1, 2. (a) Edena dala ai Naboto na e hahemaoro henia kerere? (b) Ina stadi ai ededia kara rua baita herevalaimu?

MANI a laloa, tau ta na se karaia kara dikana ta dainai e hahemaoro henia bona bae hamasea. Una tau ena ruma bese bona bamona veridia na basie hamomokaniamu, badina kavakava taudia haida edia hahebade koikoi dainai ia na unu e hahemaoro henia toma. Hahemaoro maoromaoro karana e uramu taudia ese una kara na be lalohisihsilaiamu. To una na e vara momokani ḡauna. Una na Iehova ena hesiai tauna, Naboto enai e vara, ia na Israel pavapavana Ahaba e lohiava neganai e noho.—1 Han. 21:11-13; 2 Han. 9:26.

² Ina stadi ai, dia Naboto mo baita herevalaiamu, to Kristen kongrigeisen ginigunana ai elda tauna goadana ta ese e karaia hahemaoro kererena danu baita herevalaiamu. Ini Baibul sivaraidia baita lalodiamu neganai, baita dibamu manau karana na mai anina bada bema ta uramu Iehova ena hahemaoro maoromaoro karana baita tohotohoa. Danu, baita dibamu bema kongrigeisen lalonai hahemaoro kererena baine vara neganai, edena dala ai mai eda ura ida dika baita gwautao karana ese Iehova ena hahemaoro maoromaoro dalana be hahedinaraiamu.

3, 4. Naboto be tau ede bamona, bona dahaka dainai se ura ena vine imeana na Pavapava Ahaba enai baine hoihoilaia?

³ Naboto na Iehova e badinaia hanaihanaiva, ena be Israel taudia momo na Pavapava Ahaba bona adavana Iesebel edia haheitalai dikana e badinaiava. Unu Baal e tomadiho heniava taudia ese Iehova na asie matauraia bona ena taravatu na asie lalodia bada. To, Naboto ese ena hetura karana Iehova ida na e laloa bada ena be ena mauri baine haboioa diba.

⁴ Hanua Pavapavadia Ginigunana  21:1-3 ba duahi. Ahaba na e ura Naboto ena vine imeana baine hoia bona gabuna ai vine imea namona ta baine henia neganai, Naboto na se ura. Dahaka dainai? Ia na mai hematauraina ida eto: “Iehova na se uramu senegu edia amo na abia tanona na oi baina henimu.” Naboto na Iehova ese Israel taudia e henidia taravatuna e badinaia dainai, Ahaba ena ura na se abia dae; una taravatu ai e hahedinaraia Israel taudia ese edia iduhu tanona na basie hoihoilaia. (Lev. 25:23; Num. 36:7) E hahedinaraiamu, Naboto na Iehova ena lalohadai e badinaia.

5. Iesebel be dahaka e kara Naboto baine hamasea totona?

⁵ Naboto na se ura ena vine imeana baine hoihoilaia dainai Pavapava Ahaba bona adavana ese e kara auka henia. Iesebel na adavana dainai una vine imeana iabina totona, ia ese Naboto na e habadelaia koikoi dainai Naboto bona natuna na e hamasedia. Una hahemaoro kererena dainai Iehova be dahaka e kara?

6, 7. Edena dalai Iehova ese e hahedinaraia ia na hahemaoro maoromaoro karana e ura heniamu? Bona dahaka dainai una kara ese Naboto varavarana bona bamona ediai tauhalo e henidia?

⁶ Iehova na haraḡa herea Elia e siaia Ahaba baine hereva henia. Elia ese Ahaba e hahemaoro henia e gwa ia na ala-ala bona henaohenao tauna. Iehova be dahaka e kara? Ahaba, adavana, bona natuna na e hamasedia, Naboto bona natuna e mase heḡereḡerena.—1 Han. 21:17-25.

