ROBERT bona Mary Jo na e gwa: “Misinari ḡaukara na laḡani 21 lalodiai a moalelaia murinai, tamamai bona sinamai na e goreredia. Ai na a moale idia baia naridia. To a ura heniava gabuna a rakatania neganai a lalohisihisi.”

1-3. Ededia badi daidiai fultaim hesiai ḡaukara e karamu taudia edia asainmen na e idaumu?

² William bona Terrie na ini e gwau toma: “A diba ai na mai emai gorere dainai emai asainmen na basia karaia loumu neganai, a tai. Emai ura na idau tanona ai, Iehova baia hesiai henia, to a diba una na basia karaia loumu.”

³ Betele ai e ḡaukaramu tadikakana, Aleksey na eto: “Ai na mai dibamai, e daḡedaḡe henimaiva taudia na e ura brens ofis bae koua. Una e vara bona e hamaoromai Betele baia rakatania neganai a lalohisihisi.”

4. Ina atikol ai, ededia henanadai baita herevalaimu?

⁴ Unu ekspiriens heḡereḡeredia, fultaim hesiai ḡaukara e karamu taudia momo, Betele ai e ḡaukaramu taudia danu asainmen matamatadia e abimu. * Reana unu tadikaka bona taihu ediai na be aukamu laḡani momo lalodiai e moalelai asainmen bae rakatani bona asainmen matamatadia bae abi totona. Edia asainmen e idaumu neganai dahaka ese baine durudia? Edena dalai idia ba durudia diba? Unu henanadai edia haere ese ita iboudai be durudamu eda mauri ai e varamu sensi idauidau baita haheaukalai.

5. Dahaka baine vara diba bema iseda asainmen baine idau?

⁵ Herevana edeseniai fultaim hesiai ḡaukara ta karaiamu, una gabu ai e nohomu taudia na baita lalokau henidia bona ta nohomu gabuna na baita ura henia. Bema badi haida daidiai unu gabu eiava unu gabu ai e nohomu taudia ta rakatanidiamu, ita na ta hebogahisimu. Ita ese tadikakada bona taihuda na ta lalodiamu, to daḡedaḡe karadia dainai asainmen e idaumu neganai, ita na tadikakada bona taihuda daidiai ta lalohekwarahimu. (Mat. 10:23; 2 Kor. 11:28, 29) Danu asainmen matamatana ta abiamu eiava ta loumu eda gabu korikori neganai, nega haida be aukamu unu gabu kastomdia baita diba totona. Robert bona Mary Jo na eto: “A hemami emai gabu ena kastom baia dibaia bona emai gado ai baia haroro na auka. Ai na laḡani momo lalodiai gabu idauna ta ai a haroro dainai emai gabu a lou henia negani a hemamiva ai na dia una gabu taumai.” Asainmen matamata e abimu taudia haida na moni dalanai e hekwakwanaimu. Readia be daradaramu, be laloamu ediai na dia heḡereḡere, bona be lalometaumu. Dahaka ese baine durudia diba?

6. Edena dalai Iehova baita raka henia kahi?

⁶ Iehova ba raka henia kahi. (Iak. 4:8) Edena dalai unu baita kara toma? Ia bavabidadama henia badina ia na “ḡuriḡuri ikamonaina Diravana.” (Sal. 65:2) Salamo 62:8 na e gwa, “lalomui anidia na ia vairanai ba hahedinarai.” Iehova na “baine ḡaukara, ela bona eda noinoi bona eda lalo-hadai idoidiai baine hereadia.” (Efe. 3:20) Ia na dia ta ḡuriḡurilaimu ḡaudia mo e henimu. Nega haida ia ese kara ta na ita ese asita laloamu dalanai baine karaia diba iseda hekwakwanai ihanaidia helaorena.

7. (a) Dahaka ese baine duruda Iehova baita raka henia kahi totona? (b) Heberu 6:10-12 heḡereḡerena, mai kudouda idoinai ida Iehova baita hesiai heniamu ena namo be dahaka?

⁷ Iehova baita raka henia kahi totona, dina ta ta ai Baibul baita duahia bona baita laloa dobu. Guna misinari ḡaukara e karaia tadikaka ta na eto: “Emu asainmen gunanai ruma bese tomadiho bona hebou ḡaudia iheḡaeḡaelaidia sediual o badinaiava heḡereḡerena, emu asainmen matamatana ai danu unu ba kara toma.” Danu, emu kongrigeisin matamatana ai, sivarai namona iharorolaina ḡaukarana ba goadalaia. Iehova ese mai kudoudia idoinai ida ia e hesiai heniamu taudia na se lalodia boiomu, ena be hari e karaiamu ḡaukarana na dia guna e karaiava heḡereḡerena.​—Heberu 6:10-12 ba duahi.

