1-3. (a) Memero kekeni be dahaka hekwakwanai e davarimu, bona una be ede ba haheitalaia toma? (Rau 25 ai laulau ba itaia.) (b) Edena dala ai Kristen memero kekeni ese unu hekwakwanai bae hanaidia diba?

BEMA oi na palani o kara mai anina bada ḡauna ta dainai taoni daudauna ta baola, oi na basi amo una taoni bo laomu. Basi stopu ai, taunimanima na hutuma bona basi momo dainai bo daradaramu. To bo moalemu badina mai dibamu edena basi ai bo guimu bona edena gabu bo laomu. Gabu idaudia e laomu basidia ta ai bo guimu neganai dala kererena bo laomu.

² Hari ina negai, memero kekeni na unu pasendia heḡereḡeredia. Edia mauri ai vaitani gabu daudauna ta e laomu. Nega haida abi hidi na idauidau dainai e daradaramu. Memero kekeni e, abi hidi maorona ba karaia totona ba palani namonamo guna na namo. Edena dala ai una ba karaia?

³ Ina atikol ese una henanadai be haerelaiamu bona memero kekeni be durudiamu Iehova ihamoalena karadia bae lalo bada. Anina na edia mauri ibounai lalonai​—edukeisen, moni ḡaukara, ruma bese inarina madunadia, bona ma ḡau haida ai​—abi hidi e karamu neganai, Iehova bae badinaia. Bona Ia ihesiai henina ḡaukaradia bae ura henia. Iehova ihesiai henina karana e laloa  badamu matamata taudia na e dibamu Ia ese be hanamodiamu bona edia ḡaukara ai bae kwalimu diba.​—Hereva Lada-isidia 16:3 ba duahia.

4. Ina atikol ai dahaka baita herevalaimu?

⁴ Eregabemu negana ai tiokratik ḡaukaradia bavato guna na namo. Dahaka dainai? Badi toi baita herevalaimu. Ginigunana bona iharuana ese be hahedinaraimu lauma ḡaudia bavato guna bona ba haḡuḡuru karana ese emu hetura karana Iehova ida be hagoadaiamu; ihatoina ese eregabemu negana ai tiokratik ḡaukaradia bavato guna ena namo be hahedinaraiamu.

5. Lauma ḡaudia baita ato guna badina badana be dahaka?

⁵ Lauma ḡaudia baita ato guna badina ginigunana na, ta uramu Iehova ena lalokau bona ita daidai e kara ḡaudia dainai Ia baita hanamoa. Salamo itorena tauna na eto: “Iehova ihanamona be namo. . . . Badina be, Iehova e, oi ese emu ḡaukara amo vada o hamoalegu; oi imamu ḡaukaradia daidiai ane na abimu mai moalegu ida.” (Sal. 92:1, 4) Oi na eregabe dainai, Iehova ese e henimu ḡaudia iboudiai ba lalodia. Emu mauri, emu abidadama, Baibul, kongrigeisen, bona emu vaira nega helarona. Lauma ḡaudia ba lalodia bada karana amo ba hahedinaraia unu hahenamo daidiai Dirava o hanamoamu, bona ia ba hetura henia.

6. (a) Edena dala ai lauma ḡaudia baita ato guna karana ese eda hetura karana Iehova ida baine hagoadaia? (b) Maraḡimu ai dahaka bavato guna?

⁶ Badi iharuana na, lauma ḡaudia bo ato gunamu bona bo haḡuḡurumu neganai, Iehova matanai oi na ḡaukara namodia o karamu. Una ese emu hetura karana Ia ida be hagoadaiamu. Aposetolo Paulo na e gwauhamata: “Dirava na asi ena kara gageva-gageva; emui ḡaukara bona emui lalokau ia ladana dainai vada o hahedinarai, . . . ia ese basine lalo boio.” (Heb. 6:10) Ena be oi na maraḡi to lauma ḡaudia bavato guna diba. Christine na laḡanina 10 ai lalona e hadaia, hanaihanai abidadama Witnes taudia edia mauri sivaraidia baine duahi totona. Toby na laḡanina 12 ai, palani e kara do se bapatiso ai Baibul ibounai baine duahia totona. Maxim na laḡanina 11 bona tadina Noemi na laḡanina 10 ai e bapatiso. Bena raruosi na palani e kara Betele ai bae ḡaukara. E palanilaia ḡauna bae laloa bada totona, idia ese Betele aplikeisen pepana na edia ruma habana ai e kapaia kau. Namona na ba haeroa dahaka be mai anidia bada bona ba ḡaukara goada ba haḡuḡuru totona.​—Filipi 1:10, 11 ba duahi.