⁷ Ena be Naboto ena ruma bese bona bamona na Ahaba ena ala-ala karana dainai e lalohisihisi, to idia na tauhalo e davari badina mai dibadia Iehova ese una hahemaoro kererena na e itaia bona kara haraḡa e hamaoromaoroa. To, gabeai bae vara ḡaudia ese edia manau bona abidadama karana e tohoa.

8. Ahaba na Iehova ena hahemaoro herevana dainai dahaka e kara, bona dahaka e vara?

⁸ Ahaba na e diba Iehova ese baine hahemaoro henia neganai, ‘ena dabua e dare, puse dabuadia e dokilaidia, e anivaga, puse dabuadia ai e hekure, bona mai lalo-metauna ida e loa.’ Ahaba na sibona e hahemanau! Bena dahaka e vara? Iehova ese Elia e hamaoroa, eto: “Lau vairagu ai e hahemanau dainai lau ese dika basina hadihoa iena nega ai, a natuna ena nega ai lau ese dika baina hadihoa, ena iduhu latanai.” (1 Han. 21:27-29; 2 Han. 10:10, 11, 17) Iehova, “taunimanima lalodia e tohodiamu” Diravana ese Ahaba na e bogaiahisi.—Her. 17:3.

9. Dahaka dainai manau karana ese Naboto ena ruma bese bona bamona na bema gimadia?

⁹ Dirava ese Ahaba e bogaiahisi dainai, iena kerere e diba taudia ediai be dahaka e vara? Una ese reana Naboto ena ruma bese bona bamona edia abidadama na e tohoa. To, manau karana ese idia na bema gimadia, una ese bema  hagoadadia dounu Iehova bema tomadiho henia, badina mai dibadia edia Dirava na basine hahemaoro kerere diba. (Deuteronomi 32:3, 4 ba duahi.) Naboto, natuna bona edia bese ese hahemaoro ḡoevadaena na be mamiamu bema Iehova ese kara maoromaoro taudia baine hatoredia isi lou. (Iobu 14:14, 15; Ioa. 5:28, 29) Danu, manau tauna na mai dibana “Dirava ese kara iboudiai bona ḡau hehunidia iboudiai, namodia bona dikadia, na baine hahemaoro henidia.” (Koh. 12:14) Oibe, Iehova na e hahemaoromu neganai, ita ese asita diba ḡaudia danu e haerodiamu. Una dainai, manau karana ese asi edia kerere taudia na e gimadiamu, lauma dalanai basie moru totona.

10, 11. (a) Dahaka ḡau haida dainai hahemaoro maoromaoro karana baita laloa kereremu? (b) Edena dala ai manau karana ese baine gimada?

¹⁰ Bema elda taudia ese e karaia abi hidina ta na so lalopararalaiamu eiava so abia daemu, dahaka ba kara na namo? Heḡereḡere, bema oi ese emu hahenamo hesiai ḡaukara ai ba haboioa eiava o lalokau heniamu tauna ta ese ena baine haboioa, dahaka ba kara na namo? Eiava bema adavamu, natumu, o turamu namona ta na murimuri ai bae atoa bona oi ese una kara na so abia daemu be ede bamona? Eiava bema oi na o laloamu e kerere tauna na basiema bogaiahisi na namo be ede bamona? Unu ḡau ese eda abidadama Iehova bona ena orea ai baine tohoa diba.  Bema unu bamona hahetohona ta ba davaria, edena dalai manau karana ese baine gimamu? Mani dala rua aita herevalai.

