1. Kristen ginigunadia edia nega ai, Iehova ena taunimanima be ede e ḡaukara tomava?

 IEHOVA ese ḡaukara ta na ena taunimanima e henidiamu neganai, ia na e uramu dala maorona ai una ḡaukara na bae karaia. (1 Kor. 14:33) Heḡereḡere, Dirava na e uramu sivarai namona na tanobada idoinai bae harorolaia. (Mat. 24:14) Iehova ese Iesu na maoro e henia una ḡaukara baine gunalaia. Bona Iesu ese una ḡaukara na Iehova ena ura dalana ai e karaia. Kristen ginigunadia edia negai, kongrigeisin e giniva gabudiai, elda taudia e abidia hidiva kongrigeisin bae naridia bona hahekau daladia bae badinadia. (Apos. 14:23) Una nega ai gavanin bodi na Ierusalem ai, bona e karava abi hididia na kongrigeisin e siai henidiava bae badinadia totona. (Apos. 15:2; 16:4) Kristen taudia na e abiva hahekau herevadia e badinadiava dainai, “edia abidadama e goada e laova, bona dina iboudiai . . . taudia na e hutuma e laova.”—Apos. 16:5.

2. Laḡani 1919 amo, Iehova be edena dala ai ena taunimanima e hakaudiava bona lauma dalana ai e ubudiava?

² Laḡani 1919 amo ema bona hari Iehova na dounu ena taunimanima e naridiamu. Badina una nega amo, Iesu ese horoa oreana amo tatau haida e abidia hidi haroro ḡaukara bae gunalaia bona ia murina ai bae raka taudia na lauma aniani baine henidia. a (Luka 12:42) Iehova ese edia ḡaukara na doini e hanamoamu.—Isa. 60:22; 65:​13, 14.

3-4. (a) Iehova ena orea ese e hakaudamu dainai dahaka namo e varamu? (b) Ina atikol ai dahaka baita herevalaimu?

 ³ Bema ita na asi ihakauda, Iesu ese e heni ḡaukarana na basita karaia namonamo diba. (Mat. 28:​19, 20) Heḡereḡere, bema tadikaka ese haroro ḡaukara ena teritori basinema henida; ita ta ta na siboda eda ura gabudiai tama haroro. Ita na da gabu tamona ai mo tama haroro loulou to gabu haida be da lasi. Iehova ena orea ese e hakaudamu ena hahenamo ma haida be dahaka?

⁴ Iesu na tanobada ai, ia murinai e rakava taudia e hakaudia namonamo heḡereḡerena, hari danu ia ese Dirava ena taunimanima na e hakaudia namonamomu. Ina atikol ai, Iesu unu e kara toma dalana, Iehova ena orea ese ia e tohotohoamu daladia, bona Iehova ena orea baita matauraia bona baita abidadama henia daladia baita herevalaimu.

IEHOVA ENA OREA ESE IESU ENA HAHEITALAI E TOHOTOHOAMU

5. Iehova ena orea ese Iesu ena haheitalai e tohotohoamu dalana ta be dahaka? (Ioane 8:28)

⁵ Iesu na Tamana ena amo baine herevalai ḡaudia bona baine kara ḡaudia e dibadia. Iehova ena orea ese Iesu e tohotohoamu dalana ta na, Baibul e ḡaukaralaiamu maoro bona kerere edia idau bona ibadinadia daladia e hadibalaidamu. (Ioane 8:28 ba duahia; 2 Tim. 3:​16, 17) Danu, hanaihanai e hahelalodataomu Baibul baita duahia bona baita badinaia. Unu baita kara toma ena namo be dahaka?

6. Baibul istadilaina amo ta abiamu hahenamona ta be dahaka?

⁶ Baibul ta stadilaiamu neganai eda pablikeisin idauidau ta ḡaukaralaidiamu, una ese e duruda badamu. Heḡereḡere, orea amo e lasimu pablikeisindia na Baibul ena hahediba herevadia ida baita haheḡereḡeredia diba. Bena baita itaiamu Iehova ena orea amo e lasimu hahekau herevadia na Baibul amo dainai, una ese ita na be hagoadadamu Iehova ena orea na dounu baita badinaia.—Roma 12:2.

7. Iesu be dahaka e harorolaia, bona edena dala ai Iehova ena orea ese Iesu e tohotohoamu?

⁷ Iesu na “Dirava ena basileia” o Gavamani e harorolaia. (Luka 4:​43, 44) Danu, Iesu na ena aposetolo taudia e haḡanidia una Gavamani bae harorolaia. (Luka 9:​1, 2; 10:​8, 9) Hari ina nega ai Iehova ena orea taudia na una Gavamani e harorolaiamu, ena be idia na gabu idauidau ai e nohomu eiava orea lalonai edia maduna na idauidau.

