1. Ita iboudai be dahaka baita kara?

OI O URAMU heau-helulu aukana ta lalonai ba heau, bema oi na e goreremu o hesikumu? Reana lasi. To, aposetolo Paulo na e gwa Kristen taudia iboudiai na heau-helulu ta lalonai. (Heb. 12:1) Bona ita iboudai ena be matamata eiava buruka, goada eiava hesiku, bema ta uramu Iehova ese e henidamu ahuna baita abia namona na baita haheauka ela bona dokona.​—Mat. 24:13.

2. Timoteo Iharuana 4:7, 8 heḡereḡerena, dahaka dainai Paulo enai na se auka ita baine hagoadada?

² Paulo enai na se auka ita baine hagoadada badina be ia ese ena heau-helulu vada e haḡuḡurua. (2 Timoteo 4:7, 8 ba duahi.) To Paulo be edena heau-helulu e herevalaia?

3. Paulo be edena heau-helulu e herevalaia?

³ Gunaguna Greece ai e karava gadaradia haida na Paulo ese nega haida e ḡaukaralaiva mai anidia bada ḡaudia baine hahedinarai totona. (1 Kor. 9:25-27; 2 Tim. 2:5) Nega idauidau ai, ia ese Kristen mauri dalana na heau-helulu ta ida e haheḡereḡerea. (1 Kor. 9:24; Flp. 2:16) Ta na ena mauri e gwauhamatalaiamu bona e bapatisomu neganai ia na una “heau-helulu” lalonai e heau matamamu. (1 Pet. 3:21) Heau-helulu dokona ai baine heau kau neganai, Iehova ese mauri hanaihanai ahuna do baine henia.​—Mat. 25:31-34, 46; 2 Tim. 4:8.

4. Ina atikol ai dahaka baita herevalaimu?

⁴ Heau-helulu daudauna bona Kristen maurina be ededia dala haida ai baita haheḡereḡeredia? Dala haida ai idia na heḡereḡere. Mani dala toi aita herevalai. Ginigunana, dala maorona baita badinaia; iharuana, dokona kahana mo baita itaia;  bona ihatoina, ena be hekwakwanai ta davarimu to dounu baita heau.

5. Edena dala baita badinaia na namo bona dahaka dainai?

⁵ Heau-helulu ta ai e heaumu taudia ese ahudia bae abi helaoreana idia na heau-helulu e heḡaeḡaelaia taudia ese e gwauraia dalana bae badinaia. Una heḡereḡerena, bema ita na ta uramu mauri hanaihanai ahuna baita abia, namona na Kristen mauri dalana baita badinaia. (Apos. 20:24; 1 Pet. 2:21) To, Satana bona ia e badinaiamu taudia na asie uramu ita na Kristen mauri dalana baita badinaia to e uramu idia ida baita heau ‘hebou.’ (1 Pet. 4:4) Idia ese ita ta maurilaiamu mauri dalana na e kirikirilaiamu bona e laloamu edia mauri dalana na mauri dalana namona bona sibodia edia ura bae badina. To, una na koikoi.​—2 Pet. 2:19.

6. Brian ena haheitalai amo dahaka o dibamu?

⁶ Satana ena tanobada e badinaiamu taudia na kahirakahira be dibamu idia na ura kwalimu na asie davariamu to idia na iḡui ta lalonai. (Roma 6:16) Mani Brian ena haheitalai aita laloa. Tamana bona sinana ese e hagoadaia Kristen mauri dalana baine badinaia. To, ia eregabenai, ia na e daradara bema una ese ia na baine hamoalea. Una dainai Brian na Satana ena tanobada e badinaiamu taudia e bamodia. Ia na eto: “Asina dibava lau na uralaia mauri dalana ese lau na basine durugu. Gabeai, lau na drag na abiva, na inu kekerova bona kara dika idauidau na karava. Laḡani momo muridiai, lau ese drag aukadia ianidia karana na manadalaia bona egu ai na e auka baina dadarai. . . . Drag na hoihoilai matama una mauri dalana baina badinaia totona.” To gabeai, Brian na Iehova ena taravatu e badina. Ia ese ena mauri dalana e haidaua bena laḡani 2001 ai e bapatiso. Hari ia na Kristen mauri dalana e badinaiamu dainai e moalemu. *

