1. David ese Iehova ena manau karana be ede e herevalaia toma?

ITA NA baita gwau dibamu, Iehova na manau Diravana, ani? Oibe. Nega ta ai David eto: “Emu hahemauri kesina vada o henigu; emu kara manada-manada [“emu manau,” NWT] ese vada e imodaigu.” (2 Sam. 22:36; Sal. 18:35) Una negai, reana David ese e laloa dinana binai: Samuel na David tamana ena ruma ela, bena Israel ena king ai bainela tauna e horoa. Una negai memero 8 amo David be mero dokona; to, Iehova ese David e abia hidi King Saulo gabuna baine abia totona.​—1 Sam. 16:1, 10-13.

2. Ina stadi ai be dahaka baita herevalaimu?

² Reana David ese salamo e torea tauna ena hereva na e moalelaia, badina ia ese Iehova na ini e herevalaia toma: “E igo dobimu, guba bona tanobada e nenediamu. Ia ese ogoḡami taudia na ḡahu amo e abidia isimu, e dabumu taudia na kahu gabuna amo e veridia isimu; pavapava ida e hahelaidia heboumu.” (Sal. 113:6-8) Ina stadi ai baita itaiamu ḡauna ginigunana na, edena dalai Iehova ena haheitalai ese be durudamu baita manau totona. Una murinai, King Saulo, peroveta tauna Daniel, bona Iesu edia manau karana amo ḡau haida baita dibamu.

3. Iehova ese ita be ede e kara henida tomamu, bona una ese dahaka e hamomokaniamu?

³ Iehova na manau Diravana, badina ia ese ena taunimanima na e kara namo henidiamu, ena be idia na dia ḡoevadae. Danu, Ia ese iseda tomadiho dalana na e abia daemu bona ita na ia turana ai e halaodamu. (Sal. 25:14) Una baine vara totona, Iehova na Iesu ena boubou ḡauna amo eda dika e gwauatao. Momokani, Iehova ese ita na e bogada hisimu!

4. Iehova ese ita be dahaka e henida, bona dahaka dainai?

 ⁴ Iehova ena manau karana ma ta mani aita laloa. Iehova ese ita na robot ta heḡereḡerena bema karada diba​—anina na nega iboudiai iena ura karadia mo baitama kara. To lasi, Dirava ese ita na e karada, ia heida-idana bona ura kwalimu e henida danu. Ia na e uramu ita ogoḡami tauda ese ia baita hesiai henia badina be ia ta lalokau heniamu, bona dibada ia e kamonai heniamu taudia na namo e davarimu. (Deu. 10:12; Isa. 48:17, 18) Ita na ta moalemu badina Iehova na manau Diravana!

5. Edena dala ai Iehova ese ita e hadibadamu baita manau totona? (Rau 1 laulauna ba itaia.)

⁵ Iehova ese ita na e hadibadamu edena dalai manau karana baita hahedinaraia. Iehova na aonega Tauna hereadaena. To, ia ese ma haida edia lalohadai e kamonaimu danu. Heḡereḡere, Iesu ese Iehova e durua ḡau iboudiai e havaradia. (Her. 8:27-30; Kol. 1:15, 16) Bona ena be Iehova na Siahu Idoinai Diravana, to ia ese ena ḡaukara na ma haida e henidiamu danu. Heḡereḡere, ia ese Iesu e abia hidi Basileia ena King ai e halaoa, bona Dirava ese dagi haida na taunimanima 144,000 e henidia, unu amo Iesu ida bae lohia hebou. (Luka 12:32) Momokani, Iehova ese Iesu na e hadibaia ḡoevaḡoeva dainai ia na King bona Hahelaḡa Tauna Badana ai ela. (Heb. 5:8, 9) Danu, Iesu ida bae lohia taudia na Dirava ese e hadibadia ḡoevaḡoevamu, bona idia ese edia ḡaukara e karaiamu dalana na Dirava ese se kontroloa tohomu. Badina ia dibana vaitani idia ese iena ura na be karaiamu.​—Apok. 5:10.

