1. Ita be dahaka ta dibamu?

 ITA na Iehova ena taunimanima dainai, ta dibamu ia ese e lalokau henidamu bona e uramu mauri namona baita moalelaia. (Roma 8:35-39) Danu, ta dibamu bema Baibul ena hahekau herevadia baita badinamu, hanaihanai namo baita davarimu. (Isa. 48:17, 18) To, asita lalomu hekwakwanaidia baita davari neganai, dahaka baita kara?

2. Ededia hekwakwanai baita davarimu, bona unu daidiai ede baita lalo tomamu?

² Iehova ena hesiai taudia iboudiai na hekwakwanai idauidau e davarimu. Heḡereḡere, eda ruma bese tauna ta ese laloda be hahisiamu. Reana gorere badana ta dainai Iehova ena hesiai ḡaukara lalonai guna ta karava ḡaudia na basita kara dibamu. Reana disasta ta dainai ḡau momo baita haboiomu. Eiava reana eda abidadama dainai be daḡedaḡe henidamu. Hekwakwanai unu bamodia baita davarimu neganai, reana baita lalomu: ‘Dahaka dainai lauegu ai e varamu? Lau be ḡau ta na karaia kerere, a? Una ese e hahedinaraiamu Iehova be lau se hanamogumu, a?’ Nega haida unu o lalo tomamu, a? Bema oibe, basio lalomanoka. Guna Iehova ena hesiai taudia momo na lalohadai unu bamodia e abiva.​—Sal. 22:1, 2; Hab. 1:2, 3.

3. Salamo 34:19 amo dahaka ta dibamu?

³ Salamo 34:19 ba duahia. Ina siri na point badadia rua e  herevalaimu: (1) Kara maoromaoro taudia na hekwakwanai e davarimu. (2) Iehova ese eda hekwakwanai amo e hamauridamu. To Iehova be edena dalai ita e hamauridamu? Dala ta na e durudamu ina tanobada ai mauri baita laloa maoromaoro. Iehova na e gwauhamata ia baita hesiai heniamu neganai baita moalemu, to se gwaumu hekwakwanai na basita davarimu. (Isa. 66:14) Ia ese e hagoadadamu vaira nega baita laloa bada​—una nega ai mauri na baita moalelaiamu ela bona hanaihanai. (2 Kor. 4:16-18) To hari, ia na ita e durudamu ia baita hesiai henia hanaihanai totona.​—Roh. 3:22-24.

4. Ina atikol ai dahaka baita herevalaimu?

⁴ Baibul negadiai bona hari ina negai, Iehova ena hesiai taudia edia sivarai amo baita dibamu ḡaudia mani aita herevalai. Baita itaiamu, asita lalomu hekwakwanaidia na bae vara diba. To bema Iehova enai baita tabekaumu ia ese hanaihanai ita na be durudamu. (Sal. 55:22) Ini sivarai bo lalomu neganai, sibomu ba henanadai: ‘Bema lauegu ai hekwakwanai unu bamona baine vara, dahaka baina kara? Unu sivarai ese egu abidadama Iehova enai be ede e hagoadaia tomamu? Name diba ḡaudia be egu mauri lalonai ede baina badinadia toma?’

5. Laban dainai Iakob be dahaka hekwakwanai e davari? (Rau 1 laulauna ba itaia.)

⁵ Baibul negadiai Iehova ena hesiai taudia na asie lalo hekwakwanaidia e davari. Mani Iakob aita laloa. Ia na tamana ese e hamaoroa varavarana Laban natuna kekenina ta baine advaia, bona e hagoadaia Iehova ese ia na baine hanamoa bada. (Gen. 28:1-4) Iakob na unu e kara toma. Ia na Kanaan tanona e rakatania bona ela Laban ena gabu. Laban natuna kekenidia na rarua, Lea bona Rahela. Iakob ese hane-muritai Rahela e ura henia, bona baine adavaia totona Laban e hamaoroa ienai laḡani 7 baine ḡaukara. (Gen. 29:18) To Iakob ese e laloa ḡauna na se vara. Laban na e koikoi bona natuna hane-guna Lea na Iakob e henia baine e adavaia. Laban ese Iakob e hamaoroa, wiki ta murinai Rahela baine adavaia bema laḡani 7 ma baine ḡaukara. (Gen. 29:25-27) Bona Laban na nega momo ena ḡaukara ai Iakob e koia. Laḡani 20 lalodiai Laban ese Iakob na se kara henia namonamo.​—Gen. 31:41, 42.

