1. Mero ta ese ena abidadama tore isi lou helarona ai be ede e herevalaia toma?

 MERO ta ladana Matthew na mai ena gorere badana ta dainai, opereisin momo e abi. Ia laḡanina 7 neganai, ena ruma bese ida JW Broadcasting^® ta e itaia. Una broadcasting dokonai idia ese miusik vidio ta e itaia​—una vidio ai na tore isi lou taudia e hedavari henidia lou laulauna. b Una vidio murinai, Matthew na tamana sinana imadia e dogotao, bena e gwa: “Tamagu bona sinagu, ena be lau na ba masemu, to tore isi lou negana ai ba tore isi loumu. Lau ba narigu, una na be vara momokanimu.” Mani a laloa, ia tamana bona sinana na e moale, badina e diba natudia ese tore isi lou helarona na e abia dae momokani.

2-3. Dahaka dainai tore isi lou gwauhamatana baita laloa na namo?

² Dina ta ta ai, Baibul ai e gwauraia tore isi lou gwauhamatana baita laloa. (Ioa. 5:28, 29) Dahaka dainai? Badina ita na asi dibada edena negai gorere badana ta baita abiamu o eda lalokau tauna ta be masemu. (Koh. 9:11; Iak. 4:13, 14) Tore isi lou helarona ese baine duruda diba, unu hekwakwanai baita haheaukalai. (1 Tes. 4:13) Baibul ese e hadibadamu Tamada guba ai ese ita na e dibada ḡoevaḡoeva, bona e lalokau henida badamu. (Luka 12:7) Iehova na mai dibana namonamo ita, una dainai be hatoreda isi loumu neganai, eda kara bona memori iboudiai be heni loumu. Momokani, Iehova ese ita na e lalokau henidamu dainai dala e kehoa baita mauri hanaihanai, bona ena be baita masemu to be hatoreda isi loumu.

³ Ina atikol ai, ita ese tore isi lou gwauhamatana baita abia dae badidia baita herevalaimu. Bona eda abidadama be hagoadaiamu  Baibul sivaraina ta baita herevalaiamu. Una sivarai ese iseda siri badana, “Taihumu na baine tore isi lou,” e hahedinaraiamu. (Ioa. 11:23) Danu, tore isi lou helarona baita abia dae momokani dalana baita dibaiamu.

4. Gwauhamata ta baita abia dae totona, dahaka baita diba be namo? Haheitalai a gwauraia.

⁴ Gwauhamata ta baita abia dae totona, namona na baita diba una gwauhamata e karaiamu tauna na e ura dikadikamu bona mai ena siahu una gwauhamata baine haḡuḡurua. Ina haheitalai aita laloa: Emu ruma na lai badana ta ese e hadikaia. Turamu ta ese baine gwauhamata henimu, baineto, ‘Baina durumu, emu ruma na baina haginia lou.’ Ia na ena hereva e badinamu tauna bona mai dibamu ia na e ura dikadikamu oi baine durumu. Bema ia na kapenta ta bona mai ena tulu, bo dibamu oi na be durumumu. Una dainai iena gwauhamata na bo abia daemu. To, Dirava ena gwauhamata tore isi lou ai be ede o laloa tomamu? Ia be e ura dikadikamu bona mai ena siahu una gwauhamata baine haḡuḡurua, a?

5-6. Dahaka dainai ta dibamu Iehova na e ura dikadikamu mase taudia baine hatoredia isi lou?

⁵ Iehova be e ura dikadikamu mase taudia baine hatoredia isi lou, a? Oibe. Ia ese Baibul itorena taudia e hasiahudia vaira negana ai baine vara tore isi lou gwauhamatana e torea. (Isa. 26:19; Hos. 13:14; Apok. 20:11-13) Bona Iehova na hanaihanai ena gwauhamata na e haḡuḡurumu. (Ios. 23:14) Momokani, Iehova na e ura dikadikamu mase taudia baine hatoredia isi lou. Dahaka dainai unu ta gwau tomamu?

⁶ Iobu ena hereva mani aita laloa. Ia na mai dibana ena be baine mase, to Iehova na e uramu baine hatorea isi lou. (Iobu 14:14, 15) Iehova ena ura na se idau, ena hesiai taudia na mase amo baine hatoredia isi lou. Ia na e ura dikadikamu baine hatoredia isi lou neganai, basie gorere bona mauri namona bae moalelaia. To, Iehova asie dibaia bena e mase taudia iboudiai be ede bamona? Eda Dirava lalokauna na e uramu idia danu baine hatoredia isi lou. (Apos. 24:15) Ia na e uramu idia na ia turana ai baela bona tanobada ai bae mauri hanaihanai. (Ioa. 3:16) Ta diba momokanimu Iehova na e ura dikadikamu mase taudia baine hatoredia isi lou.

