Heberu gado ai unu siri na mai anidia bada. Una dainai baita herevalaimu ḡaudia ese be durudamu lalohadai maorona baita abia totona:

1. Salamo 144 badina herevadia baita lalodia. Siri 12 ela 14 ai e herevalai hahenamodia ese e hahedinaraiamu unu na kara maoromaoro taudia e herevalaidia​—idia na kara dika taudia edia amo e ‘hamauridia’ (siri 11). Una lalohadai na siri 15 ai danu e hahedinaraia, una siri ai ina hereva “e moalemu” na nega rua e gwauraia dainai una na unu taunimanima tamodia e herevalaidia​—edia “Dirava be Iehova.”

2. Ina hereva na Baibul siridia ma haida ida e heḡereḡere, unu siri ese Dirava ena abidadama taudia edia hahenamo e herevalai. Ina salamo ai e hahedinaraia David na e abia dae Dirava ese Israel taudia na inaidia amo e hamauridia neganai, Ia ese baine hanamodia unu amo bae moale bona bae noho namonamo. (Lev. 26:9, 10; Deu. 7:13; Sal. 128:1-6) Heḡereḡere, Deuteronomi 28:4 na eto: “Taumui anidia bae namo, bona emui tano anidia bae namo. Emui mauri ḡaudia anidia bae namo, bona emui seri bae hutuma; emui mamoe natudia bae mauri.” Momokani, David natuna Solomon e lohiava negana lalonai, taunimanima na maino ai e nohova. Danu, Solomon ena lohia dalana ese Mesia ena lohia dalana e hahedinaraia.​—1 Han. 4:20, 21; Sal. 72:1-20.

Una dainai, Salamo 144 ena hereva ese Iehova ena hesiai taudia edia helaro namona e herevalaia​—Dirava ese kara dika taudia baine hahemaoro henidia murinai, kara maoromaoro taudia na maino bona noho namo ai bae noho hanaihanai.​—Sal. 37:10, 11.