ABIDADAMA na mai siahuna. Heḡereḡere, ena be Satana na e uramu iseda hetura karana Dirava ida baine hadikaia, to abidadama ese baine duruda ‘Tau Dikana ena diba lahidia baita habodo diba.’ (Efe. 6:16) Abidadama dainai, ororo heḡereḡeredia hekwakwanaidia baita haheaukalai diba. Iesu ese ena hahediba e hamaorodia, eto: “Emui abidadama bema sinapi nadinadina mo na heto, ina ororo boma haduaia, boma toma ‘ini amo unu baola,’ bena bema lao.” (Mat. 17:20) Abidadama ese eda hetura karana Dirava ida e hagoadaiamu dainai, namona na ini henanadai baita lalodia: Abidadama anina be dahaka? Edena dalai ta lalomu ḡaudia ese eda abidadama baine hagoadaia o baine hadikaia? Eda abidadama be ede baita hagoadaia toma? Bona daika baita abidadama henia na namo?​—Roma 4:3.

Abidadama anina na dia hereva momokani mo baita abia dae, badina be ‘demoni danu e abia daemu [Dirava na e nohomu] bona e heudeheudemu.’ (Iak. 2:19, NWT) To, abidadama anina be dahaka?

Baibul ese abidadama anina na dala rua ai e herevalaia. Ginigunana na, “abidadama anina bina, oi na so daradaramu to o dibamu o nariamu ḡauna anina na be varamu.” (Heb. 11:1a, NWT) Bema mai emu abidadama, oi na bo abia dae momokanimu Iehova ena hereva iboudiai na momomokani bona be ḡuḡurumu. Heḡereḡere, Iehova ese Israel taudia e hamaorodia, eto: “Egu haheḡani dina enai eiava hanuaboi enai boma utua diba, bena dina bona hanuaboi na edia nega korikoridia ai basiema hedinarai, bena egu gwauhamata egu hesiai tauna David enai danu ba utua diba.” (Ier. 33:20, 21) Nega haida o garimu badina o laloamu dina basine daemu o basine dihomu neganai, dina bona hanuaboi na lasi, a? Bema oi na mai dibamu dina be daemu bona be dihomu, anina na mai dibamu unu ḡau e kara Diravana ese ena gwauhamata iboudiai na be haḡuḡuru dibamu, ani?​—Isa. 55:10, 11; Mat. 5:18.

Iharuana na, abidadama anina na “o diba momokanimu, o abi daemu ḡaudia na momokani, ena be unu ḡau na do so ita.” Baibul ese e hahedinaraiamu hahemomokani ḡaudia amo abidadama anina ta dibamu ena be unu ḡau na do asita itadia. (Heb. 11:1b, NWT) Edena dalai? Bema natu ta na oi baine nanadaimu: ‘Ede o diba tomamu hodahoda na mia?’ Ena be hodahoda na so itaiamu, to natu baine laloparara totona hahemomokani ḡaudia haida bo herevalaimu, heḡereḡere hahodi hodahodana, o lai e toamu neḡanai rau e mareremu eiava paraka na kopimu ai o mamimu, o ḡau ma haida. Natu na una be lalopararalaiamu neganai, be abia daemu unu ḡau na e miamu ena be se itadiamu. Una heḡereḡerena, hahemomokani ḡaudia baita lalopararalaimu neganai, eda abidadama na be hagoadaiamu.​—Roma 1:20.

Abidadama na hahemomokani ḡaudia amo ta dibamu dainai, namona na ta ese “hereva momokani ena diba maoromaoro” baine abia guna. (1 Tim. 2:4, NWT) To una mo na dia heḡereḡere. Aposetolo Paulo na e eto: “Tau ta na kudouna ai e abidadamamu.” (Roma 10:10, NWT) Ta na dia hereva momokani mo baine abia dae, to una hereva momokani baine laloa bada na namo. Unu be kara tomamu neganai, ia na abidadama be hahedinaraiamu, anina na, Dirava ese e moalelaimu daladia baine badina.  (Iak. 2:20) Hereva momokani se laloa badamu tauna ese hahemomokani ḡaudia na basine abi daemu, badina be ia na se uramu e abi daemu ḡaudia baine haidau eiava tauani ena ura dikadia e lalo badamu. (2 Pet. 3:3, 4; Iuda 18) Baibul negadiai, hoa karadia e ita taudia haida ese Dirava na asie abidadama henia. (Num. 14:11; Ioa. 12:37) Dirava ena lauma helaḡa ese kara maorodia e ura henimu taudia kudoudia ai abidadama e havaraiamu.​—Gal. 5:22, NWT; 2 Tes. 2:10, 11.

Kind David na abidadama goadana e hahedinaraia tauna ta. (Heb. 11:32, 33) To, dia ena bese taudia iboudiai ese iena abidadama e tohotohoa. Heḡereḡere, ia kakana Eliab aita laloa. David na e ura Goliata baine tuari henia neganai, Eliab na e badu. To Eliab ese David na e gwau henia, bona unu e kara toma neganai, ia ese e hahedinaraia Iehova na se abidadama henia. (1 Sam. 17:26-28) Ta ese abidadama na se varalaia o tamana bona sinana edia amo se abia hanai, una dainai ta dibamu David na mai ena abidadama badina ia bona Dirava edia hetura karana na goada.

Salamo 27 ai, David ese abidadama goadana e abia dalana e hahedinaraia. (Siri 1) David na guna enai e vara ḡaudia bona Iehova ese inaina e kara henidia dalana e haerodia. (Siri 2, 3) Ia ese Iehova ena dubu helaḡa na e laloa bada. (Siri 4) David na Dirava itomadiho henina taudia ida dubu helaḡa ai Dirava e tomadiho heniava. (Siri 6) Ia na ḡuriḡuri amo Iehova ena heduru e tahua. (Siri 7, 8) Danu, ia na e ura Dirava ese ena dala baine hadibalaia. (Siri 11) David enai abidadama karana na mai anina bada, una dainai ia na eto: “Lau lalogu na e abia daemu Iehova ena kara namo baina itaia.”​—Siri 13.

Oi danu David heḡereḡerena abidadama goadana bo abia dibamu bema Salamo 27 ai e herevalai karadia bo hahedinaraimu. Abidadama na diba maoromaoro iabina karana ese e hagoadaiamu dainai, bema Dirava ena Hereva bona eda pablikeisin baita stadilai namonamomu, ita ese Dirava ena lauma huahuana baita hahedinaraiamu. (Sal. 1:2, 3) O stadimu neganai, nega bavato ba lalo dobu. Bema o stadilaimu ḡaudia bo lalodia dobumu, Iehova ihanamona karana bo habadaia dibamu. Iehova bo hanamoamu dainai, bo ura dikadikamu emu abidadama ihagoadana totona kongrigeisin heboudia ai ia ba tomadiho henia bona emu helaro na ma haida ediai ba herevalaia. (Heb. 10:23-25) Danu, abidadama karana baita hahedinaraia diba bema ‘nega iboudiai baita ḡuriḡuri, basita hesiku.’ (Luka 18:1-8) Una dainai “ḡuriḡuri basio hadokoa” bona bavabia dae Iehova “ese e lalomuimu.” (1 Tes. 5:17; 1 Pet. 5:7) Abidadama dainai kara maorona baita karaiamu, unu amo iseda abidadama na be goadamu.​—Iak. 2:22.

Iesu do se mase hanuaboina ai, ia na ena hahediba e hamaorodia eto: “Dirava bavabidadama henia,  lau danu bavabidadama henigu.” (Ioa. 14:1) Una dainai, namona na Iehova bona Iesu baita abidadama henidia. Iesu be ede baita abidadama henia toma? Dala toi mani aita herevalai.

Ginigunana na, bavabia dae mauri davana na Dirava ese oi e henimu harihari ḡauna ta. Aposetolo Paulo na eto: “Dirava Natuna na abidadama heniamu dainai na maurimu. Ia ese e ura henigu bona sibona e heni, lau daigu ai.” (Gal. 2:20) Iesu bo abidadama heniamu neganai, bo abia daemu mauri davana ese oi na be durumumu, emu dika be gwautaomu, mauri hanaihanai helarona bo abiamu bona bo hamomokaniamu Dirava ese oi na e lalokau henimumu. (Roma 8:32, 38, 39; Efe. 1:7) Una ese oi na be durumumu emu kara kerere daidiai basio lalohisihisi totona.​—2 Tes. 2:16, 17.

Iharuana na, Iesu ena boubou ḡauna dainai, oi na ḡuriḡuri amo Iehova ba raka henia kahi diba. Mauri davana dainai, ita ese Iehova baita ḡuriḡuri henia diba “asi eda gari; bena baine bogada hisi, bona harihari-bada, eda dabu negadia ai baine kahada hariharina, baita abia.” (Heb. 4:15, 16; 10:19-22) Ḡuriḡuri karana ese be hagoadadamu hedibaḡani idauidau baita dadarai.​—Luka 22:40.

Ihatoina na, Iesu ba badinaia. Aposetolo Ioane na e gwa: “Natuna e abidadama heniamu tauna ese mauri hanaihanai baine abia; Natuna e gwau edeede heniamu tauna ese mauri basine itaia, a Dirava ena badu na ia latanai e miamu.” (Ioa. 3:36) Ioane ese abidadama bona gwau-edeede edia idau e herevalaia. Una dainai, Iesu o badinaiamu neganai, oi na abidadama karana o hahedinaraiamu. Iesu na bo badinaiamu bema “Keriso ena haheḡani” bo kamonai henimu, unu na ia ese e hahedibalai bona e haheḡanilai ḡaudia. (Gal. 6:2) Iesu ba badinaia dalana ta na “abidadama bona aonega hesiai tauna” amo e maimu hahekau herevadia ba badina. (Mat. 24:45, NWT) Iesu bo badinaiamu neganai, be hagoadamumu hekwakwanai badadia, lai gubadia na heto, bo haheaukalaimu.​—Luka 6:47, 48.

Nega ta, tau ta ese Iesu e boi henia eto: “Lau be vada na abidadama; egu abidadama maraḡi-maraḡi ame kahaia.” (Mar. 9:24) Ena be una tau na mai ena abidadama, to ia na e diba ena abidadama baine hagoadaia na namo. Una tau heḡereḡerena, ita danu eda abidadama baita habadaia na namo bona harihari una abidadama baita hagoadaia diba. Ta herevalaia heḡereḡerena, eda abidadama baita hagoadaia totona, namona na Dirava ena Hereva baita stadilaia bona baita laloa dobu, unu amo ita ese Iehova baita hanamoamu. Eda abidadama na be goadamu bema ita na tadikakada bona taihuda ida Iehova baita tomadiho heniamu, eda helaro na haida ediai baita herevalaiamu, bona ḡuriḡuri karana baita goadalaiamu. Danu, eda abidadama baita hagoadaiamu neganai, ita na ina hahenamo hereadaena baita abiamu. Dirava na e gwa: “Egu lalokau taumui e, emui abidadama helaḡana latanai emui mauri ba hadaia. . . . Dirava ena lalokau ai ba noho.”​—Iuda 20, 21.