1. Iehova e hesiai heniamu taudia momo ese e davarimu hekwakwanaidia haida be dahaka?

TANOBADA heḡeḡemadai, Iehova e hesiai heniamu taudia momo na e davarimu hekwakwanaidia daidiai e lalohekwarahimu. Emu kongrigeisin ai una o itaiamu, a? Kristen taudia haida na gorere badana ta e davariamu eiava lalokau taudia e masemu dainai e dara dokomu. Haida be edia ruma bese taudia eiava turadia ese Iehova e rakatania dainai e lalohisihisimu. Eiava disasta daidiai e hisihisimu. Unu tadikaka bona taihu baita hagoadadia na namo. To edena dalai?

2. Dahaka dainai nega haida aposetolo Paulo na hahegoada baine abi na namo?

² Aposetolo Paulo na hekwakwanai momo e davari loulouva bona kahirakahira ena mauri na e haboioa. (2 Kor. 11:23-28) Hisihisi ta na ḡiniḡini bamona ia ese e haheaukalaiava, reana una na gorere ta. (2 Kor. 12:7) Paulo na e lalohisihisi badina ia ida e ḡaukara hebouva tauna, Dema ese ‘tanobada e ura henia’ bona ia na e rakatania. (2 Tim. 4:10) Paulo na lalogoada horoa Kristen tauna ta bona mai lalona idoinai ida haida e durudiava, to nega haida ia na e lalomanokava danu.​—⁠Roma 9:1, 2.

3. Paulo be daika amo goada e abi, bona edena dalai?

³ Paulo na hahegoada bona heduru namona e abia. Edena dalai? Iehova ese Ena lauma helaḡa amo e hagoadaia. (2 Kor. 4:7; Flp. 4:13) Bona Iehova ese Kristen taudia danu e ḡaukaralaidia ia e hagoadaia. Paulo ese ia ida e ḡaukara hebouva taudia haida na e gwauraidia hahegoada bada e heniva taudia. (Kol. 4:11) Idia haida na Aristako, Tukiko bona Mareko. Idia ese Paulo na e hagoadaia bona e durua baine haheauka. Unu Kristen taudia tatoiosi be dahaka ese  e durudia dainai Paulo e hagoadaia? Ta hahegoada hehenimu neganai, idia edia haheitalai be ede baita tohotohoa toma?

4. Edena dalai Aristako na e hamomokania ia na Paulo turana korikorina?

⁴ Aristako na Tesalonika Kristen tauna, bona Makedonia ai e nohova, ia na Paulo turana korikorina ai ela. Aristako sivaraina na Paulo ena misinari laolao ihatoina ai Efeso e vadivadia sivaraina lalonai e hedinarai guna. Ia na Paulo e bamoava lalonai, daḡedaḡe taudia ese e dabaia tao. (Apos. 19:29) Gabeai e ruhaia neganai, ena mauri na se laloa to Paulo ida e nohova. Hua haida muridiai, Greece ai, ena be Paulo e inai heniava taudia na e urava ia bae hamasea, to Aristako na dounu Paulo e bamoava. (Apos. 20:2-4) Laḡani 58 C.E. bamona ai, Paulo na e siaia Roma bainela unuseniai bae hadiburaia neganai Aristako ese e bamoa, bona e gui boutina na davara ai e dika neganai, raruosi ese una na e haheaukalaia. (Apos. 27:1, 2, 41) Roma ai e kau neganai, ia na Paulo ida dibura rumana ai e nohova. (Kol. 4:10) Asi ta daradaramu Aristako na Paulo turana korikorina ai ela bona ia na e hagoadaia.

5. Hereva Lada-isidia 17:17 heḡereḡerena, edena dalai ita na tura korikoridia ai baitala?

⁵ Aristako heḡereḡerena dia nega namodia ai mo to nega dikadia ai danu tadikaka bona taihu baita durudia. (Hereva Lada-isidia 17:17 ba duahia.) Tadikaka bona taihu edia hekwakwanai e oremu murinai danu baita hagoadadia. Frances * na tamana e mase bena hua toi muridiai sinana ma e mase, ia na eto: “Edai e varamu hekwakwanaidia ese e havaramu hisihisidia na basie ore haraḡamu. Ena be doini na lalohisihisimu, to na moalemu badina turagu ese doini e lalogumu.”

