DABA e rere Nisan 16, 33 C.E. ai, Dirava garina e gariva hahinedia haida na Iesu tauanina e atoa gabuna ela bona daradia na e doko. Lohiabada Iesu Keriso tauanina na dina ta mai kahana bamona vada e noho. Unuseniai e kau neganai, muramura mai bonadia bona dahudahu muramuradia amo e ura Iesu tauanina bae dahua, to e hoa badina Iesu tauanina na asie davaria. Aneru ta ese e hamaorodia, Iesu na mase amo vada e toreisi lou bona eto: “Baine gunalaimui Galilea ai; unuseni ai ba itaia.”​—Mat. 28:1-7; Luka 23:56; 24:10.

1-2. Iesu tauanina e atoa gabunai aneru ta ese hahine haida be dahaka e hamaorolaidia, bona Iesu be dahaka e gwa?

² Unu hahine ese Iesu tauanina e atoa gabuna e rakatania murinai, Iesu na idia ediai e hedinarai bona e hamaorodia eto: “Aola, varavaragu ba hamaorodia, idia na Galilea baela, unuseni ai bae itagu.” (Mat. 28:10) Reana Iesu na e ura hahediba hereva badadia haida na ena hahediba baine hamaorolaidia dainai idia ida e hegogo, bona una na Iesu e toreisi lou murinai ia ese e heḡaeḡaelaia hebouna ginigunana.

3-4. Dahaka dainai baita gwau dibamu Mataio 28:19, 20 ai e gwauraia haheḡanina na dia aposetolo mo e henidia? (Rau 1 laulauna ba itaia.)

³ Mataio 28:16-20 ba duahi. Una hebou lalonai Iesu na ena hahediba taudia ese bae karaia ḡaukara badana e gwauraia, bona hari ina negai ita danu una ḡaukara tamona ta karaiamu. Iesu na eto: “Taunabunai baola, bese iboudiai hahediba ai ba halaodia, . . . ba hadibadia danu, na henimui haheḡanidia iboudiai bae badina.”

 ⁴ Iesu na e uramu ia murinai e rakamu taudia iboudiai na bae haroro. Ia ese una haheḡani na dia aposetolo 11 mo e henidia. Ede ta diba tomamu? O laloamu Galilea ai Iesu ese ororo ai una haheḡani e heni neganai, iena aposetolo mo nonoho, a? Ba helalotao aneru ese hahine na e hamaorodia eto: “Galilea . . . ai ba itaia.” Una dainai, unu abidadama hahinedia danu reana una hebou lalonai nonoho. To dia una mo. Aposetolo Paulo ese danu e hahedinaraia Iesu na “nega tamona ai varavarada sinahu-ima mai dikoana ediai e hedinarai.” (1 Kor. 15:6) To, unu taunimanima 500 mai kahana be gabu tamona ai e hegogo, a?

5. Korinto Ginigunana 15:6 amo dahaka ta dibamu?

⁵ Badi haida daidiai ta hamomokaniamu Paulo ese e gwauraia herevana na Galilea ai e karaia hebouna e herevalaiamu. Badidia be dahaka? Ginigunana na, Iesu ena hahediba taudia momo na Galilea taudia. Idia na hutuma bona Ierusalem ai ruma ta ai bae hegogo na dia heḡereḡere dainai Galilea ororona ai bae hebou na namo. Iharuana na, Iesu e toreisi lou murinai ia na ena aposetolo 11 ida Ierusalem ai ruma ta ai e hedavari guna. Bema Iesu ena ura na aposetolo mo haroro bona hahediba ihalaodia haheḡanina bema henidia una na Ierusalem ai bema karaia, to ena aposetolo, hahine, bona ma haida na basinema noidia Galilea ai bae hegogo.​—Luka 24:33, 36.

6. Edena dalai hari iseda negai Mataio 28:20 ai e gwauraia haheḡanina na mai anina bada, bona dahaka ese e hamomokaniamu taunimanima ese una haheḡani na e badinaiamu?

⁶ Mani badi ihatoina aita laloa. Taunimanima na hahediba taudia ai bae halaodia haheḡanina na Iesu ese dia una negai e nohova Kristen taudia mo e henidia. Ede ta diba tomamu? Iesu ese ia murinai e rakava taudia e henidia haheḡanina dokonai, e gwa: “Lau na daba daba iboudiai umui ida ta nohomu ela bona tanobada dokona.” (Mat. 28:20) Iesu ena hereva na momokani badina hari ina negai momo na hahediba taudia ihalaodia ḡaukarana e karaiamu. Laḡani ta ta kahirakahira taunimanima 300,000 na e bapatisomu, Iehova ena Witnes taudia ai e laomu, bona Iesu Keriso ena hahediba taudia ai e laomu. Una na hoa ḡauna.