7, 8. (a) Edena dala ai lauma ḡaudia bavato guna karana ese emu abi hidi karana baine durua diba? (b) Dahaka dainai kekeni ta na se ura iunivesiti bainela?

⁷ Eregabemu ai lauma ḡaudia bavato guna badina ihatoina na, abi hidi na momo. Memero kekeni na edukeisen, moni ḡaukara, bona ma ḡau haida ai abi hidi e karamu. Abi hidi ikarana na vaitani dala na rua eiava momo to dala maorona bo abia hidimu. Ba lao henia gabuna na mai dibamu dainai, basio hekwarahimu dala maorona bavabia hidi totona. Una heḡereḡerena, bema emu mauri ai o palanilai ḡaudia na mai dibamu, abi hidi namodia bo karamu na asi hekwarahina. Hereva Lada-isidia 21:5 na e gwaumu: “Ḡaukara malaka-malaka tauna ena lalo-hadai ese anidia e havara badamu.” Ba haḡuḡuru ḡaudia namodia ba palanilai guna neganai, gabeai bo kwalimumu. Damaris enai una na e vara, ia na eregabena ai abi hidi badadia e kara.

⁸ Damaris na haiskuli e haorea neganai ena maka na nanamo. Bema ura neganai scholarship ta bema abia dae diba iunivesiti ai taravatu istadilaina totona, to abi hidi e  karaia banka ta ai baine ḡaukara. Dahaka dainai? Eto: “Maraḡigu ai lalogu na hadaia baina painia. Una anina na pat-taim moni ḡaukara baina kara. Iunivesiti ena loea pepana nama abia neganai, moni momo herea nama abi diba, to egu nega na lasi pat-taim moni ḡaukara baina tahu totona.” Hari Damaris na laḡani 20 lalodiai painia ḡaukarana e karaiamu. Ia be e mamia eregabena ai abi hidi maorona e karaia, a? Ia na eto: “Egu ḡaukara gabuna banka ai, bamogu momo na loea taudia. Idia ese e karamu ḡaukaradia na iunivesiti nama lao neganai nama stadilai ḡaukaradia. To, idia momo ese edia ḡaukara na asie moalelaimu. Painia ḡaukara na abia hidi karana ese e durugu dainai asina lalohisihisi bona laḡani momo lalodiai Iehova ena hesiai ḡaukara na moalelaia.”

9. Dahaka dainai eda matamata taudia baita hanamodia na namo?

⁹ Tanobada heḡeḡemadai kongrigeisen ai matamata taudia momo baita hanamodia na namo. Idia ese Iehova enai edia mauri e gwauhamatalaia bona tiokratik ḡaukaradia e lalo badamu. Unu matamata taudia na edia mauri e moalelaiamu bona ḡau iboudiai lalodiai Iehova ena hahekau daladia ibadinadia karana e dibamu. Unu ḡau haida na edukeisen, moni ḡaukara, bona ruma bese maurina. Solomon na eto: “Iehova bavabidadama henia mai lalomu idoinai . . . Emu dala iboudiai lalodiai ia bavabia dae, bena ia ese emu dala baine hamaoromaorodia.” (Her. 3:5, 6) Iehova ese Kristen kongrigeisen ai matamata taudia na e lalodia badamu, e lalokau henidiamu dainai e gimadiamu, e hakaudiamu, bona e hanamodiamu.

10. (a) Dahaka dainai eda mauri ai haroro ḡaukara baita laloa bada na namo? (b) Edena dala ai haroro ḡaukara baita karaia namonamo diba?

¹⁰ Iehova ihamoalena karadia e lalo badamu matamata tauna na e uramu haroro ḡaukara baine karaia. Iesu na eto, “sivarai namo” na bae harorolaia guna. (Mar. 13:10) Haroro ḡaukara na mai anina bada dainai, eda mauri ai baita laloa bada na namo. Palani ba kara diba ba haroro hanaihanai totona, a? Ba painia diba, a? To bema haroro ḡaukara so moalelaiamu be ede bamona? Bona edena dala ai ma haida ba haroro henidia namonamo diba? Bae durumu diba ḡaudia rua bini: Ba heḡaeḡae namonamo, bona basio hesiku to o diba ḡaudia na ma haida ba hadibadia. Unu amo haroro ḡaukara bo moalelaiamu.

