1. Kristen taudia be dahaka bae kara mauri ena heau-helulu bae haḡuḡurua helaoreana?

KRISTEN taudia na mauri iabina heau-heluluna lalonai e heaumu. Herevana harihari ta heau matamamu eiava laḡani momo lalodiai vada ta heau, to ḡau badana na baita heau ela bona heau-helulu dokonai baita kau. Paulo ese Filipi Kristen taudia e henidia sisibana ese baine hagoadada diba heau-helulu baita haḡuḡurua helaoreana. Kristen kongrigeisin ginigunana taudia haida na Paulo ena revareva e abia neganai idia na laḡani momo lalonai Iehova vada e hesiai henia. Edia abidadama na goada, to Paulo ese e hadibadia ḡau badana na mai haheaukadia ida edia hesiai ḡaukara bae karaia. Ena ura na idia ese iena haheitalai bae tohotohoa, eto “dokona na heau heniamu, davana baina abia na tomamu.”​—Flp. 3:14.

2. Dahaka dainai Paulo ese Filipi taudia e henidia sisibana na nega korikori ai e heni?

² Paulo ese Filipi taudia e henidia sisibana na nega korikori ai e heni. Kongrigeisin e matama negana amo haida ese tadikaka na e daḡedaḡe henidiava. Dirava ena boiboi herevana, “Makedonia aoma,” na Paulo bona Sila ese e badinaia bona Filipi ai e kau neganai, una daḡedaḡe karana e matama, reana una na laḡani 50 C.E. lalonai. (Apos. 16:9) Unuseniai idia ese hahine ta ladana Ludia e davaria; ia ese edia “hereva e kamonai, bona Lohiabada [“Iehova,” NWT], ese lalona e hapararaia” sivarai namona ihakala henina totona. (Apos. 16:14) Se daudau, ia bona ena ruma taudia na bapatiso e abi. To, Diabolo ese e tohodia matama. Hanua tataudia haida ese Paulo bona Sila e dabaidia tao bona hahemaoro taudia vairadiai e hakaudia lao bona e habadelaidia koikoi eto idia na hanua lalonai heiriheiri  e havaraiamu. Una dainai, Paulo bona Sila na e dadabadia, dibura rumana ai e atodia, bona gabeai e hamaorodia hanua bae rakatania. (Apos. 16:16-40) Idia raruosi be e hesiku, a? Lasi! To una kongrigeisin matamatana tadikakadia bona taihudia be dahaka e kara? Idia danu e haheauka! Paulo bona Sila edia haheitalai namona ese e hagoadadia bada.

3. Paulo ese e dibaia ḡauna be dahaka, bona ededia henanadai baita herevalaimu?

³ Paulo na lalona e hadaia basine hesiku. (2 Kor. 4:16) To, mai dibana heau-helulu dokonai baine kau totona, davana baine laloa bada na namo. Paulo ena haheitalai ese dahaka e hadibadamu? Hari ina negai, daidia edia abidadama sivaraidia ese bae duruda diba hekwakwanai baita haheaukalai? Bona iseda nega vaira helarona ese edena dala ai baine hagoadada basita hesiku helaoreana?

4. Ena be Paulo na ruma ta ai e hadiburaia, to edena dala ai e harorova?

⁴ Paulo ese Filipi taudia e tore henidia neganai, e karava ḡaudia mani aita lalo. Ia na Roma ai ruma ta ai e hadiburaia. Una dainai ia na asi ena dala baine raka lasi bona baine haroro. To, ia e vadivadiava taudia e haroro henidiava bona gabu daudau kongrigeisin idauidau e tore henidiava. Hari ina negai danu, Kristen taudia momo na gorere o buruka dainai ruma ai mo e nohomu, to dala e hekehomu neganai idia e vadivadidiamu taudia ediai sivarai namona e harorolaiamu. Bona idia ese hahegoada revarevadia na haroro ai asita davaridiamu taudia e siai henidiamu.