7. Mataio 7:13, 14 ese ededia dala rua e herevalaimu?

⁷ Mauri dala maorona baita badinaia na mai anina bada. Satana na se uramu ita iboudai na “mauri gabuna e laomu dalana” hekahi-hekahina ai dounu baita heau to ia na e uramu hari ina negai tanobada taudia momo ese e badinaiamu ‘dala lababana’ ai baita heau. Una dala ibadinana na asi hekwarahina. To, ia na “mase gabuna e laomu dalana.” (Mataio 7:13, 14 ba duahi.) Dala maorona ai baita noho bona Iehova ena taravatu asie badinamu taudia ese basie koida totona, namona na Iehova enai baita tabekau bona Ia baita kamonai henia.

8. Bema heau-helulu tauna ta na e morumu, ia be dahaka e karamu?

⁸ Dala daudauna heau-heluluna ai e heaumu taudia na heau gabuna mo e itaiamu unu amo basie moru. To, reana edia heau na e heau heboumu taudia ese be hadikaiamu eiava guri ai be moimu. Bema bae moru idia na ma be toreisimu bona ma be heaumu. Idia na e hahekwakwanaidiamu ḡaudia asie lalomu, to idia e laloa badamu ḡauna na dokona ai bae kau bona kwalimu ahuna bae abia.

9. Bema ta morumu, dahaka baita kara?

⁹ Eda heau-helulu ai, nega momo eda hereva bona kara kereredia daidiai baita morumu. Eiava ita ida ta heau heboumu taudia edia kara kereredia ese be hahisidamu. Unu na vaia bae vara ḡaudia. Ita iboudai na dia ḡoḡoevadadae, bona iboudai na mauri e lao heniamu dala hekahi-hekahina ai ta heaumu. Una dainai, ita na ta baita hahekwakwanaia dibamu. Paulo na e gwa nega haida “ta ese bamona baine habadelaia” o baine maumau diba. (Kol. 3:13) To namona na e hahekwakwanaidamu ḡaudia na basita lalo, a vairadai ahuda namona baita laloa. Bema baita moru, namona na baita toreisi bona dounu baita heau. Bema baita badumu bona Iehova ihesiai henina karana baita rakataniamu, ita na dokona ai na basita kaumu bona ahuda na basita abiamu. Bona una ese mauri e lao heniamu dala hekahi-hekahina ai e uramu bae raka taudia na be hahekwakwanaidiamu.

10. Edena dalai haida ‘ihahekwakwanaidia’ dalana baita dadaraia?

¹⁰ Eda tadikaka taihu basita ‘hahekwakwanaidia’ dalana ta na, baita uramu edia lalohadai danu baita abi dae to dia eda ura daladia mo baita badina. (Roma 14:13, 19-21; 1 Kor. 8:9, 13) Unu amo ta hahedinaraiamu ita na dia heau-helulu ta lalonai e heau taudia heḡereḡeredia. Idia ta ta na e uramu bae kwalimu dainai e heaumu, bona e ura badamu ahudia bae abi. Heau taudia na sibodia edia namo e tahumu. Una dainai, vaira kahanai bae heau totona heau taudia ma haida na be doridiamu. To, ita eda heau-helulu na dia unu bamona. (Gal. 5:26; 6:4) Ita na ta uramu taunimanima momo baita durudia unu amo dokona  baita heau henia hebou bona ahuda mauri hanaihanai baita abia. Una dainai, ta uramu Paulo ena sisiba herevana baita badinaia, siboda ‘[eda] namo basita tahu, a bamoda edia namo baita tahu.’​—Flp. 2:4.

11. Heau tauna be dahaka e laloa badamu, bona dahaka dainai?

¹¹ Heau-helulu lalonai heau taudia na dia dala mo bae itaia to dokona kahana danu bae itaia bona bae heau henia. Ena be dokona kahana na gabu daudauna ai matadia amo basie itaia diba, edia heau lalonai dokona ai bae kau bona ahudia bae abi mo e laloamu. Edia ura badana na una.

12. Iehova ena gwauhamata be dahaka?

¹² Ita ese ta heaulaiamu heau-heluluna lalonai, Iehova ena taunimanima ese edia heau-helulu bae haḡuḡurua neganai, Ia na mai ena hebogahisi ida ahudia​—mauri hanaihanai gubai ai eiava tanobada ai​—baine henidia. Baibul ese baine vara maurina na e herevalaia, unu amo ta lalopararamu ita na mauri namona baita abiamu. Vaira nega totona Iehova ese ita totoda e gwauhamatalai ḡaudia baita lalo badamu neganai, una ese be durudamu baita haheauka totona.