6. Iakob ese ededia hekwakwanai ma haida e haheaukalai?

⁶ Iakob na hekwakwanai ma haida e haheaukalai. Ia natuna na momo, to e heiri-heiriva. Idia ese tadidia Iosef na hesiai tauna ta bamona e hoihoilaia. Iakob natuna rarua, Simeon bona Levi, ese ruma bese na e hahemaraia bona Iehova ladana e hadikaia. Danu, Iakob adavana lalokauna Rahela na natudia iharuana e havaraia neganai e mase. Bona hitolo bada e vara dainai Iakob na buruka lalonai, ena tano e rakatania Aigupto ela.​—Gen. 34:30; 35:16-19; 37:28; 45:9-11, 28.

7. Edena dala ai Iehova ese e hahedinaraia Iakob na e lalonamo henia?

⁷ Ena be Iakob na unu hekwakwanai e davaridia to Iehova bona ena gwauhamata na dounu e abidadama henidia. Bona Iehova ese e hahedinaraia Iakob na e lalonamo henia. Heḡereḡere, ena be Laban ese Iakob na e koia, to Iehova ese Iakob na kohu momo e henia. Iakob na Iehova e tenkiu henia bada, badina natuna Iosef ida e hedavari lou, ena be e laloava Iosef na vada e mase. Iakob ena hetura karana Iehova ida na goada dainai, e davari hekwakwanaidia iboudiai na e haheaukalai. (Gen. 30:43; 32:9, 10; 46:28-30) Bema eda hetura karana Iehova ida baita hagoadaiamu,  asita lalomu hekwakwanaidia baita davarimu neganai baita haheaukamu.

8. King David be e ura dahaka baine kara?

⁸ King David na Iehova ena hesiai ḡaukara ai e urava baine kara ḡaudia iboudiai na se kara. Heḡereḡere, David na e ura dikadika Dirava ena dubu helaḡa baine haginia. Ena lalohadai na peroveta tauna Natan enai e gwauraia. Bona Natan ese e hamaoroa, eto: “Lalomu ai e miamu ḡauna idoinai do ba karaia, badina be Dirava na oi ida.” (1 Sis. 17:1, 2) Momokani, unu hereva ese David na e hagoadaia. Reana ia na maoromaoro una ḡaukara badana e plenia.

9. David na Natan ese e hamaoroa herevana e kamonai neganai dahaka e kara?

⁹ Se daudau, Iehova ena peroveta tauna na hereva idauna ta e laohaia. “Una hanuaboi” ai Iehova ese Natan e hamaoroa, David ese dubu helaḡa na basine haginia, to natuna ta ese baine haginia. (1 Sis. 17:3, 4, 11, 12) David na una hereva e kamonai neganai dahaka e kara? Ena plen na e haidaua. Ia ese moni bona kohu e habou, natuna Solomon ese dubu ihaginina ai baine ḡaukaralai totona.​—1 Sis. 29:1-5.

10. Iehova ese David be ede e hanamoa toma?

¹⁰ Iehova ese David na dubu helaḡa basine haginia herevana e hamaorolaia murinai, maoromaoro ia ida gwauhamata ta e karaia. E gwa David ena bese amo ta na baine lohia ela bona hanaihanai. (2 Sam. 7:16) Tanobada matamatana ai, Iesu Ena Lohia Laḡanidia 1,000 lalonai, David na be moalemu badina be dibamu King Iesu na ena bese amo e vara. Una sivarai ese e durudamu ena be Iehova ena ḡaukara ai ta uramu baita kara ḡaudia iboudiai na basita kara dibamu, to Iehova ese hahenamo na asita lalomu dalana ai be henidamu.

11. Kristen ginigunadia ediai be dahaka ḡau namodia e vara, ena be Basileia na e laloa negana ai se lohia? (Aposetolo Edia Kara 6:7)

¹¹ Kristen ginigunadia na se lalo ḡaudia ediai e vara. Heḡereḡere, idia na e urava Dirava ena Basileia na bainema. To asi dibadia edena nega ai baine vara. (Apos. 1:6, 7) Una dainai dahaka e kara? Idia ese haroro ḡaukara e goadalaia. Sivarai namona na gabu ibounai e harorolaiava lalonai, Iehova ese e hanamodia dalana e itaia.​—Aposetolo Edia Kara 6:7 ba duahia.

12. Hitolo bada e vara neganai, Kristen ginigunadia be dahaka e kara?

¹² Nega ta, ‘tanobada idoinai’ lalonai hitolo bada e vara. (Apos. 11:28) Kristen ginigunadia ese danu e mamia. Mani a laloa hitolo bada dainai edia mauri na e auka? Momokani, una nega ai tama sina na e lalohekwarahi bada edia ruma bese be ede bae ubudia toma. Bona e urava edia hesiai ḡaukara bae habadaia matamata taudia ediai be dahaka e vara? Reana e lalo bae nari ela bona hitolo negana baine ore, a? Herevana dahaka e vara, to Kristen taudia na edia mauri dalana heḡereḡerena haroro ḡaukara na dounu e karaia, bona mai moaledia ida tadikakadia Iudea ai na edia kohu amo e durudia.​—Apos. 11:29, 30.

