1. Iesu ena hoa karana ginigunana ai e vara ḡauna mani a herevalaia.

 LAḠANI 29 C.E. ai Iesu ena hesiai ḡaukara e hamatamaia neganai, e vara ḡauna mani a laloa. Iesu bona sinana Maria bona ena hahediba haida na headava ariana ta totona e invaitidia dainai Kana ela. Una hanua na Iesu ena hanua Nasaret ena not kahanai. Maria na una headava matamata edia bese turadia ta, bona vadivadi taudia inaridia karana ai e heduruva. To, headava ariana lalonai e vara hekwakwanaina ta ese una headava matamata bona edia bese na bema hahemaraidia​—edia wain na e ore. b Reana vadivadi taudia na momo herea. Maria na haraḡa herea natuna e hamaoroa, eto: “Idia na asi adia vine ranuna.” (Ioa. 2:1-3) Iesu be dahaka e kara? Ia ese hoa karana ta e karaia. Ranu na “vine ranuna namo-hereana” ai e halaoa.​—Ioa. 2:9, 10.

2-3. (a) Iesu be ededia hoa karadia e kara? (b) Iesu ena hoa karadia baita lalodiamu karana ese ede be duruda tomamu?

² Iesu na ena hesiai ḡaukara lalonai hoa karadia momo e kara. c Unu hoa karadia amo taunimanima tausen momo e durudia. Heḡereḡere, ena hoa karadia rua​—tatau 5,000 e ubudia  bena gabeai tatau 4,000​—lalodiai bema hahine bona natu baita duahidiamu, iboudiai na 27,000 mai kahana bamona. (Mat. 14:15-21; 15:32-38) Unu nega rua lalodiai, Iesu ese gorere taudia momo danu e hanamodia. (Mat. 14:14; 15:30, 31) Mani a laloa, hutuma na Iesu ese hoa dalana ai edia gorere e hanamodia bona e ubudia dainai e hoa dikadika!

³ Iesu ena hoa karadia amo ḡau momo baita dibamu. Ina atikol ai, unu hoa karadia ese eda abidadama e hagoadaiamu ḡaudia haida baita herevalaimu. Danu, Iesu ese hoa karadia e karava lalonai e hahedinaraia hebogahisina bona manau karana baita tohotohodia daladia baita herevalaimu.

4. Iesu ena hoa karadia amo dahaka ta dibamu?

⁴ Iesu ena hoa karadia amo dia ia mo, to Tamana danu ta dibaiamu. Badina ia na Iehova ena siahu amo unu hoa karadia e kara. Aposetolo Edia Kara 10:38 na e gwaumu: “Dirava ese Lauma Helaḡa bona siahu [Iesu] e horolaia; bena ia na eha loava, kara namodia e karava, Diabolo ese e hadikadiava taudia iboudiai e hamauridiava; badina be Dirava ese e bamoava.” Danu, ba laloatao, Iesu ese ena hereva, kara, bona e kara hoa karadia amo Tamana ena lalohadai bona hemami e hahedinarai ḡoevaḡoeva. (Ioa. 14:9) Iesu ena hoa karadia amo baita dibamu ḡaudia toi mani aita herevalaidia.

5. Dahaka dainai Iesu na hoa karadia e kara? (Mataio 20:30-34)

⁵ Ginigunana na, Iesu bona Tamana ese ita na e lalokau henida badamu. Iesu tanobada ai e nohova neganai, ia ese hisihisi taudia na hoa dalana ai e durudia, unu amo e hahedinaraia idia na e lalokau henidia bada. Nega ta, matakepulu taudia rarua na ia e boi henia baine durudia. (Mataio 20:30-34 ba duahidia.) Iesu ese e “bogadia hisi” dainai matadia e hanamo. Ina hereva “bogadia hisi” na Grik gado ai e hahanaia neganai, anina na ta ena hisihisi na laloda ai baita mamia momokani. Una hebogahisi na lalokau amo e varamu karana ta, danu una kara dainai Iesu ese hutuma e ubudia bona lepra tauna ta e hanamoa. (Mat. 15:32; Mar. 1:41) Ta dibamu Iehova na “hebogahisi” Diravana, bona Natuna ese ita na e lalokau henida badamu bona eda hisihisi daidiai e bogada hisimu. (Luka 1:78; 1 Pet. 5:7) Idia raruosi na e ura dikadikamu taunimanima edia hisihisi iboudiai bae haoredia!