8. Ita e henida hahenamona be dahaka?

⁸ Ita ese Dirava ena Gavamani sivaraina namona ta harorolaiamu na hahenamo badana! Una hahenamo na dia taunimanima iboudiai e henidia. Heḡereḡere, Iesu tanobada ai e nohova neganai, ia ese lauma dikadia na maoro se henidia ia sivaraina bae harorolaia. (Luka 4:41) Hari ina nega ai, bema ta na e uramu Iehova ena Witnes taudia ida baine haroro, namona na ia na Iehova e hamoaleamu mauri dalana vada e badinaiamu. Haroro ḡaukara hahenamona na ta laloa badamu dainai ta davaridiamu taudia ediai Dirava ena Gavamani ta herevalaiamu. Iesu heḡereḡerena, ita na ta uramu ta davaridiamu taudia baita haroro henidia bona hereva momokani baita hadibadia.—Mat. 13:​3, 23; 1 Kor. 3:6.

9. Edena dala ai Dirava ena orea ese ia ladana e hahedibalaiamu?

⁹ Iesu ese Dirava ladana e hahedibalaia. Iesu na tamana e ḡuriḡuri henia neganai, e gwa: “Oi ladamu danu vada na hadibalaidia.” (Ioa. 17:26) Iesu ena haheitalai heḡereḡerena, Iehova ena orea na dala idauidau ai Dirava ladana e hahedibalaiamu. Dala ta be The New World Translation of the Holy Scriptures ai,  Dirava ladana na gabu korikoridiai e ato lou. Una Baibul ibounai eiava kahana haida na gado 270 mai kahana ai vada e hahanaia. Apendiks A4 bona A5 ai, Dirava ladana na gabu korikoridiai e ato badina bona dalana bo dibaiamu. Danu, Study Bible ena Apendiks C ai, hahemomokani ḡaudia ese e hahedinaraia Christian Greek Scriptures ai Dirava ladana na nega 237 baine hedinarai na namo.

10. Myanmar ai hahine ta ena hereva amo dahaka o dibamu?

¹⁰ Iesu heḡereḡerena, ita na ta uramu momo baita durudia Dirava ladana bae dibaia. Myanmar ai, laḡanina 67 hahinena ta na Dirava ladana e dibaia neganai, mai taina ida e gwa: “Ina na egu nega ginigunana Dirava ladana Iehova name kamonaia. . . . Oi ese mai anina bada ḡauna ta ome hadibagu.” Ina ekspiriens ese e hahedinaraiamu, taunimanima ese Dirava ladana e dibaiamu neganai, edia mauri na e haidaumu.

HANAIHANAI IEHOVA ENA OREA BAITA MATAURAIA BONA BAITA ABIDADAMA HENIA

11. Edena dala ai elda taudia ese Iehova ena orea e matauraiamu bona e abidadama heniamu? (Laulau danu ba itaia.)

¹¹ Edena dala ai elda taudia ese Iehova ena orea e matauraiamu bona e abidadama heniamu? Idia na Iehova ena orea amo e abimu hahekau herevadia na e duahimu bona e badinadia namonamomu. Heḡereḡere, hebou ihakaudia daladia, kongrigeisin ai ḡuriḡuri igwauraina daladia, bona Keriso ena mamoe ireḡudia daladia na e badinamu. Unu amo tadikaka taihu na Iehova ena hegima bona lalokau e mamiamu.

12. (a) Dahaka dainai elda taudia ida baita ḡaukara hebou na namo? (Heberu 13:​7, 17) (b) Dahaka dainai elda taudia edia kara namodia baita lalo bada na namo?

¹² Elda taudia ese hahekau herevadia e henimu neganai, mai eda ura ida baita badina na namo. Bema unu baita kara tomamu, elda taudia na mai moaledia ida edia ḡaukara be karamu. Baibul ese e hagoadadamu ihakauda taudia baita kamonai henidia bona baita matauraidia. (Heberu 13:​7, 17 ba duahidia.) To nega haida una na auka. Dahaka dainai? Badina idia na dia ḡoevadae. Bema ita na edia manoka ḡaudia mo baita lalomu, ita ese Iehova ena orea e inai heniamu taudia baita durudiamu. Dahaka dainai unu ta gwau tomamu? Badina ita inaida na e uramu ita ese Iehova ena orea na basita abidadama henia. Una dainai bema elda taudia edia manoka ḡaudia mo baita lalomu, Dirava ena orea na basita matauraiamu bona basita abidadama heniamu. Dahaka baita kara unu amo e inai henidamu taudia edia koikoi karadia baita diba, bona baita dadarai?

HAIDA ESE EMU ABIDADAMA BONA HEMATAURAI KARANA BASIE HADIKAIA

13. Edena dala ai Dirava e inai heniamu taudia ese iena orea ladana e hadikaiamu?

¹³ Dirava e inai heniamu taudia ese hereva koikoidia amo iena orea ladana e hadikaiamu. Heḡereḡere, Baibul ta stadilaia neganai ta diba Iehova na e uramu ita na tauani dalana ai, eda kara ai, bona lauma dalana ai baita ḡoeva. Danu, Iehova na e uramu kara dika badana ta e karaiamu bona se helalo-kerehaimu tauna na kongrigeisin amo bae atoa siri. (1 Kor. 5:​11-13; 6:​9, 10) Iehova ena orea ese una haheḡani na e badinaiamu dainai, inaidia na e gwaumu idia ese taunimanima na asie lalokau henidiamu, to e hahemaoro henidiamu bona e kara auka henidiamu.

14. Sivarai koikoidia badidia be daika?

¹⁴ Ba diba daika ese Iehova ena orea e hadikaiamu. Satana Diabolo ese Dirava ena orea e sivarailaia koikoimu, bona ia na “koikoi idoidiai tamadia.” (Ioa. 8:44; Gen. 3:​1-5) Una  dainai Satana ese haida e ḡaukaralaidiamu bena Iehova ena orea e sivarailaia koikoimu neganai ita na asita hoamu. Iesu bona Kristen ginigunadia ediai danu una na e vara.

15. Dubu igunalaina taudia ese Iesu bona ena hahediba be ede e kara henidia toma?

¹⁵ Kristen ginigunadia edia negai, Satana ese haida e ḡaukaralaidia Dirava Natuna ladana e hadikaia, ena be Iesu na ḡoevadae bona hoa karadia momo e kara. Heḡereḡere, dubu igunalaina taudia ese taunimanima e hamaorodiava Iesu na “lauma dikadia biagudia” ena siahu amo lauma dikadia e luludiava. (Mar. 3:22) Iesu e kota henia neganai, dubu igunalaina taudia ese ia na e gwauraia Dirava ladana e hadikaia tauna bona hutuma lalodia e ani Iesu bae hamasea. (Mat. 27:20) Gabeai, Iesu murinai e rakava taudia ese sivarai namona e harorolaia neganai, idia e inai henidiava taudia ese “idau bese taudia lalodia e ani,” unu Kristen taudia bae daḡedaḡe henidia. (Apos. 14:​2, 19) The Watchtower December 1, 1998 ai, Aposetolo Edia Kara 14:2 na ini e herevalaia toma: “Kristen taudia e harorova neganai, idia e inai henidiava taudia na asie kamonaiva bona ihadikadia herevadia danu e gwauraiva, unu amo haida ese unu Kristen taudia edia hereva na basie kamonai bona bae daḡedaḡe henidia.”

16. Sivarai koikoidia ta kamonaimu neganai, dahaka baita laloatao be namo?

¹⁶ Satana na doini “tanobada idoinai e koiamu.” (Apok. 12:9) Dirava ena orea eiava elda taudia e sivarailaidia koikoimu herevadia ta kamonaimu neganai, baita helalotao Dirava e inai heniamu taudia ese Iesu bona Kristen ginigunadia danu e sivarailaidia koikoi. Baibul ena hereva heḡereḡerena, hari, Iehova ena taunimanima danu e daḡedaḡe henidiamu bona e sivarailaidia koikoimu. (Mat. 5:​11, 12) Sivarai koikoidia e lasimu dalana baita  dibamu neganai, unu na basita abi daemu, bona kara ta baita karaiamu unu amo siboda baita hegima diba. To dahaka baita kara unu amo siboda baita hegima?

17. Edena dala ai sivarai koikoidia baita dadarai? (2 Timoteo 1:13) (Maua ladana “ Sivarai Koikoidia O Kamonaimu Neganai Dahaka Ba Kara?” ba itaia danu.)

¹⁷ Sivarai koikoidia ba dadarai. Bema sivarai koikoidia ta kamonaimu, namona na aposetolo Paulo ese e gwauraia hahekau herevana baita badinaia. Ia ese Timoteo e hamaoroa eto, ‘haida ba sisiba henidia . . . sivarai koikoidia basie kamonai’ bona basie abi dae. (1 Tim. 1:​3, 4; 4:7) Mani a laloa, beibi na floa ai e davari ḡau mirodia be abimu bena uduna ai be atomu, to taunimanima badana na unu basine kara tomamu, badina dibana una ese be hagorereamu. Una heḡereḡerena, ita ese sivarai koikoidia na ta dadaraimu, badina mai dibada unu sivarai badidia be daika. Ita na “hereva momokanidia” mo baita kamonai.—2 Timoteo 1:13 ba duahia.

18. Edena dala ai ta hahedinaraiamu ita ese Iehova ena orea ta badinaiamu?

¹⁸ Ita na Dirava ena orea ese Iesu e tohotohoamu daladia toi tame herevalai. Baibul bo stadilaiamu neganai, Dirava ena orea ese Iesu ena haheitalai e tohotohoamu daladia ma haida bo dibamu. Emu kongrigeisin ai ma haida ba durudia edia hemataurai bona abidadama Dirava ena orea ai bae hagoadaia. Danu, Iehova ba hesiai henia bona ena orea ba badinaia, unu amo ba hahedinaraia oi na Iehova ena orea o matauraiamu bona o abidadama heniamu. (Sal. 37:28) Oibe, namona na hanaihanai Iehova baita tenkiu henia, badina Ia e lalokau heniamu bona e badinaiamu taudia ida ta ḡaukara heboumu.