1. Ta turana ai baola dalana be dahaka?

VAIA, oi na ta turana namona ai baola totona nega bavato ia ida ba hebamo. Emui lalohadai bona hemami bo herevalai heboumu neganai, tura namodia ai bo laomu. To nega haida ḡau haida ese Iesu turana ai baitala karana na baine koua diba. Dahaka ese baine koua diba?

2. Iesu ihetura henina karana e kouamu ḡauna ginigunana be dahaka?

² Iesu ihetura henina karana be kouamu ḡauna ginigunana na ita ese Iesu na asita itaia. Kristen ginigunadia momo danu Iesu na asie itaia. To, aposetolo Petero na e gwa: “Ena be nega ta asio itaia, to o ura heniamu; ena be asio itaiamu, to o abidadama heniamu.” (1 Pet. 1:8) Una dainai ita na Iesu turana ai baitala diba ena be nega ta asita itaia.

3. Iesu ihetura henina karana e kouamu ḡauna iharuana be dahaka?

³ Iesu ihetura henina karana be kouamu ḡauna iharuana na ita ese Iesu na basita hereva henia diba. Ita ta ḡuriḡurimu neganai ita na Iehova ta hereva heniamu. Momokani, ita na Iesu ladanai ta ḡuriḡurimu to dia ia ta hereva heniamu. Bona Iesu danu se uramu ita ese ia baita ḡuriḡuri henia. Dahaka dainai? Badina ḡuriḡuri na tomadiho karana ta bona Iehova sibona baita toma henia diho na maoro. (Mat. 4:10) To eda lalokau Iesu enai na baita hahedinaraia diba.

4. Iesu ihetura henina karana e kouamu ḡauna ihatoina be dahaka bona ina atikol ai dahaka baita herevalaimu?

 ⁴ Iesu ihetura henina karana be kouamu ḡauna ihatoina na Iesu na gubai e nohomu. Ena be ita na dia ia ida gabu tamonai ta nohomu, to ia na baita dibaia diba. Ita na ḡau 4 baita herevalaimu unu ese ia ida eda hetura karana be hagoadaiamu. To namona na Keriso ida baita hetura namonamo badidia do baita herevalai guna.

5. Dahaka dainai Iesu turana ai baitala? (Ini maua “ Iesu Bo Hetura Heniamu Neganai, Iehova Turanai Bo Lao Dibamu” bona “ Iesu Ena Ḡaukara Baita Laloa Dalana” ba ita.)

⁵ Iesu turana ai baitala na mai anina bada bema ita na ta uramu hetura karana namona Iehova ida baita moalelaia. Dahaka dainai? Mani badi rua aita lalo. Ginigunana na, Iesu ese ena hahediba e hamaorodia, eto: “Tamada ese e ura henimuimu, umui ese lau o ura henigumu dainai.” (Ioa. 16:27) Ia na ma eto: “Tamada dekena baela taudia iboudiai edia dala na lau.” (Ioa. 14:6) Bema oi na o uramu Iehova turana ai baola to bema emu hetura karana Iesu ida na dia namo, oi na vaitani ruma ta ai o uramu ba vareai to iduara na so ḡaukaralaiamu. Iesu ese haheitalai unu bamona e ḡaukaralaia neganai ia na sibona e hegwaurai “mamoe ikoukouna” o iduarana. (Ioa. 10:7) Badi iharuana na Iesu ese Tamana ena kara na e tohotohodia ḡoevaḡoeva. Ena hahediba e hamaorodia, e gwa: “Vada eme itagu tauna ese Tamagu danu vada eme itaia.” (Ioa. 14:9) Una dainai Iehova baita dibaia dalana badana na Iesu ena mauri baita stadilaia. Iesu baita dibaiamu neganai, eda lalokau ienai na be badamu. Bona eda hetura karana Iesu ida be goadamu neganai, eda lalokau Iehova enai danu be goadamu.

6. Iesu ida baita hetura na mai anina bada badina ma ta be dahaka? Ba herevalaia.

 ⁶ Iesu ida baita hetura na mai anina bada badina unu amo Iehova ese eda ḡuriḡuri baine haerelai. Una dainai ḡuriḡuri lalonai ina hereva “Iesu ladanai” mo baita gwauraia na dia heḡereḡere. Namona na Iehova ese eda ḡuriḡuri baine haerelaia totona, Iesu e ḡaukaralaiamu dalana baita lalopraralaia. Iesu ese aposetolo taudia e hamaorodia, eto: “Ladagu ai ba noi ḡaudia iboudiai do baina kara.” (Ioa. 14:13) Ena be Iehova ese eda ḡuriḡuri e kamonaimu bona e haerelaimu, to Ia ese siahu na Iesu e henia Iena ura o e lalomu ḡaudia baine haḡuḡuru totona. (Mat. 28:18) Dirava ese eda ḡuriḡuri do se haerelai neganai, ia na e itaiamu bema ita na Iesu ese e heni sisibana ta badinaiamu. Heḡereḡere, Iesu na e gwa: “Badina be umui ese taunimanima edia dika ba gwautao, Tamamui guba ai e nohomu ese emui dika baine gwau tao. A umui ese taunimanima edia dika basio gwau tao, Tamamui ese emui dika basine gwau tao.” (Mat. 6:14, 15) Una dainai Iehova bona Iesu ese ita e kara henidamu dalana heḡereḡerena ai ita ese ma haida baita kara henidia na namo.