7-8. Dahaka dainai ta dibamu Iehova na mai ena siahu mase taudia baine hatoredia isi lou?

⁷ Iehova be mai ena siahu mase taudia baine hatoredia isi lou, a? Oibe! Ia na “Siahu Idounai Diravana.” (Apok. 1:8) Una dainai ia inaina iboudiai, mase danu, baine hadareredia diba. (1 Kor. 15:26) Una ta dibamu dainai, una ese ita na e hagoadadamu. Mani taihu Emma Arnold ena sivarai aita laloa. Tanobada Tuarina Iharuana lalonai, ia bona ena ruma bese na edia abidadama dainai hahetoho momo e davari. Emma ena lalokau taudia haida na Nazi dibura kamepadia ai e mase dainai, ia ese natuna kekenina e hagoadaia, eto: “Bema mase taudia na basie tore isi lou diba, anina na ita inaida mase ese Dirava ena goada na e hereaia, to ta dibamu una na dia momokani, ani?” Vaia, ḡau ta ese Iehova ena goada o siahu na se hereaiamu! Ia na mauri e havaraia Diravana dainai, mai ena siahu e mase taudia baine hamauridia lou.

⁸ Dirava ese mase taudia baine hatoredia isi lou diba badina ma ta na, iena helalotao karana na asi hetoana. Ia ese hisiu ta ta ladadia e hatomu. (Isa. 40:26) Danu, e mase taudia na e lalodia taomu. (Iobu 14:13; Luka 20:37, 38) Ia ese baine hatoredia isi lou taudia edia kara maraḡi-maraḡidia iboudiai na e  lalotaomu, idia toadia, edia mauri ai e vara ḡaudia, bona edia memori danu.

9. Dahaka dainai Iehova ese e gwauhamatalaia tore isi louna bavabia dae?

⁹ Momokani, Iehova ese e gwauhamatalaia tore isi louna na baita abia dae diba, badina ta dibamu ia na e ura dikadikamu bona mai ena siahu una gwauhamata baine haḡuḡurua. Tore isi lou gwauhamatana baita abia dae badina ma ta ina: Guna Iehova ese haida na e hatoredia isi lou. Baibul negadiai, Ia ese abidadama taudia haida bona Iesu na siahu e henidia mase taudia e hatoredia isi lou. Mani Iesu ese e karaia tore isi louna ta aita herevalaia, una na Ioane karoa 11 ai.

10. Iesu na Ioridane kahana ai e harorova neganai, Betania ai be dahaka e vara, bona ia be dahaka e kara? (Ioane 11:1-3)

¹⁰ Ioane 11:1-3 ba duahidia. Laḡani 32 C.E. dokona ai, Betania ai e vara ḡauna mani aita laloa. Una hanua ai Iesu na mai turana namodia​—Lasaro bona taihuna raruosi, Maria bona Mareta. (Luka 10:38-42) To Lasaro na e gorerea dainai, taihuna raruosi na e lalohekwarahi. Idia ese hereva e siai Iesu dekena; ia na Ioridane kahana ai. Betania amo Ioridane ilao henina na dina rua heḡereḡerena bae raka. (Ioa. 10:40) To, hereva e laohaia tauna na Iesu dekenai e kau negana ai, Lasaro na e mase. Ena be Iesu na dibana Lasaro na vada e mase, to ia na ma dina rua e noho gabeamo Betania ela. Una dainai Lasaro e mase bena dina 4 muridiai Iesu e kau. Iesu na e ura kara ta baine karaia, unu amo turana baine durudia bona Dirava baine heatolaia.​—Ioa. 11:4, 6, 11, 17.

11. Ina sivarai amo tura korikori ena kara be ede ta dibaia tomamu?

¹¹ Ina sivarai amo tura korikori ena kara ta dibaiamu. Mani a laloa, Maria bona Mareta na hereva e siai neganai, asie gwa Iesu na Betania bainela. To e gwa ia turana namona na e gorerea. (Ioa. 11:3) Lasaro e mase neganai, Iesu ese gabu daudauna amo bema hamauria diba. To, Iesu na Betania ela turana Maria bona Mareta dekedia. Oi turamu ta be e uramu oi baine durumu ena be so noia, a? Oi na mai dibamu dika negadia ai heduru na bo abi dibamu. (Her. 17:17) Iesu heḡereḡerena, namona na tura unu bamodia ai baitala. Mani una sivarai ai e vara ḡauna ma ta aita laloa.