13. Eda heau bona heau-helulu ta lalonai e heaumu taudia edia idau be dahaka?

¹³ Greece ai e karava gadaradia ai e heau-heluluva taudia ese hekwakwanai haida heḡereḡere hesiku bona hisihisi na e haheaukalaiva. To idia e karaia ḡauna na, edia treinini ai e diba ḡaudia e badina bona edia goada ai e tabekau. Unu heau taudia heḡereḡeredia, ede baita heau toma totona treinini baita abi na namo. To, eda heau na dia unu heau-helulu ai e heau taudia heḡereḡeredia. Ita na Iehova ese e hagoadadamu bona e duruda hanaihanaimu. Bema Iehova enai baita tabekaumu, Ia na e gwauhamata dia ita mo be treininidamu to be hagoadadamu danu.​—1 Pet. 5:10.

14. Korinto Iharuana 12:9, 10 ese ita be ede e duruda tomamu hekwakwanai baita hanai totona?

¹⁴ Paulo na hekwakwanai momo e haheaukalai. Ia na dia taunimanima ese e daḡedaḡe henia mo to nega haida tauanina e manokava bona vaitani “ḡiniḡini ta” e haheaukalaiava. (2 Kor. 12:7) Unu ḡau idauidau daidiai ia na Iehova ena hesiai ḡaukara na se rakatania, to goada helaoreana Iehova enai e tabekau. (2 Korinto 12:9, 10 ba duahi.) Paulo na unu e kara toma dainai Iehova ese hanaihanai ena hahetoho lalodiai e duruava.

15. Bema Paulo baita tohotohoamu, dahaka baita davarimu?

¹⁵ Ita danu eda abidadama dainai be kirikirilaidamu eiava be daḡedaḡe henidamu. Bona readia tauanida na be hesikumu eiava gorere badana ta baita haheaukalaiamu. Bema Paulo ena haheitalai baita tohotohoamu, ta davarimu hekwakwanai ta ta ese be hahedinaraiamu Iehova na mai lalokauna ida ita e durudamu.

16. Ena be oi na gorere, to dahaka ba kara diba?

¹⁶ Oi be gorere dainai bedi ai o hekuremu eiava wheelchair ai o helaimu, a? Tuimui e hisihisimu eiava matamu be dika, a? Bema unu bamona, oi be tauanidia goadadia taudia bona eregabe taudia ida Iehova ba hesiai henia hebou diba, a? Oibe, unu ba kara toma diba. Burukadia bona gorere taudia momo na mauri hanaihanai dalana ai e heaumu. To, sibodia edia goada amo unu na basie kara toma diba. Idia na Iehova amo goada e abimu dalana ta na, telefon amo Kristen hebou herevadia e hakalamu. Bona dokta, nesi bona varavaradia e haroro henidiamu amo hahediba ḡaukarana e karaiamu.

17. Tauanidia e manoka eiava gorere taudia be Iehova ese ede e lalodia tomamu?

 ¹⁷ Ena be Iehova totona o uramu ba kara ḡaudia iboudiai na basio kara dibamu, to basio lalomanoka bona basioto oi na dia heḡereḡere ba haheauka ela bona ina tanobada oromana dokona. Emu abidadama dainai Iehova ese oi na e lalokau henimumu bona Ia totona o kara ḡaudia na doini e lalodiataomu. Iena heduru bavabia na namo, bona Ia ese oi na basine rakatanimumu. (Sal. 9:10) To Ia ese oi na be durumumu. Gorere badana ta e haheaukalaiamu taihuna ta ena hereva mani a laloa: “Lau na gorere idauidau na davarimu dainai, na itaiamu asi egu nega ma haida ediai hereva momokani baina herevalaia totona. To mai dibagu ena be nega sisina na ḡaukaralaiamu ma haida baina haroro henidia, una ese Iehova kudouna na e hamoaleamu.” Bema o lalomanokamu, ba helalotao tadikaka taihu haida danu unu e hemami tomamu. Paulo ena haheitalai bona ena hahegoada herevana mani ba laloa, ia na eto: “Manoka-manoka . . . na moalelaimu; badina be na manokamu negadia ai na goadamu.”​—2 Kor. 12:10.