6-7. Iehova ese ena maduna e hariamu karana ese dahaka e hadibadamu?

⁶ Ena be Dirava na tau ta ese baine durua na asi anina, to bema Ia ese ena dagi ḡaukaradia na ma haida e henidiamu, namona na  iena kara baita tohotohoa! Heḡereḡere, oi be ruma bese kwarana ta eiava kongrigeisin elda ta, a? Namona na Iehova ena haheitalai ba tohotohoa, heḡereḡere emu ḡaukara na ba haria, to ma haida o henidiamu ḡaukaradia na ma basio kontrolodia toho. Iehova e tohotohoamu taudia ese ḡaukara e haḡuḡurumu, bona treinin na ma haida e henidiamu. (Isa. 41:10) Dagi taudia be Iehova amo dahaka ḡau ma haida e dibamu?

⁷ Baibul ese e hahedinaraiamu, Iehova ese aneru edia lalohadai na e lalo badamu danu. (1 Han. 22:19-22) Tama o sina e, Iehova ena haheitalai be ede ba tohotohoa toma? Nega haida reana natumu ba nanadaidia idia e laloamu ḡaukarana ta be ede ba karaia toma. Bena idia ese lalohadai ta e gwauraiamu neganai, mani una lalohadai ba badinaia toho.

8. Edena dala ai Iehova ese Abraham bona Sara edia kara e haheaukalai?

⁸ Iehova ena haheauka karana ese e hahedinaraiamu ia na manau Diravana. Heḡereḡere, Iehova na e haheaukamu bona e hematauraimu, ena be ena disisin haida na ena hesiai taudia ma haida ese e henanadailaimu o e daradaralaimu. Nega ta ai Abraham na eto Dirava na asi ena maoro Sodom bona Gomora baine hadikaia neganai, Dirava ese Abraham ena lalohadai na e hakala henia. (Gen. 18:22-33) Bona Iehova ese Abraham adavana, Sara, ede e kara henia toma o laloa taomu? Dirava na e gwauhamata Sara na buruka lalona ai baine rogorogo neganai Sara na e kiri, to Dirava na se badu. (Gen. 18:10-14) Momokani, Ia ese Sara na e matauraia.

9. Tama sina bona elda taudia be Iehova ena haheitalai amo dahaka ḡau haida bae dibadia?

⁹ Tama sina bona elda taudia e, Iehova ena haheitalai amo oi be dahaka ḡau ba dibaia? Emu disisin haida na ma ta ese e henanadailaimu o e daradaralaimu neganai, oi be dahaka o karamu? Oi be maoromaoro idia o hamaorodiamu idia na kerere, a? Eiava oi na o uramu edia lalohadai ba lalopararalaia toho, a? Dagi taudia ese Iehova e tohotohoamu neganai, ruma bese bona kongrigeisin ai namo e varamu. Ina stadi ai tame itaia, edena dalai Iehova ena manau karana amo ḡau namodia tame dibadia. Mani aita itaia, Baibul ese e sivarailaia taudia haida edia manau karana amo dahaka baita dibamu.

10. Iehova ese ma haida edia haheitalai amo ita be ede e hadibada tomamu?

¹⁰ Iseda “Hahediba Tauna,” Iehova, na Baibul ai haheitalai namodia e ato, unu amo ita e hadibada namonamomu. (Isa. 30:20, 21) Baibul ese e sivarailaia taudia momo ese kara namodia​—manau karana danu​—e hahedinarai, bona unu kara baita lalodia dobumu karana amo ḡau haida baita dibamu. Danu, kara namodia asie hahedinarai taudia edia haheitalai amo ḡau haida baita dibamu.​—Sal. 37:37; 1 Kor. 10:11.