7. Dahaka baita herevalaimu, bona dahaka dainai?

⁷ Baibul e stadilaiamu taudia momo na e bapatisomu. To ena be haida edia stadi na ta karaia hanaihanaimu, idia na asie uramu hahediba taudia ai baela. Edia stadi na e moalelaiamu to bapatiso bae abi totona asie goadamu. Ita iboudai na ta uramu eda Baibul stiuden baita durudia e dibamu ḡaudia na edia mauri lalodiai bae badina bona Keriso ena hahediba ai baela. Stiuden baita durudia Iehova bae lalokau henia bona bae goada daladia na ina atikol ai baita herevalaimu. Dahaka dainai? Badina reana nega ta baita lalomu stadi be dounu baita karaiamu eiava.

8. Dahaka dainai nega haida na e aukamu eda stiuden baita durudia Iehova bae lalokau henia totona?

⁸ Iehova na e uramu lalokau dainai, taunimanima ese ia bae hesiai henia. Una dainai ita na ta uramu eda stadi taudia baita durudia, bena bae laloparara Iehova ese idia ta ta na e lalodiamu bona e lalokau henidia badamu. Bona ta uramu baita durudia bae diba Iehova “na ihareha tamadia bona vabu igimadia” Diravana. (Sal. 68:5) Emu stiuden na be itaiamu Dirava ese idia e lalokau henidiamu neganai, edia lalokau Iehova enai na be badamu. To, Baibul stiuden haida ediai na be aukamu Iehova na Tama lalokauna ta bamona bae laloa, badina edia ruma bese lalonai tamadia ese idia ediai lalokau korikorina na asie  hahedinaraia. (2 Tim. 3:1, 3) Baibul stadi o karamu neganai, Iehova ena kara na ba herevalai namonamo. Emu stiuden ba durudia bae laloparara Dirava lalokauna na e uramu idia na mauri hanaihanai bae abia, bona ia na noho heḡaeḡae idia baine durudia. To baita karaia ḡauna ma ta be dahaka?

9-10. Ededia buka be eda Baibul stiuden ida baita stadilai, bona dahaka dainai unu buka baita ḡaukaralai?

⁹ Ini buka “What Can the Bible Teach Us?” bona “How to Remain in God’s Love” ba ḡaukaralai diba. Unu buka e tore badidia na ita bae duruda eda stiuden baita durudia Iehova bae lalokau henia totona. Heḡereḡere, Teach Us bukana karoa ginigunana ese ini henanadai be haerelaimu: Dirava ese ita e lalodamu eiava ia na daḡedaḡe tauna?, Bema taunimanima na hisihisi e davarimu, Dirava ena hemami be ede bamona?, bona Iehova turana ai baola diba, a? To, mani Remain in God’s Love bukana aita laloa. Una buka ese stadi tauna be duruamu bena ia na be lalopararamu ena mauri ai Baibul ena hahekau herevadia be badinamu neganai, iena mauri na be haidauamu bona  Iehova turana ai be laomu. Ena be unu buka ruaosi na haida ida vada o stadilai, to stadi ta ta iboudiai ba heḡaeḡaelai namonamo unu amo stiuden baine durua ḡauna ba dibaia bona ba durua diba.

¹⁰ To bema stiuden na e uramu topik ma ta baine herevalaia to una topik e herevalaiamu pablikeisin na dia Hahediba Mauana ai, oi be dahaka ba kara? Bema ia enai una pablikeisin na mia ba hagoadaia sibona ese baine duahia, unu amo ataiai tame herevalai bukadia ta amo ena stadi na dounu ba karaia.

11. Edena negai eda stadi na ḡuriḡuri amo baita kehoa bona baita koua, bona edena dalai stiuden baita durua baine laloparara una na mai anina bada?

¹¹ Ḡuriḡuri amo stadi ba hamatamaia. Wiki haida lalodiai stadi ta ta karaiamu murinai, maoromaoro ḡuriḡuri amo baita kehoa bona baita koua diba. Namona na stiuden baita durua bena baine laloparara Dirava ena lauma helaḡa ese ita na be durudamu Baibul baita lalopararalaia. Stadi e hakauamu taudia haida na Iamesi 1:5 ai e herevalaia ḡuriḡuri badina e hahedinaraiamu, ini e gwau tomamu: “Umui ta aonega ai bema dabu, ia ese taunimanima iboudiai e henidia dudu kaumu bona se gwaugwaumu Diravana na baine noia.” Stadi e hakauamu tauna ese ena stiuden e nanadaiamu, “Edena dalai Dirava amo aonega baita noia?” Stiuden na maoromaoro be dibamu namona na Dirava baita ḡuriḡuri henia.