18. Haida ese hekwakwanai ede bamodia e davarimu?

¹⁸ Mauri dalanai e heaumu taudia haida na hekwakwanai ma ta e haheaukalaiamu. Una na haida ese asie itaiamu bona asie lalopararalaiamu hekwakwanaina. Heḡereḡere, e lalometaumu eiava e lalohekwarahimu. Dahaka dainai idia na hekwakwanai unu bamodia e davarimu? Badina bema ta na imana e kwaidu eiava wheelchair ai e helaimu, taunimanima ese una na be itaiamu bona be uramu bae heduru. To, ta lalonai e miamu hisihisina na ta ese basine dibaia diba. E mamiamu hisihisina na bada vaitani idia na aedia eiava imadia bema kwaidu. Haida ese una na asie itamu dainai basie durudia diba.

19. Mefiboset ena haheitalai amo dahaka ta dibamu?

¹⁹ Bema oi na ḡau haida basio kara diba bona o mamiamu haida ese emu hekwakwanai na asie lalopararalaimu, Mefiboset ena haheitalai ese oi na baine hagoadamu diba. (2 Sam. 4:4) Ia na ena gorere e haheaukalaia bona King David ese e hahemaoro henia kerere. Una na dia Mefiboset ena kerere daidiai e vara. Unu na se lalo bada, to ena mauri ai e vara ḡaudia mo e lalo. Ia ese guna David ena kara namodia ienai na e lalo bada. (2 Sam. 9:6-10) Una dainai, David ese e hahemaoro henia kerere neganai, Mefiboset na e vara ḡaudia iboudiai e haerodia namonamo. David ena kerere ese ia na se habadua. Bona David ese e karaia karana dainai gwau na Iehova na se henia. Mefiboset ese e laloava ḡauna na ia  be dahaka baine kara Iehova ese e abia hidi king baine durua totona. (2 Sam. 16:1-4; 19:24-30) Iehova ese Mefiboset ena haheitalai namona na Baibul ai e torea ita ihadibada totona.​—Roma 15:4.

20. Lalohekwarahi dainai haida be ede e hemami tomamu, to dahaka bae diba na namo?

²⁰ Lalohekwarahi na e bada e laomu dainai, tadikaka bona taihu haida na e hemaraimu bona ma haida ida e nohomu neganai e garimu. Ediai na e aukamu hutuma padadiai bae noho, to dounu kongrigeisin heboudia bona hebouhebou badadia e lao henimu. Ediai na e aukamu asi dibadia taudia bae hereva henidia, to dounu haroro ḡaukara ai haida e hereva henidiamu. Bema unu na oiemu ai e varamu, ba helalotao ma haida ediai danu unu e vara tomamu. Oiemu ai e varamu ḡauna na taunimanima momo ediai danu e varamu. Ba helalotao o hekwarahimu mai kudoumu idoinai ida ia ba hesiai henia karana na Iehova ese e laloa badamu. Oi na dounu o ḡaukara goadamu badina ia ese e hanamomumu bona goada e henimumu. * (Flp. 4:6, 7; 1 Pet. 5:7) Bema oi na dounu Iehova o hesiai heniamu, ena be emu goada na dia heḡereḡere eiava hekwakwanai ta o haheaukalaiamu, namona na ba diba oi na Iehova o hamoaleamu.

21. Iehova ena heduru amo dahaka baine vara diba?

²¹ Heau-helulu korikorina bona Paulo ese e herevalaia heau-heluluna na i’idau. Baibul negadiai gabu daudau heau-heluluna ta lalonai taunimanima tamona ese ahuna e abiamu. To, Kristen maurina ena heau-helulu lalonai bae haheauka ela bona dokona taudia ese mauri hanaihanai ahuna bae abia. (Ioa. 3:16) Heau-helulu korikorina ai, gorere taudia na asie heaumu badina gorere taudia na basie kwalimumu. Ena be ita momo na ta goreremu eiava tauanida na dia gogoada, to ta haheaukamu. (2 Kor. 4:16) Iehova ena heduru amo ita iboudai ese eda heau-helulu baita haḡuḡurua diba.