7. Daidia be Iesu ena mauri idavalaina boubouna amo namo bae davari?

⁷ Iesu turana ai baela taudia mo na iena mauri idavalaina boubouna amo namo bae davari. Ede ta diba tomamu? Iesu na e gwa, ia ese “ena mauri baine atoa diho, turana daidiai.” (Ioa. 15:13) Namona na Iesu tanobada do sema neganai e mauriva abidadama taudia ese Iesu bae dibaia bona bae lalokau henia. Unu abidadama taudia heḡereḡere, Abraham, Sara, Mose, bona Rahaba na be toreisi loumu, bona ena be idia na guna Iehova e hesiai henia kara maoromaoro taudia, to idia danu Iesu turana ai baela na mai anina bada, mauri hanaihanai bae abia totona.​—Ioa. 17:3; Apos. 24:15; Heb. 11:8-12, 24-26, 31.

8-9. Ioane 15:4, 5 heḡereḡerena, Iesu ida eda hetura karana ese e durudamu dahaka baita kara bona dahaka dainai una na mai anina bada?

⁸ Ita na ta moalemu badina Basileia sivaraina namona iharorolaina bona ihahedibalaina ḡaukaradia ai Iesu ida ta ḡaukara heboumu. Iesu tanobada ai e nohova neganai ia na Hahediba Tauna. Ia na kongrigeisin kwarana bona guba e lou lao negana amo ia na haroro bona hahediba ḡaukarana e hakauamu. Danu o hekwarahimu momo o durudiamu ia bona Tamana bae dibadia neganai ia ese una na e itaiamu bona e laloa badamu. Momokani, Iehova bona Iesu edia heduru amo ina ḡaukara baita haḡuḡurua diba.​—Ioane 15:4, 5 ba duahi.

⁹ Baibul ese e hadibadamu Iesu baita lalokau henia bona una na baita goadalaia, unu amo Iehova baita hamoalea. Una dainai ita na Iesu turana ai baitala totona baita kara ḡaudia hani baita haerodiamu.

10. Iesu ida baita hetura totona, baita karaia ḡauna ginigunana be dahaka?

¹⁰ (1) Iesu ba dibaia. Unu baita kara toma totona, Baibul bukadia Mataio, Mareko, Luka bona Ioane baita duahidia. Baibul ai Iesu ena mauri e herevalai sivaraidia baita lalodia dobumu neganai, Iesu baita lalokau heniamu bona baita matauraiamu, badina ia ese taunimanima na e kara namo henidia. Heḡereḡere, ena be ia na idia Biagudia to ia ese ena hahediba taudia na hesiai taudia bamona se kara henidia. Bona idia ediai ena lalohadai bona hemami na e herevalai. (Ioa. 15:15) Iesu ese edia hisihisi na e mamia bona  idia ida e tai hebou. (Ioa. 11:32-36) Inaina danu e diba iena hereva e badinava taudia na ia turana. (Mat. 11:19) Iesu ese ena hahediba e kara henidia dalana baita tohotohoamu neganai, eda hetura karana ma haida ida na be hanamoamu, laloda na be moalemu, bona Keriso enai eda lalokau bona hemataurai na be badamu.

11. Iesu ida baita hetura totona, baita karaia ḡauna iharuana be dahaka?

¹¹ (2) Iesu ena lalohadai bona kara ba tohotoho. Iesu ena lalohadai baita dibamu bona baita tohotohomu neganai, eda hetura karana ia ida na be namomu. (1 Kor. 2:16) Iesu be ede baita tohotohoa toma? Dala ta mani aita laloa. Iesu ese ma haida idurudia karana e laloa bada to sibona na se helalo. (Mat. 20:28; Roma 15:1-3) Unu e lalo tomava dainai sibona e heni bona ma haida edia dika e gwautaova. Taunimanima ese e gwau heniava negadiai se badu haraḡava. (Ioa. 1:46, 47) Haida edia kerere gunadia daidiai se kara auka henidiava. (1 Tim. 1:12-14) Iesu na e gwa: “Taunimanima iboudiai bae diba umui na lauegu hahediba: ba helalokau heheni dainai.” (Ioa. 13:35) Namona na siboda baita henanadai: “Lau be Iesu na tohotohoamu, na hekwarahimu tadikaka taihu ida maino ai baia noho, a?”

