OI BE o ura dikadikamu kongrigeisin ai maduna ta ba huaia, to emu ai na dia heḡereḡere, a? Reana una maduna na hari ta ese e huaiamu. Eiava reana una na guna o huaiava madunana. To, hari o burukamu, eiava o goreremu, ogoḡami, eiava ruma bese madunadia dainai, emu goada na dia heḡereḡere. Eiava orea ena senisi haida dainai laḡani momo lalodiai o karava ḡaukaradia na hari so karamu. Ena be badi na idauidau to oi na o hemamimu Dirava ena hesiai ḡaukara lalonai o uramu ba kara ḡaudia na so karamu. Nega unu bamodiai vaia nega haida bo lalohisihisimu. To, dahaka ese baine durumu diba basio lalomanoka, basio lalohisihisi, eiava basio badu? Edena dala ai dounu ba moale diba?

Ioane Bapatiso ena haheitalai amo baita dibaiamu ḡauna ese be durudamu baita moale totona. Ena be Ioane na se diba ena mauri ai be dahaka be varamu, to ena hesiai ḡaukara na e moalelaia. Ia na dibura rumana ai baine noho daudau na se laloa, ena be ena haroro ḡaukarana na se karaia daudau. To, Ioane na ena mauri lalonai ena hesiai ḡaukara na e moalelaiava. Dahaka ese e durua? Ta lalohisihisimu neganai dahaka ese baine duruda dounu baita moale?

Laḡani 29 C.E. ai Ioane ese e abia ḡaukarana na Mesia ena dala baine lailaia, eto: “A helalo kerehai, badina be guba basileiana vada eme kahira-kahira.” (Mat. 3:2; Luka 1:12-17) Taunimanima momo ese ena hereva na e abia dae. Hutuma na Ioane ena hereva bae kamonai helaoreana gabu daudaudia amo ela, e helalo kerehai bona e bapatiso. Ioane na mai lalogoadana ida e hekokorokuva tomadiho igunalaina taudia e hamaorodia bema basie helalo kerehai, Dirava ese baine hahemaoro henidia. (Mat. 3:5-12) Laḡani 29 C.E. ai Ioane ese Iesu e habapatisoa neganai ena hesiai ḡaukara lalonai una na mai anina bada ḡaukarana. Una nega amo Ioane ese ma haida e hagoadadia Iesu, gwauhamata Mesiana, murinai bae raka.​—Ioa. 1:32-37.

 Iesu ese Ioane ena ḡaukara e laloa neganai, ini e gwau toma: “Hahine bogadia ai e vara taudia iboudiai na ta ese Ioane se hereaiamu.” (Mat. 11:11) Ta diba momokanimu Ioane ese ena ḡaukara amo e abi hahenamodia na e moalelai. Ioane heḡereḡerena, momo ese Dirava ena hesiai ḡaukara amo e abimu hahenamodia na e moalelaimu. Mani tadikaka Terry aita laloa. Ia bona adavana Sandra na laḡani 50 mai kahana lalona fultaim hesiai ḡaukara e kara. Terry na e gwa: “Lau na hahenamo momo na abi. Na regula painia, Betele ai na ḡaukara, spesel painia ḡaukara na karaia, sekit bona distrik ḡaukara na kara, bona hari spesel painia ḡaukarana ma na karaiamu.” Momokani, Dirava ena hesiai ḡaukara lalonai hahenamo ta abimu na mai moalena, to Ioane ena haheitalai amo baita dibamu namona na baita hekwarahi baita moale ena be eda mauri daladia na bae idau.

Ioane Bapatiso na ena hesiai ḡaukara e laloa badava dainai e moaleva. Haheitalai ta aita laloa. Iesu e bapatiso murinai, iena hahediba taudia edia namba na e bada, a Ioane ena hahediba taudia edia namba na e maraḡi e laova. Ioane ena hahediba taudia na e lalohekwarahi dainai Ioane e hamaoroa, eto: “Oi ese o herevalaia tauna na vada e hahebapatisomu, bona taunimanima loḡora ia dekena e laomu.” (Ioa. 3:26) Ioane na eto: “Hahine matamatana e abiamu tauna, headava matamata tauna bunai. A headava matamata tauna turana danu e ginimu, erena e kamonaimu, bona headava matamata tauna gadona e moalelaiamu. Taunabunai, lauegu moale vada eme ḡuḡuru.” (Ioa. 3:29) Ioane ese ena hesiai ḡaukara na Iesu ena ida se haheḡereḡereava, bona se lalova e karaiava hesiai ḡaukarana na asi anina. To, e moale badina ia na “headava matamata tauna turana.”

Ioane na ena hesiai ḡaukara ai lalohadai maorona e abia dainai e moale, herevana una ḡaukara na mai hekwarahina. Heḡereḡere, ia na Nasiri tauna dainai vine ranuna na basine inua. (Luka 1:15) Iesu ese Ioane ena mauri e herevalaia neganai, eto: “Ioane Bapatiso ema, se anianiva, se inuinuva.” To, Iesu bona ena hahediba taudia edia mauri na dia unu bamona. (Mat. 11:18, 19) Ena be Ioane na hoa karadia na se kara, to e diba Iesu ena hahediba taudia bona iena hahediba taudia haida na siahu e abi hoa karadia bae kara. (Mat. 10:1; Ioa. 10:41) Ioane ese ena hahediba taudia bona Iesu ena hahediba taudia edia idau na se laloa, to Iehova ese e henia ḡaukarana hari e laloa bada.

