1. Daidia ese Filipi ai kongrigeisin e hamatamaia?

APOSETOLO Paulo, Sila, Luka bona Timoteo na Roma ena provins Filipi ai e kau neganai, idia ese Basileia sivaraina e ura henia taudia momo e davaridia. Ini tadikaka goadadia haniosi ese kongrigeisin ta e hamatamaia, bena hahediba taudia iboudiai e hebou matama; reana unu hebou na heabidae taihuna ta ladana Ludia ena ruma ai e karava.​—Apos. 16:40.

2. Kongrigeisin ese e davaria hahetohona be dahaka?

² Se daudau una kongrigeisin matamatana na hahetoho e davari. Satana ese hereva momokani e inai heniava taudia haida e ḡaukaralaidia abidadama Kristen taudia edia haroro ḡaukara bae koua totona. Idia ese Paulo bona Sila e dabaidia tao, au amo e dadabadia, bona dibura rumai e atodia. Dibura amo e ruhadia murinai, Paulo bona Sila ese hahediba taudia matamatadia e vadivadidia bona e hagoadadia. Bena Paulo, Sila, bona Timoteo ese hanua e rakatania, to Luka na unuseniai e noho. Hari kongrigeisin matamatana be ede e goada toma? Iehova ena lauma helaḡa ena heduru dainai, unu hahediba matamatadia na Iehova e hesiai heniava mai goadadia ida. (Flp. 2:12) Una ese Paulo na e hamoalea bada!

3. Filipi 1:9-11 heḡereḡerena, Paulo be dahaka e ḡuriḡurilai?

³ Laḡani 10 muridiai, Paulo ese Filipi kongrigeisin taudia ediai revareva ta e siaia. Una revareva bo duahiamu neganai, bo dibamu Paulo ese tadikakana na e lalokau henidia bada. Paulo eto: “Keriso Iesu ena hebogahisi ai umui iboumui ai na ura henimui lalo-dikamu.” (Flp. 1:8) Ia ese e tore henidia e hamaorodia idia daidiai e ḡuriḡuriva. Ia ese Iehova e noia unu  amo baine durudia edia lalokau bae habadaia, mai anidia bada ḡaudia bae diba, bae noho mai ḡoevadia, asi bebeka-bebekadia ida, haida basie hahekwakwanaidia, bona kara maoromaoro huahuadia bae havara. Hari ina negai, ita danu Paulo ena hahegoada herevadia ese be durudamu. Una dainai, Paulo ese Filipi taudia e tore henidia herevana mani aita duahia. (Filipi 1:9-11 ba duahi.) Unu amo Paulo ese e gwaurai herevadia bona eda mauri ai baita badina daladia ta ta baita herevalaimu.

4. (a) Ioane Ginigunana 4:9, 10 heḡereḡerena, Iehova ese ena lalokau ita edai be ede e hahedinaraia toma? (b) Dirava be ede baita lalokau henia toma?

⁴ Iehova ese ena lalokau hereadaena ita edai e hahedinaraia dalana na, ia ese Natuna tanobada e siaia iseda kara dika daidiai baine mase helaoreana. (1 Ioane 4:9, 10 ba duahi.) Dirava ena lalokau ese e durudamu Ia baita lalokau henia. (Roma 5:8) Dirava be ede baita lalokau henia toma? Iesu ese Farisea tauna ta e hereva henia neganai una henanadai e haerelaia, eto: “Namona na Iehova emu Dirava ba lalokau henia mai kudoumu idoinai, mai emu mauri idoinai, bona mai daramu idoinai ida.” (Mat. 22:36, 37, NWT) Ita na ta uramu mai kudouda idoinai ida Dirava baita lalokau henia. Bona ta uramu dina ta ta iseda lalokau baita hagoadaia. Paulo ese Filipi taudia e hamaorodia edia lalokau na “baine vara badabada” na namo. Ita be dahaka baita kara unu amo iseda lalokau Dirava enai baita hagoadaia?