8. Ioane Ginigunana 2:15-17 ena hereva ese oi be ede baine durumu toma emu mauri ai kohu momo basio tahu?

 ⁸ Emu mauri ai kohu momo basio tahu. Satana ena tanobada ena lalohaguhi ḡaudia ese Iehova o hesiai heniamu karana basine “koua” na namo. (Mat. 13:22, NWT) Iehova asie hesiai heniamu taudia, turamu eiava varavaramu ese bae dorimu moni ḡaukara namona ta ba tahua neganai, edia hereva na basio abi dae. (1 Ioane 2:15-17 ba duahi.) Iehova bavabidadama henia; ia na e gwauhamata, “nega maorona ai” iseda abidadama baine hagoadaia, lalomaino baine henida, bona eda dabu ḡaudia baine heni.​—Heberu 4:16, NWT; 13:5, 6.

9. Hereva Lada-Isidia 22:3, 7 heḡereḡerena, dahaka dainai abitorehai asi anidia ai nahuada baita toho, bona dahaka ese baine duruda abi hidi maorodia baita kara?

⁹ Abitorehai asi anidia ai nahuada baita toho. (Hereva Lada-Isidia 22:3, 7 ba duahi.) Tano ma ta ai baita noho totona baita itaiamu kohu davadia na babada dainai baita uramu baita abitorehaimu. Abitorehai ihamaraḡina totona, basita ḡaukaralaimu ḡaudia na basita hoi. Heḡereḡere nega haida gorere taudia ta naridiamu neganai ta lalohekwarahi momomu, una dainai basita lalo namonamomu ita be abitorehai ede badana baita karaia. Unu e vara tomamu negadiai, ba helalotao, ḡuriḡuri bona noinoi karana ese be durumumu abi hidi maorodia ba kara. Emui ḡuriḡuri dainai, Iehova “ena maino, eda diba idoinai e hereaiamu mainona, ese lalomui bona daramui baine gima,” unu amo ḡau iboudiai ba lalohadailai mai lalo mainomu ida.​—Flp. 4:6, 7; 1 Pet. 5:7.

10. Edena dalai oi na ta turana ai baola?

¹⁰ Oi bae durumu taudia ba bamodia. Emu hemami bona emu ai e vara ḡaudia na turamu namodia ida ba herevalai, reana idia ediai danu unu e vara toma. Una ese oi na be durumumu. (Koh. 4:9, 10) Emu asainmen gunana ai o hetura hendia taudia na dounu oi turamu. To emu asainmen matamatana ai, namona na tadikaka bona taihu ba hetura henidia. Ba helalotao, bema o uramu haida ese bae hetura henimu, namona na oi ese kara namodia ba hahedinarai. Edena dalai oi na ta turana ai baola? Iehova ese emu hesiai ḡaukara e hanamoa daladia na turamu ediai ba herevalai, unu amo idia ese Iehova ena hesiai ḡaukara ai o abia moalena bae mamia. Herevana kongrigeisin ai haida ese o karaia fultaim hesiai ḡaukara na basie lalopararalaiamu, to haida na emu haheitalai namona ese be durudiamu bona oi turamu ai be laomu. Ba helalotao, Iehova ena hesiai ḡaukara ai o haḡuḡuru ḡaudia bona so ura henimu ḡaudia na basio herevalai.

11. Emu headava maurina be ede ba moalelaia toma?

¹¹ Bema adavamu na gorere dainai emui asainmen o rakatania, basioto una na oiemu  kerere eiava adavamu ena kerere. Eiava, bema oiemu gorere dainai unu e vara toma, basio lalohisihisi. Ba helalotao, umui na “vada tamona” bona Iehova vairanai o gwauhamata, herevana emui mauri ai dahaka baine vara, umui na ba henari heheni. (Mat. 19:5, 6) Danu, emui fultaim hesiai ḡaukarana lalonai ena be so palanilaia to adavamu e rogorogo bena emui asainmen o rakatania, namona na natumu na baine diba ia o laloa bada dainai unu o kara toma. Bona ba hamaoroa ia na “herahia” ḡauna ta Dirava amo. (Sal. 127:3-5) Emu asainmen ai o davari ekspiriens namodia danu ba hamaorolaia. Unu bo kara tomamu neganai, una ese natumu be hagoadaiamu ena mauri ibounai lalonai Iehova ihesiai henina karana be moalelaimu, oi o kara heḡereḡerena.

12. (a) Fultaim hesiai ḡaukara e karamu taudia edia asainmen bae goadalaia helaoreana, ede baita durudia toma? (b) Edia asainmen matamatana bae moalelaia totona, dahaka baita kara?

¹² Kongrigeisin momo ai tadikaka bona taihu ta ta na fultaim hesiai ḡaukara e karamu taudia e durudiamu edia asainmen bae goadalaia helaoreana, una dainai a hanamodiamu. Heḡereḡere, moni bona edia dabu ḡaudia e henimu, edia ruma bese na gabu daudaudia ai e nohomu dainai e durudiamu. (Gal. 6:2) Bema fultaim hesiai ḡaukara e karamu taudia na asainmen matamata e abi bona emu kongrigeisen ema, basioto idia na kerere haida e kara eiava sisiba e abi. * Namona na ba durudia edia asainmen matamatana bae moalelaia totona. Ba welkam henidia, bona edia ḡaukara namona dainai ba hanamodia, ena be nega haida gorere daidiai ḡau momo na basie kara diba. Danu  e diba ḡaudia bona edia ekspiriens amo emu diba ba habadaia.