5. Filipi 3:12-14 heḡereḡerena, Paulo be dahaka ese e durua baine abia davana baine laloa bada totona?

⁵ Paulo na guna e abi dagidia eiava ena kara kereredia ese se koua Iehova baine hesiai henia totona. Una dainai ia na e gwau “murigu ḡaudia name lalo boio” bona “vairagu ḡaudia na ḡavamu,” heau helulu ihaḡuḡuruna helaoreana. (Filipi 3:12-14 ba duahi.) Dahaka ḡau haida ese Paulo ena heau dalana bema hadikaia diba? Ginigunana binai: Iuda tomadihona ai ena dagi na bada. To, ia ese unu ḡau na “negenege ḡaudia ai” e halaodia. (Flp. 3:3-8) Iharuana binai: Ena be guna ia ese Kristen taudia e daḡedaḡe henidiava, to una ese ia na se koua Dirava baine hesiai henia. Bona ihatoina binai: Ia na se lalo Iehova ena ḡaukara vada e haḡuḡurua dainai, ena ḡaukara na baine hadokoa. Paulo ena hesiai ḡaukara na mai huahuana, ena be haida ese dibura ai e atoa, e dadabaia, nadi amo e hodoa, e gui kau kadana e dika, bona aniani bona dabua ai e dabu. (2 Kor. 11:23-27) Ena be unu ḡau iboudiai na Paulo enai e vara, to ia na mai dibana baine haheauka na ḡau badana. Ita danu unu baita kara toma na namo.

6. Baita lalodia boio ‘murida ḡaudia’ haida be dahaka?

⁶ Edena dala ai Paulo baita tohotohoa bona murida ḡaudia baita laloboio? Readia ita haida ese eda kara dika gunadia daidiai ta mamimu lalohisihisidia baita hanaidia na namo. Bema oi na unu o hemami tomamu, namona na sibomu emu stadi project ta lalonai Keriso ena mauri davana e heni sivaraina ba stadilaia. Bema una sivarai baita stadilaiamu, baita laloa dobumu, bona baita ḡuriḡurilaiamu, reana iseda lalohisihisi na be maraḡi be laomu. Bona baita dibamu Iehova ese eda kara dika vada e gwautao dainai unu kara na ma basita lalodia loumu. Paulo amo baita dibaia ḡauna ma ta aita laloa. Readia haida na moni ḡaukara namodia e rakatani Basileia ḡaukaradia bae kara totona. Bema ita edai unu e vara toma, namona na murida ḡaudia na basita lalodia lou, anina na tama abia  diba moni ḡaukara namona na basita laloa lou. (Num. 11:4-6; Koh. 7:10) ‘Murida ḡaudia’ haida na, readia Dirava ihesiai heninai ta karava ḡaudia eiava guna ta haheaukalai hahetohodia. Momokani, Iehova ese laḡani momo lalodiai e hanamoda bona e duruda daladia baita lalo loumu neganai, be durudamu Tamada guba ai baita raka henia kahi totona. To, basitato eda ḡaukara ta haḡuḡuru dainai, ita na vada heḡereḡere.​—1 Kor. 15:58.

7. Korinto Ginigunana 9:24-27 heḡereḡerena, mauri ena heau-helulu ai baita kwalimu totona, dahaka na mai anina bada? Mani haheitalai ta ba gwauraia.

⁷ Paulo ese Iesu ena hereva na e lalopararalaia, Iesu eto: “Ba hekwarahi bada.” (Luka 13:23, 24, NWT) Paulo na mai dibana Keriso heḡereḡerena, baine haheauka ela bona dokona na namo. Una dainai, ia ese Kristen mauri dalana na heau-helulu ta ida e haheḡereḡerea. (1 Korinto 9:24-27 ba duahi.) Heau-helulu tauna ese dokona e raraiamu bona murina ḡaudia se lalodiamu. Haheitalai binai: Hari ina negai siti ta ai heau-helulu taudia na readia bisnes rumadia bona ma gabu haida bogaraḡidiai e heaumu. O laloamu, heau tauna ta be nega sisina baine gini gabu ta ai stoa lalona ḡaudia baine rarai, a? Lasi, ia na dounu be heaumu bema e uramu baine kwalimu! Ita danu mauri ena heau-helulu lalonai, eda heau bae hadikaia ḡaudia basita lalodia na namo. Bema ta uramu baita abia ḡauna baita laloamu bona baita hekwarahimu, Paulo heḡereḡerena, davada baita abiamu!

8. Ededia hahetoho toi baita herevalaimu?

⁸ Hari ita ese bae hametauda ḡaudia toi baita herevalaimu. Ḡaudia bini: Ta lalomu ḡaudia se varamu, gorere o buruka dainai tauanida e manokamu, bona e mia daudaumu hahetohodia. Haida ese ini ḡau e haheaukalai daladia amo namo baita abi diba.​—Flp. 3:17.