5. Iseda lalokau be ede baita hagoadaia toma?

⁵ Dirava baita dibaia na namo unu amo ia baita lalokau henia. Baibul na e gwaumu: “Asi ena lalokau tauna na asi dibana Dirava, badina be Dirava na lalokau.” (1 Ioa. 4:8) Aposetolo Paulo ese e hahedinaraia iseda lalokau Dirava enai na be goadamu bema iseda “diba maoromaoro bona lalo-parara” Dirava enai baita habadaiamu. (Flp. 1:9, NWT) Baibul ta stadilaia matama neganai, eda lalokau Iehova enai ta hahedinaraia ena be ia na do asita dibaia namonamo. To Iehova ta dibaia namonamo murinai, iseda lalokau ienai na e goada e laova. Una dainai, iseda mauri lalonai Baibul istadilaina bona ilalona dobu karana na mai anidia bada!​—Flp. 2:16.

6. Ioane Ginigunana 4:11, 20, 21 heḡereḡerena, daidia danu baita lalokau henidia?

⁶ Dirava ena lalokau hereadaena ese e hagoadadamu tadikakada baita lalokau henidia. (1 Ioane 4:11, 20, 21 ba duahi.) Readia baita lalomu iseda tadikaka bona taihu baita lalokau henidia na dia auka. Badina Iehova ta tomadiho heniamu bona ta hekwarahimu iena kara namodia baita tohotoho. Iesu ena haheitalai ta badinaiamu, ia na ita e lalokau henida bada dainai ita daidai ena mauri e heni. To, readia nega haida baita helalokau heheni haheḡanina ibadinana na auka. Mani Filipi kongrigeisin ai e vara ḡauna ta aita laloa.

7. Paulo ese Euodia bona Sunutuke ediai e gwauraia sisibana amo dahaka ta dibamu?

⁷ Euodia bona Sunutuke na taihu goadadia bona aposetolo Paulo ida e “ḡaukara hebouva.” To, readia e hepapahuahu dainai taidia e parara. Paulo ese unu taihu raruosi e nohova kongrigeisin e tore henia neganai, Euodia bona Sunutuke ladadia e gwaurai bona e haḡanidia “lalodia bae tamona.” (Flp. 4:2, 3) Paulo na e lalo kongrigeisin ibounai baine sisiba henia na ḡau badana, eto: “Ḡau iboudiai asi emui maumau asi emui hepapahuahu ba kara.” (Flp. 2:14) Momokani, Paulo ena sisiba goadana ese dia unu taihu mo to kongrigeisin taudia iboudiai e durudia lalokau heheni karana bae hagoadaia.

8. Dahaka ese tadikakada ilalokau henina karana be kouamu, bona ede baita hanaia toma?

 ⁸ Euodia bona Sunutuke heḡereḡeredia, reana nega haida edai na auka tadikakada baita lalokau henidia badina edia kerere baita lalodia momomu. Ita iboudai na ta kereremu. Bema haida edia kerere mo baita lalomu, idia na basita lalokau henidiamu. Heḡereḡere, bema tadikaka ta na Kingdom Hall ihaḡoevana ai e helaloboio, reana ienai baita badumu. Bema una tadikaka ena kerere haida danu ma baita lalomu, iseda badu na be badamu bona iseda lalokau ienai be maraḡimu. Bema una na oi, namona na ina hereva ba laloa: Iehova ese iseda kerere bona tadikakada edia kerere danu e itamu. Herevana ita na mai eda kerere, to Iehova ese ita bona tadikakada na dounu e lalokau henidamu. Una dainai, namona na Iehova ena lalokau karana baita tohotohoa bona tadikakada edia kara namodia mo baita lalo. Bema ita na baita hekwarahimu tadikakada ilalokau henidia karadia baita hahedinaraimu, lalotamona ai baita nohomu.​—Flp. 2:1, 2.

9. Paulo ese Filipi taudia e tore henidia revarevana lalonai “mai anidia bada ḡaudia” haida be dahaka?

⁹ Lauma helaḡa ena heduru amo Paulo ese Filipi taudia bona Kristen taudia iboudiai e hadibadia, ‘ḡau namodia [“mai anidia bada ḡaudia” NWT] toadia bae diba.’ (Flp. 1:10) Mai anidia bada ḡaudia haida na, Iehova ladana ihahelaḡana karana, Iena ura ihaḡuḡuruna karana, bona kongrigeisin taudia na maino bona lalotamona ai bae noho karana. (Mat. 6:9, 10; Ioa. 13:35) Bema iseda mauri ai unu baita lalo badamu, baita hahedinaraiamu Iehova na ta lalokau heniamu.