11, 12. (a) Matamata taudia be dahaka bae kara diba bae haroro totona? (b) Edena dala ai matamata tauna ta na sikuli ai e haroro?

¹¹ Sikuli ai turamu ese nega momo e henimu henanadaina ena haere ba heḡaeḡaelaia, heḡereḡere, “Dahaka dainai o abia daemu Dirava na e nohomu?” Eda jw.org websait ai atikol momo ese matamata taudia baine durudia una henanadai ena haere bae diba totona. Baola BIBLE TEACHINGS > TEENAGERS kahana ba itaia. Unuseni ai worksheet ta bo davariamu sinadona na “Why Do I Believe in God?” Una worksheet ese be durumumu emu haere ba heḡaeḡaelaia totona. E hahedinarai siridia toi na, Heberu 3:4, Roma 1:20, bona Salamo 139:14; emu abidadama ba herevalaia neganai unu siri ba ḡaukaralai diba. Unu worksheet ba ḡaukaralai, henanadai ta ta haeredia ba heḡaeḡaelai.​—1 Petro 3:15 ba duahia.

¹² Dala e hekehomu neganai, turamu ba hagoadadia sibodia ese jw.org bae itaia totona. Luca na unu e kara toma. Ena klas taudia ese tomadiho idauidau e herevalaiva, bona Luca na e itaia edia sikuli bukana ai Iehova ena Witnes taudia na e sivarailaidia koikoi. Ena be ia na e gari, to sikuli hahedibana e noia gwaumaoro baine henia unu  koikoi herevadia baine hamaoromaoro totona, bona sikuli hahedibana ese ena noinoi e abia dae. Luca na e abi dae ḡaudia mo se herevalai to klas taudia ediai eda websait e hahedinaraia danu. Sikuli hahedibana ese klas taudia e noidia edia homework bae kara neganai, katun vidiona Beat a Bully Without Using Your Fists bae itaia. Luca na sikuli ai e haroro dainai e moale dikadika.

13. Dahaka dainai hekwakwanai e varamu neganai basita hesiku na namo?

¹³ Basio lalomanoka, ena be nega haida mauri na auka. (2 Tim. 4:2) Hekwakwanai bae vara neganai, o ato guna mai anidia bada ḡaudia na dounu ba badina. Katharina na laḡanina 17 neganai, palani e kara ḡaukara gabuna ai bamona baine haroro henidia. Idia ta ese nega momo e gwau dika heniava, to ia na se gariva. Ena kara namodia na e ḡaukara hebouva tauna ta ladana Hans ese e moalelai. Una dainai, ia ese eda pablikeisen e duahiva, Baibul e stadilaia, bona e bapatiso. Katharina na asi dibana una e vara badina ia na gabu ma ta ela. Mani a laloa, laḡani 13 muridiai ia na ena ruma bese ida Kingdom Hall ai helai bona Hans ese pablik tok e heni neganai, e hoa! Katharina na e moale badina se hesiku ena ḡaukara taudia baine haroro henidia totona.

14, 15. (a) Memero kekeni be dahaka bae laloatao na namo bema haida ese lalodia e animu? (b) Edena dala ai memero kekeni ese bamodia edia lalo ani karadia bae dadarai diba?

¹⁴ Ina atikol ese eme hagoadamu lalomu ba hadaia emu mauri lalonai Iehova ihesiai henina urana ba laloa bada totona. Una anina na emu mauri lalonai lauma ḡaudia bavato guna. Emu uru taudia haida na edia mauri lalonai moale karadia e lalo badamu, bona reana be boirimumu idia ida ba moale. Namona na ba hahedinaraia oi na lalomu o hadaia o abi hidi ḡaudia o lalodia badamu. Bamo edia lalo ani karadia ese basie koumu na namo. Mani basi haheitalaina aita laloa lou, oi na basio uramu idau gabu e laomu basidia ta ai ba gui, ena be una basi ai e gui taudia na e moalemu.

¹⁵ Bamo edia lalo ani karadia na dala idauidau ai ba dadarai diba. Heḡereḡere, hedibaḡani  bae vara diba gabudia ba dadarai. (Her. 22:3) Bona kara kereredia ba kara ena dika ba laloa. (Gal. 6:7) Bona ma haida edia heduru bavabi na namo. Manau karana ese baine durumu tamamu sinamu bona kongrigeisen ai lo taudia edia heduru herevadia bavabi dae totona.​—1 Petro 5:5, 6 ba duahi.