13. Hitolo bada negana lalonai, Kristen taudia be dahaka hahenamo e davari?

¹³ Hitolo bada negana lalonai, Kristen taudia be dahaka hahenamo e davari? Heduru e abi taudia na e itaia Iehova ese idia na e durudiava. (Mat. 6:31-33) Reana idia e durudiava tadikakadia ida edia hetura karana na e goada. Bona kontribiusen e heni o dala ma idaudia ai e heduru tadikakadia ese henia karana amo moale e davaria. (Apos. 20:35) Iehova ese idia iboudiai na e hanamodia, badina ena be edia mauri na e auka, to mai moaledia ida ia e hesiai henia.

14. Banaba bona aposetolo Paulo ediai be dahaka e vara, bona dahaka namo e havaraia? (Aposetolo Edia Kara 14:21, 22)

 ¹⁴ Kristen ginigunadia na nega momo daḡedaḡe e davari, nega haida unu na idia asie laloa negana ai e vara. Banaba bona aposetolo Paulo na Lustera ai e harorova lalonai e vara ḡauna mani aita laloa. Matamanai, kamonai taudia ese idia na e abidia dae. To gabeai, daḡedaḡe taudia ese ‘hutuma lalodia e ani’ bona idia haida ese Paulo na nadi amo e hodoa bona e rakatania baine mase. (Apos. 14:19) To, Banaba bona Paulo na ma gabu haida ai dounu e haroro. Bena dahaka namo e vara? Momo na Iesu ibadinana taudia ai ela bona edia hereva bona haheitalai ese tadikakadia e hagoadadia. (Aposetolo Edia Kara 14:21, 22 ba duahidia.) Ena be Paulo bona Banaba na daḡedaḡe e davari, to haroro ḡaukara na asie hadokoa, una dainai momo e durudia. Bema Iehova ese e henida ḡaukaradia baita karamu, ia ese ita na be hanamodamu.

15. Tadikaka A. H. Macmillan ena haheitalai amo dahaka o dibamu?

¹⁵ Laḡani 1914 vairana laḡanidia ai, Iehova ena taunimanima na e laloava ḡau haida na vada be varamu. Heḡereḡere, Tadikaka A. H. Macmillan mani aita laloa. Una negai momo e lalova heḡereḡerena, Tadikaka Macmillan danu e laloava ia na kahirakahira guba be laomu. September 1914 ai, pablik tok ta e heniva lalonai, e gwa: “Ina na reana lauegu pablik tok orena.” To, una na dia iena tok orena. Tadikaka Macmillan na gabeai e gwa: “Ai haida na reana haraḡa herea a lalo ai na vada guba baia laomu.” Ma e gwa: “Namona na Lohiabada ena ḡaukara hari baita goadalaia.” Tadikaka Macmillan na unu e kara toma. Ia na haroro ḡaukara e goadalaia. Ia ese tadikaka momo e hagoadadia; idia na ami ai asie vareai dainai e hadiburadia. Bona ia na hanaihanai kongrigeisin heboudia e laova, e buruka negana lalonai danu. Tadikaka Macmillan na ena guba helarona e nariava lalonai, Iehova ena hesiai ḡaukara e goadalaia dainai dahaka namo e davari? Laḡani 1966 ai, do se mase ai ia na e gwa: “Hari egu abidadama na goada herea dia guna bamona.” Ita iboudai ese iena haheitalai namona baita tohotohoa na namo, badina ita haida na nega daudau hekwakwanai idauidau ta haheaukalaimu.​—Heb. 13:7.

16. Tadikaka Herbert Jennings bona adavana ediai be dahaka e vara? (Iakobo 4:14)

¹⁶ Iehova ena taunimanima momo na gorere badadia e davari. Heḡereḡere, Tadikaka Herbert Jennings b ena sivarai lalonai ia bona adavana ese misinari ḡaukarana Ghana ai e moalelaia dalana e herevalaia. To gabeai, ia na gorere badana ta (mood disorder) e davaria. Tadikaka Jennings na Iakobo 4:14, ena hereva e gwauraia, e gwa: “Ai na asi dibamai ‘kerukeru’ be dahaka baine vara.” (Ba duahia.) Eto: “Dala a kara Ghana ai turamai namodia momo a rakatanidia bona Canada a lou lao, medikol heduru baia abia totona.” Iehova ese Tadikaka Jennings bona adavana e durudia una hekwakwanai lalonai dounu ia e hesiai henia.

