Aposetolo Paulo na Dirava ena heduru amo lauma helaḡa ese e havaramu karadia 9 e toredia. (Gal. 5:22, 23) Ia ese unu kara namodia na e gwauraidia “lauma huahuana.” * Una huahua ese “tau matamatana” ena kara e hahedinaraiamu. (Kol. 3:10) Au ta na ta ese be reḡua namonamomu neganai huahua be havaramu, una heḡereḡerena, ta na ena mauri ai lauma helaḡa baine ḡaukara neganai, lauma huahuadia baine hahedinarai diba.​—Sal. 1:1-3.

Paulo ese e herevalaia lauma huahuana ginigunana na lalokau. Edena dalai lalokau na kara hereadaena? Paulo na eto, bema lalokau basine hahedinaraia, ia na “ḡau asi anina na heto.” (1 Kor. 13:2) To, lalokau anina be dahaka bona edena dalai dina ta ta ai baita hahedinaraia?

Ena be lalokau anina korikori na basita gwauraia dibamu, to Baibul ese lalokau ihahedinaraina dalana na e herevalaia. Heḡereḡere, Baibul na e gwaumu, “lalokau na e haheauka taritarimu; lalokau na mai ena heabi-dae.” Danu “hereva momokani e moalelaimu; ḡaukara iboudiai e goadalaimu; ḡau iboudiai e abi daemu; iboudiai e laromu; dika iboudiai e haheauka henimu.” Bona mai ena lalokau tauna na ma haida edia namo e lalo badamu, e kara namo henidiamu bona e durudiamu. To, asi ena lalokau tauna na, be mamamu, be hekokorokumu, be kara havaramu, be mataḡaniḡanimu, be badumu bona dika basine gwautaomu. Kara unu bamodia na basita hahedinarai, to lalokau baita hahedinaraia badina lalokau na “sibona ena ḡau se tahumu.”​—1 Kor. 13:4-8.

“Dirava na lalokau.” Momokani, Iehova na lalokau badina. (1 Ioa. 4:8) Ia ese e havara ḡaudia bona iena kara ese ena lalokau e hahedinaraiamu. Taunimanima ediai iena lalokau hereadaena e hahedinaraia dalana na, Iesu e siaia ita daidai baine hisihisi bona baine mase. Aposetolo Ioane na eto: “Dirava ena lalokau na ini e hahedinarai henida toma: Dirava ese ia Natuna vara-edeana tanobada ai e siaia, ia bagunai baita mauri helaoreana. Lalokau anina binai: dia ita ese Dirava ta ura henia, to ia ese ita e ura henida, bona ia Natuna e siaia, iseda dika kwarana ai ela.” (1 Ioa. 4:9, 10) Dirava ena lalokau dainai, eda dika e gwautaomu, helaro e henida bona baita mauri diba.

Iesu na mai ena ura ida Dirava ena ura e karaia, unu amo taunimanima ediai ena lalokau e hahedinaraia. Paulo na e gwa: “[Iesu] eto, Lau o ina, emu ura ikarana nama. . . . Una ura ese vada e hahelaḡada, Iesu Keriso tau-anina nega tamona mo boubou ḡauna ai vada e halaoa dainai.” (Heb. 10:9, 10) Taunimanima ta ese lalokau hereadaena basine hahedinaraia diba. Iesu na e gwa: “Lalokau herea-daena binai, ta ese ena mauri baine atoa diho, turana daidiai.” (Ioa. 15:13) Dia ḡoevadae tauda ese Iehova bona Iesu edia lalokau karana baita tohotohoa diba, eiava? Oibe! Mani una baita karaia dalana aita herevalaia.

Paulo ese ita e hagoadada: “Umui, Dirava natuna, ena lalokau, Dirava ba haḡoia. Lalokau ai ba raka, Keriso ese e lalokau henida heḡereḡerena; ia sibona e heni, ita daidai.” (Efe. 5:1, 2) Eda mauri ai lalokau baita hahedinaraiamu neganai, ita na ‘lalokau ai ta rakamu.’ Lalokau na eda kara bona hereva amo baita hahedinaraia. Ioane na eto: “Natugu e, eda lalokau na dia hereva amo, dia mala amo, a kara ai bona momokani ai baita hahedinaraia.” (1 Ioa. 3:18) Heḡereḡere, Dirava bona dekeda taudia baita lalokau henidiamu neganai, una ese be hagoadadamu “Basileia sivaraina namona” baita harorolaiamu. (Mat. 24:14; Luka 10:27) Danu, lalokau dainai baita haheaukamu, haida baita kara namo henidiamu bona dika baita gwautaomu. Baibul na e gwaumu: “Lohiabada ese emui dika vada e gwau tao; umui danu unu ba kara toma.”​—Kol. 3:13.

Una lalokau na dia hebogahisi kava hemamina amo baita hahedinaraia. Heḡereḡere, una hebogahisi e hahedinaraiamu tama sina na natudia ihadorona totona ena ura ḡaudia iboudiai be henimu. To lalokau korikori e hahedinaraiamu tama sina ese natudia edia namo e lalomu dainai, edia ura ḡaudia haida na basie henimu. Una heḡereḡerena, Dirava na lalokau, to Ia ese “e ura heniamu tauna matana e hakaniamu.” (Heb. 12:6) Bema lalokau ai baita rakamu, ita danu matahakani maorodia baita henimu. (Her. 3:11, 12) To matahakani ta henimu neganai, namona na baita helalotao ita na dia ḡoevadae tauda dainai nega haida kerere baita karamu. Una dainai, namona na lalokau ihahedinaraina ai eda kara haida baita hanamodia. Edena dala ai unu baita kara toma? Mani dala toi aita herevalai.

Ginigunana na, Iehova baita noia ena lauma helaḡa amo baine duruda lalokau baita hahedinaraia totona. Iesu na e gwa, Iehova ese lauma helaḡa e noiamu taudia na do baine henidia. (Luka 11:13) Bema lauma helaḡa baita noiamu bona baita ḡaukara goadamu ‘lauma ena dala ai baita rakamu,’ lalokau na eda kara amo baita hahedinaraiamu. (Gal. 5:16) Heḡereḡere, bema oi na elda ta kristen kongrigeisen ai, namona na lauma helaḡa ena heduru ba noia unu amo lalokau ai ma haida o durudiamu neganai siri maorodia ba ḡaukaralai diba. Eiava bema oi na tama o sina, namona na Dirava ena lauma helaḡa ena heduru ba noia, unu amo mai emu lalokau ida natumu ba matahakani henidia, to dia badu ai.

Iharuana na, haida ese Iesu e daḡedaḡe henia neganai, lalokau e hahedinaraia dalana ba laloa. (1 Pet. 2:21, 23) Bema ita na haida ese e kara auka henida eiava e hahemaoro henida kerere, Keriso ena haheitalai baita laloa lou na namo. Nega unu bamodia ai, siboda baita henanadai, ‘Iesu be dahaka bema kara?’ Taihu ta ladana Leigh na una henanadai e laloa karana ese e durua baine lalo namonamo gabeai kara ta baine karaia. Leigh na e gwa: “Nega ta a ḡaukara hebouva kekenina ta ese bamogu ediai meseij ta e siaia, bona lau e gwauraigu dika bona egu ḡaukara danu se hanamoa. Una ese lalogu na e hahisia. To, sibogu na henanadai, ‘Edena dala ai Iesu baina tohotohoa bona una kekeni baina kara namo henia?’ Iesu ese bema karaia ḡauna na lalohadailaia murinai, lalogu na hadaia una e vara ḡauna na baina laloaboio. Gabeai, na diba una kekeni na mai ena gorere bona e lalometau momova. Unu amo na diba, reana ia na se lalo namonamo bena una meseij e torea. Iesu na haida ese e hahisia neganai lalokau e hahedinaraia, una na lalohadailaia neganai e durugu a ḡaukara hebouva kekenina enai lalokau baina hahedinaraia.” Oibe, bema Iesu baita tohotohoamu, lalokau baita hahedinaraiamu.

Ihatoina na, siboda eda ura idadaraina lalokauna baita hahedinaraia, una na Kristen taudia korikoridia edia kara badana. (Ioa. 13:34, 35) Baibul ese e hadibadamu eda lalohadai na Iesu ena lalohadai ida baine heḡereḡere na namo. Iesu na guba e rakatania neganai, ia na ita daidai “sibona e hekaruhia hebubu . . . ela bona mase.” (Fili. 2:5-8) Keriso ese sibona  ena ura idadaraina lalokauna e hahedinaraia karana baita tohotohoamu neganai, eda lalohadai bona hemami na iena ida be heḡereḡeremu, bona ma haida edia namo baita ato gunamu. Lalokau ihahedinaraina karana ena namo haida be dahaka?

Bema lalokau baita hahedinaraiamu, hahenamo momo baita davarimu. Mani unu hahenamo rua aita herevalai.

• TADIKAKA OREANA: Eda helalokau heheni karana dainai, mai dibada tanobada heḡeḡemadai ena be edena kongrigeisen baita vadivadiamu, to tadikaka taihu ese mai moaledia ida be abida daemu. Tanobada heḡeḡemadai “tadikaka oreana” ese e lalokau henidamu na hahenamo badana. (1 Pet. 5:9, NWT) Ta dibamu Dirava ena orea taudia bogaraḡidiai lalokau unu bamona baita davariamu, ani?

• MAINO: ‘Lalokau ai baita haheauka heheni’ karana ese be durudamu ‘maino’ ai baita nohomu. (Efe. 4:2, 3) Eda hebou badadia bona maraḡidia ai ta itaiamu tadikaka taihu na maino ai e nohomu. Ina tanobada dikanai, maino unu bamona na kara idau hereana, ani? (Sal. 119:165; Isa. 54:13) Ma haida ida maino ai baita nohomu neganai, una ese idia ediai eda lalokau e hahedinaraiamu, una ese Tamada gubai e hamoaleamu.​—Sal. 133:1-3; Mat. 5:9.

Paulo na eto: “Lalokau ese goada e havaraiamu.” (1 Kor. 8:1) Edena dalai? Aposetolo Paulo ese Korinto Ginigunana karoa 13 ai lalokau e goadamu dalana e herevalaia. Lalokau na sibona ena namo se tahumu. (1 Kor. 10:24; 13:5) Danu, lalokau na ma haida e lalodiamu, e haheaukamu, bona e kara namomu dainai, ruma bese ai lalokau e miamu bona kongrigeisen ai lalotamona e havaraiamu.​—Kol. 3:14.

Dirava ilalokau henina karana na mai anina bada bona baine hagoadada diba. Una lalokau ese bese bona gado idauidau taudia iboudiai e haboudiamu, “mai lalodia tamona ida” Iehova bae hesiai henia totona. (Sef. 3:9) Namona na laloda baita hadai, Dirava ena lauma helaḡa ena kara hereadaena, lalokau, na dina ta ta lalodiai baita hahedinaraia totona.