9. Ta lalomu ḡaudia asie vara haraḡamu neganai eda hemami be ede bamona?

⁹ Ta lalomu ḡaudia se varamu. Vaia, ita na ta uramu Iehova ese e gwauhamatalai ḡau namodia baita ita. Momokani, Iehova ena peroveta tauna Habakuku na e ura Iehova ese Iuda ai kara dikadia baine haorea neganai, Iehova ese  e hamaoroa una nega baine “naria.” (Hab. 2:3) To, ta lalomu ḡaudia basie vara haraḡamu neganai, readia baita daradaramu bona baita lalohisihisimu. (Her. 13:12) Laḡani 1914 lalodiai tadikaka haida ediai una na e vara. Una neganai, e horodia Kristen taudia momo banava eto 1914 ai guba baela. To, una se vara neganai, idia be dahaka e kara?

10. Headava taudia rarua na e lalo ḡaudia se vara haraḡa neganai, dahaka e kara?

¹⁰ Abidadama taudia rarua ediai e vara ḡaudia mani aita lalodia. Tadikaka Royal Spatz na laḡani 1908 ai e bapatiso, una negai ia laḡanina na 20. Ia na e laloava guba ai davana na kahirakahira baine abia. Una dainai, laḡani 1911 ai, ia ese taihu ta ladana Pearl e noia baine adavaia neganai, e hamaoroa: “Oi na mai dibamu laḡani 1914 ai be dahaka be varamu. Bema baita headava, baita karaia haraḡa na namo!” To, laḡani 1914 ai guba lao hahenamona asie abia neganai, idia be e lalomanoka, a? Lasi, badina be idia e laloa badava ḡauna na Dirava ena ura bae karaia, dia davadia gubai bae abi. Idia na lalodia e hadai mai haheaukadia ida bae heau. Momokani, Royal bona Pearl na e ḡaukara goada bona Dirava e badinaia ela bona laḡani momo muridiai e mase. Asia daradaramu oi danu o uramu Iehova ese ladana baine hahelaḡaia, ena lohia siahuna baine abia isi bona ena gwauhamata iboudiai baine haḡuḡuru negana ba itaia. Bavabia dae Iehova ese ini ḡau iboudiai na ena nega korikori ai baine haḡuḡuru. To una nega ta nariamu lalonai, namona na Iehova ena hesiai ḡaukara lalonai baita bisi, dia namo ta lalomu ḡaudia se vara haraḡamu dainai baita lalohisihisi eiava eda heau baita hametaua.

11-12. Dahaka dainai mai abidadama ida Iehova baita hesiai henia ena be gorere o buruka dainai tauanida e manokamu? Mani haheitalai ta ba gwauraia.

¹¹ Gorere o buruka dainai tauanida e manokamu. Vaia heau-helulu ai tauanimu baine goada na ḡau badana, to lauma dalanai na dia unu bamona. Badina tauanidia e manoka e laomu taudia momo na dounu mai edia ura bada ida Dirava e hesiai heniamu. (2 Kor. 4:16) Haheitalai ta binai: Tadikaka Arthur Secord * laḡanina na 88 bona mai ena gorere; ia na laḡani 55 Betele ai e ḡaukarava! Nurse ta na ena bedi e raka henia baine durua totona. Ia ese Arthur e itaia bona mai lalokauna ida e hereva henia, eto: “Tadikaka Secord, oi na laḡani momo Iehova vada o hesiai henia.” To, Arthur ese guna e kara ḡaudia na se lalodia. Ia ese e itaia, e kiri, bona e haere eto: “Una na momokani, to ḡau badana na, hari amo ela ita na dounu Iehova baita abidadama henia.”

¹² Reana oi na laḡani momo Iehova o hesiai henia bona hari, gorere dainai, reana o  karamu ḡaukaradia na dia guna o karava ḡaukaradia heḡereḡeredia. Bema unu bamona, basio lalohisihisi. Namona na ba diba, Iehova ese guna ia dainai o karaia hesiai ḡaukarana na e laloa badamu. (Heb. 6:10) Hari namona na ba helalotao, Iehova ilalokau henina karana na dia o kara ḡaukaradia momo amo to emu kara namodia bona emu goada heḡereḡerenai ba kara ḡaukaradia amo ba hahedinaraia. (Kol. 3:23) Iehova na iseda goada hetoadia na e lalopararalaimu bona se doridamu basita kara diba ḡaudia baita kara totona.​—Mar. 12:43, 44.

