LAḠANI gunanai, tanobada heḡeḡemadai Iehova ena Witnes taudia bogaraḡidiai tadikaka momo na e abidia hidi elda bona hesiai taudia. Bema oi na idia ta, a dibamu hesiai ḡaukara ai una hahenamo matamatana na o moalelaiamu.

To danu, reana o lalohekwarahimu. Jason, eregabe elda ta, na eto: “E abigu hidi matama neganai, na lalohekwarahiva badina maduna matamatadia momo ba huamu.” Mose bona Ieremia na Iehova ese ḡaukara matamatadia e henidia neganai, e mamiava idia na dia heḡereḡere. (Eso. 4:10; Ier. 1:6) Bema emu hemami na unu bamona, edena dala ai ba hanaia diba bona ba ḡaukara goada? Kristen hahediba tauna Timoteo ena haheitalai ba laloa.​—Kara 16:1-3.

Timoteo laḡanina na reana 15 eiava 20 neganai aposetolo Paulo ese e noia ena laolao ai baine bamoa. Matamanai, Timoteo na do matamata dainai e laloava ia na dia heḡereḡere bona reana una ḡaukara matamatana ikarana na e daradaralaia. (1 Tim. 4:11, 12; 2 Tim. 1:1, 2, 7) To, laḡani 10 muridiai, Paulo ese Filipi kongrigeisen taudia e hamaorodia: “Lohiabada Iesu lalonai na laloamu asi vanahana Timoteo baina siaia vasi . . . Badina be dekegu ai ta lasi ia heḡereḡerena.”​—Fili. 2:19, 20.

Timoteo be dahaka ese e durua elda tauna namona ai ela? Mani ena haheitalai amo ba diba ḡaudia 6 ba lalodia.

1. Ia ese taunimanima na e lalodia badava. Paulo ese Filipi tadikaka e hamaorodia, Timoteo ese ‘baine reḡudia.’ (Fili. 2:20) Oibe, Timoteo ese taunimanima na e lalodia badava. Ia na e urava idia ese Iehova bae hetura henia, bona mai ena ura ida e ḡaukara goadava baine durudia totona.

Dia namo basi e tarimu tauna heḡereḡerena ba kara, ia na e uramu nega korikori ai basi stopu ai baine kau dainai, pasendia iudadia na se laloa badamu. William, laḡani 20 mai kahana elda ḡaukara e karaiava bona momo ese e matauraiava tauna, ese elda taudia matamatadia na ini e hagoadadia toma: “Tadikaka ba lalokau henidia. Edia namo ba lalo bada dia kongrigeisen ḡaukaradia mo ba haerodia bona ba kara.”

2. Ia ese haroro ḡaukara e atoa guna. Paulo ese Timoteo bona ma haida edia kara edia idau e herevalai neganai, eto: “Iboudiai na sibodia edia ḡau e tahumu, a Iesu Keriso ena ḡau asie tahumu.” (Fili. 2:21) Paulo na Roma ai ena revareva e torea. Ia na e itaia unuseniai ai e nohova tadikakadia na sibodia edia ura itahuna karadia e goadalaiva. A haroro ḡaukara ikarana ai e lahedova. To Timoteo na dia unu bamona! Sivarai namona ihabadana totona dala e hekehova negadia ai, ia na Isaia heḡereḡerena, eto: “Lau o ina, a siaigu.”​—Isa. 6:8.

Edena dala ai emu ura ḡaudia bona emu hesiai ḡaukaradia ba karadia namonamo? Ḡau ginigunana na, mai anina bada ḡaudia bavato guna. Paulo na eto: “Mai anina bada ḡaudia do ba diba.” (Fili. 1:10, NWT) Dirava ese e lalo badamu ḡaudia na mai anina bada ḡaudia ai ba halaodia. Ḡau iharuana na, kohu bona moni momo basio tahu. Emu nega bona goada ihaorena karana ba hamaraḡia. Paulo ese Timoteo e hagoadaia: “Uhau edia lebulebu karadia ba heautani. Ini na ba  ḡava: kara maoromaoro, abidadama, lalokau, maino.”​—2 Tim. 2:22.