17. Edena dala ai Tadikaka Jennings ena haheitalai ese tadikaka taihu e durudia?

¹⁷ Tadikaka Jennings ena sivarai lalonai e gwaurai herevadia ese momo na e durudia bada. Taihu ta na e gwaumu: “Tadikaka Jennings sivaraina na duahia neganai e hagoadagu. . . . Ia na ena gorere dainai ena asainment e rakatania bona una ese e durugu egu ai e vara ḡauna baina laloa maoromaoro.”  Tadikaka ta danu e gwaumu: “Kongrigeisen elda ḡaukara na karaia to laḡani 10 muridiai na hadokoa badina kwara gorerena ta na davaria. Na lalova ḡaukara namona ta basina karaia diba dainai, na lalometau bona asina urava mauri sivaraidia e herevalai atikol baina duahi. . . . To Tadikaka Jennings ena haheauka karana ese e hagoadagu bada.” Una ese e hadibadamu, asita lalomu hekwakwanaidia baita davarimu bona baita haheaukalaimu neganai, ma haida na be hagoadadiamu. Ena be edai e varamu ḡaudia ese eda mauri na be haidaumu, to eda abidadama bona haheauka karana ese ma haida na baine hagoadadia diba.​—1 Pet. 5:9.

18. Laulau heḡereḡerena, Nigeria ai vabu ta ena haheitalai amo dahaka o dibamu?

¹⁸ Disasta idauidau, heḡereḡere COVID-19 pandemic ese Iehova ena taunimanima momo edia mauri na e hadikaia. Heḡereḡere, Nigeria ai vabu ta ena aniani bona moni na dia bada. Daba ta ai, natuna kekenina ese e nanadaia edia raisi kapusi orena bae nadua murinai be ma dahaka bae ani. Una taihu na natuna e hamaoroa idia na asi edia moni bona aniani, to namona na Sarefata vabuna bae tohotohoa, edia aniani orena bae nadua bona Iehova enai bae tabekau momokani. (1 Han. 17:8-16) Una dina ai, edia dina tubua anianina danu do asie lalohadailaia neganai, tadikaka taihu haida ese aniani e henidia. Unu aniani na wiki rua mai kahana lalonai bae ani diba ḡaudia. Taihu na e gwa, ia na se laloa ia natuna e hamoroava herevana na Iehova ese e kamonaia. Momokani, bema Iehova enai baita tabekaumu, ena be asita lalomu hekwakwanaidia be varamu to eda hetura karana Iehova enai na be goadamu.​—1 Pet. 5:6, 7.

19. Aleksey Yershov ese e haheaukalaia daḡedaḡe karana be dahaka?

¹⁹ Vanega laḡani lalodiai, tadikaka taihu momo na daḡedaḡe karadia e haheaukalai.  Mani Russia ai e nohomu Tadikakana Aleksey Yershov aita laloa. Laḡani 1994 ai, Tadikaka Yershov e bapatiso neganai, unuseniai Iehova ena taunimanima na tomadiho ḡaukaradia dounu e karava. To, laḡani haida muridiai una na e idau. Laḡani 2020 ai, Tadikaka Yershov ena ruma na pulisi ese e sekea bona ena kohu momo e abi. Hua haida muridiai, gavamani na e gwa ia na kerere haida e kara. Unu e gwau toma badina idia na laḡani ta mai kahana lalonai Baibul e stadilaia koikoi tauna ta ese e karaia vidiona e itaia. Una na dika herea, ani?

20. Tadikaka Yershov ese ena hetura karana Iehova ida be ede e hagoadaia toma?

²⁰ Tadikaka Yershov enai e vara daḡedaḡe karana amo namo e vara, a? Oibe. Iena hetura karana Iehova ida na e goada. Ia na e gwaumu: “Nega momo adavagu ida a ḡuriḡuri hebouva. Na laloparara Iehova ena heduru dainai na haheauka.” Ma e gwaumu: “Sibogu egu stadi karana ese e durugu basina lalomanoka. Idaunegai abidadama taudia edia haheitalai na lalodia dobu. Baibul sivaraidia momo ese e hahedinaraimu, maino ai baina noho bona Iehova baina abidadama henia na mai anina bada.”

21. Ina atikol ai dahaka tame diba?

²¹ Ina atikol ai dahaka tame diba? Ina tanobada ai asita lalomu hekwakwanaidia na e varamu. To, Iehova ena hesiai taudia na ia enai e tabekaumu neganai, ia ese hanaihanai e durudiamu. Ina atikol ena siri badana heḡereḡerena, “kara maoromaoro tauna ena hisihisi na momo, a Iehova ese iboudiai lalodia amo e hamauriamu.” (Sal. 34:19) Eda hekwakwanai na basita lalodia momo, to namona na Iehova ena goada ai baita tabekau. Bena aposetolo Paulo heḡereḡerena, baita gwau dibamu: “Goada e henigumu Diravana dainai lau na ḡau iboudiai ikaradia ai na goadamu.”​—Fili. 4:13.