16. Edena dala ai Christoph ena haheitalai ese e hahedinaraiamu manau karana na mai anina bada?

¹⁶ Manau karana ese Christoph e durua dainai sisiba namona e abia dae. Ia na e bapatiso bena se daudau, eksasais gabuna ta ai e treinin hanaihanaiva. Una gabu ai matamata taudia haida ese e boiria edia tim ai baine vareai. Ia ese elda tauna ta enai una e herevalaia, bona una elda ese Christoph e hamaoroa abi hidi ta do se karaia neganai bae vara hekwakwanaidia haida baine lalodia guna, heḡereḡere gadara helulu karana. To Christoph na tim ai e vareai. Gabeai, e davaria una gadara ese dika bada e havaraia. Ia ese elda taudia ma haida e hereva henidia, bona idia ese Baibul amo e sisiba henia. “Iehova ese sisiba taudia namodia amo e durugu, bona na kamonai henia, ena be matamanai asina kamonai.” Mai manaumu ida sisiba namodia o abi daemu, a?

17, 18. (a) Hari ina negai Iehova be e uramu matamata taudia be dahaka bae kara? (b) Ta e badamu neganai dahaka dainai e lalohisihisimu, bona edena dala ai una ba hanaia diba? Haheitalai a gwauraia.

¹⁷ “Eregabe taumu e, eregabemu ai ba moale, eregabemu dinadia ai lalomu ese baine hamoalemu.” (Koh. 11:9) Oibe, Iehova na e uramu eregabemu negana ai ba moale. Ina atikol ese una ba karaia dalana ta eme hahedinaraia. Tiokratik ḡaukaradia ba lalodia bada, bona emu palani iboudiai lalodiai Iehova ba badinaia. Emu mauri lalonai unu bo kara tomamu neganai, Iehova ese be hakaumumu, be gimamumu, bona be hanamomumu. Dirava ena Hereva ai sisiba namodia ba lalodia, bona ina sisiba ba badinaia: “Eregabemu dinadia ai ikaramu Diravana na ba laloa tao.”​—Koh. 12:1.

¹⁸ Ta na dia eregabena ai mo baine noho hanaihanai. Matamata taudia na haraḡa herea taunimanima badadia ai e laomu. Badadia momo na e lalohisihisimu badina matamatadia ai abi hidi kereredia e kara eiava edia mauri lalonai mai anina bada ḡaudia asie ato guna. To hari ina negai, tiokratik ḡaukaradia e lalo badamu matamata taudia na taunimanima badadia ai baela neganai edia abi hidi daidiai bae moale. Mirjana enai una na e vara, ia na eregabena ai mai ena diba spot gadaradia ai. Unai dainai e boiria Winter Olympic Games ai baine vareai, to ia ese abi hidi e karaia ful-taim hesiai ḡaukara baine karaia totona. Laḡani 30 mai kahana murinai, Mirjana na adavana ida ful-taim hesiai ḡaukara dounu e karaiamu. Ia na eto: “Lada bada, heimodai karadia, dagi, bona taḡa na basie mia daudaumu bona moale korikorina basie havaraia dibamu. Dirava ihesiai henina bona lauma dalana ai taunimanima baita durudia karadia na bae mia daudau ḡaudia hereadaedia.”

19. Dahaka dainai eregabemu negana ai lauma ḡaudia ba lalo bada karana na mai ena namo?

¹⁹ Kongrigeisen ai matamata taudia ese hekwakwanai e haheaukalaimu bona edia mauri lalonai Iehova ihesiai henina karana e laloa badamu dainai, baita hanamodia na namo. Idia ese lauma ḡaudia e ato gunamu bona e haḡuḡurumu, bona haroro ḡaukara na edia mauri lalonai mai anina bada ḡauna ai e halaoamu. Danu, lalodia e hadaimu e uramu bae kara hesiai ḡaukaradia na ina tanobada ese basine hadikaia. Namona na bae diba idia na asie hekwarahi kavamu. Idia na tadikaka bona taihu ese e durudiamu, bona Iehova enai bae tabekau neganai, edia lalo-hata ḡaudia na bae haḡuḡuru diba.