1. Haida ese haroro ḡaukara ai taunimanima ihereva henidia karana be ede e laloa tomamu? (Laulau danu ba itaia.)

 ITA, Iehova ta hesiai heniamu tauda, ta haroromu badina na Tamada ta lalokau heniamu, bona ta uramu dekeda taudia baita durudia Ia bae dibaia. Pablisa momo ese haroro ḡaukara na e moalelaiamu. To haida ese una ḡaukara na asie moalelaiamu. Dahaka dainai? Reana e hemaraimu badina e laloamu idia na dia heḡereḡere ma haida bae hadibadia. Ma haida be asie uramu ma ta ena ruma ai bae dae kava. Haida be basie abidia dae garina e garimu. Ma haida be se uramu ma haida bae habadudia. Unu tadikaka taihu ese Iehova na e lalokau henia badamu, to ediai na e aukamu idau taudia bae haroro henidia. To, e dibamu haroro ḡaukara na mai anina bada dainai dounu e haroromu. Iehova na idia daidiai e moalemu!

2. Bema haroro ḡaukara na so moalelaiamu, dahaka dainai basio lalomanoka?

² Atai ai tame herevalai badi daidiai nega haida e aukamu emu haroro ḡaukara ba moalelaia, a? Bema oibe, basio lalomanoka. Una ese e hahedinaraiamu oi na o manaumu bona so uramu haida ida ba hepapahuahu. Momokani, ita na  asita uramu haida baita habadudia, ena be ta uramu ma haida baita durudia. Tamada ese oi o davarimu hekwakwanaidia na e itadiamu bona e uramu baine durumu. (Isa. 41:13) Ina atikol ai, ita ese point 5 baita herevalaimu, una ese ita be durudamu hemami unu bamodia baita hanaidia bona eda haroro ḡaukara baita moalelaia.

DIRAVA ENA HEREVA AMO GOADA BAVABI

3. Dahaka ese peroveta tauna Ieremia e durua ma haida baine haroro henidia?

³ Idaunega amo, Dirava ena hereva ese ena hesiai taudia na e hagoadadia edia ḡaukara e haḡuḡuru. Mani peroveta tauna Ieremia aita laloa. Iehova ese e hamaoroa baine haroro neganai, ia na e lalohekwarahi. Ieremia na e gwa: “Lau na asi dibagu ede baina hereva toma, badina be lau na tauhau mo.” (Ier. 1:6) To ia be dahaka ese e durua bena e lalogoada? Ia na Dirava ena hereva ese e hagoadaia. Una dainai eto: “Lalogu na e kara lahi e aramu na heto, turiagu ai e miamu; ihaheaukalaina ai na hesikumu.” (Ier. 20:​8, 9) Ena be Ieremia ese e hereva henidiava taudia na lalo auka taudia, to baine harorolaia herevana ese e hagoadaia dainai una ḡaukara na e karaia.

4. Dirava ena Hereva baita duahiamu bona baita laloa dobumu ena namo be dahaka? (Kolose 1:​9, 10)

⁴ Kristen taudia na Dirava ena Hereva amo goada e abimu. Aposetolo Paulo ese Kolose kongrigeisin taudia e tore henidia neganai, e gwa, idia ese hereva momokani ena diba maoromaorona bae abia na namo. Badina una ese baine durudia ‘Lohiabada imatauraina ai bae raka’ bona edia ‘kara namodia iboudiai anidia bae vara.’ (Kolose 1:​9, 10 ba duahidia.) Unu kara namodia ta na sivarai namona iharorolaina ḡaukarana. Una dainai bema Dirava ena Hereva baita duahiamu bona baita laloa dobumu, eda abidadama Iehova enai na be goadamu bona Basileia sivaraina iharorolaina ḡaukarana na baita laloa badamu.

5. Baibul baita lalopararalaia namonamo totona dahaka baita kara?

⁵ Baibul baita lalopararalaia namonamo totona, namona na taina ruana baita duahia, baita stadilaia, bona baita laloa dobu. Bema o duahiamu sirina ta na so lalopararalaiamu, Watch Tower Publications Index eiava Research Guide for Jehovah’s Witnesses amo una siri  anina ba tahua. Bema unu bo kara tomamu, oi na bo abia dae vaitanimu Dirava ena Hereva na momokani. (1 Tes. 5:21) Bena mai moalemu ida o diba ḡaudia na ma haida bo hadibalaidiamu.

HARORO ḠAUKARA TOTONA BA HEḠAEḠAE NAMONAMO

6. Dahaka dainai haroro ḡaukara totona baita heḡaeḡae namonamo?

⁶ Bema haroro ḡaukara totona bo heḡaeḡae namonamomu, oi na bo uramu ma haida ba hereva henidia. Iesu ese ena aposetolo taudia na e haheḡaeḡaedia guna bena gabeai e siaidia. (Luka 10:​1-11) Idia na lesu ese e hadibadia ḡaudia na e badina dainai, haroro ḡaukara na e moalelaia.—Luka 10:17.