12. Iesu be Mareta enai dahaka e gwauhamatalaia, bona dahaka dainai Mareta ese una baine abia dae diba? (Ioane 11:23-26)

¹² Ioane 11:23-26 ba duahidia. Mareta na e kamonai Iesu na Betania ai e kau neganai, haraḡa herea ela bona Iesu e hedavari henia, bona eto: “Lohiabada e, oi na iniseni ai boma noho, taihugu na basinema mase.” (Ioa. 11:21) Momokani, Iesu ese Lasaro na ena gorere amo bema hanamoa diba. To Iesu na e ura mai anina bada ḡauna ta baine karaia. Ia na e gwauhamata, eto: “Taihumu na baine tore isi lou.” Mareta ese una gwauhamata baine abia dae totona, Iesu na ma eto: “Tore-isi-lou be lau; mauri danu lau.” Oibe, ia na Dirava ese siahu e henia mase taudia baine hatoredia  isi lou. Matamanai, ia ese kekeni maraḡina ta na e mase bena se daudau e hatorea isi lou, bona eregabe tauna be e mase dinana ai e hatorea isi lou. (Luka 7:11-15; 8:49-55) To dina 4 lalonai e mase bona tauanina vada e bodaḡa tauna be baine hatorea isi lou diba, a?

13. Ioane 11:32-35 heḡereḡerena, Iesu ese Maria bona ma haida e itadia e taitaiva neganai, dahaka e kara? (Laulau danu ba itaia.)

¹³ Ioane 11:32-35 ba duahidia. Mani e vara ḡauna aita laloa. Lasaro taihuna ma ta, Maria, na Iesu ihedavari henina ela. Ia ese Mareta e gwauraia herevana e gwauraia lou, eto: “Lohiabada e, oi na iniseni ai boma noho, taihugu na basinema mase.” Ia bona ma haida na e lalohisihisi bada. Iesu ese edia taitai e itaia neganai, lalona na e hisihisi bada. Oibe, turana e bogadia hisi dainai, e tai. Ia ese lalokau tauna ta e masemu neganai ta abiamu hisihisina na e lalopararalaia. Una dainai, e ura dikadika edia taitai e havaraia ḡauna baine kokia.

14. Iesu e tai karana amo Iehova enai dahaka ta dibamu?

¹⁴ Maria e tai neganai, Iesu ena kara amo ta dibamu Iehova na hebogahisi Diravana. Dahaka dainai unu ta gwau tomamu? Stadi atikol 15 ai ta herevalaia heḡereḡerena, Iesu ese Tamana ena lalohadai bona hemami e hahedinarai ḡoevaḡoeva. (Ioa. 12:45) Iesu e tai badina na turana edia hisihisi e mamia bona e hebogahisi. Una heḡereḡerena, ta dibamu Iehova danu eda taitai e itaiamu neganai, e hebogahisimu. (Sal. 56:8) Una ese e durumumu dainai o uramu eda hebogahisi Diravana turana ai baola, a?

15. Ioane 11:41-44 heḡereḡerena, Lasaro e guria gabunai be dahaka e vara? (Laulau danu ba itaia.)

¹⁵ Ioane 11:41-44 ba duahidia. Iesu na Lasaro garana ela bona e gwa gara ikouna nadina na bae kokia. To Mareta na e gwa, Lasaro tauanina na vada e bodaḡa. Iesu e haere, eto: “Lau na hamaoromu, ani, ba heabidadama, bena Dirava hairaina do ba itaia.” (Ioa. 11:39, 40) Bena guba e itaia bona hutuma vairadiai e ḡuriḡuri. E ura baine vara ḡauna amo taunimanima ese Iehova bae heatolaia. Bena e lolo badabada, eto: “Lasaro e, a raka lasi!” Bona Lasaro na e raka lasi. Haida ese e  laloa basine vara diba ḡauna na Iesu ese e karaia.   