12. Edena dalai Salamo 139:2-4 amo emu stiuden ba durua diba ena ḡuriḡuri dalana baine hanamoa totona?

¹² Emu Baibul stiuden na ḡuriḡuri dalana ba hadibaia. Ba hadibaia mai lalona idoinai ida be gwauraiamu ḡuriḡurina na Iehova ese be hakala heniamu. Ba hahedinaraia danu, ita siboda eda ḡuriḡuri lalodiai ita lalodai e miamu herevadia na Iehova baita hamaorolaia, reana unu na ma haida ediai basita gwaurai diba ḡaudia. Baita helalotao, Iehova ese eda lalohadai na vada e dibadia vaitani. (Salamo 139:2-4 ba duahi.) Bona eda stiuden baita hagoadadia Dirava bae noia unu amo baine durudia edia lalohadai kereredia bona kara mirodia bae rakatani helaoreana. Heḡereḡere, bema o stadi heniamu tauna ta na vada e stadi daudau, to ia na doini Kristen taudia ese asie moalelaimu dina helaḡana ta e moalelaiamu. Ia na mai dibana una na kerere, to ia na doini una dina helaḡana ena moale karadia haida e moalelaimu. Ba hagoadaia, ena hemami na Iehova baine hamaorolaia bona baine noia baine durua Ia e uramu karadia mo baine ura heni.​—Sal. 97:10.

13. (a) Dahaka dainai eda Baibul stiuden na hebou baema totona baita vavedia haraḡa? (b) Dahaka baita kara unu amo eda Baibul stiuden na Kingdom Hall baema neganai basie hemarai?

¹³ Emu Baibul stiuden ba vavedia hebou baela. Emu stiuden na Kristen heboudia ai e kamonaimu bona e itamu ḡaudia ese baine hagoadaia diba Iehova baine hesiai henia. Kingdom Hall ai be Dahaka E Karamu? vidiona ba hahedinaraia, bona ba vavea oi ida hebou baola totona. Bema oi na mai emu motuka ba durua diba. Bona kongrigeisin ai tadikaka taihu idauidau ba noidia diba oi bae bamomu iena stadi ba karaia totona. Unu amo ia na kongrigeisin lalonai tadikaka taihu idauidau be manadadiamu, bona hebou be laomu neganai basine hemaraimu.

14. Dahaka ese ta baine durua lauma dalanai baine goada?

¹⁴ Ita na ta uramu eda Baibul stiuden baita durudia lauma dalanai bae goada. (Efe. 4:13) Bema ta na e uramu ita ida Baibul baita stadilaia, reana ia na be uramu stadi karana ese ia baine durua dalana baine dibaia. Bona iena lalokau Iehova enai be badamu neganai, ia ese haida bona kongrigeisin ai tadikaka taihu baine durudia daladia be lalomu. (Mat. 22:37-39) Nega maorona ai emu Baibul stiuden ba hadibaia ita ese Basileia ḡaukara iduruna totona kontribiusin baita heni diba.

15. Edena dalai Baibul stiuden ta baita hadibaia unu amo hekwakwanai baine hanaidia?

 ¹⁵ Hekwakwanai ihanaidia daladia na emu Baibul stiuden ba hadibalaia. Heḡereḡere, bema emu Baibul stiuden na bapatiso lasi pablisa ta bona oi baine hamaoromu kongrigeisin ai ta ena kara dainai ia na e lalohisihisimu. Dia namo ia ba hamaoroa daika be maoro bona daika be kerere, to Baibul ena hereva ba herevalaia bona ia baine karaia ḡauna ba hadibaia. Emu stiuden ese una tadikaka ena dika na baine gwauatao eiava baine laloaboio diba. To, bema ienai una na auka, namona na mai manauna bona lalokauna ida una tadikaka baine hereva henia unu amo bae maino. (Mataio 18:15 ba haheḡereḡerea.) Emu stiuden ba durua baine gwaurai ḡaudia na baine heḡaeḡaelai. JW Library^® app iḡaukaralaina dalana ba haheitalaia, Research Guide for Jehovah’s Witnesses, bona jw.org^® ai e herevalai pablikeisin amo ba hadibaia hetahu karana baine karaia namonamo totona. Bema emu stiuden do se bapatiso neganai bo hadibaia namonamomu, ia be bapatisomu murinai kongrigeisin ai ena hebamo karana tadikaka taihu ida na be namomu.