6. Dirava ese Iesu na siahu e henia dahaka baine kara?

⁶ Iharuana na, Dirava ese Iesu na siahu e henia taunimanima edia hekwakwanai iboudiai baine hamaoromaorodia. Iesu na hoa karadia e kara neganai, e hahedinaraia ita ese basita haoredia diba hekwakwanaidia na ia ese baine haoredia diba. Heḡereḡere, ia na mai ena siahu iseda hekwakwanai e havaramu ḡaudia baine kokidia​—unu na kara dika bona kara dika dainai e varamu hisihisidia idauidau, gorere bona mase danu. (Mat. 9:1-6; Roma 5:12, 18, 19) Iena hoa karadia ese e hamomokanimu, ia ese gorere “idau-idau” baine hanamodia bona mase taudia danu baine hatoredia isi lou diba. (Mat. 4:23; Ioa. 11:43, 44) Danu, ia na mai ena siahu lai gubadia baine koudia bona lauma dikadia baine hadareredia. (Mar. 4:37-39; Luka 8:2) Iehova ese Natuna e henia siahuna ta dibamu dainai, una ese e hagoadada badamu!

7-8. (a) Iesu ena hoa karadia daidiai dahaka ta diba momokanimu? (b) Tanobada matamatana ai edena hoa karana o uramu ba itaia?

⁷ Ihatoina na, ta diba momokanimu vaira negai Dirava ena Basileia ese baine havara hahenamodia na be vara momokanimu. Iesu ese  tanobada ai e kara hoa karadia amo ta dibamu, ia na Dirava ena guba Basileia Pavapavana dainai tanobada heḡeḡemadai unu hoa karadia na ma be karamu. Mani Keriso ena lohia henunai baita moalelaimu hahenamodia haida aita lalodia. Tauanida na be ḡoevadaemu, badina ia ese gorere idauidau be haorediamu. (Isa. 33:24; 35:5, 6; Apok. 21:3, 4) Basita hitolomu bona disasta amo e varamu hisihisi idauidau na basita mamimu. (Isa. 25:6; Mar. 4:41) Eda lalokau taudia na “gara” amo be tore isimu neganai, mai moaleda ida baita welkam henidiamu. (Ioa. 5:28, 29) Tanobada matamatana ai edena hoa karana o uramu ba itaia?

⁸ Iesu na hoa karadia e kara neganai, manau bona hebogahisi bada e hahedinarai. Namona na unu kara namodia ruaosi baita tohotohodia. Mani haheitalai rua aita lalodia, ginigunana na Kana ai e vara headava ariana.

9. Headava ariana ai Iesu be dahaka e kara? (Ioane 2:6-10)

⁹ Ioane 2:6-10 ba duahidia. Headava ariana ai wain e ore neganai, una be Iesu ena maduna kara ta baine karaia totona, a? Lasi. Peroveta herevana ta na se gwa Mesia ese hoa dalana ai ranu na wain ai baine halaoa. To mani ina a laloa, oiemu hemami be ede bamona bema emu headava ariana ai inuinu ḡaudia bae ore. Iesu ese unu headava matamata na e bogadia hisi bona se ura bae hemarai. Una  dainai matamanai tame herevalaia hoa karana e karaia. Ia ese ranu​—390 liters (103 gallon) heḡereḡerena​—na wain namo-hereana ai e halaoa. Reana wain na bada herea badina unu amo oredia na gabeai bae ḡaukaralai eiava bae hoihoilai bena monidia na headava taudia raruosi bae durulaidia. Unu headava matamata na e moale bada!