16. Ioane karoa 11 ai e herevalaia sivaraina ese tore isi lou helarona ai eda abidadama be ede e hagoadaia tomamu?

¹⁶ Ioane karoa 11 ai e herevalaia sivaraina ese tore isi lou helarona ai eda abidadama e hagoadaiamu. Edena dala ai? Mani Iesu ena gwauhamata Mareta enai aita laloa lou, eto: “Taihumu na baine tore isi lou.” (Ioa. 11:23) Iesu na Tamana heḡereḡerena, mai ena siahu bona e uramu una gwauhamata baine haḡuḡurua. E tai karana ese e hahedinaraia ia na e ura dikadika mase bona lalohisihisi baine haoredia. Lasaro gara amo e raka lasi neganai, Iesu ese e hahedinaraia ia na mai ena siahu mase taudia baine hatoredia isi lou. Danu, mani Iesu ese Mareta e hamaoroa herevana a laloa, eto: “Lau na hamaoromu, ani, ba heabidadama, bena Dirava hairaina do ba itaia.” (Ioa. 11:40) Badi maorodia daidiai ta abia daemu Dirava ese e gwauraia tore isi lou gwauhamata na baine haḡuḡurua. To, dahaka baita kara unu amo baita abia dae una helaro na be vara momokanimu?

17. Baibul ai tore isi lou sivaraidia ta duahimu neganai, dahaka baita laloatao na namo?

¹⁷ Gunaguna e vara tore isi lou sivaraidia ba duahi bona ba lalodia dobu. Baibul lalonai tanobada ai e vara tore isi lou sivaraidia 8 e herevalai. c Namona na unu sivarai ta ta ba stadilaidia namonamo. Unu o kara tomamu lalonai, ba laloatao idia na taunimanima korikoridia​—tatau, hahine, bona natu. Bona edia sivarai ese e hadibamumu ḡaudia ba tahu. Ba laloa edena dala ai unu sivarai ta ta ese e hahedinaraiamu Dirava na mai ena siahu bona e uramu mase taudia baine hamauridia lou. Bona Iesu ena tore isi lou ba laloa dobu​—una tore isi lou na mai anina bada. Ba helalotao, iena tore isi lou na taunimanima momo  herea ese e itaia bona una ese ita e durudamu vaira negai baine vara tore isi louna baita abidadama henia.​—1 Kor. 15:3-6, 20-22.

18. Tore isi lou helarona e herevalaimu anedia be ede ba ḡaukaralai toma ? (Futnout danu ba itaia.)

¹⁸ Tore isi lou helarona e herevalaimu anedia ba ḡaukaralai namonamo. d (Efe. 5:19) Unu ane ese e hahedinaraimu tore isi lou na be vara momokanimu bona eda abidadama e hagoadaiamu. Una dainai, namona na unu ane ba hakaladia, bavabidia loulou, bona emu ruma bese tomadiho lalonai anidia ba herevalai. Namona na unu ane herevadia ba lalotao. Bema kahirakahira emu mauri ba haboioa eiava emu lalokau tauna ta e masemu neganai, Iehova ena lauma helaḡa ese baine durumu unu ane herevadia ba lalotao unu amo bae hagoadamu diba.

19. Tore isi lou negana be ede baita laloa toma? (Maua ladana “ Ededia Henanadai Bo Henidiamu?” ba itaia.)

¹⁹ Tore isi lou negana ba lalohadailaia. Iehova ese haero-haero karana e henida dainai, tanobada matamatanai baita noho maurina baita lalohadailaia diba. Taihu ta na e gwaumu: “Nega momo sibogu na lalomu lau na tanobada matamatana ai, Paradaiso lalonai flaoa idauidau bonadia na hairumu.” Mani a laloa, oi ese Baibul negadia ai e nohova abidadama tataudia bona hahinedia bo hedavari henidiamu. Oi be o uramu daika ba hedavari henia? Ededia henanadai bo heniamu? Danu emu lalokau taudia be tore isi loumu neganai bo hedavari henidiamu, bo rosidiamu, bo tai heboumu, bona bo hamaorolaidiamu herevadia ba lalohadailai.

20. Laloda baita hadai dahaka baita kara?

²⁰ Iehova ta tenkiu heniamu badina ia ese tore isi lou e gwauhamatalaia. Ta diba momokanimu una gwauhamata na be varamu, badina Iehova na mai ena siahu bona e uramu una baine haḡuḡurua. Namona na laloda baita hadai una tore isi lou helarona ai eda abidadama baita hagoadaia. Unu baita kara tomamu neganai, Dirava turana namona ai baita laomu; ia na ita ta ta e gwauhamata henidamu, etomu: ‘Emu lalokau taudia na bae tore isi lou!’