DAVID ena tuari taudia haida na idau bese taudia, ladadia na ini: Seleke Amono tauna, Uria Hiti tauna, bona Itima Moab tauna. a (1 Sis. 11:​39, 41, 46) Haida be “Kerete taudia . . . Pelete taudia . . . bona Gata taudia.” (2 Sam. 15:18) Kerete bona Pelete taudia be Filistia taudia varavaradia. (Esek. 25:16) Gata taudia be reana Filistia taudia edia iduhu ta amo.—Ios. 13:​2, 3; 1 Sam. 6:​17, 18.

Dahaka dainai David ese idau bese taudia e abidia dae ena tuari oreana lalonai? Badina idia ese ia bona Iehova danu e badinaiava. Heḡereḡere, The New Interpreter’s Dictionary of the Bible ese Kerete bona Pelete taudia e herevalaidia neganai, e gwa: “David e lohiava neganai, unu bese rua na nega namodia bona nega dikadia ai ia e badinaiava.” Ede ta diba tomamu? “Israel taudia iboudiai” ese King David e rakatania bena Sieba e badinaia neganai, Kerete bona Pelete taudia ese David e durua Sieba ena gwau-edeede e koua. (2 Sam. 20:​1, 2, 7) Nega ma ta ai, King David natuna Adonia na e urava tamana ena king dagina baine dadia neganai, Kerete bona Pelete taudia ese David e durua Iehova ese e abia hidi tauna Solomon, na King ai e halaoa.—1 Han. 1:​24-27, 38, 39.

David e badinaiava idau bese tauna ma ta na Itai, tau Gata. Ia na Absalom mai ena orea ida ese David e gwau-edeede henia neganai, ena tatau 600 ida David e durua. Ena be matamanai David ese Itai na e hamaoroa, oi na idau bese taumu dainai ina na dia oi emu tuari. To ia na e haere eto: “Iehova e maurimu bona oi, egu lohia bona egu pavapava, o maurimu heḡereḡerena, egu lohia bona egu pavapava ba noho gabuna ai lau, emu hesiai tauna, danu baina noho henia, mase ai eiava mauri ai.”—2 Sam. 15:​6, 18-21.

Ena be Kerete, Pelete, bona Gata taudia na idau bese taudia, to e laloparara Iehova na Dirava momokanina bona David na Iehova ese e abia hidi tauna. David na e moale badina unu tatau na mai lalodia idoinai ia e badinaia!