16. Pablisa ta bo noiamu emu stadi lalonai baine helai vareai ena namo be dahaka?

¹⁶ Pablisa haida ba noidia​—bona sekit tauna e vadivadimu neganai ba noia diba​—emu stadi lalonai bae helai vareai. Dahaka dainai? Tame herevalai guna badidia daidiai bona reana oi ese emu Baibul stiuden basio durua diba daladiai pablisa haida ese emu stiuden na bae durua diba. Heḡereḡere, emu stiuden na e uramu siga ani karana baine hadokoa, to nega momo ienai na e aukamu unu baine kara toma. Reana una kara e hanaia Witnes ta ba noia diba emui stadi lalonai baine helai vareai. Ia ese emu stiuden baine durua diba. Bema tadikaka goadana ta o laohaiamu to ia vairanai emu hemami na dia namo, ia ba noia stadi baine hakaua. Unu dala amo emu stiuden ese heduru baine abi diba. Ba helalotao, ita na ta uramu eda stiuden na lauma dalanai bae goada.

17-18. Bema oi na o uramu stadi ta ba hadokoa, ba lalo guna ḡaudia be dahaka?

¹⁷ Bema emu Baibul stiuden ese ena mauri lalonai e dibamu ḡaudia na se badinamu, reana sibomu bo henanadaimu, ‘Egu Baibul stiuden ena stadi baina hadokoa, eiava?’ Abi hidi ta do so karaia neganai, emu Baibul stiuden ese baine kara diba ḡaudia ba lalo guna. Haida ese edia mauri dalana na basie haidaua haraḡamu. Sibomu ba henanadai: ‘Egu stadi tauna be ena noho dalana bona laloparara heḡereḡerenai sensi haida e karamu, eiava?’ ‘Ena stadi ai e dibamu ḡaudia be  e ‘badinamu,’ a?’ (Mat. 28:20) Ena be stiuden ta na hahediba tauna ai basine lao haraḡamu, to iena laloparara heḡereḡerenai ena mauri baine haidaua diba.

¹⁸ Bema ta na nega daudau lalonai e stadi to ena stadi na se laloa badamu, ita be dahaka baita kara? Mani ina a laloa: Emu stiuden na Teach Us bukana, eiava reana Remain in God’s Love bukana e stadilaiamu, to kongrigeisin hebouna ta eiava Memorial na do sela. Bona ḡau asi anidiai ena stadi na se hekaramu. Bema emu stiuden na unu e kara tomamu, ba hereva henia mai momokanimu ida. *

19. Oi be dahaka ba gwaurai diba bema o itaiamu emu Baibul stiuden ese stadi na se laloa badamu, bona dahaka ba lalo na namo?

¹⁹ Reana emu stadi tauna ba nanadaia diba: ‘O laloamu Iehova ena Witnes tauna ta ai baola totona, oi e koumumu ḡauna badana be dahaka?’ Reana stiuden na ini be haere tomamu, ‘Lau ese Baibul istadilaina karana na na moalelaiamu, to Iehova ena Witnes tauna ta ai na basinala diba.’ Bema unu e lalo tomamu, o laloamu iena stadi be dounu ba karaia, a? To bema emu stiuden na ia se goadamu badina be gwauraia hedinaraimu. Heḡereḡere, reana be gwaumu ia na dia heḡereḡere ruma-ta-ruma-ta haroro ḡaukarana baine karaia. Una bo dibamu neganai, ia iduruna dalana da bo lalopararalaia namonamomu.

20. Bema ta uramu Baibul stadi ta baita hadokoa eiava dounu baita karaia, edena dalai Aposetolo Edia Kara 13:48 ese ita na baine duruda diba?

²⁰ Baibul stiuden haida na Esekiel ena negai e nohova Israel taudia heḡereḡeredia. Idia daidiai Iehova ese Esekiel e hamaoroa, eto: “A itaia, idia ediai oi na lalokau anedia e abimu tauna na heto, gadona na namo herea, bona gitara e hataia ḡoevaḡoevamu; badina be emu hereva bae kamonai, to karana basie karaia.” (Esek. 33:32) Reana edai na be aukamu eda stadi tauna baita hamaoroa iena stadi na baita hadokoamu. To, “nega na kwadoḡi.” (1 Kor. 7:29) Eda nega na basita haorea kava se uramu bae goada taudia baita stadi henidia totona, to baita hekwarahi “mauri hanaihanai” e uramu bae abia taudia baita durudia.​—Aposetolo Edia Kara 13:48 ba duahia.

21. Laḡani 2020 ena siri badana be dahaka, bona be durudamu dahaka baita kara?

²¹ Laḡani 2020 ena siri badana ese be durudamu hahediba taudia ihalaodia ḡaukarana baita karaia namonamo. Una siri lalonai Iesu ese Galilea ororona ai e gwaurai herevadia haida e hahedinarai, eto: “Taunabunai baola, bese iboudiai hahediba ai ba halaodia, . . . ba ha bapatisodia.”​—Mat. 28:19.