12. Iesu ida baita hetura totona, baita karaia ḡauna ihatoina be dahaka bona edena dalai?

¹² (3) Keriso tadikakana baita durudia. Iesu na e laloamu ia tadikakana horoa taudia ta durudiamu karana na vaitani ia ta duruamu bamona. (Mat. 25:34-40) Horoa taudia ta durudiamu dalana badana na Basileia ta harorolaiamu bona hahediba ḡaukarana ta karaiamu, una na ia ese ena hahediba e hamaorodia bae kara ḡaukaradia. (Mat. 28:19, 20; Apos. 10:42) “Mamoe idaudia” edia heduru amo Keriso tadikakana ese tanobada heḡeḡemadai ai e hekaramu haroro ḡaukara badana bae haḡuḡurua diba. (Ioa. 10:16) Bema oi na mamoe idaudia oreana lalonai, haroro ḡaukara ai o vareaimu negadia iboudiai oi na o hahedinaraiamu dia horoa taudia mo, to Iesu danu o lalokau heniamu.

13. Luka 16:9 ai Iesu ena sisiba be ede baita badinaia toma?

¹³ Iehova bona Iesu ida baita hetura dalana ta na eda moni bona kohu amo idia ese e hakauamu ḡaukarana baita durua. (Luka 16:9 ba duahia.) Tanobada heḡeḡemadai ḡaukarana totona kontribiusin baita heni diba, heḡereḡere gabu daudaudiai haroro ḡaukarana, tomadiho momokani e duruamu rumadia o bildin bona Kingdom Hall idauidau, bona dikadika badadia daidiai heduru bae abi taudia baita durudia. Danu namona na ita ese eda kongrigeisin iduruna totona kontribiusin baita heni bona e dabumu taudia baita durudia. (Her. 19:17) Unu dala idauidau amo ita ese Keriso tadikakana baita durudia diba.

14. Efeso 4:15, 16 heḡereḡerena, Iesu ida baita hetura totona, baita karaia ḡauna ihahanina be dahaka?

¹⁴ (4) Kristen kongrigeisin ena heau dalana baita durua. Ita inarida totona e abidia hidi taudia ida baita ḡaukara heboumu neganai, kongrigeisin kwarana Iesu ida eda hetura karana na be goadamu. (Efeso 4:15, 16 ba duahi.) Heḡereḡere, ita na ta uramu eda Kingdom Hall na baita ḡaukaralaidia namonamo. Una dainai, kongrigeisin haida na ma kongrigeisin haida ida e hatamonadiamu bona teritori hetoadia na e haidaudiamu. Unu amo moni bada baita seivimu. To danu unu e varamu daidiai pablisa haida edia noho daladia na e idaumu. Unu abidadama tadikaka taihu na reana laḡani momo  lalodiai kongrigeisin ta ai hesiai ḡaukara e kara bona tadikaka taihu momo e dibadia. To hari idia na e noidia kongrigeisin idauna ta baela. Ta dibamu Iesu na e itaiamu unu abidadama tadikaka taihu ese unu dala matamatadia e badinamu neganai e moalemu.

15. Vaira neganai Iesu ida eda hetura be ede be goada tomamu?

¹⁵ Lauma helaḡa amo e horodia taudia edia helaro na Iesu ida Dirava ena Basileia ai be lohiamu ela bona hanaihanai. Idia na Keriso ida be nohomu, anina na ia be itaiamu, ia ida be herevaherevamu bona ia be bamoamu. (Ioa. 14:2, 3) Tanobada helarona taudia danu Iesu ena lalokau be mamiamu. Ena be idia ese Iesu na basie itaiamu, to Iehova bona Iesu ese be henidiamu maurina be moalelaiamu lalonai Iesu ida edia hetura karana na be goadamu.​—Isa. 9:6, 7.

16. Iesu turana ai baita laomu neganai baita davarimu hahenamodia be dahaka?

¹⁶ Iesu na e uramu ita na ia turana ai baitala, bona una ta abia daemu neganai hahenamo momo ta davarimu. Heḡereḡere, hari ita na iena lalokau bona heduru ta mamidiamu. Bona mauri hanaihanai baita abia diba. Bona mai anina bada ḡauna na, Iesu ida eda hetura karana ese dala be kehoamu ia Tamana Iehova baita hetura heniamu, una na hetura karana hereadaena. Iesu ese baine gwauraida ia turana na hahenamo namona.