bona sinagu edia amo na diba ḡaudia na lalo loumu neganai, na moalemu badina e matahakani henigu bona Iehova ilalokau henina karana e hadibagu. Dia e narigu mo to mauri dalana heredaena danu e henigu.” (Her. 23:24, 25) Tadikaka taihu milioni momo danu unu e hemami tomamu.