10. Ioane karoa 2 ai mai anina bada ḡaudia haida be dahaka? (Laulau danu ba itaia.)

¹⁰ Ioane karoa 2 ai e herevalaia sivaraina lalonai mai anina bada ḡaudia haida aita lalodia. Iesu sibona ese ranu na nadi hodudia ai se seidia, ani? To hesiai taudia e hamaorodia hodu na ranu amo e hahonudia, unu amo taunimanima ese ia ladana basie abia isi. (Siri 6, 7) Bona ranu na wain ai e halaoa murinai, Iesu sibona ese una wain na aria biaguna dekena se laohaia. To hesiai taudia e hamaorodia bae laohaia. (Siri 8) Danu Iesu na wain kapusi se abia isi bena taunimanima vairadiai seto, ‘Ina wain a inua, ina na lau ese name karaia!’

11. Iesu ena hoa karana amo dahaka ta dibamu?

¹¹ Iesu ese hoa dalana ai ranu na wain ai e halaoa karana amo dahaka ta dibamu? Manau karana ta dibaiamu. Iesu na una hoa karana e karaia neganai se heaḡi. Momokani, ia na e haḡuḡuru ḡaudia iboudiai daidiai na se heaḡi. To, nega iboudiai mai manauna ida Tamana mo ladana e abia isimu bona e imodaiamu. (Ioa. 5:19, 30; 8:28) Bema Iesu ena manau karana baita tohotohoamu, baita karamu ḡaudia na basita heaḡilaimu. Iehova ena hesiai ḡaukara idauidau ta karamu neganai, namona na dia siboda baita heaḡi, to ta hesiai heniamu Diravana baita heaḡilaia. (Ier. 9:23, 24) Ia sibona baita imodaia na namo. Badina iena heduru amo hesiai ḡaukaradia ta haḡuḡurumu.​—1 Kor. 1:26-31.

12. Iesu ena manau karana baita tohotohoa dalana ma ta be dahaka? Haheitalai a gwauraia.

¹² Iesu ena manau karana baita tohotohoa dalana ma ta aita laloa. Ina haheitalai mani a laloa: Elda ta na ena nega bada e ḡaukaralaia, hesiai tauna eregabena ta e durua ena pablik tok ginigunana e heḡaeḡaelaia. Iena heduru dainai, una eregabe tadikakana ese tok namona e heni, bona kongrigeisin ese una na e moalelaia. Hebou murinai, ta ese una elda tauna e hamaoroa, eto: ‘Eregabe tadikakana na tok namona eme heni, ani?’ Una elda tauna be baine gwa: ‘Io, to lau ese egu nega bada na ḡaukaralaia ia na durua’? Eiava, mai manauna ida baine gwa: ‘Io, lau danu na moalemu tok namona eme heni’? Baita manaumu neganai, haida idurudia ta karamu ḡau namodia daidiai na basita heaḡi. Ta moalemu badina ta dibamu Iehova ese ta karamu ḡaudia na e itamu bona e lalo badamu. (Mataio 6:2-4 ba haheḡereḡerea; Heb. 13:16) Momokani, Iesu ta tohotohoamu bona manau karana ta hahedinaraiamu neganai, Iehova ta hamoaleamu.​—1 Pet. 5:6.

13. Nain hanuana badinai Iesu be dahaka e ita, bona dahaka e kara? (Luka 7:11-15)

¹³ Luka 7:11-15 ba duahidia. Iesu ena hesiai ḡaukara e hamatamaia bena laḡani ta mai kahana lalonai e vara ḡauna mani aita laloa. Iesu na Galilea hanuana ta, Nain ela, una na Suneme badinai; Suneme ai laḡani 900 gunadiai peroveta tauna Elisaia ese hahine ta natuna merona e hatorea isi lou. (2 Han. 4:32-37) Iesu na hanua ikoukouna e raka kahi laova ai, haida e itadia mase tauna ta e huaia lasi. Una na hebogahisi negana, badina vabu ta natuna tamona madi e mase. To una vabu na dia sibona, hanua taudia hutuma ese e bamoa.  Iesu ese mase patana e huaia taudia e koudia bona e taitaiva vabuna totona hoa karana ta e karaia​—ia ese una mase tauna e hatorea isi lou! Iesu ese e kara tore isi lou toiosi amo ina be ginigunana, bona unu sivarai na Evanelia bukadia ai e hetore.