¹¹ Ginigunana na, manau karana ese baine duruda baita abia daemu e vara ḡaudia iboudiai na asi dibada. Herevana e vara ḡaudia momo na mai dibada, to Iehova ese taunimanima kudoudia na e itamu. (1 Sam. 16:7) Una na mai dibada dainai, una ese baine duruda baita manau, eda diba hetoadia baita diba, bona eda lalohadai baita hamaoromaoroa. Iharuana na, manau karana ese be durudamu hanaihanai Dirava baita badinaiamu, bona mai eda haheauka ida baita narimu Iehova ese kerere iboudiai baine hamaoromaorodia. Una na aonega tauna ese e torea herevana heḡereḡerena, e gwa: “Dirava garina e garimu taudia na bae namo . . . a kara dika tauna basine namo; ena mauri basine hadaudaua.” (Koh. 8:12, 13) Momokani, ita iboudai ese manau karana baita hahedinaraia neganai lauma dalanai na basita manokamu.—1 Petro 5:5 ba duahia.

12. Daidia sivaraidia baita herevalaimu, bona dahaka dainai?

¹² Aposetolo edia negai, Suria Antioka ai e vara ḡauna ta ese Kristen taudia edia manau karana bona mai edia ura ida dika bae gwautao karana na e tohoa. Mani una sivarai aita laloa bona baita itaia edena dalai una ese ita baine duruda dika igwautaona karana baita hahedinaraia, bona baine duruda baita laloparara, dika igwautaona karana na Iehova ena hahemaoro maoromaoro karana.

13, 14. Aposetolo Petro ese e abi hahenamodia haida be dahaka? Bona edena dala ai ia na se gari?

¹³ Kristen kongrigeisen lalonai momo na mai dibadia aposetolo Petro na elda tauna. Ia na Iesu turana namona ta bona maduna momo e hua. (Mat. 16:19) Heḡereḡere, laḡani 36 C.E. ai, Petro ese sivarai namona na Korenelio bona ena ruma bese ediai e harorolaia. Una na mai anina bada negana, badina Korenelio na asie peritomea Idau Bese tauna. Korenelio bona ena ruma bese na lauma helaḡa ese e horodia neganai, Petro na eto: “Daika ese ranu baine gwaua tao, ini Lauma Helaḡa vada e abia, ita ta abia heḡereḡerena, taudia na baine rudia, bapatiso basie abia?”—Kara 10:47.

¹⁴ Laḡani 49 C.E. ai, aposetolo taudia bona Ierusalem ai e nohova elda taudia na e hebou, Kristen taudia ai ela Idau Bese taudia bae peritomedia eiava lasi karana e herevalaia. Una hebou ai, Petro na mai ena lalo goada ida tadikaka e hahelalodia une, laḡani haida gunadiai, asie peritomedia Idau Bese taudia na lauma helaḡa e abia. Petro na e ita ḡaudia e herevalai amo aposetolo edia negai e nohova hahekau oreana e durudia abi hidi ta e karaia. (Kara 15:6-11, 13, 14, 28, 29) Reana Iuda bona Idau Bese Kristen taudia na e moale badina Petro ese e diba ḡaudia na mai ena goada ida e herevalai. Momo ese unu bamona lo tauna bae abidadama henia na haraḡa!—Heb. 13:7.

15. Suria Antioka ai Petro be dahaka kerere e kara? (Rau 23 ai laulau ba itaia.)

¹⁵ Laḡani 49 C.E. ai e abia hebouna murina ai, Petro na Suria Antioka ela. Unuseniai e nohova lalonai, ia na Idau Bese tadikakadia e bamodiava. Una dainai, idia na Petro e diba ḡaudia bona enai e vara ḡaudia amo heduru bada e abi. To, Petro na idia ida se aniani hebou neganai, idia na e daradara bona e lalohisihisi. Kongrigeisen ai Iuda Kristen taudia haida, bona Banaba danu, na Petro ese e hakaudia kerere. Dahaka dainai una lo Kristen elda na e kerere, bona una kara ese kongrigeisen na e hapararaia? Danu, Petro ena kerere amo ta dibamu  ḡauna ese ita be ede baine duruda toma, bema elda ta na ena hereva o kara amo ita baine hahisida?