7. Edena dala ai haroro ḡaukara totona baita heḡaeḡae? (Laulau danu ba itaia.)

⁷ Edena dala ai haroro ḡaukara totona baita heḡaeḡae? Namona na baita gwaurai herevadia na baita lalodia namonamo bena Baibul anina na baita herevalaia namonamo. Vaevae taunimanima ese e gwauraimu herevadia bona ihaerelaidia daladia baita lalo. Unu amo taunimanima baita hereva henidiamu neganai, mai moaleda ida baita herevamu.

8. Edena dala ai aposetolo Paulo ese Kristen taudia na hodu ida e haheḡereḡeredia?

⁸ Aposetolo Paulo ese Kristen taudia e herevalaidia neganai, e gwa: “Ina kohu namona na e kara hodu lalodiai a abiamu na heto.” (2 Kor. 4:7) Una kohu namona be dahaka? Basileia sivaraina iharorolaina ḡaukarana. (2 Kor. 4:1) Bona hodu be dahaka e laulaulaia? Dirava ena hesiai taudia, idia na sivarai namona e loalaiamu taudia. Paulo ena nega ai, hoihoi taudia ese aniani, wain, bona moni na hodu lalodiai e udava. Una heḡereḡerena, Iehova ese e henida kohu namona na sivarai namona. Iehova ena heduru dainai mai goadada ida sivarai namona ta harorolaiamu.

BA LALO GOADA TOTONA BA ḠURIḠURI

9. Dahaka baita kara unu amo basita gari? (Laulau danu ba itaia.)

⁹ Nega haida, ita na taunimanima ta gari henidiamu. To dahaka baita kara unu amo basita gari? Aposetolo taudia e taravatudia basie haroro neganai e gwauraia ḡuriḡurina mani a laloa. Idia na se gari to Iehova e  noia, e gwa: “Emu hesiai taumai goada bame henimai, emu hereva baia gwaurai mai goadamai ida.” Bena maoromaoro Iehova ese edia ḡuriḡuri na e haerelaia. (Apos. 4:​18, 29, 31) Ita danu ta garimu negadiai, Iehova baita noia baine duruda taunimanima baita lalokau henidia, unu amo baita haroro henidia.

10. Ededia dala ai Iehova ese e durudamu ia sivaraina baita harorolaia? (Isaia 43:​10-12)

¹⁰ Iehova ese ita na e abida hidi iena Witnes taudia ai baitala bona e gwauhamata lalo goada baine henida. (Isaia 43:​10-12 ba duahidia.) Mani e durudamu daladia foa aita lalodia. Ginigunana na, sivarai namona ta harorolaiamu neganai Iesu na ita ida. (Mat. 28:​18-20) Iharuana be, Iehova ese aneru e abidia hidi ita bae duruda. (Apok. 14:6) Ihatoina na, Iehova ese ena lauma helaḡa amo e durudamu ta diba ḡaudia baita lalodiatao. (Ioa. 14:​25, 26) Ihahanina be, Iehova ese tadikaka taihu e henida ita bae bamoda. Iehova bona tadikaka oreana edia heduru dainai ita na mai goadada ida doini ta haroromu.

DALA IDAUIDAU BA ḠAUKARALAI, BONA LALOHADAI MAORONA BAVABIA

11. Haroro ḡaukara ai, taunimanima momo be ede baita davaridia toma? (Laulau danu ba itaia.)

¹¹ Haroro ḡaukara ai, ta so davariamu neganai o lalomanokamu, a? Sibomu ba henanadai: ‘Ruma taudia be ede ela?’ (Apos. 16:13) ‘Idia be ḡaukara gabuna ai eiava stoa ela?’ O laloamu dala harorona ai momo bo davaridiamu, a? Tadikaka ta ladana Joshua na e gwa, “Lau na shopping gabudia ai bona taunimanima momo e loaloamu gabudia ai na haroromu.” Danu ia bona adavana Bridget na adorahi kahadia ai taunimanima momo na edia ruma ai e davaridiamu.—Efe. 5:​15, 16.

12. Taunimanima ese e abi daemu bona e lalo badamu ḡaudia be ede baita dibadia toma?

¹² Bema ta na se uramu baine kamonai, mani ba lalo, ia be dahaka e abi daemu bona dahaka e lalo badamu. Joshua bona Bridget ese taunimanima e hereva henidiamu neganai, pepapepa ai e hetore henanadaina e ḡaukaralaiamu. Heḡereḡere, Baibul be Ede O Laloa Tomamu? pepapepana e ḡaukaralaiamu  neganai, e gwaumu: “Haida na e laloamu Baibul na Dirava ena amo, a haida be lasi. Emu lalohadai be dahaka?” Nega momo una ese herevahereva dalana e kehoamu.