14. Luka karoa 7 ai mai anina bada ḡaudia haida be dahaka? (Laulau danu ba itaia.)

¹⁴ Luka karoa 7 ai e herevalaia sivaraina lalonai mai anina bada ḡaudia haida aita lalodia. Iesu ese una mase tauna sinana “e itaia” e taiva bena “e bogaia hisi.” (Siri 13) Reana una sina e itaia mai taina ida mase patana vairanai e rakava neganai, e hebogahisi. Iesu ena hebogahisi na dia hemami ai mo, to kara amo e hahedinaraia danu. Ia ese una sina e hagoadaia, eto: “Asio tai.” Bena iduruna karana ta e karaia. Ia ese natuna e hatorea isi lou bona “sinana e henia.”​—Siri 14, 15.

15. Iesu ena hoa karana amo dahaka ta dibamu?

¹⁵ Iesu ese hoa dalana ai vabu natuna merona e hatorea isi lou karana amo dahaka ta dibamu? Ta dibaiamu ḡauna na, e lalohisihisimu taudia baita bogadia hisi. Momokani, ita ese mase taudia na basita hatoredia isi lou dibamu. To, Iesu heḡereḡerena, mase dainai e lalohisihisimu taudia ta itadiamu neganai hebogahisi karana baita hahedinaraia. Namona na eda hereva bona kara amo baita durudia bona baita hagoadadia. d (Her. 17:17; 2 Kor. 1:3, 4; 1 Pet. 3:8) Ena be hereva kwadoḡidia baita gwauraimu eiava ḡau maraḡidia baita karamu, to una ese be hagoadadia badamu.

16. Laulau ai heḡereḡerena, sina ta ena sivarai amo dahaka ta dibamu?

¹⁶ Mani ina sivarai ta aita laloa. Laḡani haida gunadia ai, kongrigeisin hebouna ta ai ane e abiva lalonai, taihu ta ese sina ta e itaia e taiva. Una ane na tore isi lou helarona e herevalaia, bona una sina natuna kekenina na e mase. Taihu na mai dibana dainai, haraḡa herea ela una sina e rosia bona ane e abi hebou. Gabeai una sina na e gwa: “Tadikaka bona taihu edia lalokau na, na mamia momokani.” Sina na hebou ela dainai e moale, ia na e  gwaumu: “Kingdom Hall na heduru baita abimu gabuna.” Mase dainai e ‘dara dokomu taudia’ ta bogadia hisimu bona idurudia kara maraḡidia ta karamu neganai, ta dibamu Iehova ese unu na e itamu bona e lalodia badamu.​—Sal. 34:18.

17. Ina atikol ai be dahaka tame diba?

¹⁷ Evanelia bukadia ai Iesu ena hoa karadia sivaraidia baita stadilaimu neganai una ese be hagoadada badamu. Unu sivarai ese e hadibadamu Iehova bona Iesu ese ita na e lalokau henida badamu, Iesu na mai ena siahu eda hekwakwanai iboudiai baine haoredia, bona Basileia ese be havaramu hahenamo idauidau baita abidadama henidia. Unu sivarai ta stadilaimu neganai, Iesu ena kara baita tohotoho daladia baita lalodia dobu. Namona na nega bavato sibomu emu stadi eiava Ruma Bese Tomadiho ai Iesu ena hoa karadia ma haida ba stadilai. Ba tahua unu hoa karadia amo oi be dahaka o dibamu, bona o dibamu ḡaudia na ma haida ediai ba herevalai. Unu bo kara tomamu neganai, ma haida ida bo hahegoada heheni dibamu!​—Roma 1:11, 12.

18. Atikol gabena ai dahaka baita herevalaimu?

¹⁸ Iesu ena hesiai ḡaukara dokona ai, ia ese tore isi lou ihatoina e karaia bona una tore isi lou na idau, badina ia ese turana namona na dina 4 muridiai e hatorea isi lou. Una hoa karana amo dahaka ta dibamu? Bona edena dala ai tore isi lou helarona ai eda abidadama baita hagoadaia? Atikol gabena ese unu henanadai be haerelaimu.