1. Iehova ena ura ita edai be dahaka?

 BEIBI ta e varamu neganai, tamana bona sinana na e moale badamu. Ena be e lalokau heniamu, to bema beibi na basine badamu, idia na be lalohekwarahimu. Una heḡereḡerena, ita ese Iesu ta badinaia matamamu neganai, ita na una beibi karukaruna na heto. Iehova na e moalemu, to namona na lauma dalana ai baita tubu. (1 Kor. 3:1) Oibe, Ia na e uramu ita na lo Kristen taudia ai baitala.—1 Kor. 14:20.

2. Ina atikol ai dahaka baita herevalaimu?

² Lo Kristen tauna ai baitala anina be dahaka? Dahaka baita kara unu amo lo Kristen taudia ai baitala? Lauma dalana ai “aniani korikori” ena namo be dahaka? Dahaka dainai basitato ita na vada heḡereḡere? Unu henanadai ta ta haeredia na ina atikol ai baita dibadiamu.

LO KRISTEN TAUDIA AI BAITALA ANINA BE DAHAKA?

3. Lo Kristen taudia ai baitala anina be dahaka?

³ Baibul ai Grik herevana e hahanaia, “tatau badadia” a anina ma ta na lo taudia. (1 Kor. 2:6) Ita na lauma dalana ai tatau badadia eiava lo Kristen taudia ai baita laomu, bema hanaihanai eda hetura karana Iehova ida na baita hagoadaiamu. (1 Tim. 4:15) Oibe ita iboudai, matamata taudia danu, na lo Kristen taudia ai baitala diba. To ede ta diba tomamu ta na lo Kristen tauna?

4. Ede ta diba tomamu ta na lo Kristen tauna?

⁴ Lo Kristen tauna na Dirava ena ura iboudiai e badinamu. Dia haida mo e badinamu haida be lasi. Momokani, ia na dia ḡoevadae bona kerere haida na be karamu. To dina ta ta ai ia  e karamu ḡaudia ese e hahedinaraiamu ia ese Dirava ena ura na e badinaiamu. Iena kara na vada e haidaudia bona hanaihanai e ḡaukara goadamu Dirava ena lalohadai baine badinaia. (Efe. 4:​22-24) Ia na Iehova ena taravatu bona hahekau herevadia heḡereḡeredia ai abi hidi namodia e karamu, bona e hekwarahimu baine badinadia.—1 Kor. 9:​26, 27.

5. Dia lo Kristen tauna enai be dahaka baine vara diba? (Efeso 4:​14, 15)

⁵ Dia lo Kristen tauna na taunimanima edia “kara gageva-gagevadia bona koikoidia” ese be hakaua kerere dibamu. Bona ia ese sivarai idauidau bona aposteit taudia edia lalohadai na be abi dae haraḡamu. b (Efeso 4:​14, 15 ba duahidia.) Danu be mama kavamu, lalohisihisi karadia be karamu, eiava hahetoho ai be morumu.—1 Kor. 3:3.

6. Dahaka dainai lo Kristen taudia ai baitala karana na natu ta e tubu daemu karana ida e haheḡereḡerea? (Laulau danu ba itaia.)

⁶ Matamanai tame herevalaia bamona, Baibul ese e hahedinaraiamu ta lo Kristen tauna ai bainela karana na natu ta e tubu daemu karana ida e haheḡereḡerea. Natu maraḡina na ḡau momo asi dibana dainai, taunimanima badana ta ese baine gimaia bona baine hakaua na namo. Ini aita haheitalaia toma, sina ta ese kekeni na maraḡina ai imana e dogoataomu bena dala e hanaiamu. E badamu neganai, sibona dala e hanaiamu, to sinana ese dounu e hahelaloataomu, namona na dala kahana kahana baine ita. Gabeai, taunimanima badana ai e laomu neganai, ia na vada mai dibana dika be ede baine hanaidia toma. Una heḡereḡerena, dia lo taudia na lo Kristen taudia ese bae durudia, unu amo edia hetura karana Iehova ida basine dika bona abi hidi namodia bae kara. To lo taudia na abi hidi ta do asie karaiamu neganai, Baibul ena hahekau herevadia e tahumu, unu amo Iehova ena lalohadai e dibaiamu bona e badinaiamu.

