1-2. Pentekoste 33 C.E. dinana ai dahaka e vara?

LAḠANI 33 C.E. Ierusalem ai Pentekoste dinana Sunday daba ai, hahediba taudia 120 heḡereḡerena na ruma ta atai daiutuna ai e hebou. (Apos. 1:13-15; 2:1) Una dina do se abia neganai, Iesu ese idia na e haḡanidia Ierusalem ai bae noho badina unuseniai idia na harihari ḡauna idauna ta bae abia. (Apos. 1:4, 5) Bena dahaka e vara?

² “Guba amo reḡe ta e reḡe dagu, lai badana huna na heto.” Una reḡe na rumai helai boudia iboudiai ese e kamonaia. Bona “lahi maladia na heheto” na hahediba taudia tubuadia ai e hururu “bena Lauma Helaḡa ese e hahonudia.” (Apos. 2:2-4) Iehova ese ena lauma helaḡa na una dala amo idia latadiai e bubua. (Apos. 1:8) Idia na lauma helaḡa * amo e horodia taudia ginigunadia ai ela bona Iesu ida guba ai bae lohia helarona e henidia.

3. Dahaka dainai Pentekoste 33 C.E. ai, e horodia taudia iboudiai na asie daradara idia na Dirava ena lauma helaḡa amo e horodia?

³ Una negai bema oi na hahediba tauna ta bona atai daiutuna ai noho, una dina ai e vara ḡauna na basioma laloaboio diba. Ḡau ta na lahi maladia na heto oi tubuamu ai e hururu bona gado idauidau ai o hereva. (Apos. 2:5-12) Una negai oi na so daradara oi na lauma helaḡa amo  e horomu. To, lauma helaḡa amo e horodia taudia iboudiai be hoa dalanai bona nega tamona ai e horodia heboumu, eiava? Lasi. Ede ta diba tomamu?

4. Kristen taudia edia negai e nohova horoa taudia be nega tamona e horodia, a? Ba herevalaia.

⁴ Ta na Dirava ena lauma helaḡa amo e horoamu neganai ienai e varamu ḡauna mani aita herevalaia. Pentekoste 33 C.E. ai, dia Kristen taudia 120 mo to una dina ai taunimanima 3,000 heḡereḡerena e bapatiso neganai, idia danu lauma helaḡa amo e horodia. (Apos. 2:37, 38, 41) To laḡani haida muridiai Kristen taudia iboudiai na dia e bapatiso neganai e horodia. Samaria taudia na dia e bapatiso horonai lauma helaḡa amo e horodia. (Apos. 8:14-17) To, Korenelio mai ena bese ida na do asie bapatiso neganai, lauma helaḡa amo e horodia.​—⁠Apos. 10:44-48.

5. Korinto Iharuana 1:21, 22 ena hereva heḡereḡerena, ta na Dirava ena lauma helaḡa amo e horoamu neganai, ienai be dahaka e varamu?

⁵ Ta na Dirava ese ena lauma helaḡa amo e horoamu neganai, ienai e varamu ḡauna mani aita herevalaia. Matamanai haida na basie hamomokaniamu idia na Iehova ese e abidia hidi. Reana be daradaramu, ‘Dahaka dainai Dirava ese lau e abigu hidi?’ To haida be reana unu na basie lalo tomamu. Herevana ta na ede e hemami tomamu, to aposetolo Paulo ese horoa taudia iboudiai ediai e varamu ḡauna na e herevalaia, eto: “Umui ese danu Keriso o abidadama henia bona Dirava ese ia toana * e henimui, Lauma Helaḡa, e gwaurai hamata Laumana, bunai. Toana bunai, ita ese ahuda baita abia Dirava ena gwauhamata heḡereḡerena.” (Efe. 1:13, 14) Momokani Iehova na ena lauma helaḡa e ḡaukaralaiamu unu amo e hahedinaraia ḡoevaḡoevamu ini Kristen taudia na ia ese e abidia hidi. Lauma helaḡa na toa ta eiava gwauhamata ta e hadibadiamu vaira negai idia na gubai  bae mauri hanaihanai dia tanobada ai.​—⁠2 Korinto 1:21, 22 ba duahi.

6. E horoa Kristen tauna ese iena guba helarona baine abia totona, dahaka baine kara na namo?

⁶ Bema Kristen tauna ta na e horoa, ia be maoromaoro guba bainela, a? Lasi. Ia na mai dibana ia na e abia hidi guba bainela. To, ina hereva baine laloa bada na namo: “Varavaragu e, ba goada balaheni, e boirimui bona e abimui hidi vada ba hamomokania, badina be unu ba kara toma negana ai umui na basio keto.” (2 Pet. 1:10) Una dainai, ena be e horoa Kristen tauna ta na e abia hidi eiava e boiria guba bainela, to namona na ena abidadama baine goada unu amo ahuna na baine abia.​—⁠Flp. 3:12-14; Heb. 3:1; Apok. 2:10.