3. Hesiai ḡaukara helaḡana ai e ḡaukara goadagoadava. Paulo ese Filipi taudia e hadibadia, eto: “[Timoteo] toana be dibamui; mero ese tamana isiaina e lao henimu na heto, ia ese lau isiaigu vada e lao heni, sivarai namo dainai.” (Fili. 2:22) Timoteo na se hesiku. Ia na Paulo ida e ḡaukara goadava, bona una ese edia hetura karana e hagoadaia.

Hari ina negai Dirava ena orea lalonai ḡaukara na bada. Unu ḡaukara ese moale korikorina e havaraiamu bona emu hetura karana tadikaka bona taihu ida baine hagoadaia diba. Una dainai lalomu ba hadaia, hanaihanai “Lohiabada ena ḡaukara lalonai ba goada balaheni.”​—1 Kor. 15:58.

4. E diba ḡaudia na e badinava. Paulo ese Timoteo e hamaoroa: “Oi ese egu hahediba herevadia vada o diba vaitani; egu kara, egu ura, egu abidadama, egu hebogahisi, egu lalokau, egu haheauka, vada dibamu.” (2 Tim. 3:10) Timoteo na e diba ḡaudia e badina dainai, ia na heḡereḡere maduna badana baine huaia totona.​—1 Kor. 4:17.

Oi be lo tadikakana ta o bamoamu, a? Bema lasi, idia ta ba bamoa na namo. Tom, laḡani momo elda ḡaukara e karaia tadikakana, na eto: “Lo elda ta ese egu namo na e laloa badava bona treinin namona e henigu. Hanaihanai ena heduru na noiva bona ena sisiba na na badinava. Una ese haraḡa herea egu abidadama na e hagoadaia.”

5. Ia na sibona e hahedibava. Paulo ese Timoteo e hagoadaia, eto: “Dirava ibadinana mo ba goadalaia.” (1 Tim. 4:7) Spot gadara tauna na mai ena coach, to ia danu sibona baine hahediba o treinin na namo. Paulo ese Timoteo e hamaoroa: “Buka Helaḡa iduahina, haroro, hahediba, ba goadalai. . . . Ini ḡau ba manadalai, lalomu idoinai ba henidia, bena emu goada na taunimanima iboudiai vairadiai baine hedinarai.”​—1 Tim. 4:13-15.

Oi danu emu diba ba habadaia na namo. Lauma dalana ai ba goada bona orea ena hahekau daladia ba badina. Danu, sibomu emu diba ai basio tabekau​—basio laloa emu diba na bada dainai hekwakwanai iboudiai na ba hamaoromaoro diba bona ba hetahulai namonamo na asi anina. Namona na Timoteo ba tohotohoa, bona “sibomu nahuamu ba tohoa, bona emu hahediba herevadia nahuadia ba toho.”​—1 Tim. 4:16.

6. Iehova ena lauma ena heduru ai e tabekau. Paulo ese Timoteo ena hesiai ḡaukara e laloa neganai, Timoteo e hadibaia: “E henimu ḡauna namona ba gimaia, Lauma Helaḡa, ita laloda e noho heniamu Laumana, dainai.” (2 Tim. 1:14) Timoteo ese ena hesiai ḡaukara baine gimaia totona, Dirava ena lauma ena heduru ai baine tabekau na namo.

Donald, laḡani momo elda ḡaukara e karaia tadikakana, na eto: “E abidia hidi taudia ese edia hetura karana Dirava ida bae laloa bada na namo. Unu e kara tomamu taudia ‘edia goada na be bada be laomu.’ Bema Dirava ena lauma ena heduru bae noia bona lauma huahuadia bae hahedinarai, tadikakadia bae durudia diba.”​—Sal. 84:7; 1 Pet. 4:11.

E abidia hidi tadikakadia momo, oi heḡereḡeremu, na lauma dalana ai e goadamu neganai una ese e hagoadadamu. Jason, matamanai e herevalaia tauna, na eto: “Elda tauna ai nala negana ai, ḡau momo na diba bona egu abidadama na e goada. Hari egu ḡaukara na na moalelaiamu bona una na hahenamo namona ta!”

Hesiai ḡaukara dounu o goadalaiamu, a? Lalomu ba hadaia Timoteo ena haheitalai amo diba bavabi. Bena oi danu Dirava ena taunimanima ba durudia diba.