Bema hari Iehova ena hesiai ḡaukara lalonai ta karamu ḡaukaradia baita lalo badamu, baita moalemu. Terry, matamanai tame herevalaia tauna, na eto: “Asainmen ta ta na abiva neganai, mai moalegu ida na karadiava.” Ena fultaim hesiai ḡaukara e laloa lou neganai, ini e gwau toma: “Mai moalegu ida unu maduna na huava.”

Dirava ena hesiai ḡaukara lalonai ta abimu madunadia edia namo baita lalomu, baita moalemu. ‘Dirava ida ta ḡaukara heboumu’ na hahenamo ta. (1 Kor. 3:9) Dava bada ḡauna ta hairaina na be mia daudaumu bema baita naria namonamomu. Una heḡereḡerena, Iehova ihesiai henina amo ta abimu hahenamodia baita lalo badamu neganai, baita moale hanaihanaimu. Dia namo ita siboda ese ta karamu ḡaudia na ma haida edia ida baita haheḡereḡere. Basitato ita ta karamu ḡaukaradia na haida ese e hereadia.​—Gal. 6:4.

Reana Ioane na dibana ena hesiai ḡaukara na basine karaia hanaihanaimu, to se diba ena hesiai ḡaukara ai sensi haida be varamu. (Ioa. 3:30) Ioane ese Iesu e habapatisoa bena hua siks muridiai, King Heroda ese Ioane na dibura ruma ai e atoa, una na laḡani 30 C.E. ai. To, Ioane na dounu e harorova. (Mar. 6:17-20) Dahaka ese Ioane e durua baine moale ena be dibura ruma ai e nohova? Ia na lauma ḡaudia e lalo badava.

Ioane na dibura ruma ai e nohova neganai, Iesu ena haroro ḡaukara sivairaina e kamonai. (Mat. 11:2; Luka 7:18) Ioane na e diba Iesu na Mesia, to e lalova Iesu ese Toretore Helaḡadia ai Mesia e perovetalaia herevadia be ede baine haḡuḡuru toma. Mesia na king dagina baine abia dainai, anina be Iesu be kahirakahira be lohiamu, a? Bona Ioane be dibura ruma amo be ruhaiamu, eiava? Ioane na e ura Iesu ena ḡaukara  baine lalopararalaia namonamo dainai ena hahediba rarua e siaidia bena Iesu e nanadaia, eto: “Be maimu tauna na oi, eiava idauna ta baita naria?” (Luka 7:19) Unu hahediba na e lou bena Ioane enai Iesu e karava hoa karadia sivaraidia e herevalai neganai, Ioane na e hakala namonamo. Idia na eto: “Matakepulu taudia matadia e papamu: ae-hedairike taudia e raka namonamomu, lepra taudia e ḡoevaḡoevamu, taia-kudima taudia e kamonaimu, mase taudia e tore isimu, bona ogoḡami taudia sivarai namo e kamonaiamu.”​—Luka 7:20-22.

Unu hereva ese Ioane na e hagoadaia. Una ese e hamomokania Mesia e perovetalaia herevadia na Iesu ese e haḡuḡuru. Ena be Iesu ese Ioane na dibura ruma amo se ruhaia, to Ioane na e diba ena hesiai ḡaukara na mai anina bada. Ena be ena noho dalana e idau to ia na dounu e moaleva.

Ioane heḡereḡerena, bema Iehova ena hesiai ḡaukara baita laloa badamu, baita moalemu bona baita haheaukamu. (Kol. 1:9-11) Una baita karaia totona, hanaihanai Baibul baita duahia bona baita laloa dobu, unu amo baita lalopararamu Dirava ena hesiai ḡaukara na asita hekwarahilaia kavamu. (1 Kor. 15:58) Sandra na eto: “Dina ta ta ai Baibul karoana ta na duahimu neganai, una ese e durugumu Iehova baina raka henia kahi totona. Bona una ese e durugumu sibogu egu namo basina lalo to Iehova ena ura baina laloa bada.” Ita danu tanobada heḡeḡemadai tadikakada ese e karamu hesiai ḡaukaradia baita lalomu neganai, una ese be durudamu Iehova ese e haḡuḡurumu ḡaudia baita lalo badamu. Sandra na ma eto: “Hua ta ta ena JW Broadcasting^® ese e durumaimu Iehova ena orea ida baia ḡaukara hebou bona emai hesiai ḡaukara baia moalelaia.”

Ioane Bapatiso na “Elia ena kara bona ena siahu heḡereḡerena” laḡani tamona lalonai ena haroro ḡaukara e karaia bona Elia heḡereḡerena ia “na taunimanima mo, ita bamoda.” (Luka 1:17; Iak. 5:17) Herevana eda mauri lalonai dahaka bae vara, to bema Ioane baita tohotohoamu, bona eda hesiai ḡaukara baita laloa badamu, Basileia iduruna ḡaukaradia ai dounu baita moalemu.