11. Saulo ena haheitalai dikana ese ita be dahaka e hadibadamu?

¹¹ Mani King Saulo enai e vara ḡauna aita laloa. Matamana ai, ia na manau merona. Ia na mai dibana edena maduna be baine huaia diba bona edena be basine huaia diba. (1 Sam. 9:21; 10:20-22) To gabeai, Saulo na hekokoroku tauna ai ela. Ia na King ai ela neganai, e hekokoroku bona kara kereredia e kara. Nega ta ai, ia na se haheauka, peroveta tauna Samuel na se naria. Ena be Saulo dibana Iehova ese ena taunimanima baine durudia diba, to Saulo ese boubou ḡauna e gabua, herevana ia na asi ena maoro una baine karaia. Una dainai,  Iehova na Saulo enai e badu bona ena king dagina e abia oho. (1 Sam. 13:8-14) Ina haheitalai ese ita e hadibadamu ḡauna binai: Hekokoroku karana baita dadaraia na aonega karana.

12. Daniel ese manau karana be ede e hahedinaraia toma?

¹² To, mani peroveta tauna Daniel ena haheitalai namona aita laloa. Daniel na ena mauri idoinai lalonai e manauva bona Iehova e hesiai heniava, bona nega iboudiai Iehova e noiava ia baine hakaua totona. Heḡereḡere, nega ta ai Iehova ese Daniel amo Nebukadnesara ena nihi anina e gwauraia hedinarai neganai, Daniel na sibona ladana se abia isi. To, ia na mai manauna ida Iehova mo sibona ladana e abia isi. (Dan. 2:26-28) Una ese ita be dahaka e hadibadamu? Bema tadikaka ese eda tok e ura heniamu, o haroro ḡaukara ai ekspiriens namodia ta davarimu neganai, namona na Iehova mo sibona ladana baita abia isi. Mai manauda ida baita hahedinaraia Iehova ena heduru dainai tok namodia ta henimu bona haroro ai ekspiriens namodia ta davarimu. (Fili. 4:13) Unu baita kara tomamu neganai, ita na Iesu ena haheitalai namona ta tohotohoamu danu. Edena dala ai?

13. Ioane 5:19, 30 heḡereḡerena, Iesu ena manau karana amo dahaka ta dibaiamu?

¹³ Ena be Iesu na Dirava Natuna ḡoevadaena, to ia na Iehova enai e tabekau. (Ioane 5:19, 30 ba duahi.) Ia na se ura Tamana ena dagi baine henaoa toho. Badina Ioane 6:38 ai Iesu eto: “Badina be guba amo vada name diho, dia lauegu ura ikarana, to e siaigu Diravana ena ura ikarana.” Iesu na Tamana henunai e nohova bona dibana edena maduna be baine huaia diba bona edena be basine huaia diba bona ia ese Tamana ena siahu na e matauraia badava.

14. Iakobo bona Ioane na sinadia ida Iesu e noia dagi baine henidia neganai, Iesu be ede e haere toma?

¹⁴ Nega ta ai Iakobo bona Ioane na sinadia ida Iesu dekena ela bena sinadia ese Iesu e noia ia natuna raruosi na dagi baine henidia, to Iesu na asi ena maoro idia e noia dagina baine henidia. Ia ese maoromaoro e hamaorodia, Tamana sibona mo mai ena maoro Basileia ai Iesu idibana ai bona laurina ai bae helai taudia baine abidia hidi. (Mat. 20:20-23) Iesu na e lalopararava dahaka baine karaia be maoro bona dahaka be  basine karaia. Ia na manau tauna. Iesu na Iehova ena ura ḡaudia mo e karava. (Ioa. 12:49) Iesu ena haheitalai namona be ede baita tohotohoa toma?

15-16. Baibul ena sisiba, 1 Korinto 4:6 ai, be ede baita badinaia toma?