10. Iehova ese iseda kerere basine lalo totona, dahaka baita kara na namo?

¹⁰ Paulo na ma e gwa “ba noho mai ḡoevamui, asi bebeka-bebekamui.” Una na dia baita ḡoevadae karana e herevalaiamu. Iehova Dirava sibona mo ḡoevadae. To Ia ese iseda kerere na basine lalomu bema baita hekwarahimu iseda lalokau ihabadana karadia baita karamu bona mai anidia bada ḡaudia baita dibamu. Iseda lalokau baita hahedinaraia dalana ta na baita ḡaukara goada haida basita hahekwakwanaidia.

11. Dahaka dainai haida basita hahekwakwanaidia?

¹¹ Haida basita hahekwakwanaidia sisibana baita laloa bada na namo. Edena dalai haida baita hahekwakwanaidia diba? Ta abi hidimu moale karadia, ta karamu dabuadia, eiava eda moni ḡaukaradia ese bae hahekwakwanaidia diba. Reana baita laloamu ta abi hidi ḡaudia na dia kekerere. To bema ta abi hidimu ḡaudia ese haida lalodia be hahekwakwanaimu, una na dia namo. Bema ita ese tadikakada ta ena hetura karana Iehova ida baita hadikaia, Iesu na e gwa una ena dika ese nadi metauna ta aiodai ai bema kwatua kau bona davara ai bema negeda dobi ena dika na e hereaia!​—Mat. 18:6.

12. Painia headava taudia edia haheitalai amo dahaka ta dibamu?

¹² Tadikaka ta bona adavana na e painiamu, to idia ese Iesu ena sisiba e badinaia dalana mani aita itaia. Idia na bapatiso matamata headava taudia ida kongrigeisin ta ai e ḡaukarava; unu bapatiso matamata taudia e bada ruma besena ai ḡau momo na taravatu. Bona idia ese e abia daeva Kristen taudia na muvi ita gabudia (cinema) na basiela​—⁠herevana una na muvi namona. To e kamonai painia headava taudia na muvi ta e itaia neganai, idia na asie moale. Painia headava taudia na muvi asie ita lou ela bona bapatiso matamata taudia ese lalodia e hadibaia namonamo bona maoro bona kerere edia idau e lalopararalai.  (Heb. 5:14) Unu painia headava taudia na sibodia edia ura e dadarai amo e hahedinaraia, idia na dia edia hereva amo to edia kara amo danu bapatiso matamata taudia e lalokau henidia.​—Roma 14:19-21; 1 Ioa. 3:18.

13. Ita ese ta be ede baita hahekwakwanaia toma?

¹³ Ta baita hahekwakwanaia dalana ma ta na, ia baita doria kara dikana ta baine karaia. Edena dalai? Mani ina a laloa. Baibul stiuden ta na laḡani momo e hekwarahi murinai ia ese inuinu kekero karana e biagua. Bena e laloparara namona na basine inuinu. Ia ese ena mauri e haidaua bena e bapatiso. Gabeai, tadikaka ta ese moale hebou ta ai e boiria bena unuseniai kekero muramurana ta e henia, bena e hamaoroa, “Hari oi na Kristen tauna ta dainai; Iehova ena lauma helaḡa ese oi na be durumumu. Lauma helaḡa ena kara ta na sibomu ba hebiagu. Bema oi na sibomu bo hebiagumu, bo inuinumu to basio kekeromu.” Ta dibamu, bema hari tadikaka matamatana ese una hahediba kererena bema abia dae, dokonai dika bema davari!

14. Kristen heboudia ese ede e duruda tomamu Filipi 1:10 baita badinaia?

¹⁴ Eda Kristen heboudia ese e durudamu dala idauidau ai Filipi 1:10 ena sisiba baita badinaia. Ginigunana na, hebou ai ita na Iehova ese e lalo badamu ḡaudia ta herevalaimu. Iharuana na, ta dibamu ḡaudia baita badina daladia e hadibadamu unu amo ma haida na basita hahekwakwanaidia. Bona ihatoina binai: Ita e hagoadadamu “lalokau bona kara namodia baita havara.” (Heb. 10:24, 25) Tadikakada ese bae hagoadada neganai, iseda lalokau  Dirava enai bona tadikakada ediai be badamu. Bema ita na mai kudouda idoinai ida Dirava bona tadikakada baita lalokau henidiamu, tadikakada na basita hahekwakwanaidiamu.

