Teenage laḡanidiai na kau neganai, egu hetura karana Iehova ida na e manoka. Na itaiava egu skul turadia na edia ura karadia e karava, una dainai na laloava lau na ḡau haida na reava. Na mamiava tama sina ese e ato taravatudia bona Kristen taravatudia ese e hametauguva, bona toana na lauma ḡaudia ikaradia na mai hekwarahina. Ena be na abia daeva Iehova na e nohomu, to na mamiava lauma dalanai na manokava.

Dounu, asina urava baina manoka dainai Iehova na hesiai heniava, to dia mai lalogu idoinai. Na harorova negadiai, asina heḡaeḡaeva, una dainai herevahereva ihamatamadiai na na hekwarahiva. Unu daidiai, egu haroro ḡaukara anina na se varava bona asina moaleva. Sibogu na henanadaiva, ‘Edena dalai ta ese ina ḡaukara na pura ta ta ai bona hua ta ta ai baine karaia?’

Laḡanigu e 17 neganai, sibogu baina noho urana na e goada. Una dainai kohugu na habou, ruma na rakatania bena Australia nala. Lau na siri neganai tamagu sinagu ediai na e  auka. Idia na e lalohekwarahiva, to e laloava lauma dalanai ba goadamu.

Australia ai, lauma dalanai na manoka. Nega ta ta ai mo na hebouva. Lau na eregabe ma haida na tohotohodiava, hanuaboi ta be hebou na laova, murina hanuaboina ai be nightclub ai na ha inuinuva bona na ha mavaruva. Na lalo loumu neganai, na lalopararamu aegu kahana be hereva momokani ai, a kahana ma ta be tanobada ai, to na mamiava unu gabu ruaosi ai basina gini diba.

Laḡani rua muridiai, taihu ta na hedavari henia, iena kara namo dainai egu mauri ai na karava ḡaudia na lalopararalai. Lau na singul taihudia faiv ida ruma tamonai a nohova, bona ai ese seket tauna mai adavana Tamara ida a invaitidia wiki ta emai rumai bae noho. Seket tauna na kongrigeisin ḡaukaradia e karava neganai, Tamara na ai ida rumai a nohova bona a kiri hebouva. Una kara na na ura henia. Ia na manau bona ihereva henina na dia auka. Na moale badina na itaia lauma dalanai e goadamu tauna ta na unu e moale tomava.

Tamara na haheitalai namona badina hereva momokani bona haroro ḡaukara na e lalodia badava. Ia na e moaleva ena goada baine ḡaukaralaia Iehova ihesiai heninai, a lau be asina moaleva badina dia kudougu idoinai ida hesiai ḡaukara na karaiava. Iena kara namodia bona moale ese lau na e durugu bada. Ena haheitalai namona dainai Baibul ena hereva momokani ta na laloa: Iehova na e uramu ita iboudai ese ‘mai moaleda ida’ bona ‘mai aneda ida’ Ia baita hesiai henia.”​—Sal. 100:2.

Launa na ura Tamara e moaleva heḡereḡerena baina moale, to una moale baina abia totona, namona na sensi badadia haida baina kara. Nega taina e daudau murinai, ḡau haida na taina ruana na haidau. Haroro totona na heḡaeḡaeva, bona nega ta ta na heduru painiava. Unu ese e durugu basina  gari bona mai goadagu ida baina haroro. Haroro ḡaukarai Baibul na ḡaukaralaia momova neganai moale mamina na abiava. Gabeai, hua ta ta iboudiai na heduru painiava.

Lau ese tura namodia idauidau na davaridia, idia na lauma dalanai e goadava bona Iehova ihesiai henina na e moalelaiava. Edia haheitalai namodia ese e durugu baina kara ḡaudia na haero namonamo bona lauma ḡaudia baina lalo bada. Lau ese haroro ḡaukara na na moalelaia badava, bona gabeai na regula painiava. Laḡani haida lalodiai, una na nega ginigunana na mamia lauma dalanai na goadava bona kongrigeisin ai na moaleva.

Laḡani ta murinai, Alex ida a hedavari, ia na manau, Iehova e lalokau heniava bona haroro ḡaukara e laloa badava tadikakana. Una neganai ia na ministerial servant bona laḡani siks vada e painia. Danu Alex na hua haida lalodiai pablisa dia momo gabuna Malawi ai, hesiai ḡaukara e karaia. Unuseniai, ia na misinari taudia e bamodiava bona idia ese e hagoadaia bona e durua hanaihanai Basileia baine atoa guna.