16. Petro ena kerere be ede e hamaoromaoroa toma, bona ededia henanadai e vara?

¹⁶ Galatia 2:11-14 ba duahi. Petro na taunimanima garidia e gari. (Her. 29:25) Ena be Petro na mai dibana Iehova ese Idau Bese taudia be ede e lalodia tomava, to ia na Ierusalem ena kongrigeisen ai Iuda taudia garidia e gari. Aposetolo Paulo, guna laḡani 49 C.E. ai, Ierusalem ai e karaia hebouna ela tauna ta, na Antioka ela bona Petro ena koikoi e hahedinaraia. (Kara 15:12; Gal. 2:13) Petro ena kara dainai e hisihisi Idau Bese Kristen taudia ese una kerere be ede e laloa toma? Una kara ese idia e hahekwakwanaidia, eiava? Petro ena kerere dainai ena hahenamo e haboiodia, eiava?

17. Iehova ena hegwautao karana dainai edena dala ai Petro na namo e davari?

¹⁷ Petro na e manau bona Paulo ena sisiba e abia dae. Baibul ese na se hahedinaraia Petro ese ena maduna na e haboioa. To gabeai ia na revareva rua e toredia bona idia na Baibul kahana ai ela. Petro ese ena revareva iharuana ai, Paulo na e gwauraia “varavara-dosida.” (2 Pet. 3:15) Ena be Petro ena kerere ese kongrigeisen ai Idau Bese taudia na e hahisidia, to Iesu, kongrigeisen kwarana, ese ia na dounu e ḡaukaralaia. (Efe. 1:22) Una dainai kongrigeisen taudia ese Iesu bona Tamana bae tohotohodia na namo bona kara dika bae gwautao. Eda ura bada ḡauna na ina, kara dika tauna ta ena kerere ese ta basine hahekwakwanaia na namo.

18. Ededia nega ai Iehova ena hahemaoro maoromaoro karana baita tohotohoa?

¹⁸ Aposetolo edia nega heḡereḡerena, hari ina negai Kristen kongrigeisen lalonai elda taudia na dia ḡoḡoevadae, “badina be ita iboudai ta hekwakwanai louloumu.” (Iak. 3:2) Ena be una na mai dibada, to nega haida una na auka bema tadikakada ta ena kerere ese baine hahisida. Una baine vara neganai, Iehova ena hahemaoro maoromaoro karana baita hahedinaraiamu, eiava? Heḡereḡere, bema elda ta na ena hereva amo baine hahedinaraia ia na haida mo e hanamodiamu, oi be dahaka bo karamu? Bema elda ta na se lalo namonamo bena e gwauraia herevana ese lalomu baine hahisia, una kara dainai oi ba hekwakwanai, a? Dia namo ba laloa una tadikaka na dia heḡereḡere elda tauna ai bainela, to namona mai emu haheauka ida kongrigeisen kwarana, Iesu ba naria, ani? Eiava tadikaka ena namo, heḡereḡere laḡani momo lalodiai mai ena abidadama ida Iehova e hesiai henia karana bo laloamu, a? Bema e kara auka henimu tadikakana na dounu elda maduna e huaiamu o hahenamo ma haida baine abi, oi be bo moalemu, a? Mai emu ura ida dika ba gwautao karana ese Iehova ena hahemaoro maoromaoro karana be hahedinaraiamu.—Mataio 6:14, 15 ba duahi.

19. Namona na laloda baita hadai dahaka baita kara?

¹⁹ Hahemaoro maoromaoro e ura heniamu taudia na, Iehova ese Satana bona ena nega oromana dikana ese e havaraiamu hahemaoro kererena baine haorea vaitani negana na e nariamu. (Isa. 65:17) Una do se vara neganai, namona na ita iboudai ese laloda baita hadai, mai manauda ida baita abia dae eda laloparara na mai hetoana bona e hadikadamu taudia edia dika baita gwaudiatao, unu amo Iehova ena hahemaoro maoromaoro karana baita hahedinaraia diba.