Dahaka dainai Iesu na kahirakahira baine mase neganai, Salamo 22:1 ai David ese e torea herevana e gwauraia?

Iesu kahirakahira baine mase neganai e gwauraia herevana na Mataio 27:46 ai e tore, eto: “Egu Dirava e, egu Dirava e, dahaka lau ome rakatanigu.” Iesu unu e hereva toma neganai, ia ese David ena hereva Salamo 22:1 ai e haḡuḡurua. (Mar. 15:34) Basita gwa Iesu na unu e hereva toma badina e lalohisihisi eiava Dirava se abidadama henia. Iesu na e laloparara dahaka dainai ia na baine mase, bona mai ena ura ida una e karaia. (Mat. 16:21; 20:28) Danu e diba ia baine mase neganai, Iehova ese ia igimana ‘maḡuna’ baine kokia. (Iobu 1:10) Iehova ese Iesu na se koua unu amo Iesu ese baine hamomokania ia na Iehova baine badinaia ela bona mase.​—Mar. 14:35, 36.

Dahaka dainai Iesu ese una salamo ena hereva e gwaurai? Ena be asita diba namonamo to badi haida baita herevalaimu. *

Iesu ese una hereva e gwaurai neganai, e hahedinaraia Iehova ese ena mase basine koua, a? Iesu na sibona ena mauri davana baine heni ena be Iehova ena heduru na se abia. Ia na taunimanima dainai e mase unu amo “mase mamina e abia, taunimanima iboudiai daidiai.”​—Heb. 2:9.

Iesu ese una hereva e gwauraia neganai, ia be e ura taunimanima ese salamo 22 ibounai bae laloa? Iuda taudia ediai negai  taunimanima ese salamo momo na e lalodiataomu. Salamo ena siri ta e laloava neganai, haraḡa herea salamo ibounai e laloava. Bema una na Iesu e ura baine karaia ḡauna, ia e badinaiava Iuda taudia bema durudia ina salamo 22 ai iena mase neganai bae vara peroveta herevadia momo bema lalodiatao. (Sal. 22:7, 8, 15, 16, 18, 24) Danu, salamo 22 dokona siridia ese Iehova e hanamoamu bona e hahedinaraia ia na tanobada idoinai ena King.​—Sal. 22:27-31

Iesu ese David ena hereva e gwauraia neganai, e hahedinaraia ia be asi ena kerere, a? Ia do se mase ai, Sanhedrin taudia ese e kota henia eto ia na Dirava ladana e hadikaia. (Mat. 26:65, 66) Idia na kara haraḡa e hebou una hanuaboinai bena kota e karaia to kota ena taravatu na se badinaia. (Mat. 26:59; Mar. 14:56-59) Iesu ese ina hereva, “Egu Dirava e, egu Dirava e, dahaka lau ome rakatanigu” e gwauraia neganai, e hahedinaraia ia na kerere ta se karaia bona bae hamasea na asi badina.

Iesu be e ura ma haida baine hadibadia bena bae lalo David, ina salamo e torea tauna, be e hisihisi badina Iehova ese se lalonamo henia dainai, a? David ena henanadai ese se hahedinaraia ia na Dirava na se abidadama henia. Una henanadai e heni murinai, ia na e gwa Iehova e abidadama henia momokani bona Iehova ese ia na e hanamoa. (Sal. 22:23, 24, 27) Una heḡereḡerena ena be Iesu “David natuna” na au ai e kokoa kau dainai e hisihisi, to Iehova ese ia na e lalonamo henia.​—Mat. 21:9.

Iesu e hisihisi badina be Iehova ese ia na se gimaia unu amo Dirava ibadinana karana baine hamomokania, a? Iesu baine hisihisi bona baine mase karana na dia Iehova ena ura. To, Adam bona Heva edia gwau-edeede dainai una e vara. Iesu na kerere ta se karaia, to e hisihisi bona e mase unu amo Satana ena hereva baine haerelaia bona mauri davana baine heni Adam ese e haboioa ḡauna baine hoia lou. (Mar. 8:31; 1 Pet. 2:21-24) Una na baine vara diba bema Iehova ese ena hegima karana Iesu ena amo baine kokia.

Iesu be e ura ena hahediba baine durudia unu amo Iehova ese iena mase karana se koua badina bae laloa, a? * Iesu na dibana bema kara dika tauna ta heḡereḡerena au ai baine mase, una ese momo be hahekwakwanaidiamu. (1 Kor. 1:23) Bema ena hahediba na iena mase badina korikorina be dibamu neganai, ienai e vara ḡaudia anidia be lalopararalaimu. (Gal. 3:13, 14) Bena be dibamu ia na dia kara dika tauna to idia Ihamauridia Tauna.

Herevana dahaka badi dainai Iesu na unu e hereva toma, to ia na dibana au ai baine mase karana amo Iehova ena ura ienai baine haḡuḡurua. Iesu ese una salamo ena hereva e gwauraia murinai, ia na e gwa: “Vada name haḡuḡurua.” (Ioa. 19:30, NWT; Luka 22:37) Oibe, nega sisina lalonai Iehova ese Iesu se gimaia karana amo dala e kehoa Iesu na tanobada e siaia baine karaia ḡaukarana ibounai baine haḡuḡurua vaitani. Bona dala e kehoa Iesu na “Mose bona peroveta taudia edia buka ai bona salamo ai” ia sivaraina e tore herevadia iboudiai baine haḡuḡuru.​—Luka 24:44.