6. Edena dalai baita hahedinaraia ita ese turada na ta lalodia badamu?

⁶ Tura korikoridia na edia nega bona goada e ḡaukaralaimu tadikaka bona taihu e durudiamu. Heḡereḡere, tadikaka ta ladana Peter, na dokta ese e hamaoroa ia na mai ena gorere bona una gorere  na be bada be laomu bona baine hamasea diba. Ia adavana Kathryn na e gwa: “Emai kongrigeisin ai tadikaka ta bona adavana ese e laohaimai hospele, bena Peter ena gorere a dibaia. Una nega amo idia na lalodia e hadai emai metau lalonai basie rakatanimai bona idia na unu e kara tomamu.” Eda metau negadiai turada ese se rakatanidamu neganai, una ese ita na e hagoadadamu.

7-8. Kolose 4:7-9 heḡereḡerena, edena dalai Tukiko na e hahedinaraia ia na tura korikorina?

⁷ Roma Kristen tauna ta, Tukiko na Paulo turana korikorina ai ela. (Apos. 20:4) Laḡani 55 C.E. heḡereḡerena ai, Paulo na dala e kara Iuda Kristen taudia idurudia totona moni bae habou, bona reana Tukiko e abia hidi una ḡaukara badana baine karaia. (2 Kor. 8:18-20) Gabeai, Paulo na nega ginigunana Roma ai e hadiburaia neganai, Tukiko na iena hereva iloalaina tauna ai ela. Asia lalonai kongrigeisin idauidau ai, ia ese Paulo ena revareva bona hahegoada herevadia e laohaiva.​—⁠Kol. 4:7-9.

⁸ Tukiko na Paulo turana namona ai ela. (Tito 3:12) Una negai e nohova Kristen taudia haida na dia Tukiko heḡereḡerena. Laḡani 65 C.E. bamona ai, Paulo na nega iharuana e hadiburaia neganai, ia na e gwa Asia ai e nohova Kristen tatau momo na asie urava ia bae bamoa, reana badina idia na daḡedaḡe taudia garidia e gariva. (2 Tim. 1:15) Ena be unu e vara tomava, to Paulo ese Tukiko na ḡaukara ta e henia. (2 Tim. 4:12) Momokani, Paulo na e moale badina Tukiko na ia turana namona ta.

9. Tukiko be ede baita tohotohoa toma?

⁹ Tukiko baita tohotohoa amo tura korikoridia ai baitala. Heḡereḡere, tadikaka bona taihu baita durudia totona dia baita gwauhamata mo to idurudia ḡaudia haida danu baita kara. (Mat. 5:37; Luka 16:10) Heduru e uramu taudia na e dibamu ita ese baita durudia dibamu neganai, una ese idia na e hagoadadiamu. Taihu ta ese badina na e herevalaia, e gwa: “Oi na basio lalohekwarahimu badina oi na mai dibamu oi e gwauhamata henimu  tauna na nega korikori ai oi be durumumu.”

10. Hereva Lada-isidia 18:24 heḡereḡerena, hahetoho eiava lalohisihisi e haheaukalaimu taudia be daidia ese bae hagoadadia?

¹⁰ Nega momo hahetoho eiava lalohisihisi e haheaukalaimu taudia na tura korikorina ta enai edia lalohadai e gwauraimu neganai, goada e abimu. (Hereva Lada-isidia 18:24 ba duahia.) Bijay natuna merona na orea amo e atoa siri murinai ia na e lalohisihisi, bona e gwa: “Lau na na ura egu hemami na turagu korikorina ta enai baina herevalaia.” Carlos na kerere ta e karaia dainai kongrigeisin ai ena hahenamo na e haboioa. Ia na e gwa: “Lau na na urava turagu korikorina ta enai egu hemami baina herevalai bona asi na urava haida ese bae hahemaoro henigu.” Carlos ese ena hemami na elda taudia ediai e herevalaia bona idia ese e durua dainai una hekwakwanai na e hanaia. Bona e diba elda taudia ese iena hekwakwanai na haida basie hamaoroladiamu neganai, una ese e hagoadaia.