15. “Kara maoromaoro huahuadia ai ba honu” anina be dahaka?

¹⁵ Paulo na e ḡuriḡuri goadagoada, Filipi tadikakadia na “kara maoromaoro huahuadia ai ba honu” helaoreana. (Flp. 1:11) Unu “kara maoromaoro huahuadia” na idia ese Iehova bona ena taunimanima e lalokau henidia karana e herevalaia. Una ese Iesu e abidadama henia karana bona edia helaro na haida ediai e herevalaia karana e herevalaia danu. Filipi 2:15 ese haheitalai ma ta e ḡaukaralaia, ḡauna binai: “Idia padadiai ba hedinarai, tanobada ena diari na heto.” Una na maoro, badina Iesu ese ena hahediba e gwauraidia “tanobada diarina.” (Mat. 5:14-16) Danu, ena hahediba taudia na e haḡanidia “bese iboudiai hahediba taudia ai” bae halaodia, bona e hamaorodia eto, “lau igwaurai-hedinaraigu taumui ai baola, . . . ela bona tanobada heḡeḡe-madai.” (Mat. 28:18-20; Apos. 1:8) Bema ina mai anina bada ḡaukarana baita goadalaiamu, ita ese “kara maoromaoro huahuadia” baita hahedinaraimu.

16. Filipi 1:12-14 heḡereḡerena, herevana iseda mauri ai hisihisi ta davarimu, to edena dalai eda diari baita hahedinaraia diba? (Rau 1 laulauna ba itaia.)

¹⁶ Herevana iseda mauri ai hisihisi ta davarimu, iseda diari na baita hahedinaraia diba. Nega haida, ḡau haida e varamu dainai ta laloamu basita haroro diba. Mani Aposetolo Paulo enai e vara ḡauna aita laloa. Ia na Roma ai ruma ta ai e hadiburaia neganai, ia ese Filipi taudia e tore henidia. Ena be ia na seini amo e ḡuia to una ese se koua gadi taudia  bona ia e vadivadi henia taudia e haroro henidia. Paulo na unu nega aukadia ai e haroro goadagoada dainai, una ese tadikaka na e hagoadadia Dirava ena hereva bae gwauraia mai goadadia ida bona basie gari.​—Filipi 1:12-14 ba duahi; 4:22.

17. Hari ina negai edena dalai tadikaka bona taihu na nega aukadia lalodiai e haroromu? Haheitalai ta ba gwauraia.

¹⁷ Tadikaka bona taihu momo ese Paulo ena lalogoada karana bae tohotohoa diba. Heḡereḡere, idia e nohomu tanodia ai na auka taunimanima bae haroro henidia totona, una dainai dala idauidau e tahumu sivarai namona bae harorolaia. (Mat. 10:16-20) Tano unu bamona ta ai, sekit tauna ta na pablisa iboudiai e hamaorodia idia ta ta edia “teritori” na varavaradia, gabu tamona ai e nohomu taudia, sikuli hebou taudia, edia moni ḡaukara gabudiai, bona mai dibadia taudia ma haida. Laḡani rua lalodiai, una kongrigeisin ena namba na e bada. Ena be ita ta nohomu gabudia ai haroro ḡaukara na asie kouamu. To, unu tadikaka bona taihu amo mai anina bada ḡauna ta ta dibaiamu. Ḡauna binai: Namona na hanaihanai dala ba tahu ba haroro bona bavabia dae Iehova ese oi na be durumumu hekwakwanai iboudiai ba hanaidia totona.​—Flp. 2:13.

18. Laloda baita hadai dahaka baita kara?

¹⁸ Hari ina negai, laloda baita hadai Paulo ese Filipi taudia ediai e torea revarevana baita badinaia. Namona na mai anidia bada ḡaudia toadia baita diba, mai ḡoevada asi bebeka-bebekada baita noho, haida basita hahekwakwanaidia, bona kara maoromaoro huahuadia ai baita honu. Bena iseda lalokau baita habadaia bona Iehova, Tamada lalokauna baita imodaia.