Laḡani 2003 ai, lau bona Alex a headava, bona ai na una negana amo ema bona hari fultaim hesiai ḡaukara a karamu. Ai ese ḡau namodia momo a diba, bona Iehova ese dala idauidau ai e hanamomaimu.

Laḡani 2009 ai, e boirimai Timor-Leste misinari ḡaukara baia karaia, una na tanobada maraḡina ta Indonesia ena motumotu haida bogaraḡidiai. Nega tamona a moale bona gari mamina abia. Hua faiv muridiai siti badana Dili, ai a kau.

Unuseniai emai mauri ai sensi badadia haida a kara. Ai na kastom, gado, aniani, bona noho daladia matamatadia baia manadalai na namo. Haroro ḡaukarai, nega  momo a davaridiava taudia haida na ogoḡami, se skul namonamo, bona e hahisidia taudia. Bona a itadia taudia momo na tuari bona daḡedaḡe karadia dainai e hisihisiva. *

Haroro ḡaukara na namo herea! Heḡereḡere, nega ta laḡanina 13 kekenina ta ladana Maria * ida a hedavari. Ia sinana na laḡani haida gunadiai e mase, bona tamana na nega ta ta amo e itaiava. Ena uru taudia heḡereḡeredia, Maria na asi dibana ena mauri ai dahaka baine kara. Na helalotaomu nega ta ia na mai taina ida ena hemami na vairagu ai e gwauraiva. To, e gwauraiva herevadia na asina lalopararalaiva badina ena gado na do asi dibagu namonamo. Iehova na noia baine durugu Maria baina hagoadaia, bena hahegoada Baibul siridia na duahi henia. Laḡani haida lalodiai, na itaia hereva momokani ese Maria ena kara, toana, bona ena mauri na e haidaudia. Ia na e bapatiso, bona sibona ena Baibul stadi e karamu. Hari, Maria na lauma dalanai mai ena ruma bese badana bona e mamiamu ia na dia sibona.

Iehova ese hesiai ḡaukara Timor-Leste ai na e hanamoamu. Ena be pablisa momo na laḡani 10 gunadiai mo e bapatiso, to idia momo na painia, ministerial servant, o elda taudia. Ma haida be remote translation office ai edia gado korikori ai lauma aniani ihalasidia ḡaukarana e duruamu. Na kamonaimu hebou negadiai ane e abimu, e kirimu, bona edia tubu lauma dalanai na itamu negadiai na moalemu.

Emai mauri Timor-Leste ai na idau Australia amo, to emai mauri na a moalelaia badamu. Nega haida a guiva basi maraḡidia ai na, taunimanima, gwarume bona makedi amo e abiva uma anianidia ese e hahonuava. Nega haida Baibul stadi na ruma maraḡina ta lalonai a karava, ruma lalona na siahu bona floa na mai mirona bona kokoroku e heau loaloava. Ena be unu heto, to nega momo na lalova, ‘Ina na namo herea!’

Na lalo loumu neganai, tamagu sinagu na tenkiu henidiamu badina e hekwarahi Iehova ena dala e hadibagu, lauma dalanai na manoka negadiai danu. Hereva Lada-isidia 22:6 na e momokani egu ai. Tamagu sinagu na lau bona Alex emai ai e moalemu badina e itaiamu Iehova ese e ḡaukaralaimaimu. Laḡani 2016 amo ema bona hari, ai na Australasia brens ena teritori ai seket ḡaukara a karaiamu.

Guna na laloava haroro ḡaukara na mai hekwarahina. To, hari haroro ḡaukara na ura henia dikadikamu! Na laloparara ena be eda mauri ai dahaka bae vara, mai kudouda idoinai ida Dirava ta hesiai heniamu karana sibona ese moale korikori baine havaraia diba. Oibe, laḡani 18 lalodiai Alex ida Iehova a hesiai heniamu na egu mauri ai name moalelaidia laḡanidia. Hari na lalopararamu salamo e torea tauna David ese Iehova e hamaorolaia herevana anina be dahaka, eto: “Oi e abidadama henimumu taudia na bae moale, bae moale hisi dae ela bona hanaihanai. . . . Oi ladamu e ura heniamu taudia ese bae moalelaimu.”​—Sal. 5:11.