13. Dahaka dainai eda haroro ḡaukara na ta moalelaiamu ena be haida na asie kamonaimu? (Hereva Lada-isidia 27:11)

¹³ Eda haroro ḡaukara na ta moalelaiamu ena be haida na asie kamonaimu. Dahaka dainai? Badina ita ta haroromu neganai, ita na Iehova bona Iesu edia ura ta karaiamu, una na haroro ḡaukara. (Apos. 10:42) Bona Iehova ta hamoaleamu.—Hereva Lada-isidia 27:11 ba duahia.

14. Dahaka dainai pablisa ta ese kamonai tauna ta e davariamu neganai baita moale?

¹⁴ Pablisa ta ese teritori ai kamonai tauna ta e davariamu neganai ta moalemu. Gima Kohorona ta ai e hahedinaraia, haroro ḡaukara na e boio maraḡina ta itahuna karana heḡereḡerena. Taunimanima na gabu idauidau ai e boio merona e tahuamu, bona ta ese e davariamu neganai, iboudiai e moalemu. Una heḡereḡerena, kongrigeisin taudia iboudiai na e ḡaukara heboumu ta na hahediba ai e halaomu. Idia na teritori ibounai e karaiamu, bona kamonai tauna ta hebou e laomu neganai idia na e moalemu.

IEHOVA BONA DEKEMU TAUDIA O LALOKAU HENIDIAMU DAINAI BA HARORO

15. Edena dala ai Mataio 22:​37-39 baita badinaiamu ese haroro ḡaukara ikarana urana be habadaiamu? ( laulauna danu ba itaia.)

¹⁵ Haroro ḡaukara ikarana urana na be badamu bema ita na Iehova bona dekeda taudia baita lalokau henidiamu. (Mataio 22:​37-39 ba duahidia.) Mani a laloa, Iehova na ita e itadamu, ta haroromu neganai, ia na e moalemu, bona taunimanima ese Baibul e stadilaiamu neganai, e dibamu ḡaudia daidiai e moalemu. Ba laloa danu, kamonai tauna na ita ese ta harorolaiamu herevana amo mauri hanaihanai be abiamu.—Ioa. 6:40; 1 Tim. 4:16.

16. Edena dala ai haroro ḡaukara baita moalelaia ena be gorere dainai ruma ai mo ta nohomu? Haheitalai a gwaurai.

¹⁶ Oi be badi ta dainai ruma na basio rakatania diba, a? Bema oibe, ba kara diba ḡaudia ba lalo, unu amo emu lalokau Iehova bona dekemu taudia ediai na dounu bo hahedinaraiamu. COVID-19 pandemic dainai, Samuel  bona Dania na ruma ai mo e nohova. Una nega aukana lalonai, idia na hanaihanai telefon bona revareva amo e harorova, bona Zoom amo Baibul stadi e karava. Samuel na ena cancer gorerena dainai clinic ai treatment iabidia e laova neganai, e davaridiava taudia e haroro henidiava. Ia na e gwa: “Hekwakwanai negadia ai ta lalohekwarahimu, eda goada e oremu, bona eda haheauka na e tohoamu. To, dala baita tahu Iehova ihesiai henina ḡaukarana baita moalelaia.” Samuel ena hekwakwanai latanai, adavana Dania danu ma e moru, bona hua toi bedi ai e hekure. Gabeai, ia na ma hua siks wheelchair ai e helai. Dania na e gwa: “Lau na baina kara diba ḡaudia na karava. Heḡereḡere, egu nesi bona ruma e maiva taudia na haroro henidiava. Danu medikol kampanina ta ai e ḡaukarava hahinena ta ida telefon amo a herevaherevava.” Samuel bona Dania na edia gorere dainai ḡau momo asie karava, to bae kara diba ḡaudia mo e kara bona e moale.

17. Ina atikol ai tame herevalai heduru herevadia amo namo baita davari totona dahaka baita kara?

¹⁷ Baita hekwarahi ina atikol ai e gwaurai heduru herevadia baita badinadia. Unu heduru herevadia ta ta na aniani resepina ta lalonai ta atomu ḡaudia ida baita haheḡereḡeredia. Una resepi ai e gwaurai ḡaudia iboudiai bo udadiamu neganai, aniani mamina na be namomu. Una heḡereḡerena, ina atikol ai e gwaurai heduru herevadia bo badinadiamu neganai emu haroro ḡaukara na bo moalelaiamu.