13. Asainmen matamatadia e abimu taudia be ede baita durudia toma?

¹³ Matamanai, asainmen matamata e abi taudia na be uramu umui ese ba durudia heḡereḡere noho gabudia, trenspot, moni ḡaukara, bona e dabumu ḡaudia ma haida iabidia helaoreana. Danu, be uramu dina ta ta ai e varamu ḡaudia bae diba heḡereḡere, tax bona insurance ihenina taravatudia. To ḡau bada hereana na ina: Idia na e uramu oi ese idia edia noho daladia na ba lalopararalaia. Badina reana idia na e hekwarahimu sibodia edia gorere eiava varavaradia edia gorere bae haheaukalai totona. Eiava, varavaradia ta e mase dainai e dara dokomu. * Bona ena be haida ediai unu na asie herevalaimu to nega haida sibodia e nohomu neganai e lalomanokamu, badina edia asainmen gunanai e manadadia tadikaka bona taihu na dounu e lalodiamu. Hemami unu bamodia na be mia daudaumu.

14. Tadikaka bona taihu ese taihu ta be ede e durua toma ena asainmen matamatana baine moalelaia totona?

¹⁴ Idia ida bo haroromu bona emu haheitalai namona ese idia na be durudiamu edia asainmen bae moalelaia totona. Laḡani momo lalodiai tano idauna ai hesiai ḡaukara e karaiava taihuna ta na ini e gwau toma: “Egu asainmen gunana ai, lau na dina iboudiai Baibul stadi na karava. To egu asainmen matamatana ai, haroro ai Baibul amo siri ta baina duahia eiava vidio ta baina hahedinaraia na auka. To unuseniai e nohova pablisa ese e noigu edia lou henia bona Baibul stadi baia ita hebou. Edia haroro goadagoada bona edia Baibul stadi e karava daladia namodia na itava neganai, una ese e durugu bada. Lau ese una gabu matamatana ai taunimanima ida baia herevahereva daladia na diba. Unu ese e durugu egu asainmen baina moalelaia.”

15. Dahaka ba kara unu amo emu asainmen matamatana ba goadalaia totona?

¹⁵ Emu asainmen matamatana na ba goadalaia diba. To, emu asainmen baine idau neganai,  basioto oi na dia heḡereḡere eiava emu asainmen gunana ai o kara ḡaudia na asi anidia. Hari oiemu mauri lalonai Iehova ese e durumumu daladia ba lalo, bona haroro ḡaukara na basio hadokoa. Aposetolo edia negai e nohova abidadama Kristen taudia ba tohotohodia. Idia ‘na gabu idauidau e laova, sivarai namo e harorolaiava.’ (Apos. 8:1, 4) Bema haroro ḡaukara bo goadalaiamu hahenamo momo bo davarimu. Painia taudia haida na edia haroro ḡaukara e taravatua dainai idia na ma ela tano idauna ta, unuseniai idia edia gado bae ḡaukaralaia totona. Se daudau una gado ai grup matamatadia e hamatama.

16. Emu asainmen matamatana ai moale baine havaraia ḡauna be dahaka?

¹⁶ “Iehova imoalelaina na emui moale ḡauna.” (Neh. 8:10) Namona na iseda moale badina badana na Iehova ta hesiai heniamu dainai, ena be eda asainmen na ta ura heniamu. Una dainai, eda hesiai ḡaukara ai baita moale totona, namona na Iehova baita raka henia kahi bona Iena aonega, hahekau dalana, bona heduru ai baita tabekau. Ba helalotao, emu asainmen gunana na o ura heniava badina oi na o ḡaukara goadava unu gabu ai e nohova taudia o lalokau henidiava bona o durudiava. Una heḡereḡerena, namona na emu asainmen matamatana ai ba ḡaukara goada bena bo itaiamu Iehova ese be durumumu emu asainmen bo moalelaiamu.​—Koh. 7:10.

17. Hari ta karaiamu asainmen ai, dahaka baita laloatao na namo?

¹⁷ Namona na baita helalotao ita na Iehova baita hesiai henia hanaihanaimu to hari ta karaiamu asainmen na be oremu. Tanobada matamatana ai, readia ita iboudai eda asainmen na be idaumu. Aleksey, matamanai tame herevalaia tadikakana, ese e abia daemu hari ina negai e varamu sensidia ese ia na e haheḡaeḡaeamu tanobada matamatana totona. Ia na e gwa: “Lau na mai dibagu Iehova na e nohomu bona tanobada matamatana na be vara momokanimu. Egu roharoha ai Iehova na vaitani vairaguai bona na hemamimu tanobada matamatana na kahirakahira.” (Apos. 2:25) Herevana iseda asainmen be dahaka, namona na Iehova baita raka henia kahi. Ia ese ita na basine rakatanidamu, to be durudamu unu amo Iena hesiai ḡaukara lalonai eda asainmen baita moalelaiamu.​—Isa. 41:13.