11. Edena dalai tura korikoridia ai baitala?

¹¹ Tura korikoridia ai baitala totona, haheauka karana baita hahedinaraia na namo. Zhanna na adavana ese e rakatania neganai, turana ediai ena hemami e herevalaia karana ese e hagoadaia. Ia na e gwa: “Ena be reana ḡau tamona na herevalaia loulouva, to idia na e hakala namonamova.” Bema bo hakala namonamomu, oi na tura namona ta ai bo laomu.

12. Mareko be daika, bona edena dala ai e hahedinaraia ia na e ura ma haida baine durudia?

¹² Mareko na Iuda Kristen tauna ta, Ierusalem amo. Iena kasen Banaba, na taunimanima momo ese e dibaia misinari tauna ta. (Kol. 4:10) Mareko ena ruma bese na taḡa taudia to ena mauri lalonai kohu bona moni na se lalodia bada. Iena mauri ibounai lalonai, mai ena ura ida ma haida ihesiai henidia karana na e moalelaiava. Heḡereḡere, nega haida ia na aposetolo Paulo bona aposetolo Petero e bamodiava, unu negai reana Mareko na idia edia aniani e hoiva, edia noho gabudia e heḡaeḡaelaiva bona ma ḡau haida danu e karava. (Apos. 13:2-5; 1 Pet. 5:13) Paulo ese Mareko na e gwauraia: “Lau ida a ḡaukara heboumu, Dirava ena basileia iharorolaina ai,” bona ia ese Paulo na e hagoadaia.​—⁠Kol. 4:10, 11.

13. Timoteo Iharuana 4:11 heḡereḡerena, edena dala ai Paulo ese Mareko ena hesiai ḡaukara na e laloa bada?

¹³ Mareko na Paulo tura namona ta ai ela. Heḡereḡere, laḡani 65 C.E. bamona ai, Paulo na Roma ai e hadiburaia neganai, ia ese ena revareva iharuana na Timoteo e tore henia. Una revareva lalonai, Paulo ese Timoteo e noia Mareko ida Roma baela. (2 Tim. 4:11) Paulo na Mareko ese guna e karaia hesiai ḡaukarana e laloa bada dainai, e ura Mareko na ia ida baine noho. Mareko ese Paulo na e durua, heḡereḡere reana aniani eiava iena toretore ḡaudia e heniava. Unu amo Paulo na e durua baine haheauka ena be ia bae hamasea negana na vada kahirakahira.

14-15. Mataio 7:12 haida idurudia karanai dahaka e hadibadamu?

¹⁴ Mataio 7:12 ba duahia. Metau negadiai haida ese e durudamu dainai ta moalemu. Ryan tamana na aksiden badana ta ai e mase, bona ia na e gwa: “Ta hisihisimu negadiai, ita edai na dia heḡereḡere dina ta ta ai ta karamu ḡaudia baita kara. To, ta na oi idurumu totona ḡau maraḡina  ta baine karaia neganai, una ese oi na be hagoadamumu.”

¹⁵ Bema baita hakalamu bona ḡau baita haero namonamomu, baita dibamu taunimanima be ededia dalai baita durudia. Heḡereḡere taihu ta na e ura Peter bona Kathryn, paragraf 6 ai tame herevalai taudia baine durudia hospele baine laohaidia. Peter bona Kathryn na basie taritari lou diba dainai una taihu na sediual ta e karaia unu amo kongrigeisin ai tadikaka taihu ta ta na mai edia nega idia na hospele bae laohaidia. Una ese Peter bona Kathryn e durudia, a? Kathryn na e gwa: “A hemami, vaitani maduna metauna ta na paḡamai amo e hekoki na heto.” Hanaihanai ba helalotao, oi ese ma haida na bo hagoadadiamu ena be o karaiamu ḡauna na dia ḡaukara badana.

16. Mareko ena haheitalai amo dahaka ta dibamu?

¹⁶ Iesu ena negai e nohova hahediba tauna Mareko, na ḡaukara momo e karava Kristen tauna ta. Iehova dainai mai anina bada ḡaukaradia momo e kara, heḡereḡere Evanelia bukana Mareko e torea. To ia na nega e ato Paulo baine hagoadaia bona Paulo na e diba Mareko baine noia diba ia baine durua totona. Angela na e lalohisihisi badina tubuna hahinena na haida ese e alaia, to una na e haheaukalaia badina haida na mai edia ura ida ia e hagoadaia. Ia na e gwa: “Mai lalodia iboudiai e urava lau bae durugu taudia ihereva henidia egu ai na se aukava. Idia na asie gariva to e urava lau bae durugu.” Siboda baita henanadai, ‘Lau be mai egu ura ida tadikaka taihu na hagoadadiamu, eiava?’

17. Korinto Iharuana 1:3, 4 baita laloa dobumu neganai dahaka baita karamu?

¹⁷ Tadikaka bona taihu momo na hahegoada bae abi na namo. Reana haida ese ita e hagoadada herevadia baita ḡaukaralai diba, idia baita hagoadadia. Nino tubuna hahinena na e mase, bona ia na e gwa: “Bema ita ese haida ihagoadadia urana baita hahedinaraiamu, Iehova ese  ita na baine ḡaukaralaida diba.” (2 Korinto 1:3, 4 ba duahi.) Frances, paragraf 5 ai tame herevalaia taihuna na e gwa: “Korinto Iharuana 1:4 ena hereva na momokani. Haida edia hahegoada herevadia eiava daladia na baita ḡaukaralai diba ma haida baita hagoadadia.”

18. (a) Dahaka dainai haida na e garimu ma haida bae hagoadadia totona? (b) Edena dalai ma haida baita hagoadadia? Haheitalai ta ba gwauraia.

¹⁸ Namona na dala baita tahu ma haida baita durudia. Heḡereḡere ta e lalometaumu neganai, nega haida ita na asita dibamu dahaka baita gwaurai eiava dahaka baita kara. Elda ta ladana na Paul, ia tamana e mase murinai haida ese e hagoadaia dalana na e laloataomu. Ia na e gwa: “Na helalotaomu idia ediai na e aukava lau bae hereva henigu totona. Idia na asi dibadia dahaka bae gwaurai. To na moale badina idia na e urava lau bae hagoadagu bona bae durugu.” Tadikaka Tajon ena hemami danu unu bamona, tano laga badana ta e vara murinai, ia na ini e gwa toma: “Tano laga e ore murinai taunimanima ese e siai meseij iboudiai na asi na lalodia taomu, to na laloataomu ḡauna na idia na e urava bae diba bema lau na namo, una dainai e sekegu loulouva.” Bema baita hahedinaraiamu ma haida na ta lalodia badamu, haida na baita hagoadadiamu.

19. Dahaka dainai lalomu ba hadaia ma haida ba hagoadadia?

¹⁹ anai na be bada be laomu bona mauri na be aukamu. (2 Tim. 3:13) Bona ita na kara dika tauda bona ta kerere louloumu dainai, hanaihanai hahegoada baita abi na namo. Aposetolo Paulo e haheauka ela bona ena mauri dokona badina ta na, Kristen tadikakadia haida ese e hagoadaia. Namona na Aristako heḡereḡerena, turada na basita rakatanidia, Tukiko heḡereḡerena tura korikoridia ai baitala bona Mareko heḡereḡerena, mai eda ura ida ma haida baita durudia. Unu baita kara tomamu neganai, tadikaka bona taihu na baita durudiamu bena mai edia abidadama ida Iehova be hesiai heniamu.​—1 Tes. 3:2, 3.