¹⁵ Baibul ena sisiba, 1 Korinto 4:6 ai, baita badinaiamu neganai, ita ese Iesu ena manau karana baita tohotohoamu. Una siri etomu: “Buka Helaḡa ai e tore herevadia [“e tore ḡaudia sibodia mo,” NWT] ba badinadia.” Una dainai, haida ta durudiamu o ta sisiba henidiamu neganai, asita uramu baita doridia iseda lalohadai bae badinaia o asita uramu lalohadai kereredia baita gwaurai. Lasi, to iseda hereva lalodiai Baibul bona orea ena pablikeisin edia sisiba baita ḡaukaralai. Unu amo ta hahedinaraiamu ita na ta manaumu. Bona una dala amo ta hahedinaraiamu Siahu Idoinai Diravana ena sisiba iboudiai na mamaoro-mamaoro bona eda aonega e hereaia.​—Apok. 15:3, 4.

¹⁶ Iehova baita imodaia bona ma badi namodia momo daidiai baita manau na namo. Mani aita itaia ededia dalai manau taudia na bae moale diba bona ma haida ida bae ḡaukara hebou namonamo diba.

17. Dahaka dainai manau taudia na e moalemu?

¹⁷ Manau taudia na e moalemu. Dahaka dainai? Badina bema dibada ḡau haida na basita karadia dibamu to ma haida ese e durudamu neganai, ita na ta moalemu. Heḡereḡere, Iesu ese lepra taudia 10 edia gorere e haorea negana mani aita laloa. Idia 10 amo, tamona mo Iesu dekena ela, e tenkiu henia badina be ena gorere dikana​—tau ta ese basine haorea diba gorerena​—vada e ore. Oibe, una manau tauna na e abia heduruna dainai e moale bona Dirava e hanamoa.​—Luka 17:11-19.

18. Dahaka dainai manau taudia na ma haida ida e ḡaukara heboumu bona e hetura namonamomu? (Roma 12:10)

 ¹⁸ Manau taudia na ma haida ida e ḡaukara heboumu bona e hetura namonamomu. Dahaka dainai? Idia na e moalemu badina e itaiamu, ma haida edia kara danu namo herea bona ḡaukara idauidau na bae haḡuḡuru diba. Momokani, manau taudia na ma haida ediai e moalemu bona e tenkiu henidiamu badina be idia e abi ḡaukaradia na e haḡuḡurudia namonamomu.​—Roma 12:10 ba duahia.

19. Hekokoroku karana baita dadaraia badidia haida be dahaka?

¹⁹ To hekokoroku tauna ese ma haida baine hanamodia na auka, ia na e uramu ma haida ese ia bae hanamoa be namo. Ia ese ena ḡaukara na ma haida edia ḡaukara ida e haheḡereḡeremu, bona ia na e uramu haida baine halusidia. Ia ese ma haida basine ha treininidiamu, bona ena ḡaukara basine hariamu, badina e laloamu ia mo sibona ese ḡaukara na be karaia namonamomu, a haida ese na be karaia kereremu. Nega iboudiai e laloamu ia ese ma haida na e hereadia, bona e maumaumu bema haida ese ḡau ta e karaia namonamomu. (Gal. 5:26) Hekokoroku taudia na asi turadia. Bema hekokoroku karana na eda hekwakwanai badana ta, namona na ḡuriḡuri amo Iehova baita noia ‘laloda baine hamatamata,’ unu amo una kara dikana baita dadaraia vaitani.​—Roma 12:2.

20. Dahaka dainai baita manau na namo?

²⁰ Iehova ena haheitalai namona dainai ta moalemu. Ia na mai manauna ida ena hesiai taudia e durudiamu, bona ta uramu ia baita tohotohoa. Danu, ita na ta uramu Baibul ese e sivaralaia manau taudia edia haheitalai baita tohotoho. Nega iboudiai Iehova baita hanamoa be maoro. (Apok. 4:11) Bema unu baita kara tomamu, ita na Iehova turana ai baita laomu, badina ia ese manau taudia na e lalokau henidiamu.