7. Lo Kristen taudia be haida amo danu heduru bae tahu diba, a?

⁷ Anina be lo Kristen tauna be ma haida amo heduru be tahumu, a? Oibe, haida edia heduru baine abi diba. Dia lo Kristen tauna na be uramu haida ese ia bae hadibadibaia eiava ena abi hidi bae kara. A lo Kristen tauna be  haida amo heduru be tahumu, to sibona ese ena abi hidi be karamu bona ‘ena maduna be huaiamu,’ badina dibana Iehova na e uramu ia na unu baine kara toma.—Gal. 6:5.

8. Edena dala ai lo Kristen taudia ta ta na idauidau?

⁸ Taunimanima toadia na idauidau, una heḡereḡerena lo Kristen taudia ta ta edia kara danu idauidau. Heḡereḡere haida edia ekspiriens be bada, haida be lalo goada taudia, ma haida be harihari bada bona hebogahisi taudia. Danu, lo Kristen taudia rarua na hekwakwanai tamona be davariamu, to una neganai ta ena abi hidi na ma ta ena amo be idaumu. Idia ese Baibul ena hahekau herevadia be badinamu, ta ta lalona mamina heḡereḡerena. Una e lalopararalaiamu dainai ta ese ta na basine hahemaoro heniamu. Badina lalo tamona karana na e laloa badamu.—Roma 14:10; 1 Kor. 1:10.

DAHAKA BAITA KARA UNU AMO LO KRISTEN AI BAITALA?

9. Ta na lo Kristen ai bainela totona dahaka dainai baine hekwarahi?

⁹ Nega e laomu lalonai natu ta na be bada be laomu. To ta na lo Kristen tauna ai bainela totona ia na baine hekwarahi badina una na basine vara kava ḡauna. Haheitalai na, Korinto tadikaka taihu na sivarai namona e abia dae, e bapatiso, lauma helaḡa amo e horodia, bona Paulo ese e hadibadia ḡaudia amo namo e davari. (Apos. 18:​8-11) To, idia momo na laḡani haida muridiai lauma dalanai do asie tubu. (1 Kor. 3:2) Ita edai unu basine vara toma totona, dahaka baita kara?

10. Dahaka baita kara lo Kristen taudia ai baitala totona? (Iuda 20)

¹⁰ Baita karaia ḡauna ginigunana na, namona na baita ura ita na lo taudia ai baitala. ‘Aonega e inai heniamu taudia’ eiava lauma dalanai asie uramu bae goada taudia na lo Kristen taudia ai basie lao dibamu. (Her. 1:22) Ita na asita uramu haida baita tohotohodia, ena be idia na vada taunimanima badadia to dounu e uramu tamadia sinadia ese edia abi hidi bae kara. Namona na dounu baita ḡaukara goada eda hetura karana Iehova ida baita hagoadaia. (Iuda 20 ba duahia.) Bema oi na o hekwarahimu lo Kristen tauna ai baola, namona na Iehova ba noia una (1) “ura” (2) bona ‘goada baine henimu.’—Fili. 2:​13, NWT.

11. Lo taudia ai baitala totona Iehova ese e henimu hedurudia haida be dahaka? (Efeso 4:​11-13)

¹¹ Iehova na dibana ita lo taudia ai baitala totona iena heduru baita abia na ḡau badana. Una dainai Kristen kongrigeisin ai “hereḡu” bona “hahediba taudia” e ḡaukaralaidiamu ita bae duruda eda hetura karana Iehova ida baine goada. Unu amo Baibul ena hereva heḡereḡerena, ita na ‘tauda bae lo, Keriso tauna e lo heḡereḡerena.’ (Efeso 4:​11-13 ba duahidia.) Danu, Iehova ese ena lauma helaḡa amo e durudamu “Keriso darana” baita abia. (1 Kor. 2:​14-16) Bona, ia ese Evanelia bukadia foa e henida unu amo ita ese Iesu ena lalohadai, hereva bona kara baita dibadia. Bema oi na Iesu ena lalohadai bona kara bo tohotohomu, oi na lo Kristen tauna ai bo laomu.

LAUMA DALANA AI “ANIANI KORIKORI” ENA NAMO BE DAHAKA?

12. Ina hereva “Keriso ena hereva badidia” anina be dahaka?

¹² Lo taudia ai baitala totona “Keriso ena hereva badidia” mo baita dibadia na dia heḡereḡere. “Keriso ena hereva badidia” na Kristen hahediba hereva badadia. Haida na ini: Helalo-kerehai, abidadama, bapatiso, bona toreisi lou. (Heb. 6:​1, 2) Unu na Kristen taudia iboudiai ese e abi daemu hahediba  hereva badadia haida. Una dainai Pentekoste dinana ai, aposetolo Petro ese hutuma e haroro henidia neganai, unu hahediba herevadia na idia e hadibalaidia. (Apos. 2:​32-35, 38) Keriso ena hahediba ai baitala totona, unu hahediba hereva badadia baita abi dae na namo. Paulo na e gwa, bema ta na toreisi lou herevana basine abia dae, ia na Keriso ena hahediba ai basinela diba. (1 Kor. 15:​12-14) To, unu mo baita diba be heḡereḡere, a?

13. Heberu 5:14 ese e herevalaia “aniani korikori” amo namo baita davari totona, dahaka baita kara? (Laulau danu ba itaia.)

¹³ Baibul ese e herevalaia “aniani korikori” na idau bona “Keriso ena hereva badidia” amo, badina “aniani korikori” be Iehova ena taravatu bona hahekau herevadia. Unu ese e durudamu Iehova ena lalohadai ta dibamu. Una dainai “aniani korikori” amo namo baita davari totona, Baibul baita stadilaia, baita laloa dobu, bona baita badinaia. Unu amo baita karamu abi hididia na Iehova ese be moalelaimu. c—Heberu 5:14 ba duahia.

14. Edena dala ai Paulo ese Korinto Kristen taudia e durudia lo taudia ai baela?

¹⁴ Lauma dalana ai asie goadamu Kristen taudia na nega momo e daradaramu abi hidi ta bae karaia. Reana Baibul ena hahekau herevadia bona taravatu e tahumu to asie davarimu dainai, e laloamu bae karaia abi hidina na bae badinaia diba. Ḡau haida ai reana taravatu na lasi, to haida na dounu e uramu taravatu ta bae badinaia. Heḡereḡere, Korinto ai Kristen taudia haida na Paulo e nanadaia, bema kaivakuku edia pata ai e bouboulaia vamuna na idia ese bae ania eiava lasi. Paulo ese idia na se hamaorodia dahaka bae kara, to lalomamina ena ḡaukara e herevalaia. Bona e hadibadia, idia na mai edia maoro abi hidi bae kara. Danu, ia ese Baibul ena hahekau herevadia haida e herevalai, unu amo idia ta ta na lalodia mamidia ese basie hahemaoro henidia bona haida basie hahekwakwanaidia. (1 Kor. 8:​4, 7-9) Una nega ai, Paulo na Korinto Kristen taudia e hadibadiava namona na Dirava ena hereva bae ḡaukaralaia, bena abi hidi bae kara. Dia namo haida edia lalohadai ai bae tabekau eiava taravatu maraḡimaraḡidia bae  tahu. Ia na una dala amo idia e durudia Kristen taudia goadadia ai baela.

15. Edena dala ai Paulo ese Heberu Kristen taudia e durudia lauma dalana ai bae goada?

¹⁵ Paulo ese Heberu Kristen taudia e tore henidia revarevana amo mai anina bada ḡauna ta ta dibaiamu. Una nega ai haida na lauma dalanai dounu karukaru. Baibul na e gwaumu idia na ‘rata inu memerodia na heheto; aniani korikori ianidia na asi goadadia.’ (Heb. 5:12) Iehova ese kongrigeisin amo e halasiva diba matamata na asie urava bae abi dae. (Her. 4:18) Heḡereḡere, Iuda taudia momo na dounu Mose ena Taravatu e badinaiava, ena be laḡani 30 gunadiai Keriso ena boubou ḡauna ese unu taravatu na vada e haoredia. (Roma 10:4; Tito 1:10) Unu laḡani 30 lalodiai Iuda taudia na bema laloparara, idia ese edia lalohadai bae haidaua na namo! Paulo na e urava una revareva amo Heberu taudia baine durudia, hereva momokani dobudia bae lalopararalai bona bae abi dae. Oibe, una revareva amo e laloparara, Iehova itomadiho henina dalana matamatana ese Mose ena Taravatu na e hereaia. Danu, e hagoadadia haroro ḡaukara na bae goadalaia ena be Iuda taudia ese bae daḡedaḡe henidia.—Heb. 10:​19-23.

DAHAKA DAINAI BASITATO ITA NA VADA HEḠEREḠERE?

16. Lo tauna be dounu dahaka baine kara?

¹⁶ Namona na baita ḡaukara goada lo taudia ai baitala. Anina na dounu baita hekwarahi eda hetura karana Iehova ida na baita hagoadaia. Unu baita kara toma totona basita laloa ita na vada heḡereḡere. (1 Kor. 10:12) To namona na nega iboudiai “siboda baita hetahu” ita be lauma dalanai ta goadamu eiava lasi.—2 Kor. 13:5.

17. Dahaka dainai Paulo ese Kolose taudia e tore henidia neganai e hamaorodia bae henahua toho na namo?

¹⁷ Paulo ese Kolose taudia e tore henidia revarevana amo e hahedinaraia dahaka dainai idia na dounu bae hekwarahi edia hetura karana Iehova ida na bae hagoadaia. Ena be idia na vada lo taudia, to Paulo ese e hamaorodia namona na bae henahua toho, unu amo tanobada taudia edia lalohadai ese basie koidia. (Kol. 2:​6-10) Bona Epafra na Kolose taudia daidiai e ḡuriḡuri loulouva. Ia na unu kongrigeisin  taudia na mai dibana namonamo. Bona e urava idia na bae “gini tutuka-tutuka” bona bae “namo ḡuḡuru.” (Kol. 4:12) Una sivarai amo dahaka ta dibamu? Paulo bona Epafra na e laloparara, bema ta na e uramu lo tauna ai bainela, namona na baine hekwarahi bona Dirava ena heduru baine abia na ḡau badana. Oibe, idia na e urava Kolose taudia na unu bae kara toma, ena be hekwakwanai bae davari.

18. Lo Kristen tauna enai be dahaka baine vara diba? (Laulau danu ba itaia.)

¹⁸ Paulo ese Heberu Kristen taudia e hamaorodia bema ta na basine henari namonamo, Dirava ena lalonamo na baine haboioa diba. Bema ia na Iehova basine kamonai heniamu, Iena amo be daudaumu bona ena dika na basine gwaudia taomu. Ta moalemu badina Heberu taudia ediai una na se vara. (Heb. 6:​4-9) To hari ina nega ai manoka taudia bona disfelosip taudia bema bae helalo-kerehai be ede bamona? Dirava ese idia na be lalonamo henidia loumu bona edia dika na be gwautaomu. To idia ese Iehova e lou heniamu neganai, heduru bae abi na namo. (Esek. 34:​15, 16) Una dainai elda taudia na lo tadikaka taihu e noidiamu idia bae durudia edia hetura karana Iehova ida bae hagoadaia lou.

19. Laloda baita hadai dahaka baita kara?

¹⁹ Namona na laloda baita hadai lo Kristen taudia ai baitala. Una baita haḡuḡurua totona namona na hanaihanai Baibul ena hereva momokani dobudia baita stadilai bona baita ḡaukara goada Iehova ena lalohadai baita badinadia. Bena lo taudia ai ta laomu neganai, dounu baita goada na ḡau badana.