NOVEMBER 1932, Mexico City ai, pura ta gunanai, trafik light matamatadia e kehodia. Una siti ai taunimanima 1 milion mai kahana e nohova. To hari taunimanima na ma sivarai matamatana ta be kamonaimu. Siti ena nius ripota taudia na una pura ai baine vara ḡauna ta dainai e heḡaeḡaemu. Edia kamera e abi heḡaeḡae, bona trein abi gabunai, Watch Tower Society ena presiden, Joseph F. Rutherford, bainema dainai e nariava. Unuseni ai e nohomu Witnes taudia danu e nariva, Tadikaka Rutherford bae welkam henia totona, ia na dina toi hebouhebouna dainai ela.

The Golden Age na e gwa: “Histori lalonai ina hebouhebou na mai anina bada, badina republic of Mexico ai taunimanima ese Hereva Momokani e kamonai.” To dahaka dainai una hebouhebou na mai anina bada, ena be taunimanima 150 mo ela?

Una hebouhebou do asie karaia neganai, Mexico ai momo ese Basileia sivaraina na do asie kamonai. Laḡani 1919 amo, hebouhebou maraḡidia haida na e kara, to laḡani haida muridiai kongrigeisen edia namba na e maraḡi. Laḡani 1929 ai, Mexico City ena brens ofesi e kehoa neganai, toana na ḡau iboudiai na bae heau namonamomu. To hekwakwanai haida e vara. Tadikaka ese e hadibadia bisnes karadia na haroro ḡaukara ai basie kara neganai, kolpota (una negai e gwauraidiava painia taudia) ta na e badu dainai hereva momokani e rakatania bona sibona ena Baibul stadi oreana e hamatamaia. Gabeai, brens ovasia ta na Baibul ese e taravatua karana ta e karaia dainai ma ta ese gabuna e abia. Mexico ai Dirava e badinaiava Witnes taudia ese heduru bae abi na namo.

Tadikaka Rutherford ena vadivadi lalonai, ia ese dounu Dirava e badinaia taudia na e hagoadaia bada, hebouhebou ai tok namodia rua e heni bona reidio steisen amo hahegoada hereva namodia 5 e halasi. Mexico ai, una na nega ginigunana sivarai namona na reidio steisen amo e halasia. Hebouhebou murinai, brens ovasia matamatana ese ḡaukara e heḡaeḡaelaia, bona e haroro goadagoadava Witnes taudia na goada e abi, bona Iehova ese e hanamodia.

Murina laḡanina ai, hebouhebou rua e kara, ta be siti maraḡina Veracruz ai bona ma ta be Mexico City ai. Tadikaka edia haroro goadagoada dainai anina namona e vara. Laḡani 1931 ai pablisa iboudiai na 82. To laḡani 10 murinai, pablisa edia namba na nega 10 amo e dae! Laḡani 1941 ai, taunimanima 1,000 heḡereḡerena na Mexico City ela Tiokratik Hebouhebouna totona.

Laḡani 1943 ai, Witnes taudia ese sain bod amo Mexico ena siti iboudiai 12 ai Tiokratik Hebouhebouna ladana “Free Nation’s” ena hahediba herevana e hahedinaraiava. * Kadi bod rua na paḡadia  ai e taudaeva, ta kemedia kahanai bona ma ta na dorudia kahanai. Laḡani 1936 amo Witnes taudia na una dala e ḡaukaralaiava.

Magasin ladana La Nación ese Mexico City ai sain bod e loalai karana ena namo e herevalaia neganai, e gwa: “[Hebouhebou] dinana ginigunana ai, [Witnes taudia] na e noidia taunimanima momo bae boiridia. Dina iharuana ai, hutuma ela dainai hebou gabuna na se bada.” Unu sain bod e laolaia karana na Katolik taudia ese asie moalelaia dainai, Witnes taudia ikoudia dalana e karaia. Ena be e daḡedaḡe henidiava, to tadikaka taihu na asie gari bona dounu sain bod e loalaiva. La Nación magasin na ma e gwa: “Taunimanima momo ese e itaia . . . tatau bona hahine momo ese sain bod na dabu bamona e hahedokilai.” Una magasin ai tadikaka na Mexico City dalanai gigini bona sain bod e hahedokilai laulauna e hahedinaraia. Una laulau henunai ina hereva e torea: “Dala ibounai e ginia ahu.”

Unu laḡani lalodiai, Witnes taudia na sibodia edia ura ḡaudia haida e dadarai, unu amo Mexico ai bae heabi hebouheboudia haida bae lao heni totona. Momo na uda hanuadia amo ela, bona unu hanua ai trein bona dala na lasi. Kongrigeisen ta na e gwa, “Ina hanua ai trein ta na se vareaimu.” Una dainai, tadikaka na doniki amo eiava aedia amo dina haida e rakava trein bae abi, hebouhebou e heabiva hanuana baela totona.

Witnes taudia momo na ogoḡami dainai, hebouhebou baela mo davadia e karava. To unuseni ai e kauva neganai, idia momo na Witnes taudia ese edia rumai e abidia daeva. Haida be Kingdom Hall ai e mahutava. Nega ma ta ai, hebouhebou ela taudia 90 heḡereḡerena na brens ai e noho, unuseniai “buka boksidia 20 e ato hebou bona edia bedi ai e halao.” Yearbook ai na e gwa, tadikaka na e moale badina unu “bedi na mamanoka bona siahu-siahu, dia sementi floadia heḡereḡeredia.”

Sibodia edia ura e dadarai Witnes taudia ese hebouhebou na e moalelaia. Tadikaka edia ḡaukara goadagoada karana dainai, hari Mexico ai pablisa edia namba na e dae, kahirakahira 1 milion. * Laḡani 1949 ai Mexico brens ena ripoti ese tadikaka na ini e herevalaidia toma: “Nega aukadia ai edia abidadama na asie rakatania, badina edia herevahereva lalodiai unu hebouhebou ta ta e herevalaiva, bona seket tauna ta na e henanadai loulouva, Edena negai hebouhebou ma ta baita abiamu?” Una hereva una negai na momokani bona hari iseda negai danu.​—⁠Eda orea ena histori Central America amo.