7. E horodia taudia be ede e diba tomamu idia na guba helarona bae abia taudia?

⁷ To ta be ede e diba tomamu ia na guba bainela? Paulo ese una na e hahedinaraia, ia ese Roma ai e nohova horoa tadikaka na e gwauraidia “helaḡa taumui.” Ia na eto: “Umui be hesiai laumana mai garina ida asio abia lou, a heabi-dae laumana vada o abia; taunabunai ta boiboimu, ta tomu Aba e, Tamamai e! Lauma ese ita laumada ida e gwau boumu, e gwauraidamu, ita na Dirava natuna.” (Roma 1:7; 8:15, 16) Dirava na ena lauma helaḡa e ḡaukaralaiamu unu amo horoa taudia e hadibadiamu idia na guba helarona bae abia.​—⁠1 Tes. 2:12.

8. Edena dalai Ioane Ginigunana 2:20, 27 ese e hahedinaraiamu horoa Kristen taudia e horodia karana na ta ese baine hamomokania na asi anina?

⁸ E horodia taudia na e abia dae momokanimu idia na Iehova ese e abidia hidi guba baela. (1 Ioane 2:20, 27 ba duahi.) Momokani, kongrigeisin amo Iehova ese ita ta ta e hadibadamu heḡereḡerena idia danu una dala tamona amo e hadibadiamu. Kristen taudia e horodiamu karana na ta ese baine hamomokania na asi anina. Badina Iehova ese siahu iboudiai e hereadiamu ḡaukara siahuna, iena lauma helaḡa, e ḡaukaralaia idia e horodia.

9. Efeso 1:18 heḡereḡerena, bema ta e horoamu neganai, ienai be dahaka e varamu?

⁹ Hari ina negai, Dirava ena hesiai taudia momo na Dirava ese e horoamu tauna enai e varamu ḡauna na asie lalopararalaiamu. Badina Dirava ese idia na se horodia. Dirava ese taunimanima e karadia na tanobada ai bae mauri hanaihanai, to dia gubai. (Gen. 1:28; Sal. 37:29) Iehova ese haida mo e abidia hidi guba ai bae noho. Una dainai, Dirava ese ena lauma helaḡa amo e horodiamu neganai, ia ese edia helaro bona lalohadai na e haidaumu, unu amo idia na edia guba helarona bae laloa.​—⁠Efeso 1:18 ba duahia.

10. “Vara lou” anina be dahaka? (Futnout danu ba itaia.)

¹⁰ Kristen taudia na lauma helaḡa amo e horodiamu neganai, idia na e “vara loumu.” * Iesu ese e hahedinaraia se horoa tauna enai “vara lou” eiava “lauma ena amo e varamu ḡauna” iherevalaina na auka.​—⁠Ioa. 3:3-8.

11. Ta e horoamu neganai iena lalohadai e idaumu dalana ba herevalaia.

¹¹ Kristen taudia na e horodiamu neganai,  edia lalohadai be ede e idau tomamu? Iehova ese idia do se horodia neganai, idia na tanobada ai bae mauri hanaihanai helarona e laloa badava. Idia na Dirava ese kara dika taudia baine haoredia bona tanobada na paradaiso ai baine halaoa negana e nariava. Reana idia na e urava edia ruma bese ai e mase tauna ta baine toreisi lou neganai bae hedavari henia. To idia e horodia murinai, edia lalohadai na e idau. Dahaka dainai? Badina be dia e laloamu edia guba helarona ese tanobada helarona e hereaia. Eiava dia e davari hisihisi eiava lalometau daidiai lalodia na e haidaumu. Eiava dia e lalomu idia na tanobadai bae mauri hanaihanai neganai idia na basie moalemu. To, Iehova ese ena lauma helaḡa e ḡaukaralaiamu edia lalohadai bona edia helaro e haidaumu.

12. Petro Ginigunana 1:3, 4 heḡereḡerena, e horodia Kristen taudia ese edia helaro be ede e laloa tomamu?

¹² E horoamu tauna na reana be laloamu ia na dia heḡereḡere guba helarona baine abia. To, e diba momokanimu Iehova ese ia na e abia hidi. Ia na gubai baine noho hanaihanai helarona e laloamu neganai e moalemu.​—⁠1 Petro 1:3, 4 ba duahi.

13. E horodia taudia ese tanobadai edia mauri be ede e laloa tomamu?

¹³ Anina be e horodia taudia e uramu bae mase, a? Aposetolo Paulo ese una henanadai na e haerelaia. Ia ese taunimanima tauanidia na kalaga ta ida e haheḡereḡerea bona e gwa: “Ina kalaga ai a nohomu taumai emai maduna daidiai a ḡanaḡanamu; asia uramu baia dokia oho, to a uramu matamatana baia dokilaia; bena mauri ese mase baine hadonoa.” (2 Kor. 5:4) Unu horoa taudia ese edia mauri na e laloa badamu, bona asie uramu bae mase. To e uramu dina ta ta ai edia mauri na bae ḡaukaralaia turadia bona varavaradia ida Iehova bae hesiai henia. Herevana hari ina negai dahaka ḡaukara e karamu, to idia ese edia helaro hereadaena na e laloa badamu.​—⁠1 Kor. 15:53; 2 Pet. 1:4; 1 Ioa. 3:2, 3; Apok. 20:6.

14. Dahaka ese se hamomokaniamu ta na Dirava ena lauma helaḡa amo e horoa?

¹⁴ Reana oi na o laloamu oi danu lauma helaḡa amo e horomu tauna ta. Bema unu o lalo tomamu, ini henanadai ba lalo: Oi be o ura dikadikamu Iehova ena ura ba karaia, a? Oi ese haroro ḡaukara o goadalaiamu, a? Oi be hanaihanai Dirava ena Hereva o duahiamu bona “Dirava ena dobu ḡaudia” o tahumu, a? (1 Kor. 2:10) Iehova ese emu hesiai ḡaukara e hanamoamu, a? Oi o uramu ma haida ba durudia Dirava bae dibaia, a? Iehova ese emu mauri ai e durumumu dalana oi itaiamu, a? Bema unu henandai iboudiai haeredia na “oibe,” anina be oi be Dirava ese e horomu, a? Lasi. Dahaka dainai? Badina Dirava ena hesiai taudia iboudiai, ena be idia na horoa taudia eiava lasi, na unu bae hemami toma. Herevana edia helaro na edeseniai, to Iehova ese ena lauma helaḡa amo ena hesiai taudia baine durudia. Bema oi na lauma helaḡa ese e horomu eiava lasi o daradaralaiamu, anina na oi na dia horoa tauna. Badina Iehova ese e horodia taudia na asie daradaramu. Idia na mai dibadia.

15. Ede ta diba tomamu dia Dirava ena lauma helaḡa e abia taudia iboudiai na guba baela?

 ¹⁵ Ena be lauma helaḡa ese e durudia abidadama taudia momo sivaraidia na Baibul ai baita duahimu, to idia ese guba helarona na asie abia. David na Dirava ena lauma helaḡa ese e hakaua. (1 Sam. 16:13) Bona lauma helaḡa ena heduru amo Iehova ena dobu ḡaudia e lalopararalai bona Baibul bukadia haida e tore. (Mar. 12:36) To aposetolo Petero na e gwa: “David na guba ai se dae kau.” (Apos. 2:34) Ioane Bapatiso na lauma helaḡa ese e rohea. (Luka 1:13-16) Iesu na e gwa ta ese Ioane se hereaia, to ma e gwa ia na guba Basileia lalonai basine vareai. (Mat. 11:10, 11) Iehova ese lauma helaḡa na unu tatau e henidia hoa karadia bae kara, to se abidia hidi guba ai bae noho. Anina be idia be dia heḡereḡere guba helarona bae abia, a? Lasi. To anina na, Iehova ese idia na tanobada Paradaisona ai baine hatoredia isi lou.​—⁠Ioa. 5:28, 29; Apos. 24:15.

16. Hari ina negai Dirava ena hesiai taudia momo be edena helaro e nariamu?

¹⁶ Tanobada ai, Dirava e hesiai heniamu taudia momo na dia Dirava ese e boiridia guba ai bae noho. Heḡereḡere, Abraham, Sara, David, Ioane Bapatiso bona Baibul ese e sivarailaidia abidadama tatau bona hahine haida na tanobada ai bae mauri helarona e nariamu, una negai Dirava ena Basileia ese be lohiadiamu.​—⁠Heb. 11:10.

17. Ededia henanadai na stadi atikol gabena ai baita herevalaimu?

¹⁷ Hari ina negai, e horodia taudia haida na doini ita ida tanobada ai ta nohomu dainai, nega haida henanadai haida baita lalomu. (Apok. 12:17) Heḡereḡere, horoa taudia be ede bae lalo toma? Bema emu kongrigeisin ai Memorial negana ai ta na wain baine inu eiava parao baine ani, ia be ede baita kara henia toma? Bona bema e gwaumu guba helarona bae abia taudia edia namba na e bada e laomu, oi ese una ba lalohekwarahilaia eiava? Atikol gabena ese unu henanadai be haerelaimu.