13. Edena dalai Anatoly bona Lidiya edia ekspiriens ese e hagoadadamu hahetoho lalodiai Dirava baita hesiai henia?

¹³ E mia daudaumu hahetohodia. Iehova ena hesiai taudia haida na laḡani momo lalodiai metau bona daḡedaḡe karadia e haheaukalai. Haheitalai ta binai: Anatoly Melnik * laḡanina 12 ai, tamana na e arestia, dibura ai e atoa, bona Siberia e laohaia, una gabu bona iena ruma bese e nohova gabuna, Moldova, padadia na 7,000 kilomita mai kahana. Laḡani ta murinai, Anatoly, sinana, bona tubuna danu Siberia e laohaidia. Una murinai, idia na hanua ma ta ai hebou iboudiai e laova, to idia na 30 kilomita e raka snow lalonai, bona e kerudia dikadika. Gabeai, Tadikaka Melnik na laḡani toi dibura ruma ai e nohova; adavana Lidiya, bona natuna kekenina laḡani tamona edia amo e daudau. Ena be laḡani momo lalodiai hahetoho e davari, to Anatoly bona ena ruma bese na dounu Dirava e badinaiava. Harihari, Anatoly laḡanina na 82 bona Central Asia ai Brens Komiti ḡaukarana e karaiamu. Anatoly bona Lidiya heḡereḡeredia, namona na iseda goada heḡereḡerena Iehova baita hesiai henia bona guna ta haheaukava heḡereḡerena baita haheauka.​—Gal. 6:9.

14. Paulo na e diba dahaka baine kara na namo davana baine abia totona?

¹⁴ Paulo na e diba ena heau-helulu na baine haḡuḡurua bona dokona ai baine kau. Ia na horoa Kristen tauna ta dainai, mai moalena ida baine abia davana e nariava, ‘una dava be Dirava ese e boiria dae.’ To, una dava iabina totona, ia na e diba baine hekwarahi na namo. (Flp. 3:14) Paulo ese haheitalai namona ta e ḡaukaralaia, unu amo Filipi taudia baine durudia davadia bae laloa bada.

15. Paulo ese edena dalai Filipi Kristen taudia e hagoadadia bae hekwarahi?

¹⁵ Paulo ese Filipi taudia e hadibadia edia  hanua korikori na guba ai. (Flp. 3:20) Dahaka dainai una bae laloatao na ḡau badana? Paulo ena negai, Roma hanuana ai e nohova taudia na hahenamo momo e moalelaiva. * To, e horodia Kristen taudia edia hanua korikorina na guba ai bona hahenamo momo herea bae moalelai. Una ese Roma hanuana ena hahenamo e hereaia momokani! Una dainai, Paulo ese Filipi taudia e hagoadadia hanua taudia namodia heḡereḡeredia “Keriso ena sivarai namo ihaheḡereḡerena karadia mo [bae] kara.” (Flp. 1:27) Hari ina negai, horoa Kristen taudia ese haheitalai namona e hahedinaraiamu badina e hekwarahimu davadia guba ai, mauri hanaihanai, bae abia helaoreana.

16. Filipi 4:6, 7 heḡereḡerena, dahaka baita kara na namo ena be eda helaro na guba ai eiava tanobada ai?

¹⁶ Herevana guba ai eiava tanobada paradaisona ai baita mauri hanaihanai, to ḡau badana na baita hekwarahi dokona baita heau henia. Herevana eda noho daladia na idauidau, namona na murida ḡaudia na basita lalo, bona Dirava ta hesiai heniamu karana na ḡau ta ese basine koua. (Flp. 3:16) Readia ta lalomu ḡaudia se vara haraḡamu eiava gorere o buruka dainai tauanida e manokamu. Laḡani momo lalodiai ita ese metau bona daḡedaḡe karadia vada ta haheaukalai. To “ḡau ta basio lalo haguhilaia.” Ḡau iboudiai ḡuriḡuri amo bona noinoi amo emui ura na Dirava ba hamaorolaia, bena ia ese emu diba bona lalohadai e hereaiamu mainona baine henimu.​—Filipi 4:6, 7 ba duahi.

17. Stadi atikol 32 ai dahaka baita herevalaimu?

¹⁷ Heau-helulu tauna na e heau goadamu dokona baine davaria totona, una heḡereḡerena ita danu baita ḡaukara goada mauri ena heau-helulu baita haḡuḡurua. Iseda goada bona noho daladia heḡereḡeredia, baita hekwarahi Iehova ena gwauhamata namodia dina vairai baita abi helaoreana. Dahaka baita kara unu amo dala maorona ai baita heau bona baita haheauka? Stadi atikol 32 ese be durudamu eda mauri lalonai ḡau maorodia baita ato guna bona “mai anidia bada ḡaudia” baita dibadiamu.​